ཐུན་མོང་མ་ཡིན་པའི་བོད་ལུགས་བཟོ་བཀོད།

འགྲོ་བ་མིའི་རིགས་ཀྱི་དཔལ་ཡོན་འཕེལ་རྒྱས་བྱུང་བའི་ལོ་རྒྱུས་ཆུ་རྒྱུན་རིང་མོའི་ཁྲོད་བཟོ་བཀོད་ནི་མིའི་རིགས་ཀྱི་དངོས་པོའི་འཚོ་བའི་རྩ་བའི་ཆ་རྐྱེན་བཞིའི་ཡ་གྱལ་དུ་གྲུབ་ཅིང་། བཟོ་བཀོད་ཀྱི་རྣམ་པ་ནི་བཟོ་བཀོད་མཛེས་བར་བྱེད་པའི་གྲུབ་ཆ་ཞིག་ཡིན་པ་དང་། རིག་གནས་ཀྱི་ཐད་ནས་དཔྱད་ན་མིའི་རིགས་ཀྱི་བློ་གྲོས་ཀྱི་དྭངས་མ་ཡིན་པས་འགྲོ་བ་མིའི་རིག་གནས་མཚོན་པར་བྱེད་པའི་ཐབས་ལམ་ཞིག་ཏུ་གྱུར་འདུག  བཟོ་བཀོད་དང་འབྲེལ་བའི་རྒྱན་སྤྲས་སྒྱུ་རྩལ་ཡང་དེ་ལས་མ་འདས་པར་རིག་གནས་ཀྱི་ཐོན་རྫས་དང་འགྲོ་བ་མིའི་རིགས་ཀྱི་སྒྱུ་རྩལ་གྱི་སྙིང་སྟོབས་མངོན་པར་མཚོན་བྱེད་ཅིག་ཡིན། ཀུན་གྱིས་མཁྱེན་གསལ་ལྟར་ཐ་དད་ཀྱི་མི་རིགས་ལ་སོ་སོར་དབང་བའི་སྲོལ་རྒྱུན་རིག་གནས་དང་ཐུན་མོང་མ་ཡིན་པའི་ཁྱད་ཆོས་ཤིག་མཆིས། དེ་བས་བཟོ་བཀོད་རིག་གནས་ལ་མི་རིགས་སོ་སོའི་རྟགས་མཚན་ཞིག་ཡོད་ཅིང་ཐུན་མོང་གི་སྤྱི་ཚོགས་རྒྱབ་ལྗོངས་དང་། འཚོ་སྡོད་བྱེད་པའི་ཁོར་ཡུག  རིག་གནས་དང་སེམས་ཁམས་ཀྱི་ཁྱད་ཆོས་ལས་རིམ་གྱིས་མི་རིགས་ཀྱི་བཟོ་བཀོད་གྲུབ་པ་རེད།
　　བོད་ལུགས་བཟོ་བཀོད་དང་རྒྱན་སྤྲས་སྒྱུ་རྩལ་ནི་རིག་གནས་ཀྱི་ཁེབས་རྒྱ་ཡངས་ཤིང་ལག་ལེན་གྱི་ཁྱོན་རྒྱ་ཆེ་བའི་བཅུ་ཕྲག་རིག་པའི་གནས་ཀྱི་གྲུབ་ཆ་ཞིག་ཡིན་ལ། དེ་ནི་ལོ་རྒྱུས་ཀྱི་བྱུང་བ་རིང་མོའི་ཁྲོད་ཕ་མེས་ཡང་མེས་ཀྱི་ཐུན་མོང་གི་བློ་གྲོས་ཀྱི་རྩལ་ལས་བྱུང་བའི་ཁར། ལོ་རྒྱུས་དང་དུས་རབས་ཀྱི་ཚོད་བརྒམ་ལས་རིམ་བཞིན་འཕེལ་རྒྱས་བྱུང་བ་ཞིག་ཡིན།  