ཞི་ཅིན་ཕིང་གིས་དམག་དཔུང་ལ་གཟིགས་ཞིབ་གནང་ཞིང་གསུང་བཤད་གལ་ཆེན་གནང་།

ཤིན་ཧྭ་གསར་འགྱུར་ཁང་ནང་སོག་ཀྲོའུ་རི་ཧོ་ནས་ཟླ7ཚེས30ཉིན་གློག་འཕྲིན་འབྱོར་གསལ། ཟླ་བ7པའི་ཚེས30ཉིན་གྱི་སྔ་དྲོར། ཀྲུང་གོ་མི་དམངས་བཅིངས་འགྲོལ་དམག་བཙུགས་ཏེ་ལོ90འཁོར་བའི་དམག་གཟིགས་མཛད་སྒོ་དེ་ནང་སོག་ཀྲོའུ་རི་ཧོ་མཉམ་འབྲེལ་སྦྱོང་བརྡར་རྟེན་གཞིར་གཟབ་རྒྱས་ངང་སྤེལ་བ་རེད། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ལྷན་གྱི་ཀྲུའུ་ཞི་ཞི་ཅིན་ཕིང་གིས་དམག་དཔུང་ལ་གཟིགས་ཞིབ་གནང་ཞིང་གསུང་བཤད་གལ་ཆེན་གནང་བ་རེད། ཀྲོའུ་རི་ཧོའི་མཉམ་འབྲེལ་སྦྱོང་བརྡར་རྟེན་གཞིར་དཔོན་དམག་ཆིག་ཁྲི་གཉིས་སྟོང་དང་རླངས་འཁོར་སྒྲིག་ཆས600ལྷག   འཐབ་འཛིང་གནམ་གྲུ100ལྷག་བཅས་ཀྱིས་གཟིགས་ཞིབ་དང་ལེན་བྱས་པ་རེད།   འདི་ནི་ཀྲུང་གོ་མི་དམངས་བཅིངས་འགྲོལ་དམག་གིས་ཐེངས་དང་པོར་དམག་འཛུགས་དུས་ཆེན་གྱིས་བརྫོད་དོན་གཙོ་བོ་བྱས་པའི་དམག་གཟིགས་ཆེན་མོ་ཡིན་ཞིང་། བྱེས་འཐབ་ཅན་དང་དངོས་འཐབ་ཅན་གྱི་གཡུལ་སར་དམག་མིར་རྩིས་བཤེར་བྱས་པ་ཡིན་ལ། མི་དམངས་དམག་དཔུང་སྤྱི་ཁོག་དང་གསར་བརྗེ་རང་བཞིན་ལྡན་པའི་འགྱུར་ལྡོག་བྱུང་རྗེས་རྣམ་པ་གསར་རྐྱང་བསྟན་པའང་ཡིན་ནོ། སྔ་དྲོའི་ཆུ་ཚོད་དགུ་པར་སྐར་ལྔའི་དར་དམར་དལ་བུར་བསྒྲེངས་པའི་ཚེ་ཚང་མ་ཡར་ལངས་ཏེ་སྐད་གསང་མཐོན་པོས་རྒྱལ་གླུ་ལེན་པ་རེད།  ཞི་ཅིན་ཕིང་དམག་གཟིགས་རླངས་འཁོར་ནང་བཞུགས་ཤིང་དམག་གཟིགས་འགྲོ་ལམ་དུ་ཕེབས་པ་རེད། དམག་གཟིགས་སྤྱི་ཁྱབ་བཀོད་འདོམས་པ། དབུས་རྒྱུད་གཡུལ་འགྱེད་ཁུལ་གྱི་སི་ལིན་ཡོན་ཧན་ཝེ་གོས་གཟིགས་ཞིབ་དང་ལེན་དམག་དཔུང་གིས་གྲ་སྒྲིག་བྱས་ཚར་བ་ཞུས་རྗེས་ཞི་ཅིན་ཕིང་གིས་དམག་དཔུང་གཟིགས་ཞིབ་བྱེད་འགོ་ཚུགས་པའི་བཀའ་གནང་བ་རེད།

