ཟླ་10ཚེས་21ཉིན་གྱི་སྔ་དྲོ་ཏང་གི་ཚོགས་ཆེན་བཅུ་དགུ་པའི་གསར་འགྱུར་ལྟེ་གནས་སུ་གསར་འགོད་པའི་སྣེ་ལེན་ཚོགས་འདུ་ཐེངས་གསུམ་པ་འཚོགས་ཤིང་། ཚོགས་ཆེན་བཅུ་དགུ་པའི་གསར་འགྱུར་མགྲིན་ཚབ་པ་ཀུའོ་ཝུའེ་མིང་གིས་ཀྲུང་དབྱང་འཐབ་ཕྱོགས་གཅིག་གྱུར་པུའི་རྒྱུན་ལས་པུའུ་ཀྲང་གཞོན་པ་ཀྲང་དབྱི་ཅུང་དང་། ཀྲུང་དབྱང་འཐབ་ཕྱོགས་གཅིག་གྱུར་པུའི་པུའུ་ཀྲང་གཞོན་པ་རན་དབན་ཞང་ཏང་གི་འཐབ་ཕྱོགས་གཅིག་གྱུར་ལས་ཀའི་འབྲེལ་ཡོད་གནས་ཚུལ་ངོ་སྤྲོད་གནང་བར་གདན་དྲངས་པ་མ་ཟད། གསར་འགོད་པའི་དྲི་བར་ལན་ཡང་བསྐྱོན་པ་རེད།

     འཐབ་ཕྱོགས་གཅིག་གྱུར་གསར་གཏོད་འཕེལ་རྒྱས་དང་རྒྱ་སྟོབས་ཆེ་རུ་སོང་བ།
     ཀྲང་དབྱི་ཅུང་གིས་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། འཐབ་ཕྱོགས་གཅིག་གྱུར་གྱིས་རྒྱལ་གཅེས་རིང་ལུགས་དང་སྤྱི་ཚོགས་རིང་ལུགས་ཀྱི་དར་ཆ་མཐོན་པོར་སྒྲེང་བ་དང་། མཐུན་སྒྲིལ་ཆེ་མོ་དང་མཉམ་འབྲེལ་ཆེ་མོའི་བརྗོད་དོན་གཙོ་བོ་ཁོང་དུ་བརྟན་པོ་ཆུད་པ་བྱས་པ། གཅིག་གྱུར་རང་བཞིན་དང་སྣ་མང་རང་བཞིན་གྱི་འབྲེལ་བ་ཐག་གཅོད་ཡང་དག་བྱེད་པའི་བྱེད་ཕྱོགས་མཐའ་འཁྱོངས་བྱས་ནས་ཟམ་མི་ཆད་པར་གསར་གཏོད་འཕེལ་རྒྱས་དང་རྒྱ་སྟོབས་ཆེ་རུ་བཏང་ཡོད། སྲིད་ཏང་གྲོས་མོལ་ཚད་ལྡན་དུ་གཏོང་བ་དང་། སྲིད་ཞུགས་སྲིད་གྲོས་ལ་ཤུགས་སྣོན་རྒྱག་པ། དམངས་གཙོའི་ལྟ་སྐུལ་འཐུས་སྒོ་ཚང་དུ་གཏོང་བ་བཅས་ཀྱི་སྒོ་ནས་ཏང་མང་མཉམ་ལས་ཀྱི་ལམ་ལུགས་ཀྱི་ལེགས་ཆ་ཉིན་རེ་བཞིན་མངོན་གསལ་དོད་དུ་བཏང་ཡོད། སྤྱི་ཚོགས་རིམ་གྲས་ཁག་གི་གསོན་ཤུགས་གང་ལེགས་འཕེལ་བ་བྱས་ཏེ་ཏང་གི་སྲིད་སྐྱོང་གི་གྲལ་རིམ་གྱི་རྨང་གཞི་དང་མང་ཚོགས་ཀྱི་རྨང་གཞི་སྔར་བས་བརྟན་དུ་བཏང་ཡོད། མི་རིགས་ས་ཁོངས་རང་སྐྱོང་ལམ་ལུགས་མཐའ་འཁྱོངས་དང་འཐུས་སྒོ་ཚང་དུ་བཏང་སྟེ་མི་རིགས་ཁག་གི་མང་ཚོགས་འཆམ་མཐུན་མཉམ་གནས་དང་། ཕྱར་བ་གྲུ་འདེགས། ཞི་མཐུན་འཕེལ་རྒྱས་བཅས་ཀྱི་རྣམ་པ་བཟང་པོ་བརྟན་དུ་དང་འཕེལ་རྒྱས