བོད་ཀྱི་བཟོ་བཀོད་རྒྱན་སྤྲས་ཁྱབ་ཁོངས་དེ་རིག་གནས་སྒྱུ་རྩལ་དང་འབྲེལ་བ་དམ་ཟབ་ཡོད་པ་ལས་གཞན་ལོ་རྒྱུས་རིག་པ་དང་། མཛེས་དཔྱོད་རིག་པ། སེམས་ཁམས་རིག་པ། སྤྱི་ཚོགས་རིག་པ་སོགས་རིག་ཚན་མང་པོའི་བར་ཡང་འབྲེལ་བ་ཡོད་པ་རེད། བོད་ལུགས་བཟོ་བཀོད་ལ་སྤྱི་ཚོགས་ཕན་ནུས་ཀྱི་ཐད་ནས་དགར་ན་ཕོ་བྲང་གི་བཟོ་བཀོད་དང་། དགོན་སྡེའི་བཟོ་བཀོད། རྫོང་མཁར་གྱི་བཟོ་བཀོད། གླིང་གའི་བཟོ་བཀོད། དམངས་ཀྱི་སྡོད་ཁང་གི་བཟོ་བཀོད། ཟམ་པའི་བཟོ་བཀོད། དམིགས་བསལ་གྱི་བཟོ་བཀོད་བཅས་རིགས་བདུན་དུ་འདུས། བཟོ་བཀོད་དང་རྒྱན་སྤྲས་སྒྱུ་རྩལ་ལ་ལོ་རྒྱུས་རིག་གནས་རྒྱབ་ལྗོངས་ངེས་ཅན་ཞིག་ལྡན་པ་སྟེ། གཅིག་ནས་བཟོ་བཀོད་དང་རྒྱན་སྤྲས་སྒྱུ་རྩལ་ལ་བརྟན་གཡོ་སྣོད་བཅུད་མཛེས་པར་བྱེད་པའི་དགེ་མཚན་དོད་པོ་ལྡན་ལ། དུས་ཡུན་ངེས་ཅན་ཞིག་གི་སྐབས་ཀྱི་ལོ་རྒྱུས་དང་རིག་གནས་ཀྱི་ཆ་འཕྲིན་ཕུན་སུམ་ཚོགས་པ་ཞིག་བརྒྱུད་སྒྲོག་བྱེད་བཞིན་ཡོད། ཡང་གཅིག་ནས་བཟོ་བཀོད་དང་རྒྱན་སྤྲས་ཀྱི་རྣམ་པ་དང་སྒྲིག་གཞིས་བཟོ་བཀོད་ཀྱི་ཁྱད་ཆོས་དང་གྲུབ་གཟུགས་ཀྱི་ཁྱད་ཆོས་མངོན་པར་མཚོན་ཐུབ་གཤིས། བོད་ལུགས་བཟོ་བཀོད་ཀྱང་དེ་ལས་མ་འདས་པར་གཟི་དཔལ་འབར་བའི་རྒྱན་སྤྲས་མཛེས་རིས་དང་ལྐོག་གྱུར་གྱི་གཟིགས་དབྱིབས་ཁྲོད་རང་མི་རིགས་ཀྱི་རྫོངས་སྟུག་པོའི་ཆོས་ལུགས་རིག་གནས་དང་། དུས་རབས་ཀྱི་འཕོ་འགྱུར། འཚོ་བའི་དཔེ་རིས་དག་གཡའ་དག་པའི་མེ་ལོང་ཇི་བཞིན་མངོན་པར་མཚོན་ཐུབ་པའོ། །

དམངས་ཀྱི་སྡོད་ཁང་གི་བཟོ་བཀོད་དང་རྒྱན་སྤྲས།

　　བཟོ་བཀོད་ཀྱིས་རྒྱན་སྤྲས་སྒྱུ་རྩལ་མཚོན་བྱེད་ཀྱི་རྨང་གཞི་འདོན་སྤྲོད་བྱས་ཤིང་། རྒྱན་སྤྲས་སྒྱུ་རྩལ་དེ་ཡང་བཟོ་བཀོད་དང་ཁོར་ཡུག་མཛེས་པར་བྱེད་པའི་དགེ་མཚན་དུ་ཤར་བས། བོད་ལུགས་བཟོ་བཀོད་དང་རྒྱན་སྤྲས་སྒྱུ་རྩལ་གཉིས་ལེགས་པོར་ཟུང་དུ་སྦྲེལ་བ་ལས་ཁྱད་ཆོས་གཟེངས་སུ་ཐོན་པའི་སྒྱུ་རྩལ་གྱི་རིན་ཐང་དང་། མཛེས་དཔྱོད་རིན་ཐང་། བཀོལ་སྤྱོད་རིན་ཐང་བཅས་ཐོན་ཐུབ་ལ། བོད་ལུགས་བཟོ་བཀོད་ཀྱི་ནུས་པ་དང་ཁྱད་ཆོས་ནི་