《འབྲོང》རྩོམ་རིག་ལོ་ཙཱའི་དཔེ་ཚོགས་བཞི་བ་པར་སྐྲུན་འགྲེམ་སྤེལ་བྱས།

     རྒྱུས་ལོན་པ་ལྟར་ན། ཉེ་སྔོན། 《འབྲོང》རྩོམ་རིག་ལོ་ཙཱའི་དཔེ་ཚོགས་བཞི་བ་དེ་རྩོམ་པ་པོའི་དཔེ་སྐྲུན་ཁང་གིས་པར་སྐྲུན་འགྲེམ་སྤེལ་བྱས་ཤིང་། དཔེ་ཚོགས་བཞི་བའི་རྩོམ་པ་པོ་ཡོངས་སུ་བོད་རིགས་བུད་མེད་སྙན་ངག་པ་ཡིན།
      《འབྲོང》ཞེས་རྩོམ་རིག་ལོ་ཙཱའི་དཔེ་ཚོགས་ནི་མཚོ་སྔོན་ཞིང་ཆེན་རྩོམ་རིག་གསར་རྩོམ་འཕེལ་རྒྱས་འཆར་འགོད་རྣམ་གྲངས་ཁྲོད་ཀྱི་གཅིག་ཡིན་པ་དང་། མཚོ་སྔོན་ཞིང་ཨུ་དང་ཀྲུང་གོའི་རྩོམ་པ་པོ་མཐུན་ཚོགས་སོགས་གོང་རིམ་སྡེ་ཁག་གི་རྒྱབ་སྐྱོར་ཆེན་པོའི་འོག མཚོ་སྔོན་ཞིང་ཆེན་གྱི་མི་རིགས་རྩོམ་རིག་གསར་རྩོམ་དང་ལོ་ཙཱའི་ཐད་སྐུལ་འདེད་དང་། གྲངས་ཉུང་མི་རིགས་ཀྱི་རྩོམ་རིག་ལ་སྐུལ་འདེད། རྩོམ་པ་པོ་ཁྱབ་གདལ་དང་འབྲེལ་འདྲིས་ཐད་ནུས་པ་གལ་ཆེན་ཐོན་ཡོད་ཅིང་། རྒྱ་ཆེ་བའི་བོད་སྐད་རྩོམ་པ་པོ་དང་ཀློག་པ་པོའི་ཁྲོད་ཤུགས་རྐྱེན་ལེགས་པོ་ཐོན།
      ཐེངས་འདིར་པར་བསྐྲུན་བྱས་པའི་བརྩམས་ཆོས་བཞི་དང་ལོ་ཙཱ་བ་སོ་སོ་ནི《བདེ་སྐྱིད་སྒྲོལ་མའི་སྙན་ངག་གཅེས་བསྡུས》(བོད་ཡིག་བརྩམས་ཆོས་ཀྱི་རྩོམ་པ་པོ་བདེ་སྐྱིད་སྒྲོལ་མ། ལོ་ཙཱ་བ་བདེ་སྐྱིད་སྒྲོལ་མ)དང་། 《དཔའ་མོའི་སྙན་ངག་གཅེས་བསྡུས》(བོད་ཡིག་བརྩམས་ཆོས་ཀྱི་རྩོམ་པ་པོ་དཔའ་མོ། ལོ་ཙཱ་བ་ལུང་རིན་ཆེན)། 《པདྨ་མཚོའི་སྙན་ངག་གཅེས་བསྡུས》(བོད་ཡིག་བརྩམས་ཆོས་ཀྱི་རྩོམ་པ་པོ་པདྨ་མཚོ། ལོ་ཙཱ་བ་ཨ་སྡོང་དཔའ་རྡོ་ཐར)། 《མེ་ཏོག་སྐྱིད་ཀྱི་སྙན་ངག་གཅེས་བསྡུས》(བོད་ཡིག་བརྩམས་ཆོས་ཀྱི་རྩོམ་པ་པོ་མེ་ཏོག་སྐྱིད། ལོ་ཙཱ་བ་འཇིགས་མེད་རྡོ་རྗེ)བཅས་ཡིན།