ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཁབ་ཁྲལ་དོན་སྤྱི་ཁྱབ་ཅུད་ཀྱིས་ཉིན་ཤས་གོང་རླངས་འཁོར་ཉོ་སྒྲུབ་ཀྱི་དཔྱ་ཁྲལ་བསྡུ་བའི་དོ་དམ་བྱེད་ཐབས་ཞེས་པ་ཡོངས་བསྒྲགས་བྱས་ཡོད་པ་མ་ཟད་སྤྱི་ལོ་2015ལོའི་ཟླ་2པའི་ཚེས་1ཉིན་ནས་བཟུང་ལག་བསྟར་བྱེད་འགོ་འཛུགས་རྒྱུའི་གཏན་འབེབས་བྱས་ཡོད་པ་རེད།

ཉེ་ལམ་ལོ་ཤས་རིང་། རང་རྒྱལ་གྱི་དཔལ་འབྱོར་རྒྱུན་མཐུད་ངང་གོང་འཕེལ་ཕྱིན་པ་དང་། མི་དམངས་ཀྱི་ཡོང་འབབ་བརྟན་པོའི་ངང་འཕར་སྣོན་བྱུང་བས། སྒེར་གྱི་རླངས་འཁོར་ཉོ་ཚད་ཀྱང་མགྱོགས་མྱུར་ངང་མང་དུ་ཕྱིན་ཡོད་པ་རེད། རླངས་འཁོར་ཉོ་སྒྲུབ་དཔྱ་ཁྲལ་བསྡུ་མཁན་ཡང་དེ་མཚུངས་སུ་མང་དུ་ཕྱིན་ཡོད་པས། དེས་ཁྲལ་འཇལ་རེ་ཞུའི་འགྲོ་ལུགས་གཉེར་རྒྱུ་སྟབས་བདེ་ཚད་དང་ཁྲལ་འཇལ་ཞབས་ཞུའི་ཆུ་ཚད་ལ་ཡང་རེ་བ་དེ་བས་མཐོ་རུ་ཕྱིན་ཡོད། དེར་བརྟེན། རྒྱལ་ཁབ་ཁྲལ་དོན་སྤྱི་ཁྱབ་ཅུད་ཀྱིས་ཁྲལ་འཇལ་ཁུར་པོ་ཡང་དུ་གཏོང་རྒྱུ་དང་། ཆ་འཕྲིན་དོ་དམ་དཔྱ་ཁྲལ་ལ་ཤུགས་སྣོན་རྒྱག་རྒྱུ། བསྡུ་བ་དང་དོ་དམ་རྒྱུད་རིམ་ལེགས་སུ་གཏོང་རྒྱུ་བཅས་ཀྱི་རྩ་དོན་ལ་བརྩི་སྲུང་ཞུས་ཏེ། ཁྲལ་འཇལ་མཁན་གྱིས་དོ་ཁུར་བྱེད་ས་དང་། གཞི་རིམ་གྱི་ཁྲལ་བསྡུ་ལས་ཁུངས་ཀྱིས་དོ་ཁུར་བྱེད་ས། སྤྱི་ཚོགས་ཀྱིས་ལན་ཆ་མངོན་གསལ་དོད་པོ་བྱེད་ས་བཅས་ཀྱི་གནད་དོན་ཁག་ཅིག་ཐག་གཅོད་བྱེད་ཆེད། ཁྱོན་ཡོངས་ནས་རླངས་འཁོར་ཉོ་སྒྲུབ་ཀྱི་ཁྲལ་བསྡུ་དོ་དམ་བྱེད་ཐབས་ལ་བཟོ་བཅོས་བརྒྱབ་ནས། རླངས་འཁོར་ཉོ་སྒྲུབ་ཀྱི་ཁྲལ་བསྡུ་དོ་དམ་ལམ་ལུགས་སྔར་བས་འཐུས་སྒོ་ཚང་དུ་བཏང་ཐོག རླངས་འཁོར་ཉོ་སྒྲུབ་ཀྱི་དཔྱ་ཁྲལ་འཇལ་བའི་ལས་དོན་སྔར་བས་སྟབས་བདེ་བ་དང་། རླངས་འཁོར་ཉོ་སྒྲུབ་ཀྱི་དཔྱ་ཁྲལ་བསྡུ་བའི་དོ་དམ་ལས་ཀའི་ལས་ཆོད་དང་ཞབས་ཞུའི་སྤུས་ཚད་མཐོ་རུ་བཏང་ཡོད་པ་རེད།

ཤེས་རྟོགས་བྱུང་བར་གཞིགས་ན། གོམ་སྟབས་རྗེས་མར། རྒྱལ་ཁབ་ཁྲལ་དོན་སྤྱི་ཁྱབ་ཅུད་ཀྱིས་རླངས་འཁོར་ཉོ་སྒྲུབ་ཀྱི་ཁྲལ་བསྡུ་དོ་དམ་སྔར་བས་ལེགས་བཅོས་བཏང་ནས། རླངས་འཁོར་ཉོ་བའི་ཁྲལ་བསྡུ་དོ་དམ་དང་ཁྲལ་བསྡུ་དོ་དམ་ཀྱི་གནས་བབ་ཧྲིལ་པོ་ཟུང་འབྲེལ་ཐུབ་པ་བྱ་རྒྱུ་ཡིན་པ་རེད།  །