དང་པོ།པར་དོ་འགྲུབ་ལུགས།
འཆི་སྲིད་འགག་པ་དང་དུས་མཉམ་དུ་སྲང་མདའི་མཐོ་དམན་བཞིན་བར་དོ་འགྲུབ་ལ།དེ་ཡང་སྐྱེ་བ་ཕྱི་མའི་བྱད་གཟུགས་བཞིན།བར་དོ་བ་དེ་དབང་པོ་ཀུན་ཚང་མངོན་ཤེས་ཡོད་པ།ལས་ཀྱི་རྫུ་འཕྲུལ་ཅན།སྐྱེ་གནས་དང་རྟེན་བྱིན་ཅན་མ་གཏོགས་གང་ལའང་ཐོགས་པ་མེད་པ།རིས་མཐུན་ལྷ་མིག་དག་པས་མཐོང་བའོ།ཐ་མལ་བ་ཤི་བའི་རྗེས་སུ་རྣམ་ཤེས་དེ་ཁ་བྲལ་ཏེ་སྐྱེས་པ་ཕྱི་མའི་ལུས་ལེན་པའི་རྐྱེན་དང་འཕྲད་ཚེ་ལེན་པར་འགྱུར་ཞིང་།ཞག་བདུན་ཕྲག་གཅིག་ལ་འཆི་ཆུང་རེ་ཡོང་ཞིང་།འགྱངས་ནའང་ཞག་བདུན་ཕྲག་བདུན་ལས་མི་གནས་སོ།
བར་དོ་སྣང་ཚུལ་གྱི་ཁ་དོག་གི་ཁྱད་པར་ནི།མངལ་དུ་འཇུག་པ་ལས།དམྱལ་བའི་བར་དོ་ནི་སྡོང་དུམ་ཚིག་པ་ལྟ་བུ།ཡི་དྭགས་ཀྱི་བར་དོ་ཆུ་ལྟ་བུ།འདོད་པའི་ལྷ་དང་མིའི་བར་དོ་གསེར་ལྟ་བུ་དང་།གཟུགས་ཁམས་པའི་བར་དོ་དཀར་པོར་གསུངས་སོ།ཁ་ཅིག་གཤིན་པོ་དེ་གསོན་པའི་སྐབས་ཀྱི་རྣམ་པ་དང་ཆ་བྱད་ཇི་འདྲ་བ་ཡོད་པ་བར་དོ་ལ་བསྡད་འདུག་པས།འཕྲིན་དང་ལན་བསྐུར་ཚུལ་སོགས་ཟོག་རྫུན་ཡིན།དེ་འདྲ་རེ་གཉིས་སྲིད་ཀྱང་ཕལ་མོ་ཆེར་མི་མ་ཡིན་གྱིས་གཤིན་པོའི་གཟུགས་སུ་བསྒྱུར་བ་སྟེ།མདོ་ལས།དྲི་ཟ་ཁྱབ་བྱེད་དང་།གནོད་སྦྱིན་སྨྲ་འདོད།དྲི་ཟ་འཆི་ཁའི་སེམས་ལ་ཉེ་བར་འཇུག་པ་རྣམས་ཀྱིས་ཟས་འཚོལ་ཕྱིར་ཚེ་འདས་ཀྱི་གཟུགས་ཇི་ལྟར་བ་བཞིན་གཤིན་པོའི་དབྱིབས་བྱེད་ཅན་མངོན་སུམ་དུ་མཐོང་བ་དང་།མིའི་ཁོག་ཏུ་བརླམས་ནས་དན་རྟགས་མང་པོ་སྨྲ་བ་ལྟ་བུས་འཇིག་རྟེན་པ་བསླུ་བར་བྱེད་པ་ཡིན་ལ།དཔེར་ན།རྗེ་མི་ལས་བོན་གྱི་ཁྱིམ་ཚང་ཞིག་ནས་མི་མ་ཡིན་གཤིན་པོར་བརྫུས་པ་དེ་མཐར་སྤྱུགས་བཏང་བའི་ལོ་རྒྱུས་ལྟ་བུ་དང་།ཁྲུས་ཆོག་ལས་ཀྱང་།ཚེ་ལས་འདས་པའི་ཆ་བྱད་བཟུང་ནས།དེའི་ཉེ་འབྲེལ་དང་།འཇིག་རྟེན་པ་རྣམས་བསླུ་ཞིང་གནོད་པར་བྱེད་པའི་གནོད་སྦྱིན་དང་།ཤ་ཟ་དང་།འབྱུང་བོ་ལ་སོགས་པ་ཐམས་ཅད་གཏོར་མ་འདིས་ཚིམ་པར་གྱིས་ལ།གནོད་པ་དང་འཚེ་བའི་བསམ་པ་ངན་པ་ཐམས་ཅད་སྤོང་ལ་ཞེས་གསུངས་པ་ལྟ་བུའོ།
