སེར་གླིང་མཚོ། 
སེར་གླིང་མཚོ་ནི་བོད་ལྗོངས་ཀྱི་མཚོ་ཆེན་པོ་གཉིས་པ་ཡིན་ཞིང་།  མཚོ་འདི་གངས་ཏེ་སེའི་བྱང་རྒྱུད་དང་བྱང་ཐང་མཐོ་སྒང་གི་གས་རྡིབ་གཤོང་ས་དང་།  དཔལ་མགོན་རྫོང་དང་ཤན་རྩ་རྫོང་འབྲེལ་མཚམས་སུ་གནས།  ཤར་ནུབ་ཏུ་རིང་ཚད་སྤྱི་ལེ་72དང་ལྷོ་བྱང་དུ་ཞེང་ཚད་སྤྱི་ལེ 22.8ཡོད་ལ།    ཞེང་ཆེ་ཤོས་སར་སྤྱི་ལེ་40  ཙམ་ཟིན་ཞིང་།  མཚོའི་རྒྱ་ཁྱོན་སྤྱི་ལེ་ག 1640  གྲུ་བཞི་མ་ཙམ་ཡོད།     མཚོ་ངོས་རྒྱ་མཚོའི་ངོས་ལས་མཐོ་ཚད་སྨི་4530དང་།   མཚོའི་གཏིང་ཟབ་ཤོས་སྨི་33ལས་བརྒལ།  གནའ་བོའི་སེར་གླིང་མཚོའི་རྒྱ་ཁྱོན་སྤྱི་ལེ་གྲུ་བཞི་མ་ཁྲི1 ཙམ་ཟིན་མྱོང་མོད།  ཕྱིས་སུ་གནམ་གཤིས་སྐམ་ཤས་ཇེ་ཆེར་སོང་བ་དང་།  མཚོ་ཆག་ཤུགས་ཆེན་པོ་བྱུང་བའི་དབང་གིས་དེའི་ཁྲོད་ནས་སྐེ་རིང་མཚོ་དང་།  མཚོ་སྔོན་མོ།  གཡག་གདོང་མཚོ།  བྲང་ཁོག་མཚོ།  འུར་རུ་མཚོ།  བྱ་རྒོད་མཚོ། རྩིད་སྐུད་མཚོ།  ཡོ་ཆགས་མཚོ་སོགས་མཚོ་འགའ་ཤས་སུ་གྱེས་པ་རེད།   མཚོའི་བཟོ་ལྟ་མི་གཅིག་པར་སྣང་ཞིང་།  ནུབ་ངོས་སུ་མང་ཆེ་བ་ནི་གླིང་ཕྲན་དང་མཚོ་ཁུག་ཡིན། སེར་གླིང་མཚོ་རྒྱུད་ནི་སྲོལ་རྒྱུན་དང་ལྡན་པའི་འབྲོག་ཁུལ་ཡིན་པས་གཙོ་བོར་ནོར་དང་ལུག་འཚོ་སྐྱོང་བྱེད་པ་རེད།
  1993ལོར་སེར་གླིང་མཚོའི་ཁྲུང་ཁྲུང་སྐེ་ནག་རང་བྱུང་སྐྱོང་ས་ཁུལ་བཙུགས་ཤིང་།  2003ལོར་རྒྱལ་ཁབ་རིམ་པའི་རང་བྱུང་སྲུང་སྐྱོང་ས་ཁུལ་དུ་རིམ་པ་སྤར་བ་རེད།  གནས་འདི་རི་སྐྱེས་སྲོག་ཆགས་རིགས་ཀྱི་རང་བྱུང་སྲུང་སྐྱོང་ས་ཁུལ་ཁོངས་སུ་གཏོགས་པ་དང་མཐོ་སྒང་གི་མཐོ་གྲང་རྩྭ་ཐང་སྐྱེ་ཁམས་མ་ལག་ཁྲོད་ཀྱི་རྩ་ཆེའི་སྟོངས་ཉེའི་སྐྱེ་དངོས་སྣ་རིགས་མང་ཤོས་ལྡན་པའི་ས་ཁུལ་ཡིན་ལ་འཛམ་གླིང་ཐོག་གི་ཁྲུང་ཁྲུང་སྐེ་ནག་རང་བྱུང་སྲུང་སྐྱོང་ས་ཆེ་ཤོས་ཀྱང་རེད། །