ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ས་གནས་དེ་གའི་དུས་ཚོད་ཟླ་7ཚེས་14ཉིན་རྒྱལ་ཁབ་ཀྱི་ཀྲུའུ་ཞི་ཞིས་ཅིན་ཕིང་གིས་པར་ཙིར་གྱི་ཕུའུ་ཐ་ལའེ་སར་ཨུ་རུ་སུའི་ཙུང་ཐུང་ཕུའུ་ཅིང་དང་མཇལ་འཛོམས་གནང་བ་རེད།

    ཞིས་ཅིན་ཕིང་གིས་ཁྱེད་ཀྱིས་ཟླ་བ་གཉིས་ཀྱི་གོང་དུ་ཀྲུང་གོར་འཚམས་འདྲི་གནང་བ་དང་འབྲེལ་ཨེ་ཤེ་ཡའི་རོགས་ལས་ཡིད་རྟོན་ཚོགས་འདུའི་ཧྲང་ཧའེ་དབུ་ཚོགས་ལ་ཞུགས་པ་དང་ང་ཚོས་ཀྲུང་ཨུའི་འབྲེལ་བ་སྔར་བས་འཕེལ་རྒྱས་གཏོང་བ་དང་ཁྱབ་ཁོངས་ཁག་གི་མཉམ་ལས་རྒྱ་ཆེར་གཏོང་རྒྱུའི་སྐོར་ལ་ལོ་རྒྱུས་རང་བཞིན་གྱི་ཐུན་མོང་གི་ལྟ་སྟངས་ཆགས་ནས་ཀྲུང་ཨུའི་ཕྱོགས་ཡོངས་ཀྱི་འཐབ་ཇུས་རོགས་ལས་རོགས་ཟླའི་འབྲེལ་བ་འཕེལ་རྒྱས་ཀྱི་དུས་མཚམས་གསར་པར་སླེབས་རྒྱུར་ཐུན་མོང་ཐོག་སྐུལ་འདེད་བཏང་ཡོད།ཟླ་བ་གཉིས་རིང་ཕྱོགས་གཉིས་ཀྱི་སྡེ་ཚན་ཁག་དང་ཁེ་ལས་དབར་འབྲེལ་བ་དང་གྲོས་མོལ་དམ་ཟབ་བྱས་པ་དང་མཉམ་ལས་རྣམ་གྲངས་ཚང་མ་མདུན་ཕྱོགས་སུ་སྐུལ་འདེད་བཏང་བར་བརྟེན་ངས་འདོད་བློ་ཁེངས་པོ་བྱེད་ཀྱི་ཡོད།ཀྲུང་ཨུའི་མཉམ་ལས་སྐོར་ང་ཚོས་ཁ་དན་ཚིག་གནས་དང་བྱ་སྤྱོད་སྤེལ་བར་ངེས་པར་དུ་འབྲས་བུ་ཐོབ་པ་བྱེད་དགོས།ཕྱོགས་གཉིས་པོས་ལྕགས་ཚ་ཐོག་ལ་རྡུང་བ་ལྟར་ང་ཚོའི་དབར་ཆགས་པའི་ཐུན་མོང་གི་ལྟ་སྟངས་ཇི་མ་ཇི་བཞིན་དོན་འཁྱོལ་ཡག་པོ་བྱ་རྒྱུའི་རེ་བ་ཡོད་ཅེས་གསུངས་པ་རེད།

    ཞིས་ཅིན་ཕིང་གིས་གོམ་སྟབས་རྗེས་མར་ཀྲུང་ཨུ་ཕྱོགས་གཉིས་ཀྱིས་ཕན་ཚུན་ཆབ་སྲིད་ཐད་རྒྱབ་སྐྱོར་བྱེད་ཤུགས་མུ་མཐུད་ཆེ་རུ་གཏོང་བ་དང་།མཉམ་ལས་ཀྱི་གཏིང་ཟབ་ཚད་དང་རྒྱ་ཆེ་ཚད་ཆེ་རུ་གཏོང་བ།འཐབ་ཇུས་རང་བཞིན་གྱི་རྣམ་གྲངས་ཆེན་པོ་མཉམ་འབྲེལ་ཞིབ་འཇུག་གསར་སྤེལ་དང་།མཉམ་འབྲེལ་ཁྱབ་གདལ་བེད་སྤྱོད།མཉམ་འབྲེལ་ཐོན་སྐྱེད་བཟོ་སྐྲུན་བཅས་དེ་བས་མང་བ་བྱེད་པ།དམག་དོན་དང་བདེ་འཇགས་སོགས་ཀྱི་ཁྱབ་ཁོངས་སུ་དངོས་སྒྲུབ་མཉམ་འབྲེལ་གྱི་བྱ་སྤྱོད་མང་ཙམ་སྤེལ་བ།སྤྱི་ཚོགས་དང་རིག་གནས་སྣང་ཚུལ་སྣ་ཚོགས་ཀྱི་ཁྱབ་ཁོངས་སུ་མཉམ་འབྲེལ་སློབ་གཉེར་དང་མཉམ་དུ་རིག་གནས་འཕེལ་རྒྱས་གཏོང་རྒྱུར་སྐུལ་ལྕག་དང་རྒྱབ་སྐྱོར་བྱེད་པ་བཅས་བྱེད་དགོས་ཞེས་གསུངས་པ་རེད།