ངར་ཉམས་ལྡན་པའི་དམག་གཟིགས་རོལ་དབྱངས་ཀྱི་ཁྲོད་དུ་ཞི་ཅིན་ཕིང་གིས་རིམ་བཞིན་དུ་དར་སྲུང་རུ་སྟར་གྲུ་བཞི་དང་མི་སྣ་རུ་སྟར་གྲུ་བཞི། སྒྲིག་ཆས་རུ་སྟར་གྲུ་བཞི་སོགས་ལ་གཟིགས་ཞིབ་གནང་བ་རེད། བློ་མཐུན་རྣམས་བདེ་མོ། བློ་མཐུན་རྣམས་འོ་བརྒྱལ་ཆེ་ཐལ། ཞི་ཅིན་ཕིང་གིས་དམག་གཟིགས་དང་ལེན་ཞུ་མཁན་དཔོན་དམག་རྣམས་ལ་མཛའ་བརྩེའི་ངང་འཚམས་འདྲི་གནང་སྐབས། དཔོན་དམག་རྣམས་ཀྱིས་ཀྲུའུ་ཞི་ལགས་སྐུ་ཁམས་བཟང་། མི་དམངས་ཀྱི་དོན་དུ་ཞབས་འདེགས་ཞུ། ཞེས་པའི་བཀའ་ལན་ཞུ་བའི་སྒྲ་གནམ་སར་ཁྱབ་པ་རེད།

   སྔ་དྲོའི་ཆུ་ཚོད་བཅུ་པའི་ཐོག  ཞི་ཅིན་ཕིང་གིས་གསུང་བཤད་གལ་ཆེན་གནང་བ་རེད།  ཁོང་གིས་བསྟན་དོན།  ལོ90ཡི་སྔོན་དུ། ནན་ཁྲང་གྲོང་ཁྱེར་དུ་མེ་མདའི་སྒྲ་གྲག་པ་དང་ལྷན་དུ། ཀྲུང་གོར་ཀྲུང་གོ་གུང་ཁྲན་ཏང་གིས་འགོ་ཁྲིད་གནང་བའི་རྣམ་པ་གསར་པའི་མི་དམངས་དམག་དཔུང་བཙུགས་པའི་ཁྱབ་བསྒྲགས་བྱས་པ་རེད། ལོ90ཡི་རིང་ལ། མི་དམངས་དམག་དཔུང་གིས་ཏང་གི་དར་ཆ་མཐོན་པོར་བསྒྲེངས་ནས་རྐང་པ་མེས་རྒྱལ་གྱི་ས་གཞི་ཆེན་པོ་བཙུགས་ཏེ་མི་རིགས་ཀྱི་རེ་བ་ཕྲག་ཐོག་འཁུར་ཞིང་། ཁྲག་འདོན་དམར་འཛིང་དང་ཞུམ་མེད་མདུན་སྐྱོད་བྱས་ཏེ་དགྲ་བོ་མཐའ་དག་ལས་རྣམ་པར་རྒྱལ་བ་དང་དཀའ་ངལ་མཐའ་དག་ཁྱད་དུ་བསད་ནས་ཀྲུང་གོ་མི་དམངས་ཡར་ལངས་པ་དང་། ཕྱུག་པོར་ཆགས་པ།  སྟོབས་ལྡན་གྱུར་པར་ཉམས་རྒྱུ་མེད་པའི་བྱས་རྗེས་བཞག་ཡོད་པ་རེད། ང་ཚོའི་མི་དམངས་དམག་དཔུང་ནི་ཏང་གི་བཀའ་བཀོད་གང་གནང་ཉན་མཁན་གྱི་དཔའ་བོའི་དམག་དཔུང་ཡིན་པར་ངོ་གནོང་མི་དགོས་པ་དང་། ལྷག་བསམ་ཟོལ་མེད་ཀྱིས་རྒྱལ་ཁབ་ལ་དྲིན་ལན་འཇལ་མཁན་གྱི་དཔའ་བོའི་དམག་དཔུང་ཡིན་པར་ངོ་གནོང་མི་དགོས་པ།  ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་ཡོང་པར་དཔའ་ངར་ཆེན་པོས་འབད་འཐབ་བྱེད་མཁན་གྱི་དཔའ་བོའི་དམག་དཔུང་ཞིག་ཡིན་པར་ངོ་གནོང་མི་དགོས་པ་རེད།

