དང་པོ། བོད་ཀྱི་འུར་རྡོ་ནམ་བྱུང་གི་ལོ་རྒྱུས།
      བོད་ཀྱི་མངའ་མཛད་དགུའི་ཐོག་མ་གནོད་སྦྱིན་ནག་པོའི་དུས་ནས་བཟུང་དགྲ་འགོག་རང་སྲུང་གི་ནུས་པ་ཐོན་པའི་མཚོན་ཆའི་བྱེད་ཐབས་བཀོལ་རྒྱུའི་སྲོལ་བྱུང་ཡོད། གདོད་མའི་བོད་མི་མངའ་མཛད་དགུའི་དུས་སྐབས་སུ་དར་བ་ཡིན་པར་ཐམས་ཅད་གཅིག་མཐུན་འགལ་མེད་ལོ་རྒྱུས་ཀྱི་རྒྱབ་ལྗོངས་མངོན་པ་འདི་ནི་བོད་ཀྱི་འུར་རྡོའི་ལོ་རྒྱུས་དུས་ཡུན་གསལ་བྱེད་བདེན་དཔང་ཡིན་པ་སྙོན་མེད་དོ།།
   གཉིས་པ། བོད་མིས་འུར་རྡོ་བཀོལ་སྤྱོད་བྱས་པའི་ལོ་རྒྱུས་དང་དཔྱད་སྒོ།
      མིའི་ཚེ་སྲོག་ལ་འཚེ་བའི་གཅན་གཟན་གདུག་པ་ཅན་གྱི་གདོང་བླངས་པ་དང༌། ཁོར་ཡུག་གི་དགྲ་ཟླ་ལ་ཡ་ལན་སྤྲད་པ། རི་སྐྱེས་སྲོག་ཆགས་རྔོན་ནས་ཁ་ཟས་འཚོལ་སྒྲུབ་བྱས་ཡོད། དཔེར་ན། དབྱིན་བཙན་རྒྱལ་ཁབ་ཀྱིས་བོད་ལ་ཐོག་འགེལ་སྐབས་བོད་པས་འུར་རྡོ་བཀོལ་ནས་དབྱིན་དམག་ལ་འགོག་རྒོལ་དྲག་པོ་བྱས་པ་དང་། དེ་ནས་བཟུང་བོད་མིས། འཇམ་པོ་བལ་ལས་བཟོས་པའི། །འུར་རྡོ་ཆུ་མིགདགུ་སྒྲིལ། ། ཆུ་མིག་གཞུང་ནས་བརྒྱབ་པས། ། དབྱིན་ཇིའི་སྣ་ལ་ཐེབས་སོང༌།། ཞེས་གླུ་གཞེས་ལེན་པའི་སྲོལ་ཡོད་ཚུལ་དུང་དཀར་ཚིག་མཛོད་སོགས་ན་གསལ་བ་ལྟར། ཕྱིའི་དགྲ་འགོག་གི་ལག་ཆ་དང༌།ཐར་བའི་འཇུག་སྒོ་འཚོལ་བ་ལ་དགྲ་བའི་གསང་བ་ཉོན་མོང་གི་དགྲ་བོ་ཞི་བྱེད་གཅོད་ལུགས་པའི་ཕྱག་ཆ། ཐ་ན་རྟ་ནོར་ར་ལུག་འཚོ་སྐྱོང་ལ་དགྲ་བའི་འཕར་སྤྱང་འགོག་ཆས་སོགས་ལ་བཀོལ་མྱོང་ཞིང༌། ད་ལྟའི་དུས་སུ་དར་རྒྱས་སུ་འགྲོ་བཞིན་པའི་འགྲོ་བ་མི་རིགས་ཀྱི་ཚེ་སྲོག་ཞི་བདེར་ཤིན་ཏུ་དགྲ་བའི་དུག་རྫས་ཀྱི་རང་བཞིན་ཅན་དང༌། འགས་གཏོར་ནུས་སྟོབས་ཅན་གྱི་མཚོན་ཆ་ནག་པོའི་རིགས་ལྟ་བུའི་ཧ་ཅང་འཇིགས་སྐུལ་ཚབས་ཆེན་གྱི་ཉེན་ཁ་ཡང་མེད་པར་འོས་འཚམས་སྟབས་བདེའི་ལག་ཆ་རིན་ཐང་ཅན་ཞིག་ཡིན་པ་མངོན་གསལ་ལོ།།
