༄༅།།ཕུན་ཚོགས་སྡེ་བཞིའི་སྲིད་ལ་དབང་བསྒྱུར་ཅིང་།།གཙུག་ལག་རིག་པའི་འོད་སྣང་ཕྱོགས་བརྒྱར་འགྱེད།།སྲིད་འབྱོར་ཁྲིམས་ཀྱིས་འབངས་མི་བདེར་འགོད་པའི།།སངས་རྒྱས་རྒྱ་མཚོར་སྙིམ་པས་མེ་ཏོག་འཐོར།།གང་དེའི་ལུགས་གཉིས་སྤྲིན་གྱི་ཕུང་པོ་ལས།།གངས་ལྗོངས་གོ་ལའི་རྩེ་མོར་བབས་པའི་ཆར།།ཐིག་ཙམ་ལོངས་སུ་སྤྱོད་པའི་ཉེར་ལེན་གྱིས།།དྲན་གསོའི་ཆེད་དུ་ཉུང་ཙམ་བྲི་བར་བྲེལ།།
  སྡེ་སྲིད་ཀྱི་རྗེས་ཤུལ་དང་པོ་མཇལ་བ།།
ཞེས་མཆོད་བརྗོད་དང་བགྱི་བ་དམ་བཅའ་སྔོན་དུ་བཏང་སྟེ།འདིར་སྡེ་སྲིད་སངས་རྒྱས་རྒྱ་མཚོའི་རྗེས་ཤུལ་བཙལ་བ་ལ།གངས་རིའི་མུ་ཁྱུད་ཅན་གྱི་ལྗོངས་འདི་ནི།།སྔར་རྒྱལ་ཁབ་གཞན་དང་།མི་རིགས་གཞན་དང་མི་འདྲ་བར་ཆོས་དང་སྲིད་ཀྱི་དབང་ཆ་གཉིས་མི་གཅིག་གིས་བཟུང་བའི་ལོ་རྒྱུས་རིང་ཞིང་།།སྡེ་སྲིད་ཅེས་པའི་ཐ་སྙད་འདི་ཡང་ཐོག་མར་ཕག་མོ་གྲུབ་པའི་སྐབས་ནས་བྱུང་བ་ཞིག་ཏུ་མངོན་ལ།དེ་ཡང་གྲུབ་མཐའ་བཀའ་བརྒྱུད་པས་བོད་དབུས་གཙང་ལ་དབང་བསྒྱུར་བའི་སྐབས་ཀྱི་དང་པོ་སྟེ།ཏྭའི་སི་ཏུ་བྱང་ཆུབ་རྒྱལ་མཚན་གྱི་སྐབས་ནས་སྡེ་སྲིད་ཅེས་པའི་ཐ་སྙད་འདི་ཐོག་མར་བྱུང་བར་མངོན་ལ།དེ་ནས་བཟུང་རྒྱལ་རབས་བཅུ་གཉིས་ཙམ་བྱུང་བ་རྣམས་ལ།སྡེ་སྲིད་ཕག་མོ་གྲུ་པ་ཟེར་གྱིན་ཡོད་པར་སྣང་།དེ་ཡང་སྡེ་སྲིད་ཅེས་པའི་གོ་དོན་ནི།བོད་སྤྱིའི་ཆབ་སྲིད་ཀྱི་གོ་གནས་མཐོ་ཤོས་འཛིན་མཁན་དེའི་མཚན་ཡིན།རྒྱལ་དབང་སྐུ་ཕྲེང་ལྔ་པ་བློ་བཟང་རྒྱ་མཚོས་རབ་བྱུང་བཅུ་གཅིག་པའི་ཆུ་རྟ༡༦༤༢ལོ་ནས་བོད་སྤྱིའི་ཆོས་སྲིད་ལུགས་གཉིས་ཀྱི་འགན་དབང་བཞེས་ཏེ།ཐོག་མར་བསྐོས་པའི་སྡེ་སྲིད་ནི།སྟོད་ལུང་རྒྱ་ལེར་འཁྲུངས་པའི་བསོད་ནམས་ཆོས་འཕེལ་ལམ་བསོད་ནམས་རབ་བརྟན་སྡེ་སྲིད་དང་པོ་དང་།རབ་བྱུང་བཅུ་གཅིག་པའི་ལྕགས་བྱི༡༦༦༠ལོར་གྲོང་སྨད་པ་ཕྲིན་ལས་རྒྱ་མཚོ་བསྐོས་པ་གཉིས་པ།འདི་སྡེ་སྲིད་སངས་རྒྱས་རྒྱ་མཚོའི་མེས་པོ་ཡིན།རབ་བྱུང་བཅུ་གཅིག་པའི་ས་བྱ༡༦༦༩ལ་བློ་བཟང་མཐུ་སྟོབས་དང་།རབ་བྱུང་བཅུ་གཅིག་པའི་མེ་འབྲུག༡༦༧༦ལ་བློ་བཟང་སྦྱིན་པ་ནི་བཞི་པ་ཡིན།ལྔ་པ་སྡེ་སྲིད་སངས་རྒྱས་རྒྱ་མཚོ་ནི།བོད་ཀྱི་ལོ་རྒྱུས་ལ་ཆ་རྒྱུས་ཡོད་པའི་རིག་གནས་པ་རྣམས་ཀྱིས་མཁྱེན་གྱི་ཡོད་པས་འདི་འདྲ་གལ་མི་ཆེ་ཞིང་།བོད་ཀྱི་སྤྱི་ཚོགས་ཀྱི་ཁྱབ་ཁོངས་སུའང་ལོ་རྒྱུས་ཐོས་མྱོང་བའམ།ལོ་རྒྱུས་ལ་དོ་སྣང་བྱེད་མཁན་གྱི་རྒན་རྒོན་ཉུང་ཤས་ཙམ་རེ་ལས།བོད་མི་ཕལ་ཆེར་གྱིས་ལྟོ་གོས་ཙམ་དོན་དུ་གཉེར་བ་ལས་འདིའི་མཚན་ཙམ་ཡང་རྣ་བས་ཐོས་ཀྱང་མ་མྱོང་བ་ཆེས་མང་བ་ནི་མིག་མཐོང་ལག་ཟིན་ཡིན་པས།དེ་ནི་ཆེས་ཕང་བ་ཞིག་མ་རེད་དམ།དཔེར་ན།བདག་གྲུ་འཛིན་གཉིས་པ་ཕོ་བྲང་པོ་ཏྭ་ལ་མཇལ་དུ་ཕྱིན་པའི་སྐབས་དེར།ཕྱི་རྒྱལ་ཁག་གི་མི་སྣ་དང་།རྒྱལ་ནང་གི་མི་རིགས་ཁག་དང་།རང་རིགས་ཀྱི་ཕོ་མོ་རྒན་གཞོན་ཆེས་མང་བ་གནས་མཇལ་ལ་ཕེབས་ཀྱི་ཡོད་པ་བཅས་མང་པོ་ཞིག་དང་ཐུག་ཕྲད་བྱུང་།སྐབས་དེར་གླེང་མོལ་བྱུང་བ་ལྟར་ན།ཕྱི་རྒྱལ་ཁག་གི་མི་སྣ་དང་།རིགས་གཞན་གྱི་མི་རྣམས་ལ་དྲི་བ་བྱས་ཚེ།ཞིབ་ཕྲའི་ལོ་རྒྱུས་ཤོད་རྒྱུ་མེད་ནའང་ཐུག་ཁག་མེད་མོད།ཕོ་བྲང་སུས་བཞེངས་པ་དང་།རྟེན་གང་ཡིན།སྣང་ཚུལ་གང་བྱུང་སོགས་གསལ་པོར་བཤད་རྒྱུ་འདུགའོན་ཀྱང་རང་རིགས་ཀྱི་མཇལ་མི་བརྒྱ་ཆ་བརྒྱད་ཅུ་ཙམ་ལ།ལྷ་ཁང་ཆེ་བ་དང་།སྐུ་འདྲ་ཆེན་པོ།གསེར་དངུལ་གྱི་མཆོད་ཆས་གང་ཡོད་ཙམ་མིག་གིས་བལྟ་བ་ལས།ཕྱི་ནང་གི་རྟེན་རྣམས་གཙོ་ཕལ་གང་ཡིན་དང་།རྒྱུ་མཚན་ཅི་ཞིག་གིས་རྟེན་བྱིན་ལྡན་དུ་བརྩི་བ།ལོ་རྒྱུས་གསར་རྙིང་གང་འདྲ་ཡིན་མིན་སོགས་ལ་བརྟག་དཔྱད་གཏན་ནས་མེད་པར་གྲགས་པ་འུར་ལངས་ཙམ་གྱི་རྗེས་སུ་འབྲངས་ནས་རྒྱུག་པ་ལས།དོན་གནད་གང་ཡང་ངོ་འཕྲོད་མེད་ལ།ཨི་འཕྲོད་ཀྱི་རེ་བའང་བྱེད་ཀྱི་མེད་པ་མང་པོ་ཞིག་དང་འཕྲད་ནས་གླེང་མོལ་བྱུང་ཚེ།ལུགས་གཉིས་གང་ཐད་ནས་ཡིད་སྐྱོ་འོས་པའི་གནས་སུ་མཐོང་།ཡང་དེར་ཕྱི་རྒྱལ་གྱི་མི་སྐྲ་ཁམ་པ་མིག་སྔོ་སྐྱ།བོད་སྐད་ཆགས་ཐོགས་མེད་པ་ཞིག་གིས་རང་རིགས་ཀྱི་མི་འགའ་ཞིག་ལ་རྟེན་རྣམས་ཀྱི་ལོ་རྒྱུས་ངོ་སྤྲོད་བྱེད་ཀྱིན་ཡོད་པ་མཐོང་བས་བདག་ནི་ངོ་གནོང་དངོས་པ་ཞིག་ཏུ་གྱུར།དེ་ནས་ད་ལན་འདིར་བདག་ནི་ཤེས་བྱ་དམན་ལ་ན་ཚོད་ཀྱི་ཁུར་གྱིས་ནོན་ཀྱང་འདི་འདྲའི་རིགས་ལ་དོ་སྣང་དང་མོས་ཆེ་བ་ཙམ་ཡིན་པས་ཁོང་གི་རྗེས་ཤུལ་རྣམས་འཇལ་བར་ཆེད་དུ་བསྐྱོད་ནས་འདི་ལྟར་བྲིས་པ་ལགས།སྡེ་སྲིད་སངས་རྒྱས་རྒྱ་མཚོ་ནི།གྲོང་ཁྱེར་ལྷ་སའི་བྱང་ཕྱོགས་སེ་ར་དགོན་གྱི་ནུབ་ཕྱོགས་ཀྱི་ལུང་པའི་ཕུ་ན་སྲོང་བཙན་སྒམ་པོའི་སྒྲུབ་གནས་ཕ་བོང་ཁའི་ནུབ་ཕྱོགས་ཐག་མི་རིང་བར་ཡོད།ས་གནས་དེ་ལ་སྔར་ཉང་བྲན་གྲོང་སྨད་གཞིས་ཀ་ཟེར།ད་ལྟ་ར་མོ་རྩེ་ཟེར།དེ་ན་འཁྲུངས་ཁང་དངོས་ཀྱི་ཤུལ་ན་ད་ལྟ་ཞིང་པ་དུད་ཚང་ཞིག་གིས་ཁང་པ་ཐོག་གཅིག་མ་རྒྱ་མི་ཆུང་ཙམ་ཞིག་ཕུབ་འདུགདུད་ཚང་དེའི་བཟང་དཔོན་རང་ལོ་དོན་དགུར་སོན་པའི་རྒད་པོ་དགྲ་འདུལ་ཟེར་བ་རྣམ་རིག་གསལ་ལ་ཞལ་ལྕེ་བདེ་པོ་ཞིག་བཞུགས་པ་དེས་གསུངས་པ་ལྟར་ན།སྔར་ཁང་པ་དེའི་སྒོ་འགྲམ་དུ་སྡེ་སྲིད་སངས་རྒྱས་རྒྱ་མཚོ་རང་གི་ཕྱག་བཏབ་ཤུག་སྡོང་ཆེན་པོ་གཉིས་ཡོད་ལ།དེ་ཆེར་རྒྱས་ན་བོད་འདིར་ཡར་རྒྱས་ཆེན་པོ་འབྱུང་བའི་ལྟས་སུ་གསུངས་ཡོད་པ་རེད་ཅེས་མེས་པོའི་ཞལ་ལས་ཐོས་མྱོང་ཟེར།འོན་ཀྱང་ཤུག་སྡོང་དེ་གཉིས་རིག་གནས་གསར་བརྗེའི་སྐབས་མེད་པར་བཏང་འདུག་ཀྱང་།རྒན་པོ་དེ་ཁོ་རང་གི་ཁང་པ་བཟོས་རྗེས་ཁོག་མ་གཉིས་ཀྱི་ནང་དུ་ཤུག་པ་རེ་རྨོས་ནས་ལོ་ལྔ་ལ་གསོས་རྗེས།ཕྱི་རོལ་སྒོའི་མདུན་ཕྱོགས་སུ་སྤོས་པ་ད་ལྟ་ཐོག་ཚད་གཉིས་མ་ལོངས་ཙམ་སྐྱེས་འདུགདེ་ནི་ཤུག་པ་ཁྲོ་གཉེར་ཅན་ཕོ་ཤིང་མོ་ཤིང་གཉིས་མཛེས་ཤིང་བརྗིད་ཆགས་པ་རེ་སྐྱེས་འདུགཤུག་པ་དེ་གཉིས་ནི་རྒན་པོ་རང་གི་བུ་ཆུང་བ་ལོ་ཉེར་བདུན་ལོན་པ་ཞིག་འདུག་པ་དེ་དང་ན་མཉམ་ཡིན་ཟེར།ད་དུང་རྒན་པོ་དེས་སྔོན་ལྷ་ལྡན་སྨན་རྩིས་ཁང་གི་སློབ་དཔོན་ཆེན་མོ་བྱམས་པ་འཕྲིན་ལས་ལོ་ལྟར་དབྱར་དུས་ཤིག་ལ་དེར་ཕེབས་ཏེ་སྨན་བླ་གསུངས་ཤིང་།རྡོ་རྗེ་གཡུ་སྒྲོན་མར་བསང་གསོལ་མཛད་ཀྱི་ཡོད་ཟེར།སྐབས་དེར་བསྒྲོན་པའི་སྐུ་པར་ཡང་ང་ཚོར་བསྟན་བྱུང་།ཁང་པ་དེའི་རྒྱབ་ཕྱོགས་སུ་སྤང་ཐང་ཉམས་དགའ་བ་ཅུང་ཐུར་དུ་གསེག་པ་ཞིག་གི་སྟེང་དུ།སྟར་གའི་སྡོང་པོ་ཆེ་བ་རྒྱ་ནག་གི་རི་མོ་བས་བྲིས་པའི་ཤིང་ཚེ་རིང་ཟེར་བ་དང་མཚུངས་པ་བཅུ་སྐྱེས་འདུགདེའི་དཀྱིལ་ན་སྡེ་སྲིད་རང་ཉིད་ཀྱིས་ཕྱག་བཏབ་རེད་ཅེས་པའི་སྟར་སྡོང་ཆེན་པོ་ཞིག་ཡོད་པར་ད་ལྟ་རླུང་རྟ་སོགས་མང་པོ་བཏགས་འདུགསྟར་སྡོང་དེ་དག་ལ་ད་ལྟ་རིག་དངོས་ཤུལ་རྙིང་སྲུང་སྐྱོབ་ཁོངས་སུ་ཡོད་པའི་སྦྱར་ཡིག་ཀྱང་བཀོད་འདུགདེ་མིན་ཁམ་སྡོང་ཆེན་པོ་འགའ་ཡང་དྲང་སྲོང་རྒན་པོ་རེ་དང་འདྲ་བར་སྐྱེས་འདུགསླས་ཆུང་དེ་ཡི་སྟེང་ཕྱོགས་ན་རྟེན་མཁར་ཞིག་འདུག་པ་དེ་ནི་སྣེ་སྲིད་ཀྱི་འཁྲུངས་ལྷ་རྡོ་རྗེ་གཡུ་སྒྲོན་མ་གསོལ་ས་ཞིག་ཡིན་འདུག་ཀྱང་ཡུལ་དེའི་མི་སེར་རྣམས་ཀྱིས་མཆོད་རྟེན་ཟེར་བ་ལས།རྟེན་མཁར་ཞེས་བརྗོད་ན་བརྡ་མི་འཕྲོད་པར་འདུག།རྟེན་མཁར་དེར་བསང་གསེར་སྐྱེམས་གཏོང་མཁན་དང་།སྐོར་བ་འགྲོ་མཁན་སོགས་མང་པོ་ཡོད་པ་རྗེས་ཤུལ་གྱིས་མཐོང་ཐུབ།ཡང་ཐང་དེའི་ལྷོ་ཕྱོགས་ཁ་ཤར་འཁོར་དུ་སྡེ་སྲིད་རང་གི་གཟིམ་ཁང་དང་།མགོན་ཁང་གི་ཤུལ་སོགས་མཇལ་རྒྱུ་ཡོད་པར།མགོན་ཁང་གི་ཤུལ་དེ་ན་ཞིང་པ་པ་སངས་དང་མཚམས་གཅོད་ཅེས་པ་བཟའ་ཚང་གཉིས་དང་བུ་མོ་གཉིས་བཅས་མི་བཞི་ཡོད་པའི་དུད་ཚང་ཞིག་གིས་ཁང་པ་ཐོག་གཅིག་མ་ཀ་བ་གསུམ་གྱི་ས་ཡོད་པ་ཞིག་བརྒྱབ་འདུགདེའི་ལྷོ་དང་ནུབ་ཀྱི་ཕྱོགས་ན་སྡེ་སྲིད་རང་ཉིད་ཀྱི་སྐུ་དུས་ནས་ཡིན་ངེས་པའི་རྩིག་རྙིང་དང་།གྱང་གོག་སོགས་ཀྱིས་ཕྱོགས་གཉིས་འཁོར་འདུག།དེ་ཡང་དེས་དུས་ཀྱི་ཁང་པ་རྣམས་དང་མི་འདྲ་བར་རྡོ་རྩིག་དེ་དག་གི་རྡོ་ལ་བཟོ་བཅོས་གང་ཡང་མ་བྱས་པའི་གྲུ་བཞི་དང་།གྲུ་གསུམ།ནར་མོ་སོགས་རང་བྱུང་གི་ཉམས་བལྟས་པ་ཙམ་གྱི་ཤེས་ཐུབ་པའི་རྩིག་པ་འདོམ་ཕྱེད་ཙམ་གྱི་མཐོ་དམན་དང་།དེའི་སྟེང་དུ་ས་དམར་གྱི་གྱང་རོ་མཐོ་དམན་འདོམ་ཕྱེད་མ་འོངས་ཙམ་གྱིས་བསྐོར་ནས་ཡོད་པ་དེ་དག་ཉི་ཆུ་རླུང་གསུམ་གྱིས་ལོ་བརྒྱ་ཕྲག་འགའ་ལ་བརྡར་ཟད་དུ་སོང་བ་ལས།བཤིག་པ་དང་།འགྱེལ་བ་སོགས་ཀྱི་སྣང་ཚུལ་ཆེར་མི་མངོན།གཟིམ་ཆུང་ཤུལ་དུ་ཁང་རྙིང་གོག་ཧྲུལ་ཆུང་ངུ་ཞིག་ཀྱང་འདུགསྐབས་དེ་དུས་ཙམ་ནས་ལྷ་སའི་ཕྱོགས་འདིར་གྱང་ཁང་བཟོ་བའི་སྲོལ་ཡོད་པའང་ཤེས་ཐུབ།དེའི་འོག་ཕྱོགས་ན་སྡེ་སྲིད་ཀྱི་རྟ་ར་ཡིན་པར་གྲགས་པའི་ཐང་ཆུང་ཞིག་ཀྱང་འདུགས་གནས་དེ་འདྲ་ཞིག་ཏུ་སྡེ་སྲིད་མཆོག་སྐུ་འཁྲུངས་པ་ཡིན་ལ།ཁོང་གི་མེས་པོ་སྡེ་སྲིད་འཕྲིན་ལས་རྒྱ་མཚོ་ཁྱིམ་གཞིས་གཅིག་ཡིན་པར་སྣང་།འཁྲུངས་ལོ་ལ་བཞེད་པ་མི་འདྲ་བ་ཡིག་ཆ་རྙིང་པ་དག་ན་མཐོང་རྒྱུ་ཡོད་མོད།ལོ་གཅིག་གཉིས་ཀྱི་ཁྱད་པར་ཙམ་ལས་ཧེ་བག་མི་ཆེ།རབ་བྱུང་བཅུ་གཅིག་པའི་ཆུ་སྦྲུལ་༡༦༥༣ལོར་འཁྲུངས་ནས་ད་ལྟའི་རབ་རྒྱན་ལྕགས་སྟག༢༠༡༠བར་མི་ལོ་སུམ་བརྒྱ་ང་བདུན་འདས་ཟིན།གོང་གསལ་ལྟར་གྲོང་སྨད་གཞིས་ཀར་ཡབ་ཨ་སུག་དང་།ཡུམ་བུ་ཁྲིད་གཉིས་ཀྱི་སྲས་སུ་འཁྲུངས།རྒྱལ་དབང་ལྔ་པ་ཆེན་པོས་འབྱུང་འགྱུར་སྒྲིབ་མེད་ཡེ་ཤེས་ཀྱིས་གཟིགས་པས།དགུང་ལོ་བརྒྱད་ནས་ཁོང་རང་གི་སྐུ་མདུན་དུ་བཞག་ནས་ཞབས་ཕྱི་དང་།སློབ་སྦྱོང་བྱེད་བཅུག་ཏེ་གསོ་སྐྱོང་མཐར་ཕྱིན་པར་མཛད།སློབ་དཔོན་ཡང་གཙོ་བོ་ལྔ་པ་ཆེན་པོ་དང་།དེ་མིན་འདར་བ་ལོ་ཙཱ་བ།འཁོན་སྟོན་དཔལ་འབྱོར་ལྷུན་གྲུབ།བྱང་པ་ལྷུན་སྡིང་པ་རྣམ་རྒྱལ་རྡོ་རྗེ་སོགས་གསར་རྙིང་རིས་མེད་ཀྱི་མཁས་པ་མང་དུ་བསྟེན་ནས་སྦྱངས་བརྩོན་ཆུ་བོའི་རྒྱུན་བཞིན་བསྐྱངས་པས་མཐར་རིག་པའི་གནས་མཐའ་དག་ལ་མཁས་པའི་གོ་སར་ཕྱིན་ཏེ།མཧྰ་མཎྜིཏའི་མཚན་བཞེས།རབ་བྱུང་བཅུ་གཅིག་པའི་ས་ལུག༡༦༧༩ལོར་རྒྱལ་དབང་ལྔ་པ་ཆེན་པོའི་བཀའ་ཡིས་སྡེ་སྲིད་ཀྱི་ཁྲི་ལ་བཀོད།སྐབས་དེ་དུས་སྡེ་སྲིད་ཁོང་ཁྱིམ་པ་ཡིན་ཡང་ཕྱིས་སུ་རབ་ཏུ་བྱུང་བར་སྣང་ངོ་།།
 སྨྲས་པ།
རྨོངས་ནས་དད་དང་ཤེས་ན་དད་པ་གཉིས།།
དབྱེ་འབྱེད་མི་ཤེས་བྲག་ཆའི་རྗེས་སྙེག་ལ།།
ཕན་པར་རེ་ཡང་རེ་བ་ཇི་བཞིན་དུ།།
འབྱུང་དཀའ་ཨུ་དུམ་ཝ་རའི་ཟླ་རུ་ཉེ།།
ནད་གསོའི་སྨན་ལ་ཞིམ་པོ་མེད་པ་བཞིན།།
བདེན་པའི་གཏམ་འདི་རྣ་བར་གཟན་སྲིད་ཀྱང་།།
རྒྱུད་དྲངས་རིགས་ལ་ཞེན་པའི་སྐྱེས་བུ་ལ།།
དོན་ལྡན་རྣ་བའི་བདུད་རྩིར་འགྱུར་ཡང་སྲིད།།
ཅེས་ཀྱང་སྨྲའོ།།
སྡེ་སྲིད་ཀྱི་མཛད་རྗེས་ཆེན་པོའི་ཤུལ་གཉིས་པ།།