 གཉིས་པ།སྤུར་སྦྱོང་ཚུལ།
སྤུར་སྦྱོང་ཞེས་པ་ནི་དག་ཡིག་གི་དགོངས་དོན་ལྟར་ན།གཤིན་པོ་དེ་གཙང་བཟོ་བྱས་ཏེ་ཡང་དག་པར་སྦྱང་བ་བྱ་ཞིང་།བོད་དུ་སྤུར་སྦྱོང་བྱེད་པ་ལ་རིགས་མང་ཡང་བསྡུ་ན་སྤུར་སྦྱངས་སྟངས་གཤམ་གྱི་རིགས་དྲུག་གི་ནང་དུ་འདུ་བར་སེམས།
༡.ཕུང་བོ་མེར་བསྲེགས་པ།ཕུང་བོ་མེར་སྲེག་སྐབས་དུར་གྱི་ས་དཔྱད་ལ་གཞིགས་ཏེ།རུས་མཐོ་བ་དང་ཡོན་ཏན་ལྡན་པ།ཡང་ཚ་མཐོང་བའི་རྒན་པོ་ཡིན་ན།གདན་ཁྲི་ལྟ་བུའི་མཐོ་ས་དང་།རུས་དམན་པ་དང་ཡོན་ཏན་ཆུང་བ།ལོ་ཆུང་དག་དམའ་སར་འཇོག གྲིར་ཤི་དང་མཛེ་ཅན།གདུག་པའི་ནད་ཀྱིས་ཤི་བ་རི་སྣ་དང་བྲག་སྣ་གནོན་པའི་དམའ་ས་ལའོ།། སྲེག་སྟངས་ནི།གསང་སྔགས་ཀྱི་རྒྱུད་སྡེ་ལས་གསུངས་པ་ལྟར།རྡོ་རྗེ་སེམས་དཔའ་དང་།མི་འཁྲུགས་པ།ཀུན་རིག་སྟེ་ངན་སོང་སྦྱོང་བའི་ལྷ་གསུམ་གང་རིགས་ཀྱི་ཆོ་ག་ལྟར།རྫས་ཆེན་བཅུ་གཉིས་དང་སྲེག་ཤིང་ལ་མར་དང་སྣུམ་བྱུགས་ནས།ཚེ་འདས་ཀྱི་ཕུང་བོ་ལྔས་རྒྱལ་བ་རིགས་ལྔ་མཆོད་པའི་སླད་དུ།མེ་སྦར་ཏེ་ཐབ་ཀྱི་ནང་དུ་སྦྱངས་པ་ཡིན།ཡང་ན།པུར་ཙམ་དན་གྱི་སྤུར་སྒྲོམ་མར་ཁུས་བཀང་བའི་ནང་དུ་བཞག་སྟེ།སྲེག་ཐབ་ཀྱི་སྟེང་དུ་བཞག་འོག་ནས་མེ་སྦར་ཏེ་གདུང་སྲེག་སྲོལ་ཡང་ཡོད།དེ་ལྟར་གསང་སྔགས་ཀྱི་ཆོ་ག་ལྟར་བསྲེགས་ན།དུ་བ་ཕོག་པའི་བྱ་དང་རི་དྭགས།ཐལ་བ་ཆུར་འཕོས་ན་ཆུ་དེ་འཐུང་བའི་སེམས་ཅན་ཡོད་ཚད་ལ་ཕན་པ་རྒྱ་ཆེན་པོ་འབྱུང་ལ།ཚེ་འདས་དེས་ཀྱང་རང་གི་དབང་བོ་ལྔས་མཆོད་པ་བྱས་པའི་སྟོབས་ལ་བརྟེན་ནས།བདེ་འགྲོར་སྐྱེས་པར་གསུངས་ལ།དེ་ཡང་སྒྲུབ་པ་པོ་དང་སྒྲུབ་ཡུལ་ཚད་ལྡན་དགོས་སོ།།དེ་ནས་ཐབ་ལས་ཕྱིར་བཏོན་ཏེ་རུས་ཆོག་བསྐུར་ནས་ཕྱེ་མར་སྒྲུགས་ཏེ།རི་མཐོ་ས་ལས་རླུང་ལ་བསྐྱོན་པའམ།ཡང་ན་རུས་པ་དང་གཟུངས་ཆུ་ས་དམར་དང་སྦྲུས་ཏེ་མི་འཁྲུགས་པའི་སྐུ་དང་ས་ཙྪ་ཆུ་ཕྱགས་ཞེས་པའི་ཆོ་གའང་ཡོད་དོ།།
