གཉིས་པ།      རྨས་པ་ཁྲག་གི་ཞལ་ལྕེ་ནི།   སྔོན་གྱི་དུས་ན་མི་རབ་ཁྲག་ལ་ཐིགས་ཞོ་དང༌། 
མི་འབྲིང་ཁྲག་ལ་ཐིགས་སེ་དང༌།   མི་ཐ་ཁྲག་ལ་ཐིགས་བྲེ་ཟེར་བ་གཅིག་གྲགས་གདའ་ནའང༌།  ད་ཙ་ན་འཐབ་རྩོད་བྱུང་བའི་རྩ་བ་ལ་བདེན་པ་ཆེ་ཆུང༌།  རྨས་ཚབས་ཆེ་ཆུང་མཐའ་ཆོད་བྱས་ཏེ།  ཤ་རྒྱབ་ཏུ་ནས་ཁལ་གཉིས་མའི་ཤུལ་དུ་དཀར་ཤ་རེ།   མར་ཉག་ལྔ།  ཚྭ་བྲེ་རེ།   མར་ཁུ་ཕུལ་དོ་ཙམ་ལ་ལྷུ་བླངས་ནས།   རྨས་གོས།  ཁྲག་གདན།   རྒྱལ་དང་བཅས་པ་ཇི་ལྟར་འོས་རིགས་པས་གཅོད།  རྨས་ཚབས་ཆེ་བས་ན་ཡེ་ཤེས་ཀྱི་ལྡབ་ལ་སྨར་ཟོང་ཕྱེད་མར་གཅོད་པའི་ལུགས་ཡིན་ཡང་རྨས་ཚབས་ཆེ་བ་ལ་མི་གྲངས་སོགས་དགོས་པ་བྱུང་ན།  རྨས་གོས་ཁྲག་གི་གདན་ཇི་ལྟར་འོས་པའི་སྟེང་དུ་ཐུན་གསུམ་གྱི་མེ་ཤུལ་དུ་ཞོ་དང༌།  དྲག་ཤུལ་དུ་སྲང༌། 
རུས་པ་ཐོན་པ་གསེར་དངུལ་གྱི་རྒྱབ་སྐོར་བྱེད་པ་དང༌།   རུས་པ་རེ་ལ་ཐུན་གསུམ་རེ་བྱེད་པ་ལུགས་གཉིས་ཡོད་པ་ཁྲིམས་ལུགས་ལྟར་བྱེད་ཅིང༌།  རྒྱལ་ཤ་ཆང་གི་གྲངས་ཀ་དང༌།   ཟོང་གི་རྣམ་གྲངས་མང་ཉུང་གང་དགོས་རིགས་པས་གཅོད།  དེ་ལའང་རིན་ལ་མི་འཆམས་པས། 
ཤ་ནི་གསུམ་ནལ་མ།   ཆང་ཁལ་ཕྱེད་མ།   ཀོ་ལེ་ཞོ་རེ་མ།  པང་ཁེབ་གསུམ་ནལ་མ།   སྟན་སྲང་ཕྱེད་མ།   གཟིག་ཞོ་མ།   གུང་ཞོ་རེ་མ་ཙམ་གཅོད་དགོས།   གསུམ་པ།   བརྐུས་པ་འཇལ་གྱི་ཞལ་ལྕེ་ནི།   ཆོས་རྒྱལ་སྲོང་བཙན་སྒམ་པོ་དེ་ཉིད་ཀྱིས།  བརྐུས་ན་བརྒྱད་འཇལ་དངོས་དང་དགུ་འདེད་དོ།  །  ཞེས་བྱ་བ་གསུངས་ནའང༌།  ད་ཙ་ན་སྡེ་སྲིད་མི་གཅིག་པའི་ས།   གཞན་གྱི་ས་ནས་ཇག་བརྒྱབ་པ་ལྟ་བུ་ལ་བདུན་འགྱུར་ངོས་བརྒྱད་དམ་འདྲ་བཞི་ངོས་ལྔ།   སྡེ་སྲིད་གཅིག་པའི་ས།   གཞན་གྱི་ས་ནས་བརྐུས་པའི་འཇལ་ཆེ་བ་ལ་འདོགས་གསུམ་དངོས་དང་བཞི།  ཆུང་བ་ལ་སུམ་འདོགས་བམ།  སྐྱེ་འཁྲིད་ཆག་གསུམ་མོ།   །  རྒྱལ་འདོགས་དངོས་དང་གསུམ་ཞེས་པ་དོན་གཅིག་ལ་མིང་འདོགས་མི་འདྲ་བའི་གཅོད་རྒྱ་བྱེད།  ཁྱིམ་མཚེས་ཕན་ཚུན་རྐུ་རེས་བྱས་པ།   དངོས་པོ་གང་ཡིན་དེ་འགུལ་འདོགས་རྒྱལ་འོས་རིགས་དང་བཅས་པས་བཅད་ནས།  རྫས་ངོ༌། 