་བཏང་ཡོད། རང་རྒྱལ་གྱི་ཆོས་ལུགས་ཀྲུང་གོ་ཅན་གྱི་ཁ་ཕྱོགས་སྟངས་འཛིན་བརྟན་པོ་བྱས་ནས་ཆོས་ལུགས་དེ་སྤྱི་ཚོགས་རིང་ལུགས་སྤྱི་ཚོགས་དང་དེ་བས་འཚམ་མཐུན་ཡོང་བ་བྱས་ཡོད། མཐུན་སྒྲིལ་གྱི་གཞི་ཁྱོན་ཆེ་རུ་གཏོང་གང་ཐུབ་བྱས་པ་དང་རྒྱལ་ཁབ་ཕྱི་ནང་གི་ཀྲུང་ཧྭའི་བུ་ཕྲུག་གིས་ཐུན་མོང་ཐོག་ཀྲུང་གོའི་ཕུགས་འདུན་མཉམ་དུ་གྲུབ་ཡོད། ལོ་ལྔའི་རིང་། འཐབ་ཕྱོགས་གཅིག་གྱུར་གྱིས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བྱ་གཞག་ཁྲོད་ནུས་པ་གལ་ཆེན་བཏོན་པ་དང་། ཏང་ཤོག་ཁག་དང་། རིམ་གྲས་ཁག མི་རིགས་ཁག ཚོགས་པ་ཁག ལས་རིགས་ཁག་གི་མི་སྣ་བཅས་ཀྱིས་རྒྱལ་ཁབ་འཕེལ་རྒྱས་ལ་སྤོབས་སེམས་དང་ཡིད་ཆེས་ཀྱིས་ཁེངས་ནས་ཡོད་ཅེས་ངོ་སྤྲོད་གནང་བ་རེད།
     མི་རིགས་ཀྱི་གནད་དོན་ཐག་གཅོད་བྱེད་པའི་ཐད་ཀྲུང་གོའི་ཁྱད་ཆོས་ཀྱི་ཡང་དག་ལམ་བུའི་ཐོག་བསྐྱོད་པ།
     མི་རིགས་སྲིད་ཇུས་ཀྱི་འབྲེལ་ཡོད་དྲི་བར་ལན་བསྐྱོན་སྐབས་ཀྲང་དབྱི་ཅུང་གིས་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་མི་རིགས་ཀྱི་གནད་དོན་དང་མི་རིགས་ཀྱི་ལས་དོན་ལ་ཚད་མཐོའི་མཐོང་ཆེན་གནང་སྟེ་མི་རིགས་སྲིད་ཇུས་གྲ་རྒྱས་དང་འཐུས་སྒོ་ཚང་དུ་བཏང་བ་དང་མི་རིགས་ལས་དོན་གསར་གཏོད་ལ་སྐུལ་འདེད་བཏང་ཡོད། མི་རིགས་འདྲ་མཉམ་མཐའ་འཁྱོངས་བྱས་ཏེ་མི་རིགས་ཁག་གི་ཁྲིམས་མཐུན་དབང་ཆ་དང་ཁེ་ཕན་འགན་སྲུང་བྱས་ཡོད། མི་རིགས་ཁག་གི་མཐུན་སྒྲིལ་ཆེ་མོ་སྲུང་སྐྱོང་བྱས་ཏེ་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་ཟབ་ཏུ་བཏང་ཡོད། མི་རིགས་ས་ཁོངས་རང་སྐྱོང་ལག་ལེན་བསྟར་ཏེ་མི་རིགས་ཁག་ལ་འདྲ་མཉམ་གྱི་བཅའ་ཁྲིམས་གནས་བབ་ཡོད་པ་བྱས་པ་དང་ཐུན་མོང་ཐོག་བྱ་གཞག་ཁག་འཛུགས་སྐྲུན་བྱས་ཡོད། གྲངས་ཉུང་མི་རིགས་དང་མི་རིགས་ས་ཁུལ་མགྱོགས་མྱུར་འཕེལ་རྒྱས་གཏོང་བ་དང་། མི་རིགས་ཁག་གིས་ཐུན་མོང་ཐོག་མཐུན་སྒྲིལ་འབད་འཐབ་བྱེད་པ། ཐུན་མོང་ཐོག་དར་རྒྱས་གོང་འཕེལ་གཏོང་