བོད་ཁམས་ཡོངས་སུ་ལོ་གསར་གྱི་དགའ་སྟོན་རོལ་སྟངས་ཐད་ཡུལ་གྲུ་སོ་སོར་ལུགས་སྲོལ་མི་འདྲ་བ་ཅུང་ཟད་ཡོད་རུང་།ཁྱབ་ཆེ་ས་ནས་བཤད་ན་ཧ་ལམ་འདྲ་མཚུངས་ཡིན་པ་རེད།  ལོ་གསར་སྔོན་གྱི་ཚེས་ཉེར་དགུའི་ནུབ་མོ་དགུ་ཐུག་ཅེས་པ་སྐོལ་སྲོལ་ཡོད་ལ།ཁྱིམ་མི་ཀུན་འཛོམས་ཀྱིས་ལོ་རྙིང་ལ་བཀྲ་ཤིས་པའི་མཇུག་སྡུད་པ་དང་།ཁྱིམ་གྱི་དུད་དྲེག་དང་ཟངས་དྲེག་སོགས་འཕྱགས་དར་ལེགས་པོ་བྱས་ནས་གང་སྙིགས་ཕྱིར་འཕོ་བ་དང་མཉམ་དུ་ལོ་རྙིང་པའི་བཀྲ་ཤིས་པ་དང་།ནད་རྣམས་དེ་དང་མཉམ་དུ་རྫོགས་པའི་སྨོན་འདུན་ཞུ་སྲོལ་ཡོད་པ་རེད།  ལོ་གསར་ཚེས་གཅིག་གི་ཞོགས་པར་ལོ་དེའི་ལོ་རྟགས་དང་མཐུན་པའི་མི་ཞིག་སྔ་མོ་ནས་ལངས་ཏེ་ལོ་གསར་རྟེན་འབྲེལ་དང་པོ་ལ།ཚེས་ཆུ་གསར་པ་ལེན་དུ་འགྲོ་བ་དང་།སྔ་མོ་ནས་གྲ་སྒྲིག་བྱས་ཡོད་པའི་ཀླུ་རྫས་ཆུ་མིག་ཏུ་གཏོར་བ་དང་།བསང་མཆོད་འབུལ་སྲོལ་ཡོད་པ་དེ་ནི་ཀླུ་རྒྱལ་གཙུག་ན་རིན་ཆེན་གྱིས་འཇིག་རྟེན་ཐོག་སྐྱེ་འགྲོ་ཀུན་ལ་དཔྱིད་དཔལ་གྱི་ལེགས་སྐྱེས་བསྐྱལ་དུ་ཡོང་བར་དྲིན་པ་ཞུ་བའི་མཚོན་རྟགས་ཡིན་པར་བཤད།ཡང་ལ་ལས་ཚེས་གཅིག་ཉིན་ཐོ་རངས་སྐར་ཆེན་ཤར་ཕྱོགས་རི་བོའི་ཕྲག་ཏུ་ཤར་ཚེས་ཆུ་མགོ་སའི་གོ་ལར་ཐེངས་གཅིག་བསྐོར་ནས་སླེབས་ཡོང་བས།ཆུ་མགོ་དེ་ནི་ལོ་འཁོར་ཧྲིལ་པོའི་བཀྲ་ཤིས་མཚོན་ཚུལ་ཡིན་ཞེས་ཀྱང་བཤད་སྲོལ་མཆིས། ཞོགས་པ་ཚེས་ཆུ་ལེན་པའི་སྐབས་སུས་སྔོན་དུ་ལོན་ན་ཁྱིམ་ཚང་དེ་བཀྲ་ཤིས་བདེ་ལེགས་ཡོང་བའི་རྟེན་འབྲེལ་ཡོད་པར་སྨྲ་པས།ལོ་གསར་ཚེས་གཅིག་ཉིན་གྱི་སྔ་མོའི་ནངས་ཇ་ལ་ཚེས་ཆུ་འཐུང་ཞེས་ཟེར་སྲོལ་ཡོད།དེའི་སྐབས་ཀྱི་ཟས་རིགས་དང་མངར་རིགས་སྣ་ཚོགས་ཡོད་མོད།དུས་རྒྱུན་ཟ་བའི་རྩམ་པ་དང་ཤ་ཐུད་མར་གསུམ་ངེས་པར་དུ་འཛོམས་དགོས་པར་མ་ཟད་ཉུང་ཙམ་ཅི་ནས་ཀྱང་ཟ་དགོས་པ་རེད།  