ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕེན་གྱིས་ཚེས་བཅུ་གཅིག་ཉིན་དུས་བཅད་ལྟར་ཨ་མེ་རི་ཁའི་ཙུང་ཐུང་ཨོ་པ་མ་ལ་ཁ་པར་བཏང་།རྒྱལ་ཁབ་གཉིས་ཀྱི་མགོ་ཁྲིད་པས་ཕན་ཚུན་ལ་ལུགས་རྙིང་ལོ་སར་གྱི་རྟེན་འབྲེལ་ཞུས་པ་དང་།ལོ་གསར་བའི་ནང་དུ་ཀྲུང་གོ་དང་ཨ་མེ་རི་ཁའི་འབྲེལ་བ་རྒྱུན་སྲིང་དང་བརྟན་བརླིང་།བདེ་བླག་བཅས་ཀྱི་སྒོ་ནས་འཕེལ་རྒྱས་སུ་བཏང་སྟེ་ཀྲུང་གོ་དང་ཨ་མེ་རི་ཁའི་རྒྱལ་ཁབ་ཆེན་པོའི་འབྲེལ་བ་གསར་བའི་འཛུགས་སྐྲུན་ཐད་གྲུབ་འབྲས་སྔར་ལས་ཆེན་པོ་ལེན་པར་འཐད་པ་བྱུང་།ཞི་ཅིན་ཕེན་གྱིས་བསྟན་དོན།འདས་པའི་ལོ་གཅིག་གི་རིང་ལ་ང་ཚོས་ཐེངས་མང་བོར་བརྗེ་རེས་ཟབ་མོ་བྱས་ཏེ།ཀྲུང་གོ་དང་ཨ་མེ་རི་ཁའི་འབྲེལ་བའི་འཕེལ་རྒྱས་དང་རྒྱལ་སྤྱི་དང་ས་ཁུལ་གྱི་ཞི་བདེ་དང་འཕེལ་རྒྱས་ཀྱི་གནད་དོན་གལ་ཆེན་ཐད་ཐུན་མོང་ལྟ་བ་གལ་ཆེན་བྱུང་།ངས་ཙུང་ཐུང་ཁྱེད་དང་མུ་མཐུད་འཐབ་ཇུས་རང་བཞིན་གྱི་བརྗེ་རེས་དང་གྲོས་མོལ་བྱེད་པར་རེ་སྒུག་བྱས་ཡོད།ད་ལོར་ཀྲུང་གོ་དང་ཨ་མེ་རི་ཁའི་འཐབ་ཇུས་དང་དཔལ་འབྱོར་གྲོས་མོལ་དང་།མི་ཚུལ་བརྗེ་རེས་ཀྱི་མཐོ་རིམ་གྲོས་མོལ་ཨ་མེ་རི་ཁ་ནས་བསྡུ་རྒྱུ་ཡིན་ལ།ཕྱོགས་གཉིས་ཀྱིས་མཉམ་དུ་འབད་བརྩོན་བྱས་ཏེ།ཕན་འབྲས་བཟང་བོ་མང་ཙམ་ལེན་ཅི་ཐུབ་བྱ་རྒྱུ་ནི་ངའི་རེ་བ་ཡིན།ཕྱོགས་གཉིས་ཀྱིས་དཔལ་འབྱོར་ཉོ་ཚོང་དང་དམག་དོན།ནུས་ཁུངས།ཁོར་ཡུག་སྲུང་སྐྱོབ།རྨང་གཞིའི་སྒྲིག་ཆས་འཛུགས་སྐྲུན།ཁྲིམས་འཛིན་སོགས་ཁྱབ་ཁོངས་ཀྱི་དངོས་གཉེར་མཉམ་ལས་རྒྱ་བསྐྱེད་པ་དང་།མི་ཚུལ་བརྗེ་རེས་རྒྱ་བསྐྱེད་དེ།ཀྲུང་གོ་དང་ཨ་མེ་རི་ཁའི་འབྲེལ་བའི་རྨང་གཞི་རྒྱུན་ཆད་མེད་པར་སྲ་བརྟན་དུ་གཏོང་དགོས།ཕྱོགས་གཉིས་ཀྱིས་ཕ་རོལ་བའི་སྲོག་ཤིང་གི་ཁེ་ཕན་དང་ལངས་ཕྱོགས་གཙོ་བོར་བརྩི་བཀུར་དང་ལྟ་སྐྱོང་བྱེད་འོས།ཨ་མེ་རི་ཁ་ཕྱོགས་ཀྱིས་ཀྲུང་གོའི་ཐེ་ཝན་དང་བོད་སོགས་ཀྱི་གནད་དོན་ཐད