མཚོ་སྔོན་ཞིང་ཆེན་གནམ་གཤིས་ཚན་རིག་ཞིབ་འཇུག་ཁང་གིས་བསྒྲགས་པའི་འཁོར་སྐར་རྒྱུ་ཆ་ལྟར་ན། རྨ་འབྲི་རྫ་གསུམ་ཆུ་བོའི་འབྱུང་ཡུལ་དུ་ཕྱུགས་འཚོ་མཚམས་བཞག་ནས་རྩྭ་ས་སླར་གསོ་བྱས་པའི་བཟོ་སྐྲུན་ལག་བསྟར་བྱས་པ་ནས་བཟུང་། རྩྭ་སའི་སྤྱིའི་རྒྱ་ཁྱོན་མངོན་གསལ་གྱིས་ཇེ་ཆེར་སོང་སྟེ་རྩྭའི་ཐོན་ཚད་མུའུ་རེར་སྤྱི་རྒྱ་བཅུ་བཞི་དང་གྲངས་ཆུང་ལྔ་ཡིས་ཇེ་མང་དུ་སོང་།
  རྩྭ་སའི་རྒྱ་ཁྱོན་གྱི་འགྱུར་ལྡོག་གནས་ཚུལ་དང་བསྡུར་ན་ཉིས་སྟོང་གཉིས་ལོ་ནས་ཉིས་སྟོང་བཅུ་ལོའི་བར་དུ། རྨ་འབྲི་རྫ་གསུམ་ཆུ་བོའི་འབྱུང་ཡུལ་དུ་ཐོན་ཚད་དམའ་བའི་རྩྭ་སའི་རྒྱ་ཁྱོན་རིམ་བཞིན་ཇེ་ཉུང་དུ་སོང་བ་དང་། ཐོན་ཚད་འབྲིང་ཙམ་གྱི་རྩྭ་སའི་རྒྱ་ཁྱོན་ལ་འགྱུར་ལྡོག་ཆེན་པོ་མེད་ཀྱང་ཐོན་ཚད་མཐོ་བའི་རྩྭ་སའི་རྒྱ་ཁྱོན་དེ་མངོན་གསལ་གྱིས་ཇེ་ཆེར་འགྲོ་བཞིན་པའི་རྣམ་པ་བྱུང་ཡོད་པ་དང་། རྨ་འབྲི་རྫ་གསུམ་ཆུ་བོའི་འབྱུང་ཡུལ་ས་ཁུལ་དུ་ཕྱུགས་འཚོ་མཚམས་བཞག་ནས་རྩྭ་ས་སླར་གསོ་བྱེད་པའི་བཟོ་སྐྲུན་ལག་བསྟར་བྱས་པའི་སྔ་གཞུག་ལ་དབྱེ་ཞིབ་བྱས་ན། ཐོན་ཚད་དམའ་ལ་མུའུ་རེར་རྩྭ་སྤྱི་རྒྱ་བརྒྱ་ཡིན་པའི་རྩྭ་སའི་རྒྱ་ཁྱོན་མངོན་གསལ་གྱི་ཇེ་ཉུང་དུ་སོང་བ་དང་། དེའི་ནང་དུ་མུའུ་རེར་རྩྭ་སྤྱི་རྒྱ་ལྔ་བཅུ་ཡིན་པའི་ཐོན་ཚད་དམའ་བའི་རྩྭ་སའི་རྒྱ་ཁྱོན་སྤྱི་ལེ་གྲུ་བཞི་མ་སྟོང་དྲུག་དང་བདུན་བརྒྱ་གོ་གསུམ་ཇེ་ཉུང་དུ་སོང་ལ། ཕྱུགས་འཚོ་མཚམས་བཞག་ནས་རྩྭ་ས་སླར་གསོ་བྱེད་པའི་བཟོ་སྐྲུན་ལག་བསྟར་མ་བྱས་པའི་སྔོན་དང་བསྡུར་ན་རྒྱ་ཆའི་དྲུག་དང་གྲངས་ཆུང་གྱ་ལྔ་ཇེ་ཉུང་དུ་སོང་ནས། མུའུ་རེར་རྩྭ་སྤྱི་རྒྱ་བརྒྱ་སྐྱེས་ཐུབ་པའི་ཐོན་ཚད་འབྲིང་ཙམ་དང་ཐོན་ཚད་མཐོ་བའི་རྩྭ་སའི་རྒྱ་ཁྱོན་རིམ་བཞིན་ཇེ་ཆེར་འགྲོ་བཞིན་ཡོད་ཟེར།