ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི།ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་ཞི་ཅིན་ཕིང་ཅང་ཞི་འཐུས་ཚབ་ཚོགས་པའི་གྲོས་ཞིབ་ལ་ཞུགས། ཚོགས་ཐོག་ཏུ། ཆང་ཝེ། ལུའུ་ཞིན་ཧྲིག མའོ་ཅན་ཁྲིན། ཡིན་མེ་ཀུན། ལིས་ལི། ཞུའུ་ཡིས། ལན་ཉན་ཡིན། མིན་ཅིན་ཧྭ། ལོང་པའོ་ཀྲིག་སོགས་འཐུས་མིས་སྔ་གཞུག་ཏུ་ཁྱོན་ཡོངས་བཞི་ལག་ལེན་གཏིང་ཟབ་བྱེད་པ་དང་། བཅོས་བསྒྱུར་ཟབ་སྤེལ་གཙོར་བཟུང་བ། དམངས་ཚིས་འགན་སྲུང་ལ་ཤུགས་སྣོན་པ། སྨན་བཅོས་འགན་སྲུང་ལམ་ལུགས་འཐུས་ཚང་དུ་གཏོང་བ། དཀའ་ཁག་མང་ཚོགས་ཀྱི་འཚོ་བར་འགན་སྲུང་བྱེད་པ། ཁོར་ཡུག་སྲུང་སྐྱོབ་བྱེད་པ། བཅིངས་འགྲོལ་ས་ཁུལ་རྙིང་བའི་འཕེལ་རྒྱས་དང་དར་སྤེལ་ལ་སྣེ་ཁྲིད་པ་སོགས་ཀྱི་གནད་དོན་དང་དམིགས་ནས་བསམ་འཆར་བཏོན། ཞི་ཅིན་ཕིང་གིས་ནན་ཏན་གྱིས་ཉན་པ་དང་ཟིན་ཐོར་བཀོད་པ་མ་ཟད་ཚང་མ་དང་བསམ་བློ་བརྗེ་རེས་བྱས་པ་དང་། མཇུག་མཐར་གསུངས་བཤད་གལ་ཆེན་གནང་། ཞི་ཅིན་ཕིང་གིས་ཅང་ཞིའི་ལོ་གཅིག་རིང་གི་གྲུབ་འབྲས་ཁས་ལེན་བྱས་རྗེས་ནན་གྱིས་བསྟན་དོན། བཅིངས་འགྲོལ་ས་ཁུལ་རྙིང་བ་དང་ལྷག་པར་དུ་ཀྲུང་དབྱང་གི་སྔར་གྱི་སུའུ་ཝེ་ཨེད་ས་ཁུལ་འཕེལ་རྒྱས་སུ་གཏོང་བའི་ཐད་ཤུགས་བཏོན་ནས།བཅིངས་འགྲོལ་ས་ཁུལ་རྙིང་བའི་མི་དམངས་ཚོའི་རྒྱལ་ཡོངས་མི་དམངས་དང་མཉམ་དུ་འབྱོར་འབྲིང་སྤྱི་ཚོགས་ཁྱོན་ཡོངས་ནས་ལེགས་འགྲུབ་བྱུང་བའི་ཐད་ཀྱི་གྲུབ་འབྲས་ཉམས་སུ་མྱོང་ཐུབ་པར་བྱེད་དགོས། སྐྱེ་ཁམས་ཁོར་ཡུག་སྲུང་སྐྱོབ་ཐད་ཤུགས་བཏོན་ནས།རང་གི་མིག་ཟུང་ལ་གཅེས་སྤྲས་བྱེད་པ་ནང་བཞིན་སྐྱེ་ཁམས་ཁོར་ཡུག་ལ་སྲུང་སྐྱོབ་བྱེད་པ་དང་།ཚེ་སྲོག་ལ་གཅེས་སྤྲས་བཞིན་དུ་སྐྱེ་ཁམས་ཁོར་ཡུག་ལ་གཅེས་སྤྲས་བྱེད་དགོས། སྐྱེ་ཁམས་ཁོར་ཡུག་ལ་གཏོར་བརླག་བྱེད་པའི་བྱ་སྤྱོད་ལ་གུད་ཡངས་སུ་གཏོང་མི་རུང་། ཏང་གིས་ཏང་ལ་དོ་དམ་བྱེད་པ་དང་ཏང་གཟབ་ནན་གྱིས་སྐྱོང་བའི་ཐད་ནས་ལྷོད་གཡེང་ཅུང་ཙམ་ཡང་བྱེད་མི་རུང་།ང་ཚོའི་ཏང་གིས་མཐུན་སྒྲིལ་སྒོས་མི་དམངས་མང་ཚོགས་ཀྱི་སྣེ་ཁྲིད་དེ་རྔུལ་ཁྲག་དང་ཚེ་སྲོག་གིས་བསྐྲུན་པའི་ཅིན་ཀང་རི་བོའི་སྙིང་སྟོབས་དང་སུའུ་ཝེ་ཨེད་ས་ཁུལ་གྱི་སྙིང་སྟོབས་ནམ་ཡང་མི་བརྗེད་པ་དང་མི་རབས་ནས་མི་རབས་ཏུ་རྒྱུན་སྐྱོང་བྱེད་པ་དང་།རྒྱ་ཆེའི་ཏང་ཡོན་དང་ལས་བྱེད་པ་ཚོའི་བསམ་བློའི་སྟེང་ནས་བསྒྱུར་བཅོས་དང་གཞི་རྩ་དམ་སྲུང་བྱེད་པར་སྣེ་ཁྲིད་བྱས་ཏེ།ཐོག་མཐའ་བར་གསུམ་དུ་གུང་ཁྲན་ཏང་མིའི་ཆབ་སྲིད་ཀྱི་ངོ་བོ་རྒྱུན་འཁྱོངས་བྱེད་དགོས།གཞི་རིམ་གྱི་དར་སྲོལ་གནད་དོན་མཐོང་ཆེན་བྱས་ཏེ།སྟོབས་ཤུགས་ཆེན་པོས་མང་ཚོགས་ཉེ་འགྲམ་གྱི་སྤྱོད་ཚུལ་མི་ལེགས་པར་དག་བཅོས་བྱེད་དགོས། ཆབ་སྲིད་སྐྱེ་ཁམས་ཇེ་གཙང་དུ་གཏོང་བར་ཤུགས་འདོན་པ་དང་། དྭངས་གཙང་གིས་སྲིད་ཞུགས་བྱེད་པའི་ཁོར་ཡུག་བཟང་བོ་བསྐྲུན་པ།ཤུགས་ཆེན་པོས་སྡོང་རུལ་རྩ་བ་ནས་མེད་པར་བཟོ་བ་དང་། འབུའི་ཟིན་པའི་སྡོང་བོར་སྨན་གཏོང་བ། སྡོང་འཁྱོག་ཇེ་དྲང་དུ་བཏང་སྟེ། མགོ་ཁྲིད་ལས་བྱེད་པར་ཉེན་བརྡ་གཏོང་དགོས། ལས་བྱེད་པ་དང་ལྷག་པར་དུ་ཏང་ཡོན་མགོ་ཁྲིད་ལས་བྱེད་པའི་ལྟ་སྐུལ་དོ་དམ་ལ་ཤུགས་བསྣན་ནས། ལས་བྱེད་པར་གུད་ཡངས་གཏོང་བའི་སྣང་ཚུལ་མེད་པར་བཟོ་དགོས་ཟེར།  །