༢.བང་སོར་སྦ་སྟངས།བང་སོའི་ནང་དུ་སྦས་ནས་དུར་འཇུག་བྱེད་སྟངས་འདི།བོན་གྱི་ལུགས་སྲོལ་ཞིག་ཡིན་ཚུལ《བཀའ་ཐང་》དང《དེབ་དཀར》ལས་བཤད་ལ།དེ་ཡང་པུ་དེ་གུང་རྒྱལ་གྱི་ཡབ་གྲི་གུམ་བཙན་པོའི་སྤུར་ཟངས་ཆེན་ཁ་སྦྱོར་གྱི་ནང་དུ་བཅུག་སྟེ་གཙང་ཆུའི་གཞུང་ལ་བསྐྱུར་བ་ཀོང་པོར་ཐོན་པ་དེ།བླུས་ནས་འཕྱང་བ་དར་ཐང་དུ་དུར་བཏབ་པ་འདི།བོད་ཀྱི་ཡིག་ཚང་རྣམས་སུ་བང་སོའི་ཐོག་མ་ཡིན་པར་བཤད།ཐོག་མར་བང་སོའི་དབྱིབས་ས་ཕུང་སྤུངས་པ་ལྟ་བུ་ལས།བཟོ་དབྱིབས་མེད་པ་བོད་རྗེ་གྲི་གུམ་བཙན་པོ་ནས་ཁྲི་གཉན་གཟུངས་བཙན་བར་དུ་གསལ་ལ།འབྲོང་གཉན་ལྡེ་རུ་བང་སོར་གསོན་པོར་བཅུག་སྟབས།གུར་གྱི་དབྱིབས་ལྟ་བུ་ཟླུམ་པོ་ཡིན་པ་དང་།དེའི་རྗེས་གནམ་རི་སྲོང་བཙན་ནས་བང་སོ་གྲུ་བཞི་བརྩིགས་སྲོལ་དར་ཏེ།མངའ་བདག་རལ་བ་ཅན་གྱི་བར་དང་།དེ་ཡང་གྲུ་བཞི་སོག་པའི་རུས་ལེབ་དང་འདྲ་བར་སྒབ་ཆེ་མགོ་ཆུང་ཞིག་ཡོད།ལྷག་པར་ཆོས་རྒྱལ་སྲོང་བཙན་གྱི་བང་སོ་ནི།སྲོང་བཙན་བང་སོའི་དཀར་ཆག་ནང་།སྲོང་བཙན་བང་སོ་ཆུ་བོའི་མདའ་རུ་ཆགས།ཆེ་ཆུང་ཚད་ནི་དཔའ་ཆེན་མདའ་རྒྱང་གང་།སྟེང་གི་ཞེང་ནི་ཉག་གི་རྡོ་རྒྱང་གང་།ནང་དུ་ལྷ་ཁང་ལྔ་ཡི་བཞུགས་སུ་གསོལ།བང་སོ་ནང་རྒྱན་ཅན་དུ་གྲགས་པ་ཡིན།གསང་བའི་མཚན་ནི་མུ་རི་སྨུག་པོ་ཞེས།འཛམ་བུ་གླིང་གི་ནོར་ཕུད་ལན་གསུམ་བསྡུས།ལྷ་ཀླུ་མི་ཡི་སྐྱེས་འགྲོའི་བདེ་སྐྱིད་བསྐྲུན།ཞེས་གསུངས་ཡོད་པ་དང་།ཡང་དེབ་ཐེར་འགར།བང་སོ་འདིར་རེའུ་མིག་དགུ་ཡོད་པའི་དབུས་སུ་བཙན་པོའི་སྐུ་ཕུང་གསེར་གྱི་བཏུམས་པ་བཞུགས་ཤིང་།ནང་གི་རེའུ་མིག་ཐམས་ཅད་ནོར་གྱིས་བཀང་བ།ཕྱིའི་དབྱིབས་གྲུ་བཞི།ནང་དུ་ལྷ་ཁང་ལྔ།དབུས་སུ་རིང་ཚད་ཁྲུ་ཙི་བརྒྱད་ཙམ་ཡོད་པའི་བྱུ་རུའི་སྡོང་བོ་དང་།རྒྱལ་པོ་དང་རྒྱ་བཟའ།བལ་བཟའ་གསུམ་གྱི་འཇིམ་སྐུ་བཞུགས་ཤིང་།ཟུར་བཞིའི་མཆོད་ཁང་ནང་རིན་པོ་ཆེ་སྣ་ཚོགས་ཀྱིས་བཀང་