བོད་རང་སྐྱོང་ལྗོངས་རིག་གནས་ཐིང་དང་། ལྷ་ས་གྲོང་ཁྱེར་སྲིད་གཞུང་། ཅང་སུའུ་ཞིང་ཆེན་གྱི་ཁ་གཏད་རོགས་སྐྱོར་བྱ་ཡུལ་བོད་ལྗོངས་ལྷ་ས་གྲོང་ཁྱེར་གྱི་མདུན་ཕྱོགས་བཀོད་འདོམས་པུའུ་བཅས་ཀྱིས་མཉམ་དུ་གཉེར་བའི“རིག་གནས་གསར་གཏོད་ཀྱི་བོད་ལྗོངས་ཏེ། བོད་ལྗོངས་ལྷ་སའི་རིག་གནས་གསར་གཏོད་ཀྱི་བརྩམས་ཆོས་རྩེ་གྲའི་སྐོར་སྐྱོད་འགྲེམས་སྟོན”ཟླ་5ཚེས་4ནས་ཚེས་7ཉིན་བར་ནན་ཅིང་གྲོང་ཁྱེར་ཆིན་ཧོའེ་ཆུས་ལའོ་མོན་ཏུང་ལོ་རྒྱུས་རིག་གནས་ཁྲོམ་གཞུང་དུ་བྱས་པ་དང་བྱེད་སྒོ་ཁག་ཆེ་གྲས་9ལས་ནང་སའི་མང་ཚོགས་ཚོས་ཕྱོགས་ཡོངས་ནས་བོད་ཀྱི་རིག་གནས་ཀྱི་ཡིད་དབང་འགུག་ཤུགས་ཚོར་ཐུབ་པ་བྱ་རྒྱུ་རེད།

      ཤེས་རྟོགས་བྱུང་བར་གཞིགས་ན། ད་རེས་ཀྱི་སྐོར་སྐྱོད་འགྲེམས་སྟོན་གྱི་བྱེད་སྒོའི་ཁྲོད་ནང་དོན་ཁག་9ཚུད་པའི་ནང་བོད་མི་རིགས་ཀྱི་ཁྱད་ཆོས་ཧ་ཅང་ཟབ་མོ་ལྡན་པའི་གླུ་གར་འཁྲབ་སྟོན་ཕུད། ད་དུང་བོད་ཀྱི་ཁྱད་ཆོས་ལྡན་པའི་རིག་གནས་གསར་གཏོད་ཐོན་རྫས་ཉོ་ཚོང་འགྲེམས་སྟོན་ཡང་བྱ་རྒྱུ་དང་འགྲེམས་ཁང་གཙོ་བོར་བོད་རུམ་རྩེ་གྲའི་རིགས་ཀྱི་འགྲེམས་ཁང་དང་། བོད་ཀྱི་གསར་རྩོམ་གྱི་འགུལ་བརྙན་ཉམས་ལེན་ཁང་། བོད་རིགས་ཀྱི་རོལ་དབྱངས་དང་གླུ་གར་དཔྱད་འདེམས་གཟིགས་འབུལ་ཁང་། བོད་ཀྱི་ཁྱད་ཆོས་ལྡན་པའི་རིག་གནས་གསར་གཏོད་ཐོན་རྫས་འགྲེམས་སྟོན་ཁང་། རྣམ་གྲངས་འོས་སྦྱོར་ཉོ་ཚོང་ཁང་སོགས་ཁྱད་ལྡན་འགྲེམས་ཁང་ལྔ་བཙུགས་ཏེ་བོད་ཀྱི་ཁྱད་ལྡན་རིག་གནས་ཐོན་ལས་ཁྱབ་ཁོངས་ཀྱི་ལས་རིགས་སྒྲིག་གཞི་དང་། མཐུན་ཚོགས། ཕུལ་བྱུང་ཁེ་ལས་བཅས་དང་དེ་བཞིན་བརྒྱུད་ལམ་སྣེ་མང་དང་། ས་གནས་ས་ཐོག་ཏུ་སྤེལ་རེས་འགྲེམས་འཁྲབ། ཐོན་ལས་ཕྱིར་ཚོང་སོགས་ཀྱི་རྣམ་པའི་ཐོག་ནས་ས་གནས་ས་ཐོག་ཏུ་འགྲེམས་སྟོན་བྱ་རྒྱུ་ཡིན་པ་རེད།

