2021ལོའི་གོང་འཕེལ་འགྲོ་བཞིན་པའི་རྒྱལ་ཁབ་བར་གྱི་འགྲོ་བ་མིའི་ཐོབ་ཐང་གི་གླེང་སྟེགས་པེ་ཅིང་དུ་འཚོགས་པ།

    ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།    2021-12-14

 སྤྱི་ལོ་2021ལོའི་གོང་འཕེལ་འགྲོ་བཞིན་པའི་རྒྱལ་ཁབ་བར་གྱི་འགྲོ་བ་མིའི་ཐོབ་ཐང་གླེང་སྟེགས་དེ་སྤྱི་ཚེས་8ཉིན་པེ་ཅིང་དུ་འཚོགས་པ་དང་། རྒྱལ་ཁབ་དང་རྒྱལ་སྤྱིའི་སྒྲིག་འཛུགས་100ཙམ་གྱི་མཐོ་རིམ་དཔོན་རིགས་དང་། རིགས་གཅིག་མཁས་ཅན་དང་རིག་གནས་པ། ཀྲུང་གོར་བཅའ་སྡོད་གཞུང་ཚབ་པ་སོགས་མི་400ཙམ་དྲ་ཐོག་དང་དྲ་འོག་རྣམ་པའི་ཐོག་ནས་ཚོགས་འདུར་ཞུགས་ཡོད་པ་རེད།

གོང་འཕེལ་འགྲོ་བཞིན་པའི་རྒྱལ་ཁབ་བར་གྱི་འགྲོ་བ་མིའི་ཐོབ་ཐང་གླེང་སྟེགས་ནི་གོང་འཕེལ་འགྲོ་བཞིན་པའི་རྒྱལ་ཁབ་ཀྱིས་དགེ་མཚན་ལྡན་པའི་གླེང་མོལ་དང་མཉམ་ལས་བྱེད་པའི་སྟེགས་བུ་གལ་ཆེན་ཞིག་ཡིན་པ་དང་། ད་ལོའི་གླེང་སྟེགས་ཀྱི་བརྗོད་བྱ་གཙོ་བོ་ནི་མི་དམངས་གོང་དུ་བཀུར་བ་དང་གོ་ལ་ཧྲིལ་པོའི་འགྲོ་བ་མིའི་ཐོབ་ཐང་བཅོས་སྐྱོང་བྱེད་ཅེས་པ་དེ་ཡིན། ཚོགས་ཞུགས་སྐུ་མགྲོན་གྱིས་མིའི་རིགས་ཀྱི་འཕྲོད་བསྟེན་བདེ་ཐང་གཅིག་མཐུན་མ་ལག་དང་འགྲོ་བ་མིའི་ཐོབ་ཐང་འགན་ལེན་དང་། དབུལ་པོ་ལས་སྒྲོལ་རྒྱུ་དང་གོང་འཕེལ་གྱི་དབང་ཆ་མངོན་འགྱུར། ཕྱོགས་མང་རིང་ལུགས་དང་གོ་ལ་ཧྲིལ་པོའི་འགྲོ་བ་མིའི་ཐོབ་ཐང་བཅོས་སྐྱོང་། གོ་ལ་ཧྲིལ་པོའི་འགྲོ་བ་མིའི་ཐོབ་ཐང་བཅོས་སྐྱོང་ཁྲོད་ཀྱི་གོང་འཕེལ་འགྲོ་བཞིན་པའི་རྒྱལ་ཁབ་ཀྱི་ནུས་པ་སོགས་ཀྱི་གྲོས་གཞིར་དམིགས་ནས་བགྲོ་གླེང་གནང་རྒྱུ་ཡིན་པ་རེད།

