ཞིན་ཧྭ་གསར་འགྱུར་ཁང་ལྷ་ས་ནས་ཟླ་བ8པའི་ཚེས24ཉིན་འབྱོར་བའི་གཏམ་གསར།རྒྱལ་ཡོངས་ཀྱིས་ཁ་གཏད་བོད་སྐྱོར་བྱས་ནས་ལོ20ཡི་ནང་།བོད་སྐྱོར་ལས་བྱེད་པ་དང་ཆེད་ལས་ལག་རྩལ་མི་སྣ6000ལ་ཉེ་བ་བོད་དུ་ཡོང་ནས་ལས་ཀ་བསྒྲུབས་ཤིང་།རིམ་བསགས་ཀྱིས་བརྩིས་ན་མ་དངུལ་སྒོར་ཁྱོན་བསྡོམས་དུང་ཕྱུར260བཏང་སྟེ།བོད་ལྗོངས་ཀྱི་དཔལ་འབྱོར་དང་སྤྱི་ཚོགས་མཆོང་བརྒལ་འཕེལ་རྒྱས་ཡོང་བར་སྐུལ་སྤེལ་བྱས།འདི་ནི་གསར་འགོད་པས་གོང་ཚེས་ཉིན་ཁ་གཏད་བོད་སྐྱོར་བྱས་ནས་ལོ20འཁོར་བའི་ནང་གྲུབ་འབྲས་ངོ་སྤྲོད་བྱེད་པའི་གསར་འགྱུར་ཁྱབ་བསྒྲགས་ཚོགས་འདུའི་ཐོག་ནས་ཤེས་རྟོགས་བྱུང་བའི་གནས་ཚུལ་རེད།
    ཚན་པ་བདུན་པའི་བོད་སྐྱོར་ལས་བྱེད་པའི་སྤྱི་ཁྱབ་སྣེ་ཁྲིད་པ་དང་རང་སྐྱོང་ལྗོངས་ཏང་ཨུའི་རྩ་འཛུགས་པུའུ་ཡི་པུའུ་ཀྲང་གཞོན་པ་ཝང་ཧྥེང་ཁྲའོ་ཡིས་ངོ་སྤྲོད་བྱས་དོན།ཁ་གཏད་བོད་སྐྱོར་བྱས་ནས་ལོ20ཡི་ནང་།ཀྲུང་དབྱང་གིས་སྔོན་རྗེས་སུ་ལས་སྒྲུབ་ཚན་པ7གྱི་ཕུལ་བྱུང་གི་འཇོན་ལྡན་ལས་བྱེད་པ6000ལ་ཉེ་བ་བོད་དུ་བཏང་ནས་ལས་ཀ་བསྒྲུབས་ཤིང་།བོད་སྐྱོར་འཇོན་ལྡན་ལས་བྱེད་པའི་གྲངས་ཀ་ཚན་པ་རེ་བཞིན་འཕར་སྣོན་བྱས་ཏེ་བོད་སྐྱོར་འཇོན་ལྡན་ལས་བྱེད་པའི་སྒྲིག་གཞི་མུ་མཐུད་ནས་ལེགས་འགྱུར་བྱུང་བ་རེད།
    ཝང་ཧྥེང་ཁྲའོ་ཡིས་བཤད་དོན།1994ལོ་ནས་ད་ལྟའི་བར།སྔོན་རྗེས་སུ་ཞིང་ཆེན་དང་གྲོང་ཁྱེར（བོད་སྐྱོར་ལས་འགན་ཁུར་མེད་པའི་སི་ཁྲོན་ཞིང་ཆེན་ཚུད་པ）18དང་ཀྲུང་དབྱང་གི་ཁེ་ལས17 ཀྲུང་དབྱང་པུའུ་ཨུ་བཅུ་ཕྲག་ཁ་ཤས་བཅས་ཀྱིས་གདམ་མངགས་བྱས་པའི་བོད་སྐྱོར་ལས་བྱེད་པས་བོད་ལྗོངས་ལ་ཁ་གཏད་རོགས་སྐྱོར་བྱས་ཤིང་།ད་ལྟར་བོད་ལྗོངས་ཀྱི་རྫོང་གྲོང་（ས་ཁུལ）དང་རང་སྐྱོང་ལྗོངས་ཀྱི་ཐད་གཏོགས་སྡེ་ཁག་ཕལ་ཆེར་ཁ་གཏད་རོགས་སྐྱོར་གྱི་གཞི་ཁྱོན་དུ་བཞག་པ་རེད།
    ཝང་ཧྥེང་ཁྲའོ་ཡིས་བཤད་དོན།ལོ20ཡི་རིང་།རྒྱ་ཆེ་བའི་བོད་སྐྱོར་འཇོན་ལྡན་ལས་བྱེད་པས་མུ་མཐུད་ནས་བོད་སྐྱོར་བྱེད་སྟངས་གསར་སྐྲུན་དང་བོད་སྐྱོར་ས་ཁོངས་རྒྱ་འབྱེད།བོད་སྐྱོར་ནང་དོན་ཕུན་སུམ་ཚོགས་པར་བཏང་ཞིང་།ཤུགས་ཆེན་པོས་དཔལ་འབྱོར་དང་ཚན་རྩལ།སློབ་གསོ།འཕྲོད་བསྟེན།ལས་ཞུགས་སོགས་ཀྱི་བོད་སྐྱོར་ལས་ཀ་སྤེལ་ཏེ།བོད་ལྗོངས་མཆོང་བརྒལ་འཕེལ་རྒྱས་དང་ཡུན་རིང་བདེ་འགོད་ཡོང་བར་སྒུལ་ཤུགས་ཆེན་པོ་བཏོན་པ་དང་ཚབ་བྱེད་ཐབས་མེད་པའི་ལོ་རྒྱུས་ཀྱི་ནུས་པ་བཏོན་པ་རེད། ངོ་སྤྲོད་བྱས་པར་གཞིགས་ན།ཁ་གཏད་བོད་སྐྱོར་ལས་ཀ་དེ1994ལོར་འགོ་བརྩམས་ཤིང་།ལོ་དེའི་ཟླ་བ7པར།ཀྲུང་དབྱང་གིས་བོད་ལྗོངས་ལས་ཀའི་བཞུགས་མོལ་ཚོགས་འདུ་ཐེངས་གསུམ་པ་འཚོགས་ཏེ་རྒྱལ་ཡོངས་ཀྱིས་བོད་ལྗོངས་ལ་རོགས་སྐྱོར་དང་ཞིང་ཆེནདང་（གྲོང་ཁྱེར）15ཡིས་བོད་ལྗོངས་ལ་ཁ་གཏད་རོགས་སྐྱོར་བྱེད་དགོས་པའི་སྲིད་ཇུས་བཏོན་པ་མ་ཚད།དེ་མཚུངས་ཀྱིས་བོད་ལྗོངས་ལ་ཁ་གཏད་རོགས་སྐྱོར་བྱེད་པའི་ས་ཁུལ་（གྲོང་ཁྱེར）7གྱི་ཆ་སྒྲིག་འབྲེལ་བ་གཏན་འཁེལ་བྱས་པ་རེད།ཀྲུང་དབྱང་གིས་བོད་ལྗོངས་ལས་ཀའི་བཞུགས་མོལ་ཚོགས་འདུ་ཐེངས་ལྔ་པའི་ཐོག་ཐོག་རོགས་སྐྱོར་ཞིང་ཆེན་དང་（གྲོང་ཁྱེར）གྱིས་ལོ་རེར་མ་དངུལ་དང་དངོས་རྫས་རོགས་སྐྱོར་བྱེད་ཚད་དེ་ཞིང་ཆེན་དང་（གྲོང་ཁྱེར）དེ་གའི་སྔ་ལོའི་ས་གནས་ཀྱི་སྤྱི་བཏང་སྔོན་རྩིས་ཡོང་སྒོའི་སྟོང་ཆ1བླངས་ནས་བཀོད་སྒྲིག་བྱེད་དགོས་པའི་གཏན་འབེབས་བྱས་པ་རེད།
    བོད་རང་སྐྱོང་ལྗོངས་འཕེལ་རྒྱས་དང་བཅོས་བསྒྱུར་ཨུ་ལྷན་གྱི་ཀྲུའུ་རེན་གཞོན་པ་མར་ཆིང་ལིན་གྱིས་བཤད་དོན།སྟོང་ཆ་གཅིག་གི་བོད་སྐྱོར་མ་དངུལ་བཀོད་སྒྲིག་བྱས་པ་དེས་རོགས་སྐྱོར་བྱེད་མཁན་ཞིང་ཆེན་དང་（གྲོང་ཁྱེར）སོ་སོའི་ནོར་ཤུགས་འཕར་སྣོན་བྱུང་བ་དང་མཉམ་དུ་མ་དངུལ་འཇོག་ཤུགས་ཀྱང་ཇེ་ཆེར་ཕྱིན་པ་ཁག་ཐེག་བྱེད་ཐུབ་པ་རེད།ལོ20ཡི་ནང་།བོད་སྐྱོར་ལས་ཁུངས་ཁག་གིས་ལག་བསྟར་བྱེད་པའི་བོད་སྐྱོར་རྣམ་གྲངས་ཁྱོན་བསྡོམས་7615ཡོད་ཅིང་།བོད་སྐྱོར་མ་དངུལ་སྒོར་དུང་ཕྱུར260བཏང་ཡོད།ཁྱད་པར་དུ་ཀྲུང་དབྱང་གིས་ཐེངས་ལྔ་པའི་བོད་ལྗོངས་ལས་ཀའི་བཞུགས་མོལ་ཚོགས་འདུ་འཚོགས་པ་ནས་བཟུང་།མ་དངུལ་གཏོང་ཤུགས་སྔར་ལས་ཆེ་རུ་བཏང་ནས་བོད་སྐྱོར་རྣམ་གྲངས2198དང་མ་དངུལ་ཧ་ལམ་སྒོར་དུང་ཕྱུར109དོན་འཁྱོལ་བྱས་པས་ལོ20ཡི་མ་དངུལ་ཡོད་ཚད་ཀྱི་བརྒྱ་ཆ40ལས་བརྒལ་བ་རེད།
    མར་ཆིང་ལིན་གྱིས་བཤད་དོན།བོད་སྐྱོར་གྱི་རྣམ་གྲངས་དང་མ་དངུལ་གྱིས་བོད་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཕན་འབྲས་ལྡན་པའི་སྐུལ་འདེད་བཏང་ཞིང་།གཞི་རིམ་གྱི་སྤྱི་སྤྱོད་ཞབས་ཞུའི་ནུས་པ་མཐོ་རུ་བཏང་བ་དང་།ཁྱད་ཆོས་ལྡན་པའི་དགེ་མཚན་ཐོན་ལས་གསར་སྦོལ་བྱེད་པར་སྐུལ་སྤེལ་བྱས།ཞིང་འབྲོག་མི་དམངས་ཀྱི་ཐོན་སྐྱེད་འཚོ་བའི་ཆ་རྐྱེན་ལེགས་བཅོས་བྱས་པས།དེ་ལས་དེ་མང་གི་ཞིང་འབྲོག་མང་ཚོགས་ཀྱི་ཡོང་འབབ་འབྱུང་ཁུངས་བརྟན་བརླིང་ཆགས་པ་རེད།