    ཕུའུ་ཅིང་གིས་མིག་སྔར་ཨུ་ཀྲུང་དབར་གྱི་ཕྱོགས་ཡོངས་ཀྱི་འཐབ་ཇུས་རོགས་ལས་རོགས་ཟླའི་འབྲེལ་བ་འཕེལ་རྒྱས་ཧ་ཅང་ཡག་པོ་འགྲོ་བཞིན་ཡོད།ཀྲུའུ་ཞི་ཞིས་ཅིན་ཕིང་དང་རང་ཉིད་ངོ་མས་རྒྱལ་ཁབ་གཉིས་པོའི་མཉམ་ལས་ལ་སེམས་ཁུར་བྱེད་པ་དང་སྐུལ་འདེད་གཏོང་བ་དང་ངས་དེ་གོང་ཀྲུང་གོར་འཚམས་འདྲི་བྱེད་སྐབས་ཨུ་ཀྲུང་ཕྱོགས་གཉིས་དབར་དངོས་སྒྲུབ་ཀྱི་གྲོས་མཐུན་གལ་ཆེན་རབ་དང་རིམ་པ་བཞག་པ་ཡིན།ཨུ་རུ་སུ་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་འབད་བརྩོན་བྱས་ཏེ་ཕྱོགས་ཡོངས་ནས་དུས་བཀག་ལྟར་དོན་འཁྱོལ་ཡོང་བ་བྱེད་པ་དང་འབྲེལ་སླད་ཕྱིན་གྱི་མཉམ་ལས་འཆར་འགོད་ཡག་པོ་བྱས་ཏེ་ཕྱོགས་གཉིས་དབར་གྱི་ཚོང་དོན་དང་མ་འཇོག་གི་གཞི་ཁྱོན་ཆེ་རུ་གཏོང་བ་དང་།ནུས་རྒྱུ་དང་།ཚན་རྩལ།མཁའ་འགྲུལ་དང་འཇིག་རྟེན་འཕུར་སྐྱོད།འགྲིམ་འགྲུལ་གྱི་རྨང་གཞིའི་སྒྲིག་བཀོད།རང་དངུལ་ཕན་ཚུན་བརྗེ་རེས་སོགས་ཁྱབ་ཁོངས་ཀྱི་མཉམ་ལས་ལ་གཙོ་གནད་དུ་སྐུལ་འདེད་གཏོང་བ།ཨུ་ཀྲུང་དབར་ནུབ་རྒྱུད་རང་བྱུང་སོལ་རླངས་མདོང་ལམ་གྱི་གྲོས་མཐུན་གྱི་གྲོས་མོལ་སྔ་ཙམ་འགོ་འཛུགས་པ།ཧྲང་ཧའེ་མཉམ་ལས་རྩ་འཛུགས་དང་རྒྱལ་ཁབ་ཉི་ཤུ་ཚོགས་པ་སོགས་ཀྱི་སྒྲོམ་གཞིའི་ནང་མཐུན་སྦྱོར་དང་གཞོགས་འདེགས་བྱ་རྒྱུར་མུ་མཐུད་ཤུགས་སྣོན་རྒྱག་པ།རྒྱལ་སྤྱིའི་དངུལ་ལོར་ཐེབས་རྩ་རྩ་འཛུགས་ཀྱི་ཐོབ་སྐལ་སྒྱུར་བཅོས་ལ་ལག་གདང་སྦྲེལ་ནས་སྐུལ་འདེད་གཏོང་བ།དྲ་བའི་བདེ་འཇགས་ལ་ཐུན་མོང་ཐོག་སྲུང་སྐྱོང་བྱེད་པ་བཅས་བྱེད་འདོད་ཡོད་ཅེས་གསུངས་པ་རེད།