ཚོགས་ཞུགས་སྐུ་མགྲོན་ཚོས། རྒྱལ་ཁབ་ཁག་ཚང་མས་རང་རྒྱལ་ཁབ་ཀྱི་གནས་ཚུལ་དང་མི་དམངས་ཀྱི་དགོས་མཁོ་དང་འཚམ་པའི་འགྲོ་བ་མིའི་ཐོབ་ཐང་གོང་འཕེལ་གྱི་ལམ་བུའི་ཐོག་བསྐྱོད་ཆོག་ལ་སྐྱོད་ཀྱང་དགོས་ངེས་རེད། གོ་ལ་ཧྲིལ་པོའི་འགྲོ་བ་མིའི་ཐོབ་ཐང་བཅོས་སྐྱོང་བྱེད་པར་རྒྱལ་ཁབ་ཁག་གིས་ཐུན་མོང་ཐོག་གྲོས་བསྡུར་བྱེད་དགོས། ནུབ་ཕྱོགས་རྒྱལ་ཁབ་ཁ་ཤས་ཀྱིས་འགྲོ་བ་མིའི་ཐོབ་ཐང་གི་སྲུང་དམག་ཡིན་ཞེས་རང་བསྟོད་བྱེད་པ་དང་འགྲོ་བ་མིའི་ཐོབ་ཐང་གི་དར་ཆ་བསྒྲེངས་ཏེ་རྒྱལ་ཁབ་གཞན་གྱི་ནང་སྲིད་ལ་ཐེ་ཇུས་བྱེད་པ། རང་ངོས་ཀྱི་ཆབ་སྲིད་དམིགས་ཡུལ་ལ་ཞབས་འདེགས་ཞུ་བ་སོགས་ནི་འགྲོ་བ་མིའི་ཐོབ་ཐང་རྫུན་མ་དང་བཙན་དབང་ངོ་མ་ཞིག་རེད་ཅེས་བསྟན་ཡོད་པ་རེད།

ཚོགས་ཞུགས་སྐུ་མགྲོན་ཚོས། ཀྲུང་གོས་མི་དམངས་ཀྱི་བདེ་སྐྱིད་ལྡན་པའི་འཚོ་བ་ནི་འགྲོ་བ་མིའི་ཐོབ་ཐང་ཆེ་ཤོས་ཡིན་ཞེས་གསལ་སྟོན་བྱས་པ་དང་། སྲིད་ཇུས་ཀྱི་བྱེད་ཐབས་རབ་དང་རིམ་པ་སྤྱད་དེ་མི་དམངས་ཀྱི་ཐོབ་ཚོར་དང་སྐྱིད་ཚོར་བདེ་ཚོར་བཅས་ཆེ་རུ་གཏོང་བ། དུས་རབས་ཀྱི་རླབས་རྒྱུན་དང་འཚམ་པ་དང་ཀྲུང་གོའི་ཁྱད་ཆོས་ལྡན་པའི་འགྲོ་བ་མིའི་ཐོབ་ཐང་གོང་འཕེལ་གྱི་ལམ་བུའི་ཐོག་ལེགས་གྲུབ་ལྡན་པའི་ངང་བསྐྱོད་དེ་རྒྱལ་སྤྱིའི་འགྲོ་བ་མིའི་ཐོབ་ཐང་བྱ་གཞག་ཆེད་ལེགས་སྐྱེས་གལ་ཆེན་ཕུལ་ཡོད་ཅེས་གསུངས་ཡོད་པ་རེད།

  • ལེ་ཚན་སྔོན་མ།:ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པའི་ཡིག་ཆ་གཙོ་བོའི་ཕྱི་རྒྱལ་སྐད་ཡིག་དང་མི་རིགས་སྐད་ཡིག་གི་ཡིག་སྒྱུར་པར་མ་དཔེ་སྐྲུན་འགྲེམས་སྤེལ་བྱས་པ
  • ལེ་ཚན་རྗེས་མ།:ཀྲུང་དབྱང་གི་དཔལ་འབྱོར་ལས་དོན་ཚོགས་འདུ་པེ་ཅིང་དུ་འཚོགས།
  • དོ་སྣང་ཆེ་བའི་རྩོམ།