ནོར་ངོ༌།   མིང་ངོ་སོགས་ཀྱི་ཕྱིར་མི་གཏོང་བར་ཁྲིམས་གཞུང་སྲོང་བ་གལ།  དེ་ལྟར་རྐུ་འདོགས་ཀྱི་རིམ་པ་སྐབས་ཐོབ་དང་སྦྱར་བ་བཅས་པའི་སྟེང་ནས།  ངོ་ཚ་སྤྲད་རིན་འདི་བྱིན་བྱ་བའི་གུང་ཕུད་ཀྱི་ཆར་ཡང་བྱེད་དགོས།  དགེ་འདུན་གྱི་སྤྱི་རྫས་བརྐུས་པ་ལ་གནས་དབྱུང་ལྟ་བུ་དང༌།  དཀོན་མཆོག་གི་དཀོར་རྫས་བརྐུས་པ་ལ་བརྒྱད་ཅུ་འཇལ་དང༌།  སྡེ་དཔོན་གྱི་གན་མཛོད་ནས་བརྐུས་པ་ན་ཁས་དྲག་གི་དགུ་བཅུ་འཇལ་དང༌།  ཡང་ན།   མིག་སྒྱིད་ལག་གསུམ་ལ་བབས་པ་སོགས་མང་ངོ༌། 
        བཞི་པ།   བསྙོན་འདོར་མནའ་བསྒག་གི་ཞལ་ལྕེ་ནི།   སྤྱིར་མནའ་ཆུང་ཡང་བ་མོ་ཙམ། 
བ་མོ་ཆུང་ཡང་ལྷམ་སྤངས་ཞེས་པ།  མནའ་མི་རབས་ཀྱི་གཅོང་རྡོར་བཤད་ཀྱང༌།  ཆོས་རྒྱལ་སྲོང་བཙན་སྒམ་པོ་དེ་ཉིད་ཀྱི་རྫུན་བྱས་པ་ལ་མནའ་སྒོག་གོ།  ཞེས་ཡིན་མིན་གྱི་མ་ཚང་བ་བྱུང་ན།   ཡུལ་ལྷ་བསྟན་སྲུང་དཔང་དུ་བཙུགས་ནས།  མནའ་བྱེད་པར་གསུངས་འདུག་པས། 
ཁྲིམས་གོ་བ།   ཁེ་ཉེན་རྟོགས་པ།   འདྲ་བདེན་དཔང་དུ་བཙུགས་ནས་ཡིན་ཐོག་ཏུ་ཡིན་འཇོག་པའི་གཤགས་ཐུབ་དོན་ཐུབ་ཀྱི་བདེན་བཤགས་གཏོང་བ་ན།  ཁྲིམས་ལུགས་ལ་སེམས་རྩེ་བཟུང་ནས།  ཕོ་ཚིག་དང་ཧམ་པའི་འགལ་གཤགས་བསྙོན་ཚིག་ཁ་མཁྲང་བྱེད་པ་ལ་མནའ་ཁ་མ་ཕྱེད་པར།  གཉིས་ཕྱོགས་སྦོལ་བགོས་ འདྲ་མཉམ་ བྱས་ན་བཟང་པོ་དེ་ཡིད་ཆད།  ངན་པ་དེ་བྱུར་ལ་ངོ་སོ་ཁྱེར་ནས་སེམས་ཆེར་སྐྱེ་བས།  དཀར་མི་བཟུང་ཐུབ།   བསྡུས་པའི་མནའ་ཁ་བྱེད་ཅེས་ཀྱང་དགོས།  རྫུན་འགོང་སྤངས་ཏེ་མནའ་འཕྲང་དོག་པས།  བདེན་རྫུན་ཤེས་ཡོང༌།   མནའ་སྒོག་པའི་དཀར་མི་ལ་སྤང་བྱ་བཞི་དོར་ནས་དཀར་མི་བསྡུ་དགོས་པ་ཡིན་ཏེ།  སྤང་བྱ་བཞི།  1.  