ཞིན་ཧྭ་གསར་འགྱུར་ཁང་ཝུའུ་ལུའུ་མུའུ་ཆི་ནས་ཉེ་ཆར་འབྱོར་བའི་གཏམ་གསར།ད་ལོར་ཞིན་ཅང་གིས་སྒོར་དུང་ཕྱུར2.3བཏང་ནས་སྤྱི་ཚོགས་ཕན་བདེ་ཞབས་ཞུ་ལྟེ་གནས་དང་མི་རྒན་ཚོ་ཉིན་མོར་ལྟ་སྐྱོང་བྱེད་ས་ལྟེ་གནས་དང་རྒན་གསོ་ཕན་བདེ་ལས་ཁུངས་བཅས་ཚུད་པའི་མི་རྒན་གྱི་ཕན་བདེ་སྒྲིག་ཆས་ཚན་པ་ཞིག་བསྐྲུན་པར་བརྟེན།ཞིན་ཅང་གི་ཉིན་རེ་བཞིན་རྒན་གསོ་ཞབས་ཞུ་སྒྲིག་ཆས་མི་འདང་བའི་སྟོང་ཆ་བསྐོང་ཡོད་པ་རེད།
    ཤེས་རྟོགས་བྱུང་བར་གཞིགས་ན།2013ལོའི་ལོ་མཇུག་གི་བར་དུ་སླེབས་སྐབས།ཞིན་ཅང་གི་ལོ་ན60ཡན་ལ་སོན་པའི་མི་རྒན་ཁྲི253.18ལ་ཟིན་ཞིང་།མི་འབོར་ལོ་རྒན་ཅན་གྱི་བསྡུར་ཚད་དེ་བརྒྱ་ཆ11.18ལ་ཟིན་པ་མ་ཚད།ལོ་རེར་ཆ་སྙོམས་བརྒྱ་ཆ4.36གི་མྱུར་ཚད་ཐོག་ནས་འཕར་བཞིན་ཡོད་པ་རེད།དེ་འདྲའི་གནས་ཚུལ་ཚབས་ཆེ་ལ་དམིགས་ནས་ད་ལོར་ཞིན་ཅང་གིས་ཀྲུང་དབྱང་གི་གཅིག་བསྡུས་ཀྱི་ཕན་བདེ་རྒྱན་འཛིན་སྤྱི་ཕན་མ་དངུལ་སྒོར་དུང་ཕྱུར1.46སྤྱད་ནས་ཞིན་ཅང་གི་ལྗོངས་ཡོངས་སུ་སྤྱི་ཚོགས་ཕན་བདེ་ཞབས་ཞུ་ལྟེ་གནས་དང་མི་རྒན་ཉིན་མོར་ལྟ་སྐྱོང་ལྟེ་གནས61བསྐྲུན་པ་རེད།དེ་དང་མཉམ་དུ་རང་སྐྱོང་ལྗོངས་རིམ་པའི་ཕན་བདེ་སྤྱི་ཕན་མ་དངུལ་སྒོར་ཁྲི8780བཀོད་སྒྲིག་བྱས་ནས་ཞིན་ཅང་གི་ལྗོངས་ཡོངས་སུ་རྒན་གསོ་ཕན་བདེ་ལས་ཁུངས་བསྐྲུན་པ་རེད།