འཛམ་གླིང་ས་ཡི་གོ་ལའི་རྩེ་མོར་ལྷང་ངེར་འགྱིངས་ཤིང་།བརྗིད་ཆགས་ལྟ་ན་སྡུག་པའི་ལྷ་སའི་པོ་ཏཱ་ལ་ཞེས་སྲིད་པའི་ཁྱོན་ཆེན་པོ་འདི་ན་སྙན་གྲགས་ཀྱི་བ་དན་དཀར་པོ་ལྷབ་ལྷུབ་དུ་གཡོ་བ་འདི་ཉིད་ལ་བལྟ་བར།འབྱོར་བ་སོགས་ཀྱི་མཐུན་རྐྱེན་ཚང་བའི་མི་རྣམས་གླིང་ཆེན་པོ་དྲུག་གི་ཡུལ་ནས་དཀའ་ཚེགས་དང་།འགྲོ་གྲོན་སོགས་ལ་ཅི་མི་སྙམ་ཏེ་མིག་གི་དགའ་སྟོན་ལོངས་སུ་སྤྱོད་པའི་ཆེད་དུ་ཕྱོགས་འདིར་གཡོ་བཞིན་དང་།སྐུ་མགྲོན་དེ་དག་ལ་བརྟེན་ནས་བྱུང་བའི་རྙེད་པ་དག་གིས་འདི་ཀའི་དམངས་ཚོགས་ཀྱི་མཚོ་བའི་མཐུན་རྐྱེན་ལ་རམ་འདེགས་ཆེན་པོ་བྱུང་དང་འབྱུང་བཞིན་པ་ནི་ཀུན་གྱིས་མིག་མཐོང་ལག་ཟིན་ལགས་ན།དེའི་རྒྱུ་ཅི་ལས་བྱུང་བ་ཡིན་པ་ནི་བློ་དང་ལྡན་པ་རྣམས་ཀྱིས་ངེས་གལ་ཆེ་བ་ཞིག་སྟེ།འདིར་བྱོན་པའི་མི་ཐམས་ཅད་ཆོས་ལུགས་ལ་དད་པ་ཁོ་ན་ས་བྱུང་བ་ནི་མིན་ཞིང་།ཕལ་ཆེ་བ་ནི།ཕྱི་སྣོད་ཀྱི་ས་ཁམས་མཐོ་ལ་གངས་རི་དང་།བྲག་རི།ནགས་ཚལ།རྫ་རི།སྤང་ལྗོངས་སོགས་ཀྱི་བཀོད་པ་མཛེས་ཤིང་།ཁོར་ཡུག་འབག་བཙོག་གྱིས་མ་གོས་པར།རི་སྐྱེས་ཀྱི་སྲོག་ཆགས་སྣ་ཚོགས་བར་སྣང་དང་ས་གཞིར་ཅི་དགར་བག་ཡངས་སུ་རྒྱུ་བའི་རང་བྱུང་གི་བཀོད་པ་ངོ་མཚར་བ་སྣ་ཚོགས་ཀྱིས་བརྒྱན་པའི་ནང་བཅུད།འཕགས་མཆོག་ཕྱག་ན་པདྨོའི་རྒྱུད་ལས་བྱུང་བའི་མི་རྣམས་ཁ་གྲགས་པའི་ཐོག་མར་ཨ་མ་དང་མ་ཎི་མཉམ་དུ་སྒྲོགས་པའི་ཞིང་གི་ལྟེ་བ་ན་རི་བོ་གྲུ་འཛིན་སྟེ་ཕོ་བྲང་པོ་ཏཱ་ལ་ཞེས་པ་འདི་གཙོ་བོར་གྱུར་པ་ཡིན་ཞིང་།དེ་ཡང་སྔར་རྒྱལ་པོ་ཡབ་ཡུམ་གྱི་དུས་ན་འཛུགས་སྐྲུན་རྒྱ་ཆེར་ཡོད་ནའང་།དེ་དག་དུས་ཀྱི་དབང་གིས་འཕོ་འགྱུར་སྣ་ཚོགས་བྱུང་བས།ད་ལྟ་ལོ་རྒྱུས་ཙམ་ལས་ང་ཚོར་མིག་གིས་ལོངས་སྤྱོད་པའི་སྐལ་བས་དབེན་པར་གྱུར།ད་ལྟ་ལུས་ཅན་ཡོངས་ཀྱི་མིག་གིས་ལོངས་སྤྱོད་པའི་སྐལ་བས་དབེན་པར་གྱུར།ད་ལྟ་ལུས་ཅན་ཡོངས་ཀྱི་མིག་གིས་ལོངས་སྤྱོད་པའི་སྐལ་བས་དབེན་པར་གྱུར།ད་ལྟ་ལུས་ཅན་ཡོངས་ཀྱི་མིག་གི་དགའ་སྟོན་དུ་ལོངས་སུ་སྤྱོད་བཞིན་པའི་པོ་ཏཱ་ལ་འདི་ནི།མི་རབས་དུ་མར་བོད་རིགས་མི་དམངས་ཀྱི་བློ་གྲོས་ཀྱི་ཉིང་བཅུད་ལ་བརྟེན་ནས་བྱུང་བ་ནི་སྨྲོས་མི་དགོས་ལ།ཕོ་བྲང་དེའི་མཐའ་དབུས་ཀྱི་བཀོད་པ་ཆེས་རྒྱ་ཆེ་བས་ལོ་རྒྱུས་རྒྱ་ཆེར་བཀོད་ན་འདིར་ཡིག་ཚོགས་རྫོབ་པར་འགྱུར་དུ་དོགས་ནས་མི་སྤྲོ་ལ།ཤེས་འདོད་པ་དག་གིས་ལོ་རྒྱུས་ཡིག་ཆ་སྤྱི་དང་།ཁྱད་པར་དུ་གསེར་གདུང་འཛམ་གླིང་རྒྱན་གཅིག་གི་དཀར་ཆག་སོགས་གཟིགས་ན་ཤེས་པར་འགྱུར་རོ།།ཕོ་བྲང་དེའི་འཛུགས་སྐྲུན་གྱི་གཙོ་བོ་ནི་གསུམ་སྟེ།ཕོ་བྲང་དཀར་པོ་དང་།ཕོ་བྲང་དམར་པོ་དང་།གསེར་གདུང་འཛམ་གླིང་རྒྱན་གཅིག་གསུམ་ཡིན།དེང་སང་འཛམ་གླིང་ན་ཆེས་དཀོན་པའི་རིག་དངོས་རྙིང་པ་ཞིག་ཏུ་གྱུར་ཡོད།དེ་ཡང་ཕོ་བྲང་དཀར་པོ་ནི།།རྒྱལ་མཆོག་ལྔ་པ་ཆེན་པོས་རབ་བྱུང་བཅུ་གཅིག་པའི་ཆུ་རྟ༡༦༤༢ལོ་ནས་བོད་ཀྱི་ཆོས་སྲིད་གཉིས་ཀྱི་འགན་དབང་ཡོངས་རྫོགས་བཞེས་པ་དང་།ཕྱག་མཛོད་བསོད་ནམས་ཆོས་འཕེལ་ལ་བསོད་ནམས་རབ་བརྟན་ཏེ།སྟོད་ལུང་རྒྱ་ལེ་ཆོས་མཛད་ཀྱང་ཟེར།སྡེ་སྲིད་ཀྱི་མཚན་གནང་བ་ནས་བཟུང་།དེས་གཙོ་འགན་བཞེས་ཏེ་རབ་བྱུང་བཅུ་གཅིག་པའི་ཤིང་བྱ༡༦༤༥ལོར་ཕོ་བྲང་དཀར་པོ་བཞེངས་མགོ་བཙུགས་ནས་ལོ་བཞི་ནས་འཇུག་གྲུབ་པ་དེ་ནི་ཕོ་བྲང་དམར་པོའི་གཡོན་དངོས་སུ་ཡོད་པ་དེ་བཞེངས་ནས་ད་ལོའི་བར་མི་ལོ་སུམ་ཅུ་རེ་ལྔ་འདས།སྐབས་འདིར་བརྗོད་བྱའི་གཙོ་བོ་ནི་ཕོ་བྲང་དམར་པོ་སྟེ།རྒྱལ་མཆོག་ལྔ་པ་ཆེན་པོ་དགོངས་པ་རྫོགས་ནས་ལོ་བརྒྱད་སོང་བའི་ལྕགས་རྟ༡༦༩༠ལོར་སྡེ་སྲིད་སངས་རྒྱས་རྒྱ་མཚོ་མཆོག་གིས་གཙོ་སྐྱོང་གནང་སྟེ།ཕོ་བྲང་དམར་པོའི་ཕྱིའི་བཀོད་པ་ཡོངས་རྫོགས་དང་།རྒྱལ་དབང་ལྔ་པ་ཆེན་པོའི་གསེར་གདུང་འཛམ་གླིང་རྒྱན་གཅིག་གསར་སྐྲུན་གནང་བ་བཅས་ལོ་གསུམ་གྱི་ཁོངས་སུ་གྲུབ་ཅིང་།ནང་གི་ལྡེབས་རིས་དང་སྐུ་བརྙན་སོགས་ཞོར་གཏོགས་བཟོ་སྐྲུན་བཅས་མེ་བྱི༡༦༩༦བར་ལོ་དྲུག་གི་ཁོངས་སུ་ལེགས་པར་གྲུབ་ལ།ཕོ་བྲང་དམར་པོའི་ཕྱི་ཁོག་བཞེངས་པའི་གྲོན་དངུལ་ཁོ་ནར་རྒྱ་དངུལ་སྲང་ས་ཡ་གཉིས་དང་ཆིག་འབུམ་སུམ་ཁྲི་བཞི་སྟོང་ཆིག་བརྒྱ་སོ་དྲུག་སོང་བ་དང་།ལས་བཟོ་བ་ཁོ་ན་མི་