ཞི་ཅིན་ཕིང་གིས་ནན་གསུང་གནང་དོན།  ལྷིང་འཇགས་ཞི་བདེ་ནི་མི་དམངས་ཀྱི་བསོད་བདེ་ཡིན་པས་ཞི་བདེ་ལ་སྲུང་སྐྱོང་བྱ་རྒྱུ་ནི་མི་དམངས་དམག་དཔུང་གི་འགན་འཁྲི་རེད། དུས་བདེ་ཞོད་འཇགས་ཡོང་མིན་ཐད་ཞི་བདེ་ལ་སྲུང་སྐྱོང་བྱ་དགོས་པ་རེད། དེ་རིང་ང་ཚོས་ལོ་རྒྱུས་ཐོག་གི་དུས་སྐབས་གང་རུང་ཞིག་དང་བསྡུར་ན་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་དམིགས་ཡུལ་དང་དེ་བས་ཉེ་བཅར་ཡིན་པ་དང་། ལོ་རྒྱུས་ཐོག་གི་དུས་སྐབས་གང་རུང་ཞིག་དང་བསྡུར་ན་སྟོབས་ལྡན་གྱི་མི་དམངས་དམག་དཔུང་ཞིག་དེ་བས་འཛུགས་སྐྱོང་བྱ་དགོས་པ་རེད། ང་ཚོས་ཏང་གི་དམག་སྟོབས་ལྡན་ཡོང་བའི་དགོངས་དོན་ལག་ལེན་ཟབ་མོ་བྱས་ནས་སྲ་བརྟན་འགྱུར་མེད་ཀྱིས་ཀྲུང་གོའི་ཁྱད་ཆོས་ཀྱི་དམག་སྟོབས་ལྡན་གྱི་ལམ་བུའི་ཐོག་བསྐྱོད་དེ་ཏང་གི་གནས་བབ་གསར་པའི་འོག་དམག་སྟོབས་ལྡན་གྱི་དམིགས་ཡུལ་མངོན་འགྱུར་བྱེད་གང་ཐུབ་བྱས་པར་བརྟེན།  ང་ཚོའི་དཔའ་བོའི་མི་དམངས་དམག་དཔུང་འདི་འཛམ་གླིང་གི་རིམ་གྲས་དང་པོའི་དམག་དཔུང་ཞིག་ཏུ་འཛུགས་སྐྱོང་བྱ་དགོས།

ཞི་ཅིན་ཕིང་གིས་ཐུགས་རེ་གནང་དོན། དམག་ཡོངས་ཀྱི་དཔོན་དམག་ཚོས་སྲ་བརྟན་འགྱུར་མེད་ཀྱིས་ཏང་གིས་དམག་དཔུང་ལ་མཐའ་གཅིག་ཏུ་འགོ་ཁྲིད་གནང་བའི་རྩ་བའི་རྩ་དོན་དང་ལམ་ལུགས་རྒྱུན་འཁྱོངས་བྱས་ཏེ་དུས་གཏན་དུ་ཏང་གི་བཀའ་བཀོད་ལ་ཉན་པ་དང་། ཏང་གི་རྗེས་སུ་འབྲང་བ། ཏང་གིས་བཀའ་བཀོད་ཅི་ཡོད་ན་དེ་ལྟར་དུ་བསྒྲུབ་དགོས།  