ཞིན་ཧྭ་གསར་འགྱུར་ཁང་ལན་ཀྲུའུ་ནས་ཟླ་བ4པའི་ཚེས27ཉིན་འབྱོར་བའི་གཏམ་གསར། ལོ60ལ་འཚོལ་བསྡུ་བྱས་པར་བརྒྱུད། ཀན་ལན་བོད་རིགས་རང་སྐྱོང་ཁུལ་གྱི་མི་རབས་འགའི་རིག་གནས་ལས་ཀ་སྒྲུབ་མཁན་གྱིས་འབད་བརྩོན་འོག མིག་སྔར། ཅུང་ཆ་ཚང་བའི་སྒོ་ནས་ཀན་ལྷོའི་བོད་རིགས་དམངས་གླུ་བཀོད་པའི《ཀན་ལྷོ་བོད་རིགས་དམངས་གླུ་གཅིག་བསྡུས》ཀྱི་དེབ་འདི་པར་སྐྲུན་བྱས་ཏེ་མི་རྣམས་ཀྱི་མིག་ལམ་དུ་མངོན་པ་རེད། དེབ་འདི་པར་སྐྲུན་བྱེད་སྟངས་ནི་ཡི་གེའི་རྣམ་པའི་ཐོག་ནས་བོད་པའི་སྐད་ངག་སྙན་མོ་མུ་མཐུད་ནས་ཉར་ཚགས་བྱས་པར་བརྟེན། ས་གནས་དེ་གའི་དམངས་གླུ་ཁ་རྒྱུད་ལ་བརྟེན་ནས་རྒྱུན་འཛིན་བྱས་པའི་ལོ་རྒྱུས་མཇུག་བསྒྲིལ་བ་རེད།
    ཀན་ལྷོ་བོད་རིགས་དམངས་གླུ་ལ་བརྩེ་དུངས་གསལ་ཞིང་མཚོན་ཚུལ་ཞིབ་པ་དང་། གཞས་གདངས་འདྲ་མིན་སྣ་ཚོགས་ཡོད་པ། བརྗོད་བྱ་རྒྱ་ཆེ་བ། དགའ་སྟོན་ཞུ་བའི་གླུ་དབྱངས་དང་བརྩེ་གླུ་སོགས་ཀྱི་དབྱེ་བ་ཡོད་ཅིང་། 2008ལོར་ཐེངས་གཉིས་པའི་རྒྱལ་ཁབ་རིམ་པའི་དངོས་པོ་མིན་པའི་ཤུལ་བཞག་རིག་གནས་ལ་བདམས་པ་རེད།
    1953ལོར་ཀན་ལྷོ་བོད་རིགས་རང་སྐྱོང་ཁུལ་བཙུགས་པ་ནས་བཟུང་། ས་གནས་དེ་གའི་རིག་གནས་སྡེ་ཁག་གིས་ཀན་ལྷོ་དམངས་གླུ་བསྡུ་གསོག་བྱ་རྒྱུའི་འབྲེལ་ཡོད་ལས་ཀ་སྒྲུབ་འགོ་བརྩམས། ངོ་སྤྲོད་བྱས་པར་གཞིགས་ན།《ཀན་ལྷོ་བོད་རིགས་དམངས་གླུ་གཅིག་བསྡུས》ཀྱི་དེབ་ནང་བོད་རིགས་དམངས་གླུ་ཁྱོན་བསྡོམས་682བསྡུ་འགོད་བྱས་ཡོད། དེར་གླུ་གར་གྱི་ཕ་ས་བླ་བྲང་གི་ཆང་གཞས་དང་གླིང་གེ་སར（སྒྲུང་མཁན）མཛའ་གཞས། ཀླུ་ཆུ། རྨ་ཆུའི་རྩྭ་ཐང་རིག་གནས་ཀྱི་རྒྱུད་དྲུག་པི་ཝང་གཞས་གཏོང་རོལ་དཀྲོལ་སྦྲགས་མ། ཅོ་ནེའི་ཧོར་རིགས་དམངས་གླུ་དང་གསོལ་སྨོན་བྲོའི་གཞས་གདངས། འབྲུག་ཆུ་དང་ཐེ་བོ་གཉིས་ཀྱི་རྡོག་ཐིག་དང་གཡང་གསོལ་སོགས་ཀྱི་ཞབས་བྲོའི་གླུ་དབྱངས་བཅས་འདུས་ཡོད་པ་རེད།
    《ཀན་ལྷོ་བོད་རིགས་དམངས་གླུ་གཅིག་བསྡུས》ཀྱི་དེབ་འདི་པར་དུ་སྐྲུན་པ་དེས་ཀན་ལྷོ་བོད་ཁུལ་གྱི་དམངས་གླུ་ཁ་རྒྱུན་ལ་བརྟེན་ནས་རྒྱུན་འཛིན་བྱས་པའི་ལོ་རྒྱུས་མཇུག་བསྒྲིལ་ཞིང་། ཕྱིན་ཆད་ད་དུང་གླུ་པས་འཁྲབ་སྟོན་བྱས་པར་བརྒྱུད་དེ་ཀན་ལྷོའི་དམངས་གླུ་བརྙན་བརྡའི་འགུལ་ཚད་དུ་ཕབ་ལེན་བྱས་ནས་འདྲ་པར་གྱི་རྣམ་པའི་ཐོག་ནས་བོད་པའི་སྐད་ངག་སྙན་མོ་རུ་ཉར་ཚགས་བྱས་ཏེ་རྒྱུན་འཛིན་བྱེད་ཐུབ་བྱ་རྒྱུ་ཡིན་ཞེས་ཀན་ལྷོ་ཁུལ་རིག་གནས་ཁང་གི་འགོ་དཔོན་མ་ཆིང་ལུའུ་ཡིས་དེ་ལྟར་བཤད་པ་རེད།