ཟླ་བཞི་བའི་ཚེས་ཉེར་བཞིའི་ཉིན་གྱི་སྔ་དྲོར། ཆིན་ཧྭ་སློབ་གྲྭ་ཆེན་མོ་བཙུགས་ཏེ་ལོ་འཁོར་བརྒྱ་ལོན་པར་རྟེན་འབྲེལ་ཞུ་བའི་ཚོགས་ཆེན་པེ་ཅིན་མི་དམངས་ཚོགས་ཁང་ཆེན་མོའི་ནང་གཟབ་རྒྱས་ངང་ཚོགས། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་ཧུའུ་ཅིན་ཐའོ་ཡིས་ཚོགས་ཆེན་སྟེང་གསུང་བཤད་གལ་ཆེན་གནང་། ཁོང་གིས་འབྱོར་འབྲིང་སྤྱི་ཚོགས་ཕྱོགས་ཡོངས་ནས་འཛུགས་སྐྲུན་དང་། སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པ། ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་མངོན་འགྱུར་བྱེད་པ་བཅས་ལས། རང་རྒྱལ་གྱི་རྒྱ་ཆེའི་ཕུགས་བསམ་ལྡན་པའི་ན་གཞོན་རྣམས་ལ་མི་ཚེའི་རིན་ཐང་བསྐྲུན་པའི་སྟེགས་བུ་ཆེན་པོ་ཞིག་འདོན་སྤྲོད་བྱས་པས། རང་རྒྱལ་གྱི་ན་གཞོན་རྣམས་ཀྱིས་དེའི་ཐད་ལ་བྱས་རྗེས་ཆེན་པོ་འཇོག་དགོས་ལ། འཇོག་ཀྱང་སྲིད། ངེས་པར་དུ་རྒྱང་རིང་བསམ་པ་དང་། ཏན་ཏན་ཏིག་ཏིག་གིས་མཉམ་དུ་ང་ཚོའི་རླབས་ཆེ་བའི་མེས་རྒྱལ་དང་རླབས་ཆེན་མི་རིགས་ཀྱི་འབྱུང་འགྱུར་སྔར་ལས་མཛེས་ཤིག་ལྟ་ན་སྡུག་པར་བསྒྱུར་བར་ཡང་འབད་བསྐྱར་འབད་བྱེད་དགོས་ཞེས་ནན་གྱིས་གསུངས།
 ཏང་དང་རྒྱལ་ཁབ་ཀྱི་མགོ་ཁྲིད་པ་བུའུ་པང་གོ་དང་བུན་ཅ་པའོ། ཅ་ཆིན་ལིན། ཞི་ཅིན་ཕེན། ལིས་ཁི་ཆང་བཅས་ཚོགས་ཆེན་ལ་ཞུགས།
 ཆིན་ཧྭ་སློབ་གྲྭ་ཆེན་མོའི་ཏང་ཨུའི་ཧྲུའུ་ཅི་ཧུའུ་ཧི་ཕེན་གྱིས་རྟེན་འབྲེལ་ཚོགས་ཆེན་ལ་མགོ་འཛིན་བྱས་པ་དང་། ཆིན་ཧྭ་སློབ་གྲྭ་ཆེན་མོའི་སློབ་གཙོ་ཀུའུ་པེན་ལིན་གྱིས་གཏམ་བཤད་སྐབས་ཆིན་ཧྭ་སློབ་གྲྭ་ཆེན་མོའི་ལོ་བརྒྱའི་འཕེལ་རྒྱས་བརྒྱུད་རིམ་སྤྱི་སྡོམ་བྱས་པ་དང་། ཆིན་ཧྭ་སློབ་གྲྭ་ཆེན་མོའི་དགེ་རྒན་གྱི་འཐུས་མི་ལིས་ཡན་མའེ་དང་སློབ་མའི་འཐུས་མི་ཆིན་ཞིན་ཏ་གཉིས་ཀས་ཚོགས་ཆེན་སྟེང་གཏམ་བཤད།
 ཀྲུང་དབྱང་དང་རྒྱལ་ཁབ་ལས་ཁུངས་འབྲེལ་ཡོད་སྡེ་ཁག་གི་བློ་མཐུན་དང་། པེ་ཅིན་གྲོང་ཁྱེར་དང་ཞིང་ཆེན་དང་གྲོང་ཁྱེར་གཞན་དག་གི་འགན་འཁུར་བློ་མཐུན། རྒྱལ་ཁབ་ཕྱི་ནང་གི་མཁས་པ་གྲགས་ཅན་གྱི་འཐུས་མི་དང་། རྒྱལ་ཁབ་ཕྱི་ནང་གི་སློབ་གྲྭ་ཆེན་མོ་གྲགས་ཅན་གྱི་སློབ་གཙོའི་འཐུས་མི། ཆིན་ཧྭ་སློབ་གྲྭ་ཆེན་མོའི་འཕེལ་རྒྱས་ཐད་བྱས་རྗེས་ཆེན་པོ་བཞག་པའི་སྐུ་མགྲོན་གྱི་འཐུས་མི་སོགས་བསྡོམས་པས་མི་སྟོང་བརྒྱད་ལྷག་རྟེན་འབྲེལ་ཚོགས་ཆེན་ལ་ཞུགས།