      ད་རེས་ཀྱི་སྐོར་སྐྱོད་འགྲེམས་སྟོན་ཐོག་ད་དུང་བོད་ཀྱི་མངོན་མིན་རིག་གནས་ཤུལ་བཞག་བརྙན་ཕབ་བརྩམས་ཆོས་ཀྱི་གནས་ཚུལ་དངོས་མཚོན་པར་གཞི《ལྷ་ས་ཤེས་རྟོགས》ཞེས་པ་བལྟ་རྒྱུ་དང་རིག་གནས་གསར་གཏོད་ཀྱི་བོད་ཀྱི་སྐོར་སྐྱོད་འགྲེམས་སྟོན་བྱེད་སྒོར་གདན་ཞུ་བྱས་པའི་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་དང་། སྒྱུ་རྩལ་མཁས་ཅན། བརྙན་ཕབ་རིགས་གཅིག་མཁས་ཅན་གྱིས་གློག་བརྙན་བལྟས་ནས་བགྲོ་གླེང་བྱས་ཏེ་ནང་སའི་གྲོང་མིས་བོད་ཀྱི་མངོན་མིན་རིག་གནས་ཤུལ་བཞག་རིག་གནས་ལ་རྒྱུས་མངའ་ལོན་ཤུགས་ཆེ་རུ་གཏོང་བ་དང་བོད་ཀྱི་རིག་གནས་དང་དེ་བཞིན་རིག་གནས་གསར་གཏོད་ཐོན་རྫས་དྲིལ་བསྒྲགས་དང་ཁྱབ་གདལ་གཏོང་རྒྱུ་ཡིན་པ་རེད།

      ད་རེས་ཀྱི་སྐོར་སྐྱོད་འགྲེམས་སྟོན་གྱི་བྱེད་སྒོར་འགྲེམས་སྟོན་དང་ཕྱིར་ཚོང་མཉམ་དུ་བྱེད་པའི་རྣམ་པ་སྤྱད་དེ་ཚོགས་འདུར་ཞུགས་མཁན་དང་འགྲེམས་སྟོན་ནང་ཞུགས་མཁན་ཚོང་པར་ངོ་མཚར་ཆེ་བའི་གངས་ལྗོངས་ཀྱི་རིག་གནས་གང་ལེགས་ངོ་སྤྲོད་དང་ཆབས་ཅིག བོད་ཀྱི་རིག་གནས་གསར་གཏོད་ཀྱི་བརྩམས་ཆོས་རྩེ་གྲ་ངོ་སྤྲོད་བྱ་རྒྱུ་མ་ཟད། ཚོང་དོན་ངོ་འཕྲད་གྲོས་མོལ་ལ་བརྟེན་ནས་མཉམ་ལས་བྱེད་མཁན་འཚོལ་རྒྱུ་རེད། བྱེད་སྒོ་མཇུག་འགྲིལ་རྗེས་རྒྱུན་འཛུགས་རང་བཞིན་གྱི“བོད་ཀྱི་ཁྱད་ལྡན་རིག་གནས་ཐོན་ལས་སྐར་ཁུང”གི་འགྲེམས་ཁང་བཙུགས་ནས་དེ་བོད་ལྗོངས་དང་ཅང་སུའུ་ཡི་ཁྱད་ལྡན་རིག་གནས་ཐོན་ལས་ལས་དོན་སྤེལ་རེས་མཉམ་སྒུལ་གྱི་ལས་སྟེགས་ལ་བརྩི་རྒྱུ་ཡིན་པ་རེད། །