ཀྲུང་གོ་བོད་ཀྱི་དྲ་བའི་འཕྲིན། ཉེ་དུས་རྒྱལ་ཡོངས་ཀྱི་དཔེ་དེབ་དངོས་མང་སྟོན་ཚོགས་སྐབས་ཉེར་ལྔ་པ་ཧྲན་ཤིས་ཞིང་ཆེན་ཐའེ་ཡོན་གྲོང་ཁྱེར་དུ་གཉེར་བ་དང་།རང་ལྗོངས་ཀྱི་གསར་འགྱུར་དཔེ་སྐྲུན་ཚན་པ10ཙམ་གྱིས་ཕུལ་བྱུང་དེབ་རྩེ་གྲ་སྟོང་ཕྲག་སྟོན་ཚོགས་ལ་བཏོན་ཡོད་པ་རེད།སྐབས་འདིའི་དཔེ་དེབ་དངོས་མང་སྟོན་ཚོགས་ནི་རྒྱལ་ཁབ་གསར་འགྱུར་དཔེ་སྐྲུན་རླུང་འཕྲིན་གློག་བརྙན་བརྙན་འཕྲིན་སྤྱི་ཁྱབ་ཅུས་དང་ཧྲན་ཤིས་ཞིང་ཆེན་མི་དམངས་སྲིད་གཞུང་གིས་ཐུན་མོང་ཐོག་གཉེར་བ་དང“དཔེ་དེབ་ཀྱི་དྲི་ཞིམ་ཕྱོགས་བཞིར་འཐུལ”ཞེས་པ་བརྗོད་དོན་གཙོ་བོར་བྱས་ཤིང་།རྒྱལ་ཡོངས་ས་གནས་ཁག་གི་དཔེ་སྐྲུན་ཚན་པ1000ཙམ་སྟོན་ཚོགས་ལ་ཞུགས་ནས་དེབ་སྣ་ཁ་ཁྲི25.6འགྲེམས་སྟོན་བྱས་པའི་ནང་དེབ་གསར་པ་ཁྲི15.6ཡོད་པ་རེད།བོད་རང་སྐྱོང་ལྗོངས་གསར་འགྱུར་དཔེ་སྐྲུན་རླུང་འཕྲིན་གློག་བརྙན་བརྙན་འཕྲིན་ཅུས་ཀྱིས་ལྗོངས་ཡོངས་ཀྱི་དཔེ་སྐྲུན་དང་།འགྲེམས་སྤེལ།པར་རྒྱག་བཅས་ཀྱི་སྡེ་ཚན་དང་ཚན་པ་བཅུ་ལྷག་ཙམ་སྒྲིག་འཛུགས་བྱས་ཏེ་སྟོན་ཚོགས་ལ་ཞུགས་ཤིང་།འགྲེམས་སྟོན་བྱས་པའི་དཔེ་དེབ་དང་།བརྙན་ཕབ།གློག་རྡུལ་བཅས་ཀྱི་དཔེ་སྐྲུན་ཐོན་རྫས1000ཙམ་ཡོད་པ་དང་དཔེ་སྐྲུན་དངོས་པོའི་བརྗོད་དོན་མངོན་གསལ་དང་།ནང་དོན་ཁ་གསལ།ནང་དོན་སྣ་མང་།དཔེ་སྐྲུན་མཛེས་པ།སྤུས་ཚད་ལེགས་པ་བཅས་རང་སྐྱོང་ལྗོངས་དབུ་བརྙེས་ནས་ལོ50འཁོར་ཚུན་གྱི་རང་ལྗོངས་ཀྱི་དཔེ་སྐྲུན་ལས་རིགས་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་པའི་རྣམ་པ་བཟང་པོ་གང་ལེགས་མངོན་ཡོད།ད་ཐེངས་ཀྱི་སྟོན་ཚོགས་ལ་རང་ལྗོངས་ཀྱི་དེབ་བྲིན་ཚོང་དང་མངགས་ཉོ་བྱེད་ཚད་ཁྲི250ཟིན་ནས་ལོ་རྒྱུས་ཀྱི་ཟིན་ཐོ་མཐོ་ཤོས་བཏོད་པ་ལས།ཆུ་ཚད་མཐོ་བ་དང་།ཁྱད་ཆོས་ལྡན་པ།ཕན་འབྲས་དངོས་ཐོན་པ་བཅས་ཀྱི་སྒོ་ནས་སྟོན་ཚོགས་ལ་ཞུགས་པའི་དམིགས་ཡུལ་གང་ལེགས་མངོན་པའི་ཐོགབོད་ཀྱིས་ཕྱོགས་ཡོངས་ནས“བོད་ཀྱི་དཔེ་དེབ་ཁང་གི་དྲི་ཞིམ་འཐུལ་བའི”དམངས་ཡོངས་ཀྱི་དཔེ་དེབ་ལྟ་ཀློག་གི་བྱེད་སྒོ་སྤེལ་རྒྱུར་སྐུལ་འདེད་ཀྱི་ནུས་པ་ཐོན་རྒྱུ་རེད།  །