ལ་ལྔ་མཚོ། 
   འདྲེ་མཚོ་ལ་ལྔ་མཚོ་ཡང་མངའ་རིས་སུ་གནས་ཤིང་།   དེ་ཡང་གནས་རི་གངས་རིན་པོ་ཆེར་འགྲོ་བའི་ལམ་བར་དུ་གནས་ཤིང་གནས་མཚོ་མ་ཕམ་གཡུ་མཚོ་ནུབ་ཕྱོགས་སུ་འབྱར་ནས་ཡོད།  མཚོ་འདིའི་དབྱིབས་ནི་མཛེས་སྡུག་ལྡན་པའི་ཟླ་གམ་གཟུགས་དང་། མ་ཕམ་གཡུ་མཚོ་ཉི་གཟུགས་བཞིན་སྣང་ལ།  འདི་གཉིས་ཀྱི་བཟོ་དབྱིབས་ལས་ཞི་མཐུན་དང་རྡོ་རྗེ་ལྟར་སྲ་ཞིང་བརྟན་པ་ཡིན་ཚུལ་བསྟན་པ་རེད། 
  དོན་དམ་པར་གནས་མཚོ་དང་འདྲེ་མཚོ་གཉིས་གཅིག་ཡིན་ཞིང་།  གནམ་གཤིས་འགྱུར་བ་དང་།  མཚོ་ངོས་དམའ་རུ་སོང་བ་བཅས་ཀྱི་དབང་གིས་གུག་ཅིང་རིང་བའི་རི་མ་ཐང་ཆུང་ཆུང་ཞིག་གིས་མཚོ་འདི་གཉིས་སུ་ཕྱེ་བ་རེད། ཆུ་ལམ་ཞིག་ཡོད་པ་དེས་མཚོ་གཉིས་མཐུད་པ་དང་།  ས་གནས་འདིའི་མི་སེར་གྱིས་ད་བར་དུ་ད་དུང་མཚོ་འདི་གཉིས་ཀྱི་མཚོ་མཐིལ་འབྲེལ་ནས་བསྡད་ཡོད་ཅེས་ཟེར།  རྒྱུ་རྐྱེན་གང་ཡིན་མི་ཤེས་པར་གནས་མཚོ་དང་འདྲེ་མཚོའི་ཆུ་སྤུས་རྦད་དེ་མི་འདྲ།  གནས་མཚོའི་ཆུ་ནི་བསིལ་ཞིང་མངར་བ་དང་།  འདྲེ་མཚོའི་ཆུ་ནི་ཚྭ་ཁུ་ཁྲོག་ཁྲོག་ཡིན་པས་མི་ཕྱུགས་གཉིས་ཀའི་བཏུང་ཆུར་སྤྱོད་མི་ཉན་སྟབས་འདིར་འདྲེ་མཚོ་ཞེས་པའི་མིང་ངན་ཐོགས།
 འདྲེ་མཚོ་ལ་ལྔ་མཚོ་ནི་རྒྱ་མཚོའི་ངོས་ལས་མཐོ་ཚད་སྨི་4574ཡོད་ཅིང་།  མཚོ་དེར་རླུང་མེད་ཀྱང་རྦ་རླབས་ཡང་ཡང་ཕྱུར།  གནས་འདིའི་ཡུལ་ལྗོངས་ཧ་ཅང་མཛེས་སྡུག་ལྡན་ཞིང་།   མཚོ་འགྲམ་དུ་རི་ཆུང་ངུ་མདོག་དམར་ནག་ཅན་ཡོད་པ་དང་།  དེ་བཞིན་མཚོ་དཀྱིལ་ལ་གླིང་ཕྲན་ཆུང་ངུ་མདོག་དམར་ནག་ཅན་ཡོད་པ་དེ་དག་གི་ཚོན་མདངས་གསལ་ལ་མ་གསལ་དུ་སྣང་།།
                                                        སྤང་གོང་མཚོ།
