ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཁབ་འབྲུབ་འགོག་ཐན་འགོག་སྤྱི་ཁྱབ་བཀོད་འདོམས་པུའི་གཞུང་ལས་ཁང་དང་འཕྲལ་སྡོམ་དོ་དམ་པུས་འབྲུབ་འགོག་གི་ཆེད་དོན་བརྙན་ལམ་མཉམ་དུ་གྲོས་མོལ་བཀོད་གཏོང་བྱས་ཏེ་ཀྲུང་གོ་གནམ་གཤིས་ཅུའུ་དང་། ཆུ་བེད་པུའུ། རང་བྱུང་ཐོན་ཁུངས་པུའུ་བཅས་ཀྱི་མཉམ་འབྲེལ་ལྷན་ཚོགས་དང་ཆར་པ་བབས་ཚུལ་དང་། ཆུ་རྒྱས་ཚུལ། གནོད་སྐྱོན་གནས་ཚུལ་བཅས་ལ་གྲོས་བསྡུར་དང་བརྡར་ཤ་བཅད་པ་བརྒྱུད། བརྙན་ལམ་ནས་ཐེན་ཅིན་དང་། ཧའོ་པེ། ཅི་ལིན། ཧེ་ལུང་ཅང་སོགས་ཞིང་ཆེན་འབྲུབ་འགོག་གེགས་སེལ་ལས་དོན་གཞུང་ལས་ཁང་དང་གཙོ་གནད་ས་ཁུལ་གྱི་འབྲུབ་འགོག་གེགས་སེལ་ལས་དོན་ལ་བཀོད་སྒྲིག་བྱས།

       མིག་སྔར་ཧའེ་ཧོ་གཙང་པོའི་འབབ་རྒྱུད་ཀྱི་ཆུ་ལོག་ཐེན་ཅིན་དུ་རྒྱུག་བཞིན་ཡོད་པ་དང་། སུང་ཧྭ་ཅང་གཙང་པོ་དང་ནེན་ཅང་གཙང་པོའི་གཞུང་ཆུའི་ཆུ་ལོག་མུ་མཐུད་ཆེ་རུ་འགྲོ་བཞིན་ཡོད་པས། ཆུ་བོའི་དུམ་བུ་ཁག་གཅིག་ཉེན་རྟགས་ལས་བརྒལ་ཞིང་། གཙང་པོ་དང་ཆུ་བོའི་ཆུ་རགས་དང་ཆུ་ལོག་གསོག་ཁུལ་གྱི་ཆུ་རགས་ལ་སྐོར་ཞིབ་དང་འགོག་སྲུང་བྱེད་པའི་གནོན་ཤུགས་ཇེ་ཆེར་སོང་ཡོད། ད་ལོའི་རྒྱ་མཚོའི་རླུང་འཚུབ“ཁ་ནུའུ”ཨང6པ་ལས་བྱང་ཤར་ས་ཁུལ་ལ་ཤུགས་རྐྱེན་ཐེབས་སྲིད་པས་འབྲུབ་འགོག་གེགས་སེལ་གྱི་དུས་བབ་ཡག་པོ་མེད་ལ་ལས་འགན་ཡང་ལྕི་པོ་ཡོད། 

