ཀྲུང་གོ་བོད་ཀྱི་དྲ་བའི་འཕྲིན། འདི་ལོ་ལྷ་ས་གྲོང་ཁྱེར་སློབ་མའི“འགན་ལེན་གསུམ”གྱི་འགྲོ་གྲོན་ཚད་གཞི་སླར་ཡང་སྒོར་100མཐོ་རུ་བཏང་བ་དང་།མཐོ་རུ་བཏང་རྗེས་སློབ་གྲྭ་འབྲིང་ཆུང་སློབ་མ་མི་རེའི་ཆ་སྙོམས“འགན་ལེན་གསུམ”གྱི་འགྲོ་གྲོན་ཚད་གཞི་སྒོར་2900ཟིན་པ་དང་།འདི་ལོའི་སྟོན་དུས་ཀྱི་སློབ་འགོ་ཚུགས་པ་ནས་ལག་བསྟར་བྱ་རྒྱུ་རེད།འབྲེལ་ཡོད་ཀྱི་བསྡོམས་རྩིས་གྲངས་གཞི་ལས་མངོན་པར་གཞིགས་ན།འདི་ལོའི་ལོ་འགོར་ལྷ་ས་གྲོང་ཁྱེར་གྱི་སློབ་མའི“འགན་ལེན་གསུམ”གྱི་འགྲོ་གྲོན་ལ་སྒོར་དུང་ཕྱུར་2.6115བཏང་ནས་ཕན་པ་ཐོབ་མཁན་གྱི་སློབ་མ་མི་གྲངས་ཁྲི་9ལྷག་ཙམ་ཟིན་ཡོད།ཤེས་རྟོགས་བྱུང་བར་གཞིགས་ན།མིག་སྔར་འོས་འགན་སློབ་གསོའི“འགན་ལེན་གསུམ”གྱི་སྲིད་ཇུས་དེ་ལོ་15བར་རིང་དུ་བཏང་བ་དང་།སློབ་ཞུགས་གོང་གི་ལོ་གསུམ་གྱི་བུ་བཅོལ་སློབ་གསོ་ནས་མཐོ་རིམ་སློབ་འབྲིང་དང་དེ་བཞིན་འབྲིང་རིམ་ལས་རིགས་དུས་མཚམས་བར་གྱི་ཞིང་འབྲོག་པའི་བུ་ཕྲུག་ཚང་མ་དང་གྲོང་ཁྱེར་དང་གྲོང་རྡལ་གྱི་དཀའ་ངལ་ཡོད་པའི་ཁྱིམ་ཚང་གི་བུ་ཕྲུག་ལ་ཁྱབ་ཡོད།སློབ་མའི“འགན་ལེན་གསུམ”གྱི་སྲིད་ཇུས་ཕུད།ལྷ་ས་གྲོང་ཁྱེར་གྱི་གྲོང་གསེབ་ཀྱི་འོས་འགན་སློབ་གསོའི་སློབ་མའི་འཚོ་བཅུད་ལེགས་གཏོང་འཆར་གཞིའི་ལས་དོན་གཏིང་ཟབ་ངང་ལག་བསྟར་བྱས་པས།སློབ་མའི་བཟའ་བཏུང་གི་གྲུབ་ཆ་འཐུས་ཚང་དུ་གཏོང་བ་དང་། གཟུགས་པོའི་བྱང་ཚད་མཐོ་རུ་གཏོང་བར་ཡང་དགེ་མཚན་ལྡན་པའི་ནུས་པ་ཐོན་ཡོད།  །