བོད་ཞི་བས་བཅིངས་འགྲོལ་བཏང་ནས་ལོ60འཁོར་བའི་གྲུབ་འབྲས་འགྲེམ་སྟོན་དེ“འོད་སྟོང་འབར་བའི་ལོ་རྒྱུས་ཀྱི་བརྒྱུད་རིམ”དང་། “ཀུན་གྱིས་ཡིད་སྨོན་བྱེད་པའི་རླབས་ཆེན་གྲུབ་འབྲས”། “ལེགས་བཅོས་ཆེན་པོ་བྱུང་བའི་མི་དམངས་ཀྱི་འཚོ་བ”། “བོད་ལྗོངས་ཀྱི་མ་འོངས་པ་སྔར་ལས་མཛེས་སྡུག་ལྡན”ཞེས་ཁག་བཞི་རུ་བགོས་ཡོད་ལ། འགྲེམ་སྟོན་ལས་པར་དང་རི་མོ། ལོ་རྒྱུས་ཡིག་ཚགས་དང་དངོས་རྫས་བཅས་ལ་བརྟེན་ནས་བོད་ཞི་བས་བཅིངས་འགྲོལ་གྱི་ལོ་རྒྱུས་ཀྱི་བརྒྱུད་རིམ་གལ་ཆེན་དང་རླབས་ཆེ་བའི་ལོ་རྒྱུས་ཀྱི་དོན་སྙིང་མཚོན་ཡོད་པ་དང་། བོད་ལྗོངས་རིགས་སོ་སོའི་མི་དམངས་ཀྱིས་ཀྲུང་གོ་གུང་ཁྲན་ཏང་གི་མགོ་ཁྲིད་འོག་དང་། སྤྱི་ཚོགས་རིང་ལུགས་ཀྱི་མེས་རྒྱལ་ཁྱིམ་གཞི་ཆེན་པོའི་ཁྲོད་དུ། མཉམ་དུ་མཐུན་སྒྲིལ་འབད་འཐབ་བྱས་པ་དང་མཉམ་དུ་དར་རྒྱས་གོང་འཕེལ་བྱུང་བའི་རྣམ་པ་བཟང་པོ་དང་འཕེལ་རྒྱས་ཀྱི་མདུན་ལྗོངས་མཚོན་ཡོད།

ཞི་ཅིན་ཕེན་སོགས་འགྲེམ་སྟོན་ཁང་དུ་ཕེབས་ནས། ཀྲུང་དབྱང་མི་དམངས་སྲིད་གཞུང་གི་འཐུས་མི་དང་སྔོན་ཆད་ཀྱི་བོད་ས་གནས་སྲིད་གཞུང་གི་འཐུས་མིས་གྲོས་མཐུན་དོན་ཚན་བཅུ་བདུན་པ་བཀོད་པའི་ལོ་རྒྱུས་མཚོན་པའི་འབག་བརྙན་དང་། བོད་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གྲུབ་འབྲས་མཚོན་པའི་རི་མོ། བོད་ལྗོངས་ཀྱི་ལོ་ལྔའི་འཆར་གཞི་བཅུ་གཉིས་པའི་འཕེལ་རྒྱས་ཀྱི་དམིགས་འབེན་མཚོན་པའི་རི་མོ་བཅས་ལ་གཟིགས། བོད་ཀྱི་ཟློས་གར་དང«གེ་སར་རྒྱལ་པོའི་སྒྲུང»གཉིས་མཉམ་འབྲེལ་རྒྱལ་ཚོགས་མིའི་རིགས་ཀྱི་གཟུགས་འདས་རིག་གནས་ཤུལ་བཞག་བརྩམས་ཆོས་ཀྱི་དཀར་ཆག་ཏུ་བཀོད་པ་མཐོང་རྗེས། ཁོང་གིས་བོད་ཀྱི་ཕུལ་བྱུང་སྲོལ་རྒྱུན་རིག་གནས་ལ་སྲུང་སྐྱོབ་ཐོབ་པ་དང་འཕེལ་རྒྱས་བྱུང་ཞིང་། ལྷག་པར་དུ་རིག་གནས་ཤུལ་བཞག་སྐོར་ཞིག་ལ་ཕན་ནུས་ལྡན་པའི་སྲུང་སྐྱོབ་ཐོབ་ནས། བོད་ཀྱི་རིག་གནས་འཛིན་སྐྱོང་སྤེལ་གསུམ་ཐད་བྱས་རྗེས་བཞག་པར་ཁས་ལེན་གང་ལེགས་མཛད།

ཟླ7པའི་ཚེས18ཉིན། «རླབས་ཆེ་བའི་ལོ་རྒྱུས་བརྒྱུད་རིམ་དང་འོད་སྟོང་འབར་བའི་གྲུབ་འབྲས»ཞེས་པའི་བོད་ཞི་བས་བཅིངས་འགྲོལ་བཏང་ནས་ལོ་དྲུག་ཅུ་འཁོར་བའི་གྲུབ་འབྲས་འགྲེམ་སྟོན་ལྷ་ས་ནས་བསྡུས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་ཁབ་ཀྱི་ཀྲུའུ་ཞི་གཞོན་པ། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་གཞོན་པ། ཀྲུང་དབྱང་འཐུས་ཚབ་ཚོགས་པའི་ཚོགས་གཙོ་ཞི་ཅིན་ཕེན་གྱིས་འགྲེམ་སྟོན་མགོ་རྩོམ་པའི་དར་ཚོན་བཅད་པར་མ་ཟད་འགྲེམ་སྟོན་ལ་གཟིགས།