་ཀྱི་ལངས་ཕྱོགས་ལ་མཐོང་ཆེན་བྱས་ཏེ།ཀྲུང་གོ་དང་ཨ་མེ་རི་ཁའི་འབྲེལ་བར་དགོས་པ་མེད་པའི་བར་ཆད་མི་བཟོ་རྒྱུ་ནི་ངའི་རེ་བ་ཡིན་ཟེར།ཨོ་པ་མ་ཡིས་བསྟན་དོན།ཨ་མེ་རི་དང་ཀྲུང་གོའི་འབྲེལ་བར་ཉིས་སྟོང་བཅུ་བཞི་ལོར་ལོ་རྒྱུས་རང་བཞིན་གྱི་གྲུབ་འབྲས་ཐོབ་ཡོད།ཨ་མེ་རི་ཁས་ད་ལྟའི་རྨང་གཞིའི་སྟེང་ཨ་མེ་རི་ཁ་དང་ཀྲུང་གོའི་འབྲེལ་བའི་འཕེལ་རྒྱས་གནས་བབ་སྲུང་འཛིན་བྱས་ཏེ།དཔལ་འབྱོར་ཉོ་ཚོང་སོགས་ཁྱབ་ཁོངས་ཀྱི་དངོས་གཉེར་མཉམ་ལས་ལ་ཤུགས་སྣོན་པ་དང་།ས་ཁུལ་དང་འཛམ་གླིང་རང་བཞིན་གྱི་འགྲན་རྩོད་ལ་མཉམ་དུ་ཁ་གཏད་འཇལ་ནས།འགལ་བར་དོ་དམ་དང་ཚོད་འཛིན་བཟང་བོ་བྱེད་འདོད་ཡོད།ཨ་མེ་རི་ཁས་རྒྱལ་ཁབ་གཉིས་ཀྱིས་བཀོད་ཟིན་པའི་ཐུན་མོང་གི་ལྟ་བ་དངོས་འབེབ་བྱེད་པ་དང་།ནམ་ཟླའི་འགྱུར་ལྡོག་ཁྱབ་ཁོངས་ཀྱི་བརྗེ་རེས་དང་མཉམ་ལས་ལ་ཤུགས་བསྣན་ནས།མཉམ་འབྲེལ་རྒྱལ་ཚོགས་ཕ་རེ་སིའི་ནམ་ཟླའི་འགྱུར་ལྡོག་ཚོགས་ཆེན་ལ་གྲུབ་འབྲས་ཐོབ་པར་བྱེད་པའི་ཐད་ནས་མཐུན་སྦྱོར་བྱེད་རྒྱུའི་རེ་བ་བཅངས་ཡོད།ཨ་མེ་རི་ཁས་རྒྱལ་ཁབ་གཉིས་དང་འཛམ་གླིང་གི་དཔལ་འབྱོར་འཕེལ་རྒྱས་ལ་ཧ་ཅང་མཐོང་ཆེན་བྱེད་བཞིན་ཡོད་ལ།ཀྲུང་གོའི་བར་གྱི་མཐུན་སྦྱོར་ལ་ཤུགས་སྣོན་པ་དང་།ཕན་ཚུན་གྱི་ལངས་ཕྱོགས་ལ་རྒྱབ་སྐྱོར་བྱེད་འདོད་ཡོད་ཟེར།རྒྱལ་ཁབ་གཉིས་ཀྱི་མགོ་ཁྲིད་པས་ད་དུང་འཛམ་གླིང་གིས་ཧྥ་ཞི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་འཁོར་བདུན་ཅུ་ལོན་པར་དྲན་གསོ་ཞུ་བ་དང་།དྲ་རྒྱའི་བདེ་འཇགས།དབྱི་ལང་གི་ཉིང་རྡུལ་གནད་དོན།ཁྲའོ་ཞན་ཕྱེད་གླིང་གི་གནས་བབ་སོགས་རྒྱལ་སྤྱི་དང་ས་ཁུལ་གྱི་གནད་དོན་ཐད་ནས་བསམ་ཚུལ་བརྗེ་རེས་བྱས་པ་དང་།མཐུན་སྦྱོར་མཉམ་ལས་ལ་ཤུགས་བསྣན་ཏེ།ཕྱོགས་སོ་སོས་ལག་རྡང་མཉམ་སྦྲེལ་གྱིས་རྒྱལ་སྤྱིའི་བདེ་འཇགས་དང་བརྟན་འཇས་དང་འབྲེལ་བའི་གནད་དོན་གལ་ཆེན་ཐག་གཅོད་འདོད་ཡོད་པའི་ཚུལ་བསྟན། །