   གསུམ་པ། བོད་ཀྱི་འུར་རྡོའི་རྒྱུ་སྤུས་བྱུང་རིམ་ནས་བཟོ་ཁྱད་བཀོལ་སྟངས་སོགས།
      གདོད་མའི་མངའ་མཛད་དུས་ཀྱི་འུར་རྡོའི་རྒྱུ་ཆ་ནི་གཙོ་བོ་ཤིང་ཤུན་དང༌། སྲོག་ཆགས་ཀྱི་ཀོ་བ་དྲས་ཏེ་རྒྱུན་བུས་བཟོས་པ་དང༌། ད་ལྟ་གཅན་གཟན་སྣ་ཚོགས་དང་རི་སྐྱེས་སྲོག་ཆགས་ཀྱི་སྤུ་བསྒྲིམས་ཏེ་བཟོས་པ་ནས་ནོར་ལུག་གི་སྤུ་བཀོལ་ནས་བཟོ་བ་དང་དར་སྐུད་སོགས་བསྒྲིམས་པ་དང་སླས་ཏེ་བཟོ་ཤེས་པ་ད་ལྟའི་བར་རིམ་པར་བརྒྱུད་དེ་རྒྱུ་སྤུས་ཅན་དང༌། ལག་རྩལ་རང་བཞིན་ལྡན་པའི་འུར་རྡོ་ཞེས་པའི་ལག་ཆ་དེ་གྲུབ་གནས་བྱུང་ཡོད། བོད་ཀྱི་འུར་རྡོ་ནི་རྒྱུ་སྤུས་དང་བཟོ་ཁྱད་ཀྱི་ཐོག་ནས་མཛེས་ཆོས་སྤྲས་བཅས་ཀྱི་འགྱུར་བ་ཅུང་བྱུང་ཡོད་པ་ཙམ་མ་གཏོགས། བཟོ་དབྱིབས་ཀྱི་རྣམ་པ། རྒྱུ་ཆ། བཀོལ་སྤྱོད་བྱེད་སྟངས་སོགས་ཀྱི་ཐད་ནས་ད་དུང་གདོད་མ་ཇི་བཞིན་དུ་རང་སོར་གནས་ཡོད་པར་སེམས། དེས་ན་བོད་ཀྱིས་འུར་རྡོ་འདིས་བོད་མི་རིགས་ཀྱི་ཆེས་རྒྱུན་རིང་གི་ལོ་རྒྱུས་ལ་བདེན་དཔང་བྱས་ཡོད་པར་མ་ཟད་འཛམ་གླིང་གི་རིག་མཛོད་ཁྲོད། ཆེས་ཕུལ་དུ་བྱུང་བའི་གནའ་རྫས་ཀྱི་ཁྱད་ཆོས་མངོན་ཐུབ་ཡོད་པ་དང༌། ཆེས་མཐོའི་གོ་གནས་ཟིན་ཡོད་པར་སྣང༌།
   བཞི་པ། འུར་རྡོའི་སྤྱི་གྲུབ་ཀྱི་ཆ་ཤས།
      འུར་རྡོའི་ཞེས་པའི་ལག་ཆ་དེའི་མིང་སྤྱི་གྲུབ་ཀྱི་ཆ་ཤས་སུ་འུར་གྱི་ཡ་མཆོག་དང༌། འུར་གྱི་མ་མཆོག འུར་མཐིལ། འུར་གྱི་དཔའ་ལུང་ངམ་མཛུབ་ལུང༌། རྡོ་ལེན་ནམ་རྡོ་དཀྲིས། ཚར་ལྕེ་འམ་འུར་ལྕེ་སོགས་འདུས་ཡོད་འུར་རྡོའི་སླས་སྟངས་དང་བཟོ་སྟངས་གི་སྒྱུ་རྩལ་འདིར་མི་སྤྲོའོ།།