བ་བཅས་ལ་རྒྱབ་སྐྱོར་བྱས་ཡོད། མི་རིགས་རིག་གནས་སྲུང་སྐྱོང་དང་དར་སྤེལ་གཏོང་བ་དང་གྲངས་ཉུང་མི་རིགས་ཀྱི་རིག་གནས་བྱ་གཞག་འཕེལ་རྒྱས་ཡོང་བར་རྒྱབ་སྐྱོར་བྱས་ཡོད། འཚོལ་ཞིབ་ཟམ་མི་ཆད་པ་བྱས་པ་བརྒྱུད། ང་ཚོས་མི་རིགས་གནད་དོན་ཐག་གཅོད་བྱེད་པའི་ཐད་ཀྲུང་གོའི་ཁྱད་ཆོས་ཀྱི་ཡང་དག་པའི་ལམ་བུའི་ཐོག་བསྐྱོད་པ་དང་། ལག་ལེན་ལས་ཀྲུང་གོའི་མི་རིགས་ཀྱི་གནད་དོན་ཐག་གཅོད་བྱས་པ་ནི་གྲུབ་འབྲས་ཐོབ་པ་ཞིག་ཡིན་པ་ར་འཕྲོད་བྱུང་ཡོད་ཅེས་གསུངས་པ་རེད།
    སྤྱི་དབང་མིན་པའི་ལམ་ལུགས་དཔལ་འབྱོར་རྒྱུན་མཐུད་དང་སྐྱོན་བྲལ་ངང་འཕེལ་རྒྱས་ཕྱིན་པ།
    གསར་འགོད་པས་བཏོན་པའི་སྤྱི་དབང་མིན་པའི་ལམ་ལུགས་དཔལ་འབྱོར་འཕེལ་རྒྱས་དང་འབྲེལ་བའི་གནད་དོན་ལ་དམིགས་ཏེ་རན་དབན་ཞང་གིས་ཚོགས་ཆེན་བཅོ་བརྒྱད་པ་འཚོགས་ཚུན་འཐབ་ཕྱོགས་གཅིག་གྱུར་གྱིས་ཀྲུང་དབྱང་གི་ཐབས་ཇུས་བཀོད་སྒྲིག་ལྟར་འགན་ནུས་ལག་ལེན་ཏན་ཏིག་བསྟར་ནས་སྤྱི་དབང་མིན་པའི་ལམ་ལུགས་དཔལ་འབྱོར་སྐྱོན་བྲལ་ངང་འཕེལ་རྒྱས་འགྲོ་རྒྱུར་སྐུལ་འདེད་ཤུགས་ཆེན་དང་སྤྱི་དབང་མིན་པའི་ལམ་ལུགས་དཔལ་འབྱོར་མི་སྣ་སྐྱོན་བྲལ་ངང་འཚར་ལོངས་ཡོང་རྒྱུར་སྐུལ་འདེད་ཤུགས་ཆེན་བཏང་ཡོད། 2017ལོའི་ཟླ་6པའི་བར། རང་རྒྱལ་གྱི་སྒེར་གཉེར་ཁེ་ལས་ཁྲི་2497ཟིན་པ་དང་། སྤྱི་དབང་མིན་པའི་ལམ་ལུགས་དཔལ་འབྱོར་གྱིས་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་ཕུལ་བའི་ལེགས་སྐྱེས“56789”ཐོག་ནས་རགས་བསྡུས་ཆོག་པ་སྟེ། ཁྲལ་འབབ་ལ་ལེགས་སྐྱེས་ཕུལ་ཚད་50%ལྷག་ཙམ་ཟིན་པ་དང་། རྒྱལ་དམངས་ཀྱི་ཐོན་སྐྱེད་སྤྱིའི་རིན་ཐང་དང་། གཏན་འཇགས་རྒྱུ་ནོར་མ་འཇོག ཕྱི་ཕྱོགས་ལ་ཐད་ཀར་མ་འཇོག་བཅས་ཚང་མ་60%ལྷག་ཙམ་ཟིན་པ། མཐོ་གསར་ལག་རྩལ་ཁེ་ལས་ཀྱི་བསྡུར་ཚད་70%ལྷག་ཙམ་ཟིན་པ། གྲོང་ཁྱེར་དང་གྲོང་རྡལ་དུ་ལས་ཞུགས་ཐུབ་ཚད་80%ལྷག་ཙམ་ཟིན་པ། ལས་ཞུགས་གསར་འཕར་ཐུབ་རྒྱུར་ལེགས་སྐྱེས་འབུལ་ཚད་90%ཟིན་ཡོད་ཅེས་གསུངས་པ་རེད།