གསེར་བྱ་ངང་བ་འདམ་ལ་མི་འཛིན་ཟེར་བ་དེ་བཙུན་པ་ལ་མནའ་མ་སྒོག་ཟེར་བ་ཡིན།  དེའི་རྒྱུ་མཚན་བཙུན་པ་ཡུལ་གཉན་པ་ཡིན།  མནའ་བཙུན་པའི་སྤང་བྱ་ཡིན་པས་ལག་འཇུ་ལ་བསྡུ་མི་ཉན།  2.  གཡུ་ཆུང་དྲུག་དམར་བསྟར་ལ་མི་རྒྱུ་ཟེར་བ་དེ་བུ་ཚ་ལ་མནའ་མ་སྒོག་ཟེར་བ་ཡིན།  དེའི་རྒྱུ་མཚན་ནི་བུ་ཚས་ཁེ་ཉེན་མ་རྟོགས་པས་མནའ་ཟ་ལ་ཉེ་བས་ལག་འཇུ་ལ་བསྡུ་མི་ཉན།  3.  བྱ་རོག་ནག་པོ་རྙི་ལ་མ་འཛིན་ཟེར་བ་དེ་བུད་མེད་ལ་མནའ་མ་སྒོག་ཟེར་བ་དེ་ཡིན།  བུད་མེད་མཛའ་བོའི་ཕྱིར་དུ་མནའ་ཟ་བ་ལ་ཉེ་བས་ལག་འཇུ་ལ་བསྡུ་མི་ཉན།  4.  དུག་སྦྲུལ་ནག་པོ་རྙི་ལ་མ་འཛིན་ཟེར་བ་དེ་ནི་སྔགས་པ་ལ་མནའ་མ་སྒོག་ཟེར་བ་དེ་ཡིན།  དེའི་རྒྱུ་མཚན་སྔགས་པས་རྫས་སྔགས་དང་མནའ་སེལ་ཤེས་པས་མནའ་ཟ་བ་ལ་ཉེ་བས་དེ་རྣམས་ལག་འཇུ་ལ་སྤང་དགོས་སོ།    ཞེས་སོགས་མནའ་བསྒག་ཚུལ་མི་འདྲ་སྣ་ཚོགས་ཤིག་བསྟན་འདུག་ཀྱང་ཚིག་ཚོགས་མང་བས་འདིར་མ་བཀོད། 
      ལྔ་པ།       བྱི་བྱས་བྱི་རིན་གྱི་ཞལ་ལྕེ་ནི།   སྔོན་རྒྱ་གར་དུ།   མཐུན་འཛག་བུ་ཡིས་བདག་གིར་བྱེད།  །  བགྲོད་མིན་བགྲོད་འདོད་བྱེད་པ་ཡིན།  །  ལོག་པ་དབེན་པ་རྣམ་པ་བཞི། 
།  ཞེས་པ།   གཞན་གྱི་ཆུང་མ་དང༌།   མའམ་སྲིང་མོ་དང་འབྲེལ་བའི་ཕྱོགས་ལ་བྱི་བྱས་པ་ལ། 
ཡན་ལག་གི་ཕྲན་བཅད་ནས།  ཡུལ་གཞན་དུ་སྤྱུགས་པར་བཤད་ཀྱང༌།   ད་ཙ་ན་ཆོས་རྒྱལ་སྲོང་བཙན་སྒམ་པོ་དེ་ཉིད་ཀྱིས།  འདོད་ལོག་སྤྱད་པ་ལ་རིན་འདེད་དོ།  །  གསུངས་གདའ་བས།   གཞན་གྱི་ཆུང་མ་ལ་བྱི་བྱས་པ་ལ།  རླིག་ཞོ།   གྲ་ཕུད།   རྩེ་དར་རྣམས་གཅོད་པ་འདི་གཅོད་པ་གྲགས་ཆེ་བས་འདི་ག་གཞི་འཇོག་བྱེད་དགོས།  ཡང་བཟའ་མི་ངན་གྲོས་བྱས་ནས་གཞན་མ་དྲན་རྒྱས་བཀུག་ན་ཉེས་པ་དང་བྱི་འཇལ་ཕྱིར་སློག་པའི་ལུགས་ཡིན། 
        དྲུག་པ།     བྱེ་བྲལ་མཐུན་སྡེབས་ཀྱི་ཞལ་ལྕེ་ནི།   ཕན་ཚུན་བག་མ་གཏོང་ལེན་བྱས་པ། 