བདུན་སྟོང་བདུན་བརྒྱ་ལྷག་ཙམ་ཡོད་པར་གསུངས་འདུག་པས་རང་ཅག་ཕབ་བ་ཞིག་གིས་དེ་ཁོ་ནའང་བློ་ཡུལ་དུ་ཤོང་དཀའ་བ་ཞིག་མིན་ནམ།ད་ལྟ་ང་ཚོའི་མིག་གིས་མི་མཐོང་ཡང་ཕོ་བྲང་འདིའི་ཕྱི་རྩིག་གནད་ཆེ་བ་རྣམས་ཕྱི་ནང་གི་རྩིག་པ་ཉིས་རིམ་ཡོད་ལ་མཐོ་ཚད་སྤྱི་ཁྲེ་བཅུ་ཙམ་རེ་ཡོད་པའི་ཐོག་ནས།བར་ཐག་ངེས་ཅན་རེའི་མཚམས་ཀྱི་རྩིག་པའི་རྩེ་ནས་ཁྲོ་ཆུ་རྨང་བྲག་རྡོ་ལ་ཐུག་གི་བར་དུ་བླུགས་ཡོད་ཕྱིར་སྲ་ཞིང་བརྟན་ལ་ས་ཡོམ་འགོག་པའི་ནུས་པ་ཆེན་པོ་ཡོད་པར་བཤད་འདུག་མོད།དོན་ལ་གནས་པའང་མི་ལོ་སུམ་བརྒྱ་ལྷག་གི་དངོས་པོའི་གནས་ཚུལ་གྱིས་ཤེས་ཐུབ།ཕོ་བྲང་གི་ནང་ངོས་རྣམས་གསང་སྔགས་ཀྱི་དཀྱིལ་འཁོར་གྱི་འགྲོས་དང་མཐུན་པའི་སྒྲིག་བཀོད་བྱས་ཡོད་ལ།མདོར་ན་ཕོ་བྲང་དཀར་དམར་གཉིས་ཀྱི་ནང་དུ་ལྷ་ཁང་བཅོ་བརྒྱད་དང་།དེ་མིན་གཟིམས་ཁང་།འདུ་ཁང་།སྲིད་དོན་གྱི་ལས་ཁུངས་ཁགཆོས་དོན་གྱི་ལས་དོན་ཚུགས་ས་སོགས་བློ་ཡུལ་དུ་ཤོང་དཀའ་བ་ཙམ་དུ་མཆིས།གསེར་གདུང་འཛམ་གླིང་རྒྱན་གཅིག་ལའང་ལོ་རྒྱུས་རྒྱས་པ་དཀར་ཆག་ལས་ཤེས་དགོས་ལ།ནང་རྟེན་དུ་རྒྱལ་དབང་ལྔ་པའི་སྐུ་དམར་གདུང་བཞུགས་ཤིང་།འདིའི་ཕྱི་གཏུམ་གཅིག་པུ་ལའང་གསེར་ལྷག་མེད་རྒྱ་སྲང་ཆིག་འབུམ་ཆིག་ཁྲི་དགུ་སྟོང་ཉིས་བརྒྱ་གྱ་གཉིས་ལས་བཞེངས་པ་དང་།མཐོ་ཚད་ཐོག་སོ་གསུམ་ཡོད་ཅིང་།ཕྲ་རྒྱན་ལ་སྐབས་དེའི་བོད་དངུལ་སྲང་བརྒྱད་ཁྲི་སྟོང་མེད་བརྒྱ་དང་བཅུ་མེད་བཞིའི་རིན་ཐང་ཡོད་པར་བཤད།གསེར་ནག་བརྡུང་གི་མཆོད་རྟེན་ཆེན་པོ་འདི་འདྲ་ནི་ད་ལྟ་འཛམ་གླིང་ན་མེད་པར་གྲགས་སོ།།དེའི་གཡས་གཡོན་དུ་རྒྱ་དངུལ་ལས་གྲུབ་པའི་སྐུ་གདུང་ཆ་བརྒྱད་བཞེངས་ཡོད་པ་དང་།ལྡེབས་རིས་དག་ལ་རྒྱལ་དབང་ལྔ་པའི་སྐྱེས་རབས་རྣམ་ཐར་སོགས་ལོ་རྒྱུས་དུ་མ་སྡེ་སྲིད་རང་གི་འཆར་འགོད་ཀྱིས་བཞེངས་པ་ལྷར་བཅས་འགྲོ་བ་ཀུན་གྱི་མིག་གི་དགའ་སྟོན་དུ་གྱུར་པ་འདི་ཉིད་ཀྱིས་མཚོན་ཕྱི་ནང་བར་གསུམ་གྱི་བཀོད་པ་འདི་དག་ལ་བལྟས་ཚེ།མི་ལོ་སུམ་བརྒྱ་ལྷག་གི་སྔོན་ལ་དེང་དུས་ལྟར་འཕྲུལ་ཆས་སོགས་སྒྲ་ཙམ་ཡང་མེད་པར་མིའི་ལུས་ཤུགས་ཁོ་ན་ལ་བརྟེན་ནས་བཟོ་སྐྲུན་གྱི་བཀོད་པ་ངོ་མཚར་བ་འདི་འདྲ་བ་ནི་སྲིད་འདིར་ཆེས་དཀོན་པར་གྲགས་པའང་སྟོང་གཏམ་འུད་སྒྲོག་ཙམ་མིན་པ་དངོས་པོའི་གནས་ཚུལ་དང་སྣང་ཚུལ་གྱིས་ར་འཕྲོད་ཐུབ་པ་དང་།ཕོ་བྲང་ཕྱི་ནང་ཐམས་ཅད་ལོ་དྲུག་ལ་གྲུབ་པའི་ལོ་དེའི་ཟླ་བ་བཞི་པའི་ཚེས་ཉེར་གཅིག་ལ་དགའ་སྟོན་བྱས་པ་དང་།དྲན་རྟེན་དུ་རྡོ་རིང་ནང་མ་ཞེས་པའི་ཡི་གེ་མེད་པ་ཞིག་ཀྱང་བཙུགས་སོ།།གཞན་ཡང་ལྕགའ་ཕོ་རིའི་རིག་བྱེད་འགྲོ་ཕན་གླིང་བཏབ་ཡོད་ནའང་།རབ་བྱུང་བཅུ་དྲུག་པའི་ནང་༡༩༥༩ནས་མི་མངོན་པར་གྱུར་ཏོ།།དེ་མིན་ད་ལྟའི་འབྲས་སྤུངས་དགོན་པའི་འདབས་ཞོལ་ན་གནས་ཆུང་དགོན་རྡོ་རྗེ་སྒྲ་དབྱངས་གླིང་བཏབ་སྟེ།ཕྱི་ནང་གི་རྟེན་གསུམ་མཐའ་དག་དང་།ཁྱད་པར་དུ་བོད་ཀྱི་ཐུན་མོང་མིན་པའི་སྔ་མོའི་བཤད་སྲོལ་ལྟར་ལྷ་མ་སྲིན་ཕྱི་ནང་གསང་གསུམ་གྱི་སྡེ་བརྒྱད་སོགས་ཀྱི་རི་མོ་ཞལ་བཀོད་དང་བཅས་དཀོད་འདུག་པ་སོགས་རི་མོ་འདི་དག་ཀྱང་གངས་ལྗོངས་སུ་ད་ལྟ་མཐོང་རྒྱུ་དཀོན་པའི་ཚོད་ཙམ་དུ་གྱུར་པ་སོགས།མདོར་ན་གངས་ཅན་གྱི་ལྗོངས་སུ་འཛུགས་སྐྲུན་དང་།སྒྲིག་གཞི་སྣ་ཚོགས་བྱས་པ་དག་སྟབས་བདེ་པོ་ཞིག་གིས་བཤད་དཀའ་བར་སྣང་ངོ་།།
  སྨྲས་པ།
 སྙིང་སྟོབས་དམ་བཅའ་བརྟན་པོའི་ས་གཞི་ལ།
རྣམ་དཔྱོད་ཤེས་རབ་རྩལ་གྱི་ལྗོན་བཟང་རྩེར།།
འཛུགས་སྐྲུན་རྣམ་པར་བཀྲ་བས་འབྲས་བཟང་སྨིན།
རྨད་བྱུང་སྐྱེས་བུས་མཛད་རྗེས་སྲིད་འདིར་བཞག།
རབ་བརྗིད་གླང་ཆེན་ཉལ་འདྲའི་ས་འཛིན་རྩེར།
རབ་དམར་བྱུ་རུའི་ཕུང་པོ་བརྩེགས་པ་བཞིན།
