ཀྲུང་གོ་བོད་ཀྱི་དྲ་བའི་འཕྲིན། ཟླ4བའི་ཚེས25ཉིན་ནེ་པ་ལར་ས་ཡོམ་རིམ་པ8.1བརྒྱབ་ནས་རང་ལྗོངས་ཀྱི་གཞིས་རྩེ་གྲོང་ཁྱེར་གྱི་གཉའ་ལམ་དང་། སྐྱིད་གྲོང་། དིང་རི་སོགས་རྫོང་ལ་གྱོང་གུན་ཚབས་ཆེན་བཟོས་ཡོད། བློ་མཐུན་ཞིས་ཅིན་ཕིང་གིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ཡོམ་འགོག་གེགས་སེལ་ལས་དོན་ལ་ཚད་མཐོའི་མཐོང་ཆེན་གནང་བ་དང་མཆན་བཀོད་མཛུབ་སྟོན་གལ་ཆེན་ཐེངས་མང་གནང་ཡོད། ཀྲུང་དབྱང་གིས་གེགས་ཁུལ་གྱི་གཞི་རིམ་ཏང་རྩ་འཛུགས་དང་ཏང་ཡོན་ལ་ཐུགས་ཁུར་གནང་ལུགས་མཚོན་པར་བྱ་ཆེད་ཟླ5བའི་ཚེས2ཉིན་ཀྲུང་དབྱང་རྩ་འཛུགས་པུས་ཀྲུང་དབྱང་གི་ཚབ་ཞུས་ནས་དོ་དམ་བྱས་པའི་ཏང་གྲོན་ནང་ནས་རང་ལྗོངས་ཀྱི་ས་ཡོམ་གེགས་ཁུལ་ལ་གེགས་སེལ་ཏང་གྲོན་སྒོར་ཁྲི500གཤམ་སྤྲོད་བྱས་པ་དེ་དག་གཞི་རིམ་ཏང་རྩ་འཛུགས་ཀྱི་བྱེད་སྒོ་སྤེལ་ཡུལ་ཉམས་གསོ་བསྐྱར་སྐྲུན་དང་། ཏང་ཡོན་ལས་བྱེད་པའི་དེང་རབས་ཅན་གྱི་རྒྱང་ཁྲིད་སློབ་གསོའི་སྒྲིག་བཀོད་ཉམས་གསོ། གེགས་བར་བྱུང་བའི་ཏང་ཡོན་ལ་ཁ་གསབ་བཅས་ཀྱི་ཐད་སྤྱོད་རྒྱུ་རེད།  །