ཀྲུང་གོ་བོད་ཀྱི་དྲ་བའི་འཕྲིན། ཉེ་བའི་ལོའི་ནང་།ཀྲུང་དབྱང་དང་རང་སྐྱོང་ལྗོངས་ཀྱིས་རང་ལྗོངས་ཀྱི་ཞིང་འབྲོག་ཁུལ་གྱི་འཐུང་ཆུའི་བདེ་འཇགས་ལས་གཞིར་ཐོག་མཐའ་བར་གསུམ་དུ་མཐོང་ཆེན་པོ་གནང་སྟེ།སྤྱི་ལོ2001ལོ་ནས་གྲོང་གསེབ་ཀྱི་མི་ཕྱུགས་ཀྱི་འཐུང་ཆུའི་དཀའ་ངལ་སེལ་བའི་ལས་གཞི་དང་།ལོ་ལྔ་ཚན་བཅུ་གཅིག་པའི་རིང་གྲོང་གསེབ་ཀྱི་འཐུང་ཆུའི་བདེ་འཇགས་ལས་གཞི།སྤྱི་ལོ2010ལོ་ནས་དུད་ཚང་ཀུན་ཁྱབ་ཀྱི་ལས་གཞི་བཅས་ལག་བསྟར་བྱས་པས།རང་ལྗོངས་ཀྱི་ཞིང་འབྲོག་མང་ཚོགས་ཀྱི་འཐུང་ཆུའི་བདེ་འཇགས་དཀའ་གནད་གཞི་རྩའི་ཆ་ནས་སེལ་ཐུབ་པ་བྱུང་བ་རེད།ཉེ་བའི་ལོའི་ནང་།ཀྲུང་དབྱང་དང་ཆུ་བེད་པུས་རང་ལྗོངས་ཀྱི་ཆུ་བེད་ཐད་མ་འཇོག་བྱེད་ཚད་ལོ་རེ་བཞིན་མང་དུ་བཏང་ནས།སྤྱི་ལོ2013ལོར་མ་འཇོག་བྱེད་ཚད་སྒོར་དུང་ཕྱུར45ཟིན་པ་དང་།ན་ནིང་ཐེངས་དང་པོ་སྒོར་དུང་ཕྱུར50ཡན་ཟིན་པ་རེད།གསར་འགོད་པས་ཉེ་དུས་ནག་ཆུ་ས་ཁུལ་དང་ཉིང་ཁྲི་གྲོང་ཁྱེར།གཞིས་རྩེ་གྲོང་ཁྱེར་སོགས་སུ་བཅར་འདྲི་ཞུ་སྐབས་ཤེས་རྟོགས་བྱུར་བར་གཞིགས་ན།ཞིང་འབྲོག་ཁུལ་གྱི་འཐུང་ཆུའི་བདེ་འཇགས་ལས་གཞི་ལག་བསྟར་བྱས་ཚུན།ཆུ་འགོ་མི་ཕྱུགས་མཉམ་སྤྱོད་ཀྱི་སྔོན་མའི་གོམ་གཤིས་ལ་འགྱུར་ལྡོག་བྱུང་ནས་ནད་གཞི་ཐོན་ཚད་ཉུང་དུ་ཕྱིན་ཡོད་ལ་ངལ་རྩོལ་ནུས་ཤུགས་གྲོན་ཆུང་ཐུབ་ནས།ཞིང་འབྲོག་ཁུལ་གྱི་དཔལ་འབྱོར་སྤྱི་ཚོགས་གོང་འཕེལ་ལ་སྐུལ་མ་ཐེབས་པ་དང་།ཞིང་ཁུལ་དང་འབྲོག་ཁུལ་གྱི་འཐུང་ཆུའི་དཀའ་ངལ་གཞི་རྩའི་ཆ་ནས་སེལ་ཐུབ་པ་བྱུང་ཡོད།རང་སྐྱོང་ལྗོངས་ཆུ་བེད་ཐིང་གི་ཐིང་ཀྲང་ཟླ་བ་བཀྲ་ཤིས་ཀྱིས།དེང་སྐབས་བོད་ལ་འཐུང་ཆུའི་བདེ་འཇགས་ལས་གཞི17500ཙམ་སྐྲུན་ཟིན་ནས།ཞིང་འབྲོག་མང་ཚོགས་དང་སློབ་གྲྭའི་དགེ་སློབ་ཁྲི་ཚོ200ལྷག