སྲ་བརྟན་འགྱུར་མེད་ཀྱིས་བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་རྒྱུའི་རྩ་བའི་དམིགས་ཡུལ་རྒྱུན་འཁྱོངས་བྱས་ཏེ་ཐོག་མཐའ་བར་གསུམ་དུ་མི་དམངས་དང་མཉམ་དུ་ལངས་ནས་དུས་དང་རྣམ་པ་ཀུན་ཏུ་མི་དམངས་སེམས་སུ་བཅངས་ཏེ་དུས་གཏན་དུ་མི་དམངས་ཀྱི་བུ་སྤུན་དམག་བྱ་དགོས། སྲ་བརྟན་འགྱུར་མེད་ཀྱིས་འཐབ་འཛིང་ནུས་པའི་རྩ་བའི་ཚད་གཞི་ཉག་ཅིག་འདི་རྒྱུན་འཁྱོངས་བྱས་ཏེ་དམག་འཐབ་གྲ་སྒྲིག་དང་བོས་ན་ཡོང་ཐུབ་པ་དང་། ཡོང་ན་འཐབ་ཐུབ་པ། འཐབ་ན་རྒྱལ་ཐུབ་པའི་རྩེ་གྲའི་འཇོན་ནུས་སྦྱོང་བརྡར་བྱ་དགོས། སྲ་བརྟན་འགྱུར་མེད་ཀྱིས་ཆབ་སྲིད་ལ་བརྟེན་ནས་དམག་འཛུགས་པ་དང་བཅོས་བསྒྱུར་ལ་བརྟེན་ནས་དམག་སྟོབས་ལྡན་བྱེད་པ། ཚན་རིག་ལག་རྩལ་ལ་བརྟེན་ནས་དམག་དར་སྤེལ་གཏོང་བ། བཅའ་ཁྲིམས་ལ་བརྟེན་ནས་དམག་སྐྱོང་བ་བཅས་བྱས་ཏེ་ཁྱོན་ཡོངས་ནས་རྒྱལ་སྲུང་དང་དམག་དཔུང་དེང་རབས་ཅན་འཛུགས་སྐྲུན་བྱེད་པའི་ཆུ་ཚད་མཐོ་རུ་གཏང་དགོས།

ཞི་ཅིན་ཕིང་གིས་བསྟན་དོན། ང་ཚོའི་དཔའ་བོའི་དམག་དཔུང་ལ་བཙན་འཛུལ་བྱེད་དུ་འོང་མཁན་གྱི་དགྲ་བོ་མཐའ་དག་ལས་རྣམ་པ་རྒྱལ་བའི་ཡིད་ཆེས་དང་འཇོན་ནུས་ཡོད་པ་དང་། ང་ཚོའི་དཔའ་བོའི་དམག་དཔུང་ལ་རྒྱལ་ཁབ་ཀྱི་བདག་དབང་དང་བདེ་འཇགས། འཕེལ་རྒྱས་ཀྱི་ཁེ་ཕན་སྲུང་སྐྱོང་བྱེད་པའི་ཡིད་ཆེས་དང་འཇོན་ནུས་ཡོད་པ། ང་ཚོའི་དཔའ་བོའི་དམག་དཔུང་ལ་དམག་སྟོབས་ལྡན་གྱི་བྱ་གཞག་གི་ལེའུ་གསར་པ་བྲི་རྒྱུའི་ཡིད་ཆེས་དང་འཇོན་ནུས་ཡོད་པར་བརྟེན།  ལོ་བརྒྱ་གཉིས་ཀྱི་འབད་འཐབ་དམིགས་ཡུལ་དང་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་ཡོང་བ། འཛམ་གླིང་ཞི་བདེ་སྲུང་སྐྱོང་བྱེད་པར་བྱས་རྗེས་གསར་པ་དེ་བས་ཆེན་པོ་འཇོག་ཐུབ་པའི་ཡིད་ཆེས་ང་ལ་ཡོད།