མངའ་རིས་ཀྱི་སེང་གེ་ཁ་འབབ་ནས་བྱང་ཕྱོགས་སུ་རྒྱང་ཐག་སྤྱི་ལེ་130ཡིས་ཆོད་པའི་ས་ནི་རུ་ཐོག་རྫོང་ཡིན་ཞིང་། སྤང་གོང་མཚོ་ནི་རུ་ཐོག་རྫོང་ནས་བྱང་ཕྱོགས་སུ་སྤྱི་ལེ་10ལྡན་པའི་ཀྲུང་གོ་དང་ཧིན་རྡུས་དབང་དུ་སྡུད་པའི་ཀ་ཤི་རྨིར་འབྲེལ་མཚམས་སུ་གནས་ཤིང་།  མཚོ་འདི་རི་མཐོའི་བར་གྱི་ལུང་ཤར་ཁྲོད་གནས་ཤིང་། མཚོའི་གཏིང་ཟབ་ཚད་སྨི་50དང་། མཚོའི་རྒྱ་ཁྱོན་སྤྱི་ལེ་གྲུ་བཞི་མ604མཚོའི་རིང་ཚད་ལ་སྤྱི་ལེ་150དང་ཞེང་ཚད་མང་ཆེ་བ་སྤྱི་ལེ 2ནས5ལྔ་བར་ལྡན་ཞིང་། ཞེང་ཁ་ཆུང་ཤོས་སར་སྨི 5  ལས་མེད།  ཤར་ཕྱོགས་ཀྱི་མཚོའི་རྒྱ་ཁྱོན་གསུམ་ཆ་གཉིས་ཀྲུང་གོའི་མངའ་ཁོངས་དང་།   དེ་བྱིངས་ནུབ་ཕྱོགས་ཀྱི་མཚོའི་རྒྱ་ཁྱོན་གསུམ་ཆ་གཅིག་ཧིན་དྷུའི་མངའ་ཁོངས་སུ་གཏོགས།  མཚོ་འདིར་ཡ་མཚན་ཆེ་ཞིང་མཆོག་ཏུ་གྱུར་པའི་ཆོས་ལུགས་ཀྱི་དོན་སྙིང་མེད་མོད།   འོན་ཀྱང་མཚན་སྙན་ཕྱིར་ཁྱབ་པའི་མཚོ་ཆེ་མོ་གྲགས་ཅན་ཞིག་རེད།  གང་ལགས་ཞེ་ན།  ཀ་ཤི་རྨིར་ཁོངས་སུ་གཏོགས་པའི་ནུབ་རྒྱུད་ཀྱི་ཆ་ཤས་འདི་ཚྭ་མཚོ་ཡིན་ཞིང་།  བཤད་སྲོལ་ལ་གནས་འདིར་སྐྱེ་དངོས་དཀོན་ཞིང་མྱ་ངམ་སྐྱ་ཐེར་ཡིན་ཞེས་ཟེར་བའི་དབང་གིས་རེད།  རང་རྒྱལ་གྱི་མངའ་ཁོངས་སུ་གཏོགས་པའི་དབུས་རྒྱུད་དང་ཤར་རྒྱུད་ཀྱི་མཚོ་འདི་ཚྭ་མེད་པའི་མཚོ་ཡིན་ཁར།  མཚོ་ཆུ་དྭངས་གཙང་ཡིན་ཞིང་ཆུ་མདོག་གཡུ་ཡི་མདོག་ཏུ་སྣང་ཞིང་།   མཚོ་འདིར་ཐོན་ཁུངས་ཕུན་སུམ་ཚོགས་ཤིང་།  ཉ་རིགས་སྣ་ཁ་མང་བ་དང་། རྩྭ་ཆུ་བཟང་པོ་བཅས་ཡོད།  གནས་འདིར་ཐིང་རིལ་མཆུ་དམར་དང་ཁྲུང་ཁྲུང་མགོ་ཁྲ་འདུས་ནས་སྡོད་ཅིང་།  མཚོ་འགྲམ་དུ་སྐབས་འགར་མཐོང་དཀོན་པའི་རྐྱང་ཁྱུ་ཚོགས་ཀྱང་ཐོན་སྲིད།  མཚོ་དཀྱིལ་ལ་འདབ་ཆགས་གླིང་ཕྲན་གྲགས་ཅན་ཡོད་པས་དབྱར་དུས་སུ་སླེབས་ཚེ་སྐོར་དཀྱིལ་རྒྱ་མཚོའི་ཐིང་རིལ་མགོ་འབྲིང་ཁྲི་ཚོ་མང་པོ་གནས་འདིར་འཕུར་འོངས་ནས་རིག་རྒྱུད་སྤེལ།   གནས་འདིར་གྲུ་གླས་ནས་མཚོ་བསྐོར་ཆོག་ལ་འདབ་ཆགས་གླིང་ཕྲན་སྟེང་འཛེགས་ཏེ་ཡུག་ཏུ་འབྲེལ་བའི་བྱ་ཚང་དང་སྒོ་ང་།  ཆུ་སྐྱར་དང་ཁྲུང་ཁྲུང་མགོ་ཁྲར་སྤྱན་གཟིགས་བྱས་ཀྱང་ཆོག