ལྷང་ལྷང་འོད་སྟོང་འཁྱུག་པའི་རྒྱ་ཕིབས་ཀྱི།།
ཟེར་གྱིས་ཕྱོགས་བཅུ་ཀུན་ལ་གཟི་བྱིན་བསྐྱེད།
ཅེས་ཀྱང་སྨྲའོ།།
བླ་མ་མེད་པའི་མཛད་རྗེས་ཀྱི་ཤུལ་ཁྱད་པར་བ་སྟེ་གསུམ་པ་ནི།
ཁོངས་ནི་ལོ་རྒྱུས་ཐོག་བྱུང་མྱོང་བའི་སྡེ་སྲིད་གཞན་རྣམས་དང་མི་འདྲ་བར་མཁས་པའི་དབང་པོ་སྟེ་མཧྰ་པཎྜི་ཏ་ཞིག་ཡིན་ཕྱིར།མ་འོངས་པའི་མི་རབས་རྗེས་མ་རྣམས་ལ་དམིགས་ཏེ།བོད་ཀྱི་ལོ་རྒྱུས་དང་།སྐར་རྩིས།སྒྲ་རིག་པ།ཆོས་ལུགས།ཁྲིམས་ལུགས།ཟློས་གར།སྙན་ངགདཀར་ཆག་སོགས་དང་།ཁྱད་པར་དུ་གསོ་བ་རིག་པ་བཅས་ཀྱི་གཞུང་ལུགས་སོགས་བརྩམས་པའི་བསྟན་བཅོས་པོད་ཆེན་ཉེར་དྲུག་གམ་སུམ་ཅུ་ཞེས་བརྗོད་པའི་ཡིག་ཆ་སྣང་མོད།མཐོང་རྒྱ་ཁབ་མིག་ལྟར་དོག་པ་བློ་དམན་བདག་གིས་མཇལ་མྱོང་པའི་དཔེ་ཆ་འགའ་ཞིག་མཚན་ཙམ་དྲངས་ནས་དཔེ་མཚོན་ཙམ་བརྗོད་ན།རྒྱལ་དབང་ལྔ་པ་ཆེན་པོའི་རྣམ་ཐར་དྰུ་ཀུ་ལའི་གོས་བཟང་གི་ཁ་སྐོང་པོད་ཆེན་གསུམ།རྒྱལ་དབང་ལྔ་པའི་གསེར་གདུང་འཛམ་གླིང་རྒྱན་གཅིག་གི་དཀར་ཆག་ཐར་གླིང་རྒྱ་མཚོར་བགྲོད་པའི་གྲུ་རྫིངས།རྒྱལ་བ་སྐུ་ཕྲེང་དྲུག་པའི་རྣམ་ཐར།ཞྭ་སེར་ཆོས་
འབྱུང་བཻཌྰུརྱ་སེར་པོ།རྩིས་ཀྱི་བསྟན་བཅོས་བཻཌྰུརྱ་གཡའ་སེལ།བོད་ཡིག་གཟབ་གཤར་དང་ལྷ་དང་མཆོད་རྟེན་སོགས་ཀྱི་ཐིག་ཚད།གསོ་བ་རིག་པའི་ཁོག་དབུབ་དྲང་སྲོང་དགྱེས་པའི་གླུ་དབྱངས།བླང་དོར་གསལ་བར་འབྱེད་པའི་ཁྲིམས་ཡིག་དྭངས་ཤེལ་མེ་ལོང་།སྙན་འགྲེལ་དབྱངས་ཅན་དགྱེས་གླུའི་མཆན་འགྲེལ་དཔེ་བརྗོད་བཅས་དང་།ཁྱད་པར་དུ་ལུས་ཅན་ཡོངས་ཀྱི་འཚོ་བའི་གཉེན་དུ་གྱུར་པའི་གངས་ཅན་བོད་ཀྱི་གསོ་བ་རིག་པའི་བསྟན་བཅོས་ཀྱི་ཕྱི་མོར་གྱུར་པའི་དཔལ་ལྡན་རྒྱུད་བཞིའི་འགྲེལ་ཆེན་སྔར་མེད་ལེགས་བཤད་ཀྱི་བསྟན་བཅོས་བཻཌྰུརྱ་སྔོན་པོ་ལྡེབས་རིས་ཤོག་གྲངས༡༠༦༧དང་།མན་ངག་རྒྱུད་ཀྱི་ལྷན་ཐབས་དུས་མིན་འཆི་ཞགས་གཅོད་པའི་རལ་གྲི།།སྨན་གྱི་བྲིས་ཆ་ཐང་ག་༧༩དང་།སྨན་གྱི་བརྒྱུད་ཐང་གཅིགདུར་ཁྲོད་དུ་དངོས་སུ་ཕྱིན་ཏེ་རོ་ཡི་ཕྱི་ནང་ལ་བརྟག་དཔྱད་གསལ་བར་བྱས་པའི་བྱང་ཁོག་ཡུལ་ཐིག་གི་ཐང་ག་གཅིག་བཅས་བརྒྱད་ཅུ་རྩ་གཅིག་གི་བྲིས་ཐང་བཅས་མཇལ་ཐུབ་པས།གཞན་རྣམས་མཇལ་བའི་སྐལ་བས་དབེན་ནོ།།གཞན་ཡང་ལྕགས་ཕོ་རིའི་རྩེ་མོར་གྲུབ་ཆེན་ཐང་སྟོང་རྒྱལ་པོ་དགུང་ལོ་བདུན་བཅུའི་སྐབས་ཏེ།རབ་བྱུང་བརྒྱད་པའི་ལྕགས་ཁྱི༡༤༣༠ལོ་གསར་བཞེངས་མཛད་པའི་སྒྲུབ་གནས་ལྟ་ན་སྡུག་ཅེས་པའི་ལྷ་ཁང་ཆུང་ངུ་ཞིག་བཏབ་པ་ལྟེ་བ་བྱས་ཏེ།རབ་བྱུང་བཅུ་གཉིས་པའི་མེ་བྱི་༡༦༩༦ལོ་ལ་ལྕགས་ཕོ་རིར་སྨན་པའི་སློབ་གྲྭ་འགྲོ་ཕན་རིག་བྱེད་གླིང་ཕྱག་བཏང་སྟེ།གསོ་རིག་གི་བསྟན་པ་ལག་ལེན་སློབ་རྒྱུད་དང་བཅས་པ་གཞི་དེ་ལ་བརྟེན་ནས་ད་ལྟའི་བར་དུ་འཕེལ་རྒྱས་བྱུང་བར་མངོན་ཐུབ།ད་དུང་ཁོང་ངོ་མས་སྲིད་ཀྱི་འདུ་འགོད་སྣེ་མང་གི་བར་གསེང་ངམ་དགོས་གལ་ཆེ་སར་སྨན་རྩིས་ཀྱིས་ཕྱག་ལེན་དངོས་ཀྱི་ཐོག་བརྒྱུད་འཛིན་རྣམས་ལ་དམར་ཁྲིད་ཀྱང་གནང་ངོ་།།སྨན་གྱི་དཔེ་ཆ་སོགས་སྤར་དུ་བརྐོས་པ་ལའང་།གསོ་རིག་རྒྱུད་བཞི་དང་།འགྲེལ་བ་བ་སྔོན།མན་ངག་ལྷན་ཐབས།ཤེལ་གོང་ཤེལ་ཕྲེང་།ལག་ལེན་གཅེས་བསྡུས།སུམ་རྟགས་རྩ་འགྲེལ།གཡུ་ཐོག་བེ་བུམ།སྨན་སྐོར་འདོན་ཆོག་སོགས་ཆ་ཚང་སྤར་དུ་བརྐོས་ཏེ་ལྕགས་ཕོ་རིའི་སློབ་གྲྭར་འཇོག་གནང་མཛད་དོ།།དེ་ལྟར་བོད་ཀྱི་གསོ་བ་རིག་པ་འདི་བོད་གངས་ཅན་གྱི་ལྗོངས་སྤྱི་དང་།སོག་ཡུལ།རྒྱ་ནག་དང་།དེང་དུས་འཛམ་གླིང་འདིར་བོད་ལུགས་གསོ་རིག་ལ་ཞིབ་འཇུག་དང་།སྨན་རྫས་བེད་སྤྱོད་གཏོང་བ་སོགས་ཉིན་རེ་ལས་ཉིན་རེར་ཇེ་མང་དུ་འགྲོ་བཞིན་པའི་ཕྲིན་ལས་ཀྱི་སྒོ་འཕར་ཆེན་པོ་ནི།དུས་དེ་ནས་