བོད་ལྗོངས་ཆབ་མདོ་ས་ཁུལ་ལྷོ་རོང་རྫོང་ཤོ་པ་གྲོང་རྡལ་གྱི་སློབ་ཆུང་གི་ཚབ་ཁྲིད་དགེ་རྒན་འཕྲིན་ལས་རྒྱ་མཚོ་ལ་ཆུང་དུས་ནས་བྱིས་པའི་སྦྲིད་ནད་ཕོག་སྟེ་རྒྱུན་ལྡན་གྱི་མི་ལྟར་ཡར་ལངས་ནས་འགྲོ་མི་ཐུབ་པ་རེད། ཁོ་ཆུང་དུས་ནས་སློབ་སྦྱོང་ལ་འབད་བརྩོན་ཆེ་བས་ཕུལ་གྱི་སྦྱངས་འབྲས་ཐོབ་ནས་ལྷོ་རོང་རྫོང་སློབ་འབྲིང་དུ་རྒྱུགས་འཕྲོད། སློབ་འབྲིང་ལས་མཐར་ཕྱིན་རྗེས་འཕྲིན་ལས་རྒྱ་མཚོ་ལ་ལུས་པོའི་རྐྱེན་ལས་མུ་མཐུད་ནས་སློབ་གཉེར་བྱེད་རྒྱུ་མ་བྱུང་བས་ལྷོ་རོང་རྫོང་ཤོ་པ་གྲོང་རྡལ་གྱི་སློབ་ཆུང་དུ་ཚབ་ཁྲིད་དགེ་རྒན་གྱི་འགན་བཞེས་པ་དེ་ནི་ཁོའི་དགེ་རྒན་བྱེད་འདོད་ཀྱི་ཕུགས་བསམ་གྲུབ་པ་རེད། འཕྲིན་ལས་རྒྱ་མཚོས་ཚབ་ཁྲིད་དགེ་རྒན་གྱི་ལས་གནས་སུ་ལས་ཀ་བསྒྲུབས་ནས་ལོ34སོང་། རྐང་པ་མི་བདེ་བས་འཕྲིན་ལས་རྒྱ་མཚོས་གཞན་ལས་དཀའ་སྤྱད་འབད་བརྩོན་གྱིས་སློབ་ཁྲིད་བྱས་པ་རེད། ཁོས་ལོ་དུ་མའི་རིང་ལ་དཀའ་སྤྱད་འབད་བརྩོན་བྱས་པ་བརྒྱུད་སློབ་མ་དང་ཁྱིམ་བདག་གི་བརྩི་བཀུར་ཐོབ་ཅིང་། ཐེངས་མང་པོ་ཞིག་ལ་ཕུལ་བྱུང་གི་དགེ་རྒན་དང་ཕུལ་བྱུང་གི་འཛིན་བདག  ཕུལ་བྱུང་གི་གུང་ཁྲན་ཏང་ཡོན་གྱི་བྱ་དགའ་ཐོབ།  ཧྲ་ཧྲི་པི་ཡས་ང་ཚོ་འཇིག་རྟེན་ཐོག་མི་ལུས་ཐོབ་པ་ནི་ང་ཚོ་སྒྲོན་མེ་ཞིག་ཏུ་བརྩིས་ཡོད་པ་འདིས་རང་ཉིད་གསལ་དུ་གཏོང་བ་མ་ཡིན་ཞིང་འཛམ་གླིང་ལ་འཕྲོས་དགོས་པ་རེད་ཅེས་གསུངས་པ་ལྟར། འཕྲིན་ལས་རྒྱ་མཚོས་རང་ཉིད་ཀྱི་ཚད་ཡོད་པའི་མི་ཚེའི་ནང་སློབ་གསོའི་བྱ་གཞག་ཐོག་རང་ཉིད་ཀྱི་ཡོད་ཚད་ནས་ཡོད་ཚད་འབུལ་རྒྱུ་ཡིན་པ་རེད།