བའི་བང་མཛོད་དང་།ནང་གི་འོག་བཞིར་རྡོ་གཅལ་བཏིང་བ།ཕྱི་སྐྱ་གྱང་ས་མཐུག་པོ་བསླངས་ཤིང་།ནང་སྐྱ་རྡོ་རྩིག་ཅན།བང་སོའི་སྒོ་མོ་ནུབ་ཕྱོགས་སུ་བསྟན་པ།བང་སོའི་ཕྱི་ར་ས་སྨུག་པོ་དང་།རྡོ་ཧྲུག་གིས་བཀབ་ནས་རི་ཆུང་དེའུ་འབུར་ཞིག་དང་འདྲ་བར་གྱུར་བ།དེའི་མཐའ་བསྐོར་དུ་ཞེང་ཚད་གོམ་པ་བརྒྱ་ལྷག་ཙམ་དང་།མཐོ་ཚད་གཞུ་འདོམ་བཅུ་གཉིས།བང་སོའི་རྩེ་མོར་ལྷ་ཁང་ཆུང་ངུ་ཞིག་བཅས་ཡོད་པར་བཤད་དོ།སྙིགས་མའི་དུས་སུ་ཆུ་བོས་འཇིག་སྟེ།གནམ་སྒོ་ཕྱེ་རྒྱུ་ཡོད་པ་སོགས་བརྗོད་པ་ལྟ་བུ་དང་།ཡང་རྒྱ་ནག་གི་རྒྱལ་རབས་སུ།རི་མཚམས་བང་སོ་རི་ཆུང་ནང་བཞིན་མང་པོ་ཡོད།བང་སོའི་འཁྲིས་སུ་ཁང་བ་ཆུང་ངུ་རེ་ཡོད།ཁང་བའི་སྟེང་ལ་སྟག་རིས་དཀར་པོ་བྲིས་ཡོད་ཅེས་ཀྱང་འབྱུང་།བེམ་པོ་འཇོག་སྟངས་ཀྱང་།ཕུང་བོ་གཙང་མར་བཀྲུས་རྗེས་དུར་ས་གཙང་མའི་མཐིལ་དང་།མཐའ་འཁོར་དུ་སོལ་བས་གཏུམས་པའི་དཀྱིལ་དུ་བཞག་སྟེ་མི་རུལ་བ་བྱས་ཐོག བེམ་པོའི་མདུན་དང་མཐའ་འཁོར་དུ་ཟས་གོས་དང་།གཤིན་པོའི་རྒྱུན་སྤྱོད་ཡོ་བྱད་སོགས་བཞག སྟེང་དུ་སས་གཡོགས་པའི་ཐོག ཤིང་སྣ་འདེབས་འཛུགས་བྱེད་པ་སྟེ།ཤིང་སྡོང་འཛུགས་པ་འདི་ད་ལྟ་སྔོན་ཐོན་རྒྱལ་ཁབ་ཨ་རི་སོགས་ན་ཡང་འབྱུང་བས།དེ་ཡང་སྔ་སོར་བོད་ཀྱི་སྲོལ་ཡིན་པར་སེམས།གཞན་ཡང་།རྒྱལ་བློན་བར་དུ་བྲོ་བོར་བའི་རྡོ་དཀར་བོ་ཞིག་བཟུང་ནས།སུ་སྔོན་དུ་གྲོངས་ན་མནའ་བཅད་དེས་གོར་མ་དཀར་བོ་དེ།བང་སོའི་རྨང་དུ་བཞག་ནས་ཕྱག་བསྟར་ནས་བརྩིགས་སྲོལ་ཡོད་དེ།གནམ་རི་སྲོང་བཙན་དང་དབྱི་ཚབ་ཟུང་གིས་མནའ་རྡོ་དེ།ཕྱིས་དབྱི་ཚབ་ཀྱི་མཆད་པའི་རྨང་རྡོ་བྱས་ཚུལ་དང་།བྲོ་བོར་ཚེ་གོར་མ་ལག་ཏུ་ལེན་སྲོལ་དེ་ཉེ་ཆར་ཁམས་དང་འབྲས་ལྗོངས་ན་ཡོད་ཚུལ《དེབ་དཀར》ལས་གསུངས་སོ།ཡང《དེབ་དཀར》ལས།གྲོངས་པའི་ཚེ་ཤ་རུས་རྣམས་གསེར་ཕྱེ་དང་མཉམ་དུ་བསྲེས་ནས།ལྕགས་སྣོད་དུ་བཅུག་སྟེ་ས་ལ་སྦ་ཞེས་ཀྱང་གསུངས་ལ།《རྦ་བཞེད》