མཚོ་སྔོན་ཞིང་ཆེན་བོད་སྨན་ཁང་ཁྲི་ཀའི་ཡན་ལག་སྨན་ཁང་།
 

ཀྲུང་གོ་བོད་ཀྱི་དྲ་བའི་འཕྲིན། ཉེ་སྔོན། ཁྲི་ཀ་རྫོང་གི་ཆེས་ཆེ་བའི་མི་རིགས་སྨན་ཁང་སྟེ་ཁྲི་ཀ་བོད་སྨན་ཁང(མཚོ་སྔོན་ཞིང་ཆེན་བོད་སྨན་ཁང་ཁྲི་ཀའི་ཡན་ལག་སྨན་ཁང)དངོས་སུ་སྒོ་ཕྱེས་ཤིང་། དེས་མཚོ་སྔོན་ཞིང་ཆེན་བོད་སྨན་ཁང་གི་དགེ་མཚན་བེད་སྤྱད་ནས་མཉམ་དུ་དོ་དམ་བྱེད་པའི་སྒྲིག་གཞི་བཙུགས་ཏེ་རིམ་པ་གསུམ་པའི་སྨན་ཁང་གི་སྨན་བཅོས་ཐོན་ཁུངས་ཀྱི་ཞབས་ཞུ་དམངས་ལ་མྱོང་དུ་བཅུག་པ་རེད།
    སྒོ་ཕྱེས་པའི་ཉིན་དང་པོར་ཁྲི་ཀ་བོད་སྨན་ཁང་གིས་འགན་བབ་སྨན་བཅོས་དང་སྨན་རྫས་སྟེར་བའི་བྱ་འགུལ་སྤེལ་ནས་རྒྱ་ཆེའི་རོང་འབྲོག་མང་ཚོགས་ཀྱིས་བསྟོད་བསྔགས་ཐོབ་ལ། བསྡོམས་རྩིས་ལྟར་ན་ཉིན་དེར་སྨན་པ་བསྟེན་པའི་མི་གྲངས་སྟོང་གཅིག་དང་སུམ་བརྒྱ་ལྷག་ལ་སླེབས་པ་དང་། རིན་ཐང་སྒོར་ཁྲི་ལྔ་ལྷག་གི་སྨན་རྫས་བྱིན་པ་རེད།
    ཁྲི་ཀ་བོད་སྨན་ཁང་གི་འགོ་གཙོ་འཛོམས་སྐྱིད་ལགས་ཀྱིས་བཤད་རྒྱུར། མིག་སྔར་སྨན་ཁང་གི་སྨན་བཅོས་སྒྲིག་བཀོད་དང་ཁོར་ཡུག་སོགས་འཐུས་ཚང་དུ་གཏོང་བཞིན་ཡོད་ཅིང་། མ་འོངས་པར་སྨན་བཅོས་ཞབས་ཞུའི་གོ་རིམ་ཁྲོད་ཁོ་ཚོས་མུ་མཐུད་དུ་བོད་ལུགས་གསོ་རིག་གི་དགེ་མཚན་འདོན་སྤེལ་བྱ་ངེས་ཡིན་ཞེས་བརྗོད་པ་རེད།  །