དམ་པ་དེ་ཉིད་ཀྱིས་ཕྱེས་པ་ཡིན་ལ།ཁྱད་པར་དུ་བརྩམས་པའི་བསྟན་བཅོས་རྣམས་ལུང་དང་།རིག་པ།མན་ངག་བཅས་ཀྱི་བསྒྲུབ་བྱ་དང་སྒྲུབ་བྱེད་ཚད་ལྡན་བཀོད་པའི་ཡིག་ཆ་དེ་དག་ཏུ།ཚད་ལྡན་ལ་བསྔགས་བརྗོད་དང་།ཚུལ་མིན་ལ་དགག་པ་སོགས་སྤྲོས་པར་བརྟེན།མཁས་རློམ་ཨུ་ཚུག་ཅན་འགའ་རེས་ལྐོག་ཏུ་ངན་སྨྲས་ཀྱི་གཏམ་སོགས་ཤོད་མཁན་ཡོད་མོད་ཀྱང་།དེ་དག་ནི་ཁོང་གི་ཚིག་ཟུར་གྱི་མདའ་མོ་མ་གཟས་ཀྱང་རང་ལ་ཕོག་པས་ནང་གི་ཟུག་རྔུ་མ་བཟོད་པར་ངག་ནས་ཤོར་བ་སྟེ།ཉི་མའི་འོད་ཟེར་ཤར་བ་ན།འབྱུང་པོའི་བྱ་རྣམས་ལོང་བར་འགྱུར།ཞེས་པ་དོན་ཐོག་ཏུ་བབ་པར་སྣང་ངོ་།།དེ་ལྟར་སྤྱི་དོན་རག་རིམ་ཙམ་ངོ་སྤྲོད་བྱས་པ་ཡིན་ལ།སྤྱིར་སྡེ་སྲིད་ཅེས་པའི་མཚན་ཐོགས་པ་ནི་མང་མོད།མཛད་པ་དང་ཕྲིན་ལས་ཤེས་རིག་བཅས་གང་ཐད་ནས་ཁོང་ལ་འགྲན་ནུས་པ་ནི་གཅིག་ཀྱང་མ་བྱུང་བར་མངོན་ལ།སྲིད་ཀྱི་བྱ་བའི་འདུ་འཛི་ཆེན་པོ་འདི་ལྟ་བུ་ཞིག་གི་བར་གསེང་ནས་ལེགས་བཤད་ཀྱི་རྩོམ་པ་རྒྱ་ཆེ་བ་འདི་འདྲ་བ་གནང་ཐུབ་པ་ནི་རང་ཅག་སོ་སྐྱེའི་བློ་ཡུལ་དུ་ཤོང་དཀའ་བ་ཞིག་ཏུ་སྣང་ངོ་།།ཁོང་གི་སྐུ་ཚེ་མཐའ་འཁྱོལ་མ་བྱུང་ཕྱིར་གསུང་རྩོམ་རྣམས་ཕྱོགས་སྒྲིག་མ་ཐུབ་པ་དང་།སྤར་དུ་འཁོད་མ་ཐུབ་པ་དུ་མ་ཞིག་ཡོད་པ་ནི་གདོན་མི་ཟའོ།།སྨྲས་པ།
ཆོས་དང་སྲིད་ཀྱི་ལུགས་གཉིས་ཁུར་གྱི་ལྗིད།
བཟོད་པར་དཀའ་མོད་ཕྱི་རབས་བརྒྱུད་འཛིན་ལ།།
བསམ་ནས་ཡང་དག་རིག་པའི་ཕམ་ཕབས་འདི།།
སྤྱོད་ན་འཛད་མེད་ནོར་བུའི་གཏེར་དུ་ངེས།
ལེགས་བཤད་གངས་ཀྱི་རི་བོ་ལས་འོངས་པའི།
ལག་ལེན་ཡར་ཆབ་གཙང་པོའི་རྒྱུན་འདི་དག།
གཞོན་སྐྱེས་སྲོག་འཚོའི་བཅུད་དུ་མ་བརྟེན་ན།
ཕ་ནོར་བུ་ཡིས་བརླགས་དང་ཅིས་མི་མཚུངས།
ཅེས་ཀྱང་སྨྲའོ།།
སྡེ་སྲིད་ཐ་མ་མི་མངོན་པའི་དབྱིངས་སུ་གཤེགས་པའི་རྗེས་ཤུལ་མཇལ་བ་སྟེ་བཞི་པའོ།།
རབ་བྱུང་བཅུ་གཉིས་པའི་ལྕགས་སྦྲུལ༡༧༠༡ལོ་ནས་སོག་པོ་གུ་ཤྲི་ཧན་གྱི་བུ་ཆེ་བ་བསྟན་འཛིན་དཱ་ལི་ཧན་དུག་ནད་ཀྱིས་ལྷ་སར་ཤི་བ་དང་།དེའི་བུ་ལྷ་བཟང་ཧན་ཁྲི་ལ་བཀོད་དེ་སྡེ་སྲིད་སངས་རྒྱས་རྒྱ་མཚོ་དང་མཉམ་དུ་སྲིད་དབང་བཟུང་བ་ནས་མགོ་ཚུགས་ཏེ།ཕན་ཚུན་གཅིག་གིས་གཅིག་ལ་ཁས་མི་ལེན་པར་རང་རང་གི་འདོད་ཚུལ་ལྟར་བྱ་བ་སྣ་ཚོགས་བསྒྲུབས་སྟབས་ཁོང་གཉིས་ཀྱི་བར་དུ་འགལ་བ་ཉིན་རེ་ལས་ཉིན་རེར་ཇེ་ཆེར་གྱུར།མཐར་བོད་སོག་གཉིས་དམག་འཁྲུགས་བྱུང་སྟེ་མི་བརྒྱ་ཕྲག་འགའ་བསད།རབ་བྱུང་བཅུ་གཉིས་པའི་ཤིང་བྱ་༡༧༠༥ལོར་སླར་ཡང་བོད་སོག་འཁྲུག་རྩོད་བྱུང་བས།སེ་འབྲས་དགེ་གསུམ་གྱི་འཐུས་མི་སོགས་བར་འདུམ་པ་མང་པོས་བོད་སོག་བར་གྱི་གྱོད་བཤད་དེ།སྡེ་སྲིད་སངས་རྒྱས་རྒྱ་མཚོ་ཁྲི་ལས་བབས་ཏེ་ལྷོ་ཁ་གོང་དཀར་དུ་བཞུགས་རྒྱུ་དང་།སྡེ་སྲིད་ཀྱི་སྲས་ངག་དབང་རིན་ཆེན་སྡེ་སྲིད་ལ་བསྐོས་ཤིང་།སོག་པོ་ལྷ་བཟང་རང་ཡུལ་དུ་ཕྱིར་ལོག་རྒྱུ་བྱས་ཀྱང་།སོག་པོ་གཏམ་ལ་མ་གནས་པར་ཕྱིར་ལོག་ཁུལ་ཙམ་བྱས་ཏེ།ནག་ཆུ་ནས་ཕྱིར་འཁོར་ནས་ལྷ་སར་དམག་དྲང་པས་བོད་དམག་རྣམས་ཕམ་པར་གྱུར།སྡེ་སྲིད་བྲོས་ཏེ་ལྷ་སའི་ནུབ་ཕྱོགས་སྟོད་ལུང་རྫོང་གི་ཁོངས་སུ་སླེབས་པའི་ཚེ།སོག་དམག་ཁག་གཅིག་འཕན་པོ་ནས་འོང་བ་དང་།