་ཙམ་དང་།གྲྭ་བཙུན40000ཙམ་གྱི་འཐུང་ཆུའི་གནད་དོན་ཐག་གཅོད་ཐུབ་ཡོད་པས།ལོ་ལྔ་བཅུའི་གོང་དང་བསྡུར་ན་ཞིང་འབྲོག་མང་ཚོགས་ཀྱི་འཐུང་ཆུའི་ཆ་རྐྱེན་ལེགས་བཅོས་ཆེན་པོ་བྱུང་ཡོད་ཅེས་གསུངས་པ་རེད།ཉིང་ཁྲི་གྲོང་ཁྱེར་དུ་ཞ་ཚན་ཆེ་བ་དང་ཆར་ཆུ་བབས་ཚད་ཅུང་མང་པོ་ཡོད་ཀྱང་ལོ་ཁ་ཤས་གོང་རི་ཁུལ་གྱི་རྒྱུག་ཆུ་འཐུང་གི་ཡོད།སྨན་གླིང་རྫོང་བམ་གྲོང་གྲོང་ཚོའི་གྲོང་མི་ཨོ་རྒྱན་ཚེ་རིང་གིས།ཆུང་དུས་ནས་རི་ཁུལ་གྱི་རྒྱུག་ཆུ་འཐུང་གི་ཡོད་ཆར་པ་བབས་རིམ་བཞིན་ཆུ་ཉོག་འགྲོ་གི་འདུགརྗེས་སུ་སྲིད་གཞུང་གིས་ང་ཚོར་ཆུ་རྫིང་སྐྲུན་ཏེ་རི་ཆུ་དྭངས་སིངས་འབྱེད་རྗེས་ཐེམ་དུད་ཚང་མར་འཐུང་ཆུ་འདྲེན་བྱུང་ཞེས་བཤད་པ་རེད།བམ་གྲོང་གྲོང་ཚོའི་འཐུང་ཆུའི་བདེ་འཇགས་ལས་གཞི་སྤྱི་ལོ2012ལོར་སྐྲུན་པས།གྲོང་ཚོ་དེ་ཡོངས་ཀྱི་དུད་ཚང72ཀྱི་གྲོང་མི་དང་ཕྱུགས་རིགས་མགོ་གྲངས1300ལྷག་ལ་ཆུ་གཙང་མ་འཐུང་རྒྱུ་བྱུང་པ་རེད།རང་འབབ་ཆུ་འདྲེན་ཕུད་རང་ལྗོངས་ཀྱི་ས་ཆ་ཁག་གཅིག་གིས་གནས་ཚུལ་ལ་གཞིགས་ནས་ཁྲོན་པ་སྣ་ཚོགས་འདྲུས་ཏེ་ཆུ་མཁོ་འདོན་བྱེད་ཀྱི་ཡོད།གཞིས་རྩེ་གྲོང་ཁྱེར་རྒྱལ་རྩེ་རྫོང་སྤེན་གསར་གྲོང་ཚོར་གཏིང་ཚད་སྤྱི་ཁྲེ85ཡོད་པའི་འཕྲུལ་ཁྲོན་འདྲུས་ནས་གྲོང་མི་ཡོངས་ལ་ཆུ་མཁོ་འདོན་བྱེད་ཀྱི་ཡོད།གསར་འགོད་པས་ཤེས་རྟོགས་བྱས་པར་གཞིགས་ན།སྤྱི་ལོ2020ལོར་སླེབས་དུས་རང་ལྗོངས་ཀྱིས་ཞིང་འབྲོག་ཁུལ་དུ་གཅིག་བསྡུས་རྣམ་པའི་ཆུ་མཁོ་འདོན་གྱི་ཕན་པ་ཐོབ་པའི་མི་འབོར་གྱི་བསྡུར་ཚད་མཐོ་རུ་བཏང་སྟེ།རྫོང་གྲོང37གྱི་ཆུ་འགོའི་འགན་སྲུང་གནད་དོན་ཐག་གཅོད་བྱེད་རྩིས་ཡོད་པ་དང་།ལྗོངས་ཡོངས་ཀྱི་ཆུ་མཁོ་འདོན་བྱེད་ཚད་སྤྱི་ཁྲེ་རྒྱ་དཔངས་གྲུ་བཞི་མ་དུང་ཕྱུར5གསར་སྣོན་བྱེད་རྒྱུ་རེད།  །