ཟླ7པའི་ཚེས3ཉིན་རང་ལྗོངས་ཀྱི་དམངས་ཁྲོད་རྟེན་རྫས་བཤམས་མཛོད་ཁང་ཐོག་མ་ཡིན་པའི་ཆོས་འབྱོར་གནའ་བོའི་གོ་མཚོན་རྟེན་རྫས་བཤམས་མཛོད་ཁང་དེ་མལ་གྲོ་གུང་དཀར་རྫོང་རྒྱ་མ་ཤང་སློང་མདའ་གྲོང་ཚོར་དངོས་སུ་འགྲེམས་འགོ་ཚུགས་ཤིང་།འདི་ནི་སློང་མདའ་གྲོང་ཚོའི་གྲོང་མིས་གསོག་ཉར་དངོས་རྫས་ལ་བལྟ་བའི་གནས་ཚུལ་ཡིན།ཀྲུང་གོ་བོད་ཀྱི་དྲ་བའི་འཕྲིན། ཟླ7པའི་ཚེས3ཉིན་གྱི་སྔ་དྲོ་མལ་གྲོ་གུང་དཀར་རྫོང་རྒྱ་མ་ཤང་སློང་མདའ་གྲོང་ཚོར་རང་ལྗོངས་ཀྱི་དམངས་ཁྲོད་རྟེན་རྫས་བཤམས་མཛོད་ཁང་དང་པོ་སྟེ་ཆོས་འབྱོར་གནའ་རབས་གོ་མཚོན་རྟེན་རྫས་བཤམས་མཛོད་ཁང་གཟབ་རྒྱས་ངང་སྒོ་ཕྱེ་ཞིང་།རྟེན་རྫས་བཤམས་མཛོད་ཁང་གི་ལས་གཉེར་དུས་ཚོད་དབྱར་དུས་ཉིན་ལྟར་ཆུ་ཚོད9∶30—19∶30བར་དང་།དགུན་དུས་ཉིན་ལྟར་ཆུ་ཚོད10∶00—18∶00བར་ཡིན་པ་རེད།
ཤེས་རྟོགས་བྱས་པར་གཞིགས་ན།རྟེན་རྫས་བཤམས་མཛོད་ཁང་དེ་རྫ་ཆས་དང་།ཟངས་ཆས།མི་རིགས་ཀྱི་གྱོན་ཆས།འཚོ་བའི་སྤྱོད་ཆས།ཆོས་ལུགས་རིག་གནས།གསར་བརྗེའི་རིག་དངོས།གོ་མཚོན་སོགས་འགྲེམས་ཁུལ་བདུན་དུ་ཕྱེ་ཡོད་པ་དང་ཉར་ཚགས་དངོས་པོ1613ཡོད་པ་རེད།གྲལ་སྟར་འགྲིག་པའི་ཉར་ཚགས་དངོས་པོའི་ནང་བོད་ཀྱི་རྫ་ཆས་སྣ་ཁ27དང་།ས་གནས་དང་གྲོང་ཁྱེར་བདུན་གྱི་གྱོན་ཆས་ཡོད་པ་རེད།
ངོ་སྤྲོད་བྱས་པར་གཞིགས་ན།ཆོས་འབྱོར་གནའ་རབས་གོ་མཚོན་རྟེན་རྫས་བཤམས་མཛོད་ཁང་ནི་མལ་གྲོ་གུང་དཀར་རྫོང་ཨུད་དང་རྫོང་སྲིད་གཞུང་གི་ཤུགས་ཆེའི་རྒྱབ་སྐྱོར་འོག2012ལོ་ནས་བཟུང་སྐྲུན་འགོ་ཚུགས་པ་དང་།2013ལོར་ལྷ་ས་གྲོང་ཁྱེར་གྱི་གཙོ་གནད་རྣམ་གྲངས54གྲས་སུ་བཞག་ཅིང་།རང་ལྗོངས་ཀྱིས་རྟེན་རྫས་བཤམས་མཛོད་ཁང་དེ་རྒྱལ་གཅེས་རིང་ལུགས་ཀྱི་སློབ་གསོའི་སྟེགས་བུར་བྱ་རྒྱུ་དང་འབྲེལ་སྐྱོན་བྲལ་གྱི་བསམ་བློའི་ནང་དོན་དང་ངོ་མཚར་གྱི་འགྲེམས་རྫས་དང་སྤུས་ལེགས་ཞབས་ཞུའི་ཐོག་ནས་རྒྱལ་ཕྱི་རྒྱལ་ནང་གི་ཡུལ་སྐོར་བར་སྣེ་ལེན་ཞུས་ཏེ་མལ་གྲོ་གུང་དཀར་རྫོང་གི་ཆབ་སྲིད་དང་།དཔལ་འབྱོར།སྤྱི་ཚོགས་རིག་གནས་སོགས་ཐད་ལེགས་སྐྱེས་འབུལ་རྒྱུ་ཡིན་པ་རེད།  །