ཁག་གཅིག་སྟོད་ལུང་ནས་འོང་བའི་ཚེ།སྟོད་ལུང་ཕྱོགས་ནས་འོང་བའི་སོག་དམག་གི་དཔོན་ལྷ་བཟང་ཧན་གྱི་བཙུན་མོ་སྟེ།སྔར་མོ་རང་སྡེ་སྲིད་ཀྱི་བཙུན་མོ་བྱེད་རྒྱུའི་རེ་བ་ཆེ་བས་ལོ་མང་པོར་སྡེ་སྲིད་དང་འབྲེལ་བ་འོང་བའི་ཐབས་ཤེས་སྣ་ཚོགས་བྱས་ཀྱང་།སྡེ་སྲིད་ཀྱིས་དེ་ལ་ཁ་ཡ་མ་བྱས་པས་མཐར་ཐབས་ཟད་དེ།ལྷ་བཟང་ཧན་གྱི་བཙུན་མོ་བྱས་པའི་ཚེ་རིང་བཀྲ་ཤིས་སམ།ཚེ་རིང་རྒྱལ་མོའི་དམག་དང་ཐུག་ཏེ་སྡེ་སྲིད་མགོ་བཏགས་ཀྱང་།སྔར་གྱི་ཞེ་འཁོན་གྱིས་དེ་མ་ཐག་འཛིན་བཟུང་བྱས་ཏེ་ས་གནས་དེ་རུ་སྐེ་བཅད་པ་རེད།དེ་ལྟར་སྐུ་དཀྲོང་སའི་གནས་དངོས་ནི།སྟོད་ལུང་རྫོང་ཁོངས་སྣང་རྩེ（ད་ལྟར་དགའ་གྲོང་ཤང་གི་སྣང་རྩེ་རུ་ཁག）ས་གནས་སུ་སྔར་སྐུ་གདུང་མཆོད་རྟེན་ཆེན་པོ་ཞིག་ཡོད་པ་དེ་རིག་གསར་སྐབས་རྩ་མེད་དུ་གྱུར་འདུགརབ་བྱུང་བཅུ་བདུན་པའི་ས་ལུག༡༩༧༩ལོ་ལ་འབྲི་རུ་བླ་མ་བློ་བཟང་རྒྱ་མཚོས་དེའི་ཤུལ་དུ་བཞེངས་པའི་བྱང་ཆུབ་མཆོད་རྟེན་ཐོག་ཚད་གཉིས་ཕྱེད་ཙམ་ཡོད་པའི་ཆུ་འདམ་ཆུང་ངུ་ཞིག་ཏུ་དུག་ལྕུམ་ལོ་མ་མང་པོ་ཡོད་པའི་ནང་དུ་བོད་ཀྱི་ས་གཞན་དུ་མེད་པའི་ཆུ་སྐྱེས་པདྨ་འགའ་རེ་སྐྱེ་གི་ཡོད་ཅིང་།དེ་ནི་སྡེ་སྲིད་ཀྱི་སྐུ་ཁྲག་འཐོར་བ་ལས་བྱུང་བར་དམངས་ཁྲོད་དུ་ཤོད་སྲོལ་འདུགམཆོད་རྟེན་གསར་དུ་བཞེངས་སྐབས་སྡེ་པ་སྣང་རྩེ་ཚང་གི་གསེང་འབུམ་གྱི་ནང་ནས་ཁ་བོད་ལུས་ཡོད་པ་དེ་གཟུངས་སུ་ཕུལ་ཡོད་ཀྱང་རྗེས་སུ་རྐུན་མར་ཤོར་ནས་ལོ་གསུམ་སོང་ཟེར།དེ་དང་ཐག་ཉེ་སང་འབྲི་རུ་བླ་མས་༡༩༨༠ལོར་བཞེངས་པའི་དགོན་ཆུང་ཞིག་ཡོད་པར་བྱང་ཆུབ་ཆོས་གླིང་ཟེར་ལ།དུས་ཆེན་སོགས་ལ་གྲྭ་པ་དང་ཇོ་མོ་འགའ་རེས་གཅོད་ཀྱི་ཆོ་ག་གཏོང་གི་ཡོད་པའང་མཇལ་རྒྱུ་འདུགགོང་གསལ་སྐད་ཆ་རྣམས་བཅོ་བརྒྱད་བཅོས་བསྒྱུར་སྔོན་ལ་འབྲས་སྤུངས་གུང་རི་ཁང་ཚན་གྱི་གྲྭ་པ་ཡིན་ལ།རྗེས་སུ་སྐྱབས་སར་བབས་ནས་ས་དེ་རུ་གཞིས་ཆགས་པ་རང་ལོ་དོན་གསུམ་ལོན་པའི་ཁམས་པ་སྐལ་བཟང་ཞེས་པའི་ངག་ལས་ཐོས་པ་དག་གོ།གཞན་ཡང་མཆོད་རྟེན་དེ་ཡི་མཐའ་སྐོར་དུ་ན་ཐང་མི་ཆུང་བ་ཞིག་འདུག་པར་ས་ཞིང་གསར་སྤོལ་སོགས་མ་བྱས་པར་ཡོད་ལ།དུས་ཆེན་སོགས་ལ་བསྐོར་བ་བྱེད་མཁན་ཉུང་ཙམ་རེའང་ཡོད་པར་སྣང་ངོ་།།དེ་མིན་སྡེ་སྲིད་སངས་རྒྱས་རྒྱ་མཚོའི་སྐུ་གདུང་མཆོད་རྟེན་དངུལ་དཀར་ལས་གྲུབ་པའི་ཐོག་ཚད་གཅིག་ལྷག་ཙམ་ཡོད་པ་ཞིག་ལྕགས་ཕོ་རིའི་ལྷ་ཁང་དུ་བཞུགས་ཀྱང་༡༩༥༩ལོ་ནས་མི་མངོན་པའི་དབྱིངས་སུ་རྒྱས་བཏབ་བོ།།
སྨྲས་པ།
དབྱར་དགུན་དུས་ཀྱི་འགྱུར་བ་ཇི་བཞིན་དུ།།
དར་བའི་མཐའ་མ་རྒུད་པའི་ཆོས་ཉིད་ཀྱི།
ར་བ་བཙན་པོ་འདི་ལས་སུ་ཞིག་གིས།
བརྒལ་བར་ནུས་པ་དུས་གསུམ་གཏམ་ལ་མེད།
གཟུགས་སྐུའི་བཀོད་པ་དབྱིངས་སུ་བསྡུས་ན་ཡང་།།
ཕྲིན་ལས་འོད་དཀར་ཅན་གྱི་ཟེར་སྤྲོས་པས།
རྨད་བྱུང་འདམ་གྱིས་གོས་མིན་ཀུ་མུད་དག།
ཆེས་ཆེར་བཞད་པའི་རྒྱུ་རུ་ཅིས་མི་འགྱུར།
ཞེས་ཀྱང་སྨྲའོ།།
སླར་སྨྲས་པ།
བགྲང་བྱའི་ཁུར་གྱིས་དུབ་པའི་རྒན་པོ་ཞིག
སོས་དལ་མ་ཎི་བགྲངས་ཏེ་སྡོད་འོས་མོད།
ཆུང་ནས་འདི་འདྲའི་ལས་ལ་གོམས་པའི་ཕྱིར།
འཆོལ་གཏམ་རྟ་རྒན་ཤོག་དཀར་ཐང་དུ་ཤོར།།
སྲིད་འདིར་མི་ལུས་བླངས་པ་འདྲ་ན་ཡང་།
ཕལ་ཆེར་རང་དོན་ཙམ་ཡང་འགྲུབ་དཀའ་ན།
ལུགས་གཉིས་སྟོབས་ཀྱི་ཕྲིན་ལས་ཆེར་རྒྱས་པའི།
སྐྱེས་བུ་འདི་འདྲ་གངས་ཅན་ལྗོངས་ན་དཀོན།
དེ་ཡི་བཀའ་དྲིན་ཀུན་གྱིས་མི་བརྗེད་པར།
ཕྲིན་ལས་སྣང་བའི་བདག་པོའི་གཟི་མདངས་དེ།
བརྟན་པར་གནས་ཤིང་བརྒྱུད་འཛིན་སྟོབས་འཕེལ་ཞིང་།
སྲིད་འདིར་མི་ཉམས་ཡུན་དུ་གནས་པར་སྨོན།།
ཞེས་སྡེ་སྲིད་སངས་རྒྱས་རྒྱ་མཚོའི་རྗེས་ཤུལ་མཇལ་བ་ཞེས་པ་འདི་ནི།རབ་རྒྱན་ས་སྟག་༢༠༡༠ལོར་བདག་ལྷ་སར་མཆོད་མཇལ་དང་།གཉེན་ཕྲད་དུ་འོང་བའི་སྐབས་སུ་འཁྲུངས་འདས་ཀྱི་ས་གནས་དག་ཏུ་དངོས་བསྐྱོད་ཀྱིས།དམངས་ཁྲོད་དུ་སྐད་ཆ་སོགས་དྲིས་ནས་ཤེས་པ་དང་།ཁོང་གི་བླ་ན་མེད་པའི་མཛད་རྗེས་ལ་རྗེས་དྲན་གྱི་ཆེད་ཙམ་དུ་ཤར་མི་ཉག་གི་ཡུལ་དུ་སྐྱེས་པའི་འཚོ་བྱེད་རྟགས་ཙམ་འཛིན་པ་ཉན་ཤུལ་འཇམ་དབྱངས་གྲགས་པས་རང་ལོ་རེ་དགུ་པར་གྲོང་ཁྱེར་ལྷ་སའི་ཉེ་འདབས་སྟོད་ལུང་བསམ་འགྲུབ་སྒང་ནས་བྲིས་པའོ།།