       གྲོས་མོལ་བྱས་ནས་བསྟན་དོན། ཧའེ་ཧོ་གཙང་པོ་རྒྱུག་ཁུལ་གྱིས་ཆུ་ལོག་རིམ་འགྱུར་དང་ཆུ་ལོག་གསོག་རིང་གི་སྐོར་ཞིབ་འགོག་སྲུང་ལ་ཚད་མཐོའི་མཐོང་ཆེན་བྱས་ནས་གཙོ་གནད་ཁུལ་ལ་དམ་པོར་དམིགས་པ་དང་། ཚན་རིག་དང་མཐུན་པའི་སྒོ་ནས་ཆུ་ལོག་གསོག་ཁུལ་གྱི་འཁྱིལ་ཆུ་ཕྱིར་འབུད་ལ་གཅིག་གྱུར་འཆར་འགོད་ཀྱིས་སྐུལ་འདེད་གཏོང་བ། གནོད་འཚེ་ཕོག་པའི་མང་ཚོགས་བཀོད་སྒྲིག་དང་གཞི་རྩའི་འཚོ་བའི་འགན་སྲུང་ལེགས་པར་སྒྲུབ་དགོས། བྱང་ཤར་ས་ཁུལ་གྱིས་གཙོ་གནད་ཐོག་མཐིལ་རྟོགས་གྲལ་བཤེར་དང་ནུས་ཤུགས་ཡོད་རྒུས་འབྲེལ་ཆད་མི་སྣ་འཚོལ་སྐྱོབ་བྱ་རྒྱུ་སྒྲིག་འཛུགས་བྱས་ཏེ་མི་སྣ་གནས་སྤོ་བཀོད་སྒྲིག་སོགས་ཀྱི་ལས་དོན་གཏིང་ཟབ་ཞིབ་ཚགས་ངང་སྒྲུབ་དགོས། ཆར་ཆུའི་གནས་ཚུལ་གྱི་འཕེལ་ཕྱོགས་ལ་དོ་སྣང་ཆེན་པོ་བྱ་དགོས། འཁྱིལ་ཆུ་ཕྱིར་འབུད་ཀྱི་ལས་དོན་སྤེལ་ཤུགས་སྔར་བས་ཆེ་རུ་བཏང་ནས་ཞིང་ལས་ཀྱི་གྱོང་གུན་ཉུང་དུ་གཏོང་གང་ཐུབ་བྱེད་དགོས་ཤིང་། ཆུས་བསྣུབས་པའི་ལས་གྲྭ་མྱུར་བཟོ་བྱེད་པ་དང་ས་གཤིས་གནོད་འཚེའི་ཁུལ་གྱི་མི་མངོན་པའི་རྐྱེན་ངན་གྲལ་བཤེར་བྱེད་ཤུགས་ཆེ་རུ་བཏང་ནས་ཞོར་ཐོན་གནོད་འཚེ་ཐོན་རྒྱུ་ནན་འགོག་བྱེད་དགོས། 

        མིག་སྔར་རྒྱལ་ཁབ་འབྲུབ་འགོག་ཐན་འགོག་སྤྱི་ཁྱབ་བཀོད་འདོམས་པུའུ་ཡིས་ཐེན་ཅིན་དང་ཧའོ་པེ་ཡི་འབྲུབ་འགོག་རིམ་པ་གཉིས་ཀྱི་འཕྲལ་སྡོམ་དང་ལེན་དང་པེ་ཅིན་དང་། ཅི་ལིན། ཧེ་ལུང་ཅང་བཅས་ཀྱི་འབྲུབ་འགོག་གི་རིམ་གསུམ་འཕྲལ་སྡོམ་དང་ལེན་སྔར་བཞིན་རྒྱུན་འཁྱོངས་བྱས་ཡོད། ཚེས6ཉིན་གྱི་དགོང་མོ་རྒྱལ་ཁབ་འབྲུབ་འགོག་ཐན་འགོག་སྤྱི་ཁྱབ་བཀོད་འདོམས་པུའི་གཞུང་ལས་ཁང་དང་འཕྲལ་སྡོམ་དོ་དམ་པུས་རྒྱལ་ཁབ་འབྲུ་རིགས་དང་དངོས་ཟོག་གྲབས་གསོག་ཅུས་དང་མཉམ་དུ་སླར་ཡང་ཛ་དྲག་ངང་ཐེན་ཅིན་ལ་བསླས་འཐག་ཁུག་མ་ཁྲི700དང་། སྨི་ངོས་གྲུ་བཞི་མ་ཁྲི300བསྐྱར་དུ་འཐག་པའི་རས་ཆ། མྱུར་སྐྱོབ་གྱོན་ཆས1000སོགས་ཀྲུང་དབྱང་གི་འཕྲལ་སྡོམ་ཉེན་སེལ་གེགས་སེལ་དངོས་ཟོག་དབོར་འདྲེན་བྱས། །