ཉེ་ཆར། བོད་རང་སྐྱོང་ལྗོངས་བཟོ་བཀོད་མཛེས་རྩལ་ལས་རིགས་གོང་འཕེལ་གཏོང་བ་དང་སྐབས་གཉིས་པའི་བཟོ་བཀོད་མཛེས་རྩལ་ཆེན་མོ་བའི་མཚན་གསོལ་གཟེངས་བསྟོད་ཚོགས་ཆེན་དེ་ལྷ་སར་བསྡུས་ཏེ། བོད་རང་སྐྱོང་ལྗོངས་མི་དམངས་སྲིད་གཞུང་གིས་དཀོན་མཆོག་སྐྱབས་སོགས་མི25ལ་བཟོ་བཀོད་མཛེས་རྩལ་ཆེན་མོ་བའི་མཚན་སྙན་གནང་བ་མ་ཟད། སྐབས་གཉིས་པའི་བཟོ་བཀོད་མཛེས་རྩལ་ཆེན་མོ་བའི་དཔྱད་བཤེར་བཟོ་རྩལ་བྱ་དགའ་དང་ཕུལ་བྱུང་བརྩམས་ཆོས་ཀྱི་བྱ་དགའ་ཐོབ་པའི་མི28ལ་གཟེངས་བསྟོད་གནང་།
   རྒྱུས་ལོན་པ་ལྟར་ན། བོད་ལྗོངས་ཀྱི་བཟོ་བཀོད་མཛེས་རྩལ་བརྩམས་ཆོས་མང་ཆེ་བ་ནི་ས་གདན་དང་། བོད་ཆས། སྤོས། ཐང་ག མི་རིགས་ཀྱི་ཁྱད་ཆོས་ལྡན་པའི་ཡུལ་སྐོར་ཚོང་ཟོག་སོགས་མི་རིགས་ཀྱི་ལག་བཟོའི་ཐོན་རྫས་གཙོར་བྱས་པའི་མི་རིགས་ཀྱི་ལག་བཟོ་མཛེས་རྩལ་སྣ་ཁ2000ལྷག་ཡོད་ཅིང་། ན་ནིང་ལོ་མཇུག་བར་དུ། བོད་ལྗོངས་ཀྱི་གཟུགས་འདས་རིག་གནས་ཤུལ་བཞག་རིམ་པ་བཞི་པའི་མིང་གཞུང་དུ་རྒྱལ་ཁབ་རིམ་པའི་ལས་གཞི89ཡོད་ཅིང་། ལྷ་རིས་པ་བསྟན་པ་རབ་བརྟན་སོགས་མི71རྒྱལ་ཁབ་རིམ་པའི་གཟུགས་འདས་རིག་གནས་ཤུལ་བཞག་གི་འཐུས་ཚབ་རང་བཞིན་གྱི་རྒྱུན་འཛིན་པར་བདམས།