མཐར་འབྲལ་བ་ལ་གྱར་དུས་བོར་ཆ་ཟེར་བ་གཅིག་བྱུང་འདུག་པ།  ཐོག་མར་སུ་བདེན་མཐའ་ཆོད་པ་བྱས་ཏེ།  ཕོས་བོར་ན་མོ་ལ་བོར་ཆ་སྨར་གྱི་ཞོ་གང༌།  ལ་ལ་སྨར་ཟོང་གི་ཞོ་བཞི་ཟེར་བའང་འདུག  མོས་བོར་ན་ཕོ་ལ་བོར་ཆ་ཐུན་གསུམ་གྱི་སྲང་གང་སྤྲོད་དགོས་པ། 
སྔོན་གྱི་གནའ་མི་རྣམས་ཀྱིས་ཕོས་བོར་ཞོ་གང༌།   མོས་བོར་སྲང་གང་ཞེས་བྱ་བ་གསུངས་འདུག་པ་འདི་ག་ལེགས་པ་འདུགཡང༌།   ཕན་ཚུན་གཉིས་ཀར་བོར་ཆའི་ལབ་བརྗོད་མི་བྱེད་པའི་ལུགས་གཅིག་ཡོད།  ཡང༌།   ཕོ་ནོར་འཕེལ་མེད་དང་མོ་ནོར་གྱོང་མེད་ཟེར་བའང་འདུག
  ཡང༌།   བུད་མེད་ལ་གོ་ལག་ཟད་རིན་ནི།   གཡོག་གླ་ལ་ཉི་མ་རེ་ལ་སྨར་ཟོང་ཕྱེད་མའི་བྲེ་དོ་མ་ཀུན་ལ་གྲགས་ཆེ་བས་གཞན་མ་མི་ཆེ་ཆུང་ལ་གླ་ཐང་མཐོ་དམན་ལེན་པའང་ཡོད། 
ཕན་ཚུན་གཉིས་ཀས་མཐུན་ནས་སྤྲོད་ལེན་བྱེད་དགོས།   ཡིག་རྟེན་ཟེར་བའི་འཆར་གཅིག་འདུག་པ་ཡང༌།  ཁྲིམས་མཐུན་ཡོད་རིགས་སྤྲོད་རྟིང་ཆོད་ཡིག་སྟེར་བ་འཇིག་རྟེན་པར་སྲིད་སྲོལ་ཡོད་པས་དེ་འདྲའི་འཆར་ཡང་བྱེད་དགོས། 
       བདུན་པ།   འགྲོས་འདེད་ལེ་ལན་གྱི་ཞལ་ལྕེ་ནི།   མཚམས་བྱེད་མཁན་གྱི་མིས།   ཉིན་གསུམ་མཁས་པའི་མི་ལ་འདྲི།  མཚན་གསུམ་བསམ་མནོ་ལེགས་པར་བཏང་ནས་ཕན་ཚུན་རྩོད་པའི་གྱོད་བྱུང་ཚུལ་ལན་རྩ་ག་ན་འདུག་བལྟ་བ་གལ་ཆེ།  ལན་གྱི་རྩ་བ་འཇལ་གྱི་གསུམ་གཉིས་ཟེར་བའང་ཡོད།   གྱོད་ལེ་ལན་གྱི་རྩ་བ་ལ་ཁ་མཆུའི་བཞི་ཟུར་བྱ་བའང་ཡོད།   བྱ་དང་རྡོའི་དཔེ་དང་འདྲ།  དེའི་རིགས་ལ་ཕན་ཚུན་སེམས་གཙང་མའི་ཆོད་མདོ་འདྲ་བྱ་སྟེ། 
གྱོད་ཅན་ལ་འབའ་སྡུད་རེ་ཨེ་བྱེད།   མི་བྱེད་ན་ཁྲིམས་བདག་ལ་ཞུས་ནས་བརྡ་འདེད་གཏོང་ཟེར་བ་འདུག
          བརྒྱད་པ།   དམའ་ཕབ་ཡུས་ཀྱི་ཞལ་ལྕེ་ནི།   དཔེར་ན་མི་མངོན་སུམ་སུ་ཁ་ཕབ་པའམ། 
ཤེད་ངོམས་ཀྱིས་ཁ་ལ་བརྒྱབ་པའམ།   བཀས་བཏགས་བཅས་སོ་འཕྲོགས་པ་ལྟ་བུ་ལ།  མི་མངོན་སུམ་དུ་དམའ་ཕབ་པ་ཡིན་པས་ཆང་འདྲེན་པུས་འཛུགས་གང་རེགས་གཅོད་དོ།  །    