ཚེས་ཆུ་མ་འཐུང་སྔོན་དུ་རང་རང་གི་མཆོད་ཁང་དང་ཐབ་ལྷར་མཆོད་པ་ཞིག་འབུལ་དགོས་པ་དང་།ཚེས་ཆུ་བཏུང་རྗེས་སྐྱེས་པ་རྣམས་བསང་གཏོང་བར་འགྲོ་དགོས།དེ་ནི་ཆེས་བརྗིད་རྔམ་ལྡན་པའི་རྟེན་འབྲེལ་གྱི་མཛད་སྒོ་ཞིག་ཡིན་པ་རེད།ཉི་མ་ལ་ལུང་ཀུན་ཏུ་འཆར་རྗེས་སྐྱེས་པ་རྣམས་ཀྱིས་རྟ་ལ་སྒ་སྲབ་སོགས་ཀྱིས་གཟབ་མཆོར་སྤྲས་པ་དང་།རང་གིས་ཀྱང་རྒྱན་གོས་ལེགས་པ་གྱོན་ཏེ་་ཕན་ཚུན་ལ་ལོ་གསར་བའི་རྟེན་འབྲེལ་ལ“ལོ་གསར་བཟང”ཞེས་མཚམས་འདྲི་ཞུ་བ་དང་།མཉམ་དུ་བསང་གཏོང་ལ་བསང་འབོད་སྣ་ཚོགས་བྱས་སྲོལ་ཡོད་པ་རེད།བསང་གཏོང་རྗེས་རྟ་རྒྱུག་བང་རྩལ་འགྲན་པ་དང་།ཁ་ཤག་རྩེད་མོ་བྱས་ནས་ཉི་མ་ནུབ་རིའི་རྒྱབ་ལ་ཡིབ་དུས་ད་གཟོད་རང་རང་གི་ཁྱིམ་དུ་ལོག  དེང་སང་ལོ་གསར་ཚེས་གཅིག་གི་དགའ་སྟོན་འདིར་དེང་རབས་ཀྱི་ཁྱད་ཆོས་ཤིག་མངོན་བཞིན་ཡོད་པ་རེད།དཔེར་ན་སྟག་ཤར་རྣམས་ཀྱིས་སྦག་སྦག་འཁོར་ལོ་ཞོན་ནས་བསང་དུ་འགྲོ་བ་དང་།སྦག་སྦག་ཞོན་རྩལ་དང་སྦག་སྦག་རྒྱུག་ཤེད་བཅས་ཀྱིས་འགྲན་བསྡུར་བྱེད་ཀྱིན་ཡོད་པ་རེད།  ཚེས་གཉིས་ཉིན་ནས་ལོ་གསར་གྱི་མགྲོན་འབོད་བྱས་ཏེ་སྐྱེས་པ་རྣམས་ཀྱིས་རང་གི་གཉེན་ཉེ་མཆེད་གྲོགས་རྣམས་ཁྱིམ་ཚང་སོ་སོར་བོད་ནས།ཆང་དང་གླུ་གར་རྩེད་འཇོར་རོལ་བ་རེད།ལོ་གསར་གྱི་མཇུག་ཏེ་ཚེས་བཅོ་ལྔ་ཉིན་རྫོགས་ཤིང་དེ་ནས་དགོན་པའི་སྨོན་ལམ་ཚོགས་སར་འགྲོ་སྲོལ་ཡོད་པ་རེད།