     དགུ་པ།   སྤུས་འདོད་ཚོང་གི་ཞལ་ལྕེ་ནི།   ཕན་ཚུན་ཉོ་འདོད་འཚོང་འདོད་ཀྱི་མཚམས་སུ་རིན་རྒྱག་བྱེད་པ་ལ།  ཐོག་མར་ཞོ་ཐག་གཅད་པར་བྱ་སྟེ།  ནས་ལ་ནས་ཁལ་བརྒྱད་མ་ལ་སྨར་ཞོ།   ཚྭ་ལྕགས་ཁལ་གཉིས་མ་ལ་ཁྲག་ཞོ།  ཟོང་ཁལ་བརྒྱད་མ་ལ་ཟོང་ཞོ།   མར་ཁལ་གསུམ་ཉག་ལྔ་ལ་མར་ཞོ།   ཇ་ཉག་བཞི་མ་ལ་ཇ་ཞོ།   དངུལ་སེ་བཞི་མ་ལ་དངུལ་ཞོ་སྟེ།  དངུལ་ཞོ་དྲུག་མ་ལ་གསེར་ཞོ།   གསེར་དང་དངུལ་ལ་དྲུག་ལྡབ་ཀྱི་ཁྱད་བྱེད་པ་ཡིན་པས།  ཉོ་ཚོང་གང་བྱེད་ཀྱང་ཕན་ཚུན་འོས་ཚོད་བླངས་ནས།  རིན་སྤུས་གང་འོས་དང༌།  ཞོ་གྲངས་ཁལ་གྲངས་གང་འོས་རིགས་པས་དཔྱད་ནས་བྱེད་པ་ཡིན་ནོ། 
        བཅུ་པ།   ལྷག་ཆད་རྩིས་ཀྱི་ཞལ་ལྕེ་ནི།   སྔོན་གྱི་གནའ་མི་རྣམས་ཀྱིས་རྩིས་ནོར་ལོ་གསུམ་སོང་ཡང་བྱེད་ཅེས་བྱ་བ་གསུངས་གདའ་བས།  བུ་ལོན་གཏོང་ལེན་བྱེད་པའམ།   དཔྱད་པ་ཉོ་ཚོང་བྱས་པའི་ལྷག་ཆད་ལ་མ་འཆམས་ནས།  རྡེ ་ཕད་བུད་དུ་བཤས་ཏེ།  ཕན་ཚུན་ཡིད་ཆེས་པའི་རྩིས་ངེས་པར་བྱེད་དགོས། 
        བཅུ་གཅིག་པ།   ལ་ལྟག་རྒྱབ་ཀྱི་ཞལ་ལྕེ་ནི།   དཔེར་ན་ལ་ཕར་རྒྱབ་ནས་ཇག་བརྒྱབ་པ་རྗེས་སྙེགས་འཕྲོད་དེ།  ཕན་ཚུན་གཤེར་མལ་བྱེད་པའི་ཚེ་བར་དུ་བོར་ཟོག་བྱུང་བ་རྣམས་ལ་མ་འཆམས་ན།  སྟོང་འགོང་གཤམ་སྤྲོད་ཀྱི་མནའ་སྐབས་འདིར་བབ་པས།   ནོར་བདག་གིས་འདི་ཚུན་ལ་འཐོར་འདི་ལས་བྱུང་རེ་ཟེར་བ་བྱས་དག་སྐྱེལ།  ཇག་པས་ཀྱང་ངེད་ཀྱི་ལག་ཏུ་རི་ཚུན་ལ་འདི་ལས་བྱུང་རེ་ཟེར་བ་བྱས་ནས།  ཕན་ཚུན་ཡིད་ཆེས་ཀྱི་དག་པ་རྗེས་ལེན་བྱས་ནས། 
མ་འཆམས་པ་སྦོལ་བགོས་ཞེས་བྱ་བ་སྐབས་འདིར་འཇིག་རྟེན་རྒན་པོས་གསུངས་པས། 
རྩོད་པའི་གཞི་ལ་སྦོལ་བགོས་བྱས་ཏེ་ཕྱེད་ནོར་བདག་གིས་གུད་འཁུར།  ཕྱེད་ཀྱི་འདེགས་རྒྱལ་ཇག་པས་སྤྲོད་དགོས་པ་འཇིག་རྟེན་མཁས་པའི་ལུགས་ལ་ཡོད་དོ།