བོད་ལུགས་རྒྱན་སྤྲས་སྒྱུ་རྩལ་གྱི་རྣམ་པ་དང་བརྗོད་བྱ་ཇུས་འགོད་བྱེད་པའི་གཞི་འཛིན་ས་གཙོ་བོ་ཞིག་ཏུ་གྲུབ། བཟོ་བཀོད་རྒྱན་སྤྲས་ཤིག་གི་མཆོག་དམན་གདེང་འཇོག་བྱེད་སྐབས་དེའི་ཇུས་འགོད་དང་རྒྱུ་སྤུས་ཁོ་ན་ལས་འཛིན་མི་རུང་བར། དེའི་སྤྱི་ཚོགས་ཀྱི་ཁོར་ཡུག་དང་རིག་གནས་ཀྱི་རྒྱབ་ལྗོངས་སོགས་དང་ཆ་མཐུན་ཡིན་མིན་ལ་དཔྱད་དགོས་པ་ནི་ཤིན་ཏུ་གལ་ཆེའོ། ། རྒྱན་སྤྲས་སྒྱུ་རྩལ་ལ་མཛེས་དཔྱོད་དང་། ངོས་འཛིན་བྱེད་སྟངས། སློབ་གསོ་སོགས་ཀྱི་ཕན་ནུས་ལྡན་པར་མ་ཟད། སྤྱིའི་བཟོ་བཀོད་ཇེ་མཛེས་ཇེ་ལེགས་དང་སྙོམས་སྒྲིག་བྱེད་པའི་ནུས་པ་ཤིག་ཀྱང་ལྡན་པ་རེད། དེ་བས་བཟོ་བཀོད་དང་རྒྱན་སྤྲས་སྒྱུ་རྩལ་གཉིས་ཟུང་སྦྲེལ་བྱས་པ་ལས་བཟོ་བཀོད་ཀྱི་མཛེས་ཉམས་དང་བཀོལ་སྤྱོད་རིན་ཐང་ཐོན་ཐུབ་ལ། འགྲོ་བ་མིའི་རིགས་ཀྱི་འཚོ་བ་དང་དད་མོས་སོགས་ཀྱི་ཐད་ལ་ཡང་དགེ་མཚན་དོད་པོ་ལྡན་པས་དེ་གཉིས་ཕན་ཚུན་གཅིག་ལ་གཅིག་བརྟེན་གྱི་འབྲེལ་བ་དམ་པོར་ཆགས་འདུག
　　བོད་ལུགས་བཟོ་བཀོད་རྒྱན་སྤྲས་དང་བཟོ་བཀོད་ཁོར་ཡུག་གཉིས་གཞི་གཅིག་ཏུ་གྲུབ་པ་ནི་མཐར་གཏུགས་ན་སྒྱུ་རྩལ་རིག་གནས་གཞན་དང་ཐ་དད་པའི་ཁྱད་ཆོས་ལས་བྱུང་བ་ཡིན་ཏེ། གཅིག་ནས་བོད་ལུགས་བཟོ་བཀོད་ཀྱི་ཕན་ནུས་དང་རྒྱན་སྤྲས་སྒྱུ་རྩལ་གཉིས་ཟུང་དུ་སྦྲེལ་འདུག་ཅིང་ཁོར་ཡུག་གི་ཁྱད་ཆོས་དང་ལོ་རྒྱུས་རིག་གནས་རྒྱབ་ལྗོངས་ནི་རྒྱན་སྤྲས་ཇུས་བཀོད་དང་རྒྱུ་ཆ་འདེམ་སྒྲིག་བྱེད་པའི་གཞི་གཙོ་བོ་ཞིག་ཏུ་གྲུབ། གཉིས་ནས་བོད་ལུགས་རྒྱན་སྤྲས་ཀྱི་བཟོ་རྩལ་རྒྱུ་ཆ་དང་བཟོ་བཀོད་ཁོར་ཡུག་གཉིས་ཕན་ཚུན་མཐུན་འཇུག་དང་སྙོམས་སྒྲིག་བྱེད་པའི་ནུས་པ་ལྡན་ལ། བོད་ལུགས་བཟོ་བཀོད་རྒྱན་སྤྲས་ཇུས་འགོད་བྱེད་སྐབས་བཟོ་བཀོད་ཀྱི་ཁྱད་ཆོས་དང་། སྤྱོད་ནུས། ཁ་དོག རྒྱ་ཁྱོན་སོགས་ལ་གཞིགས་ནས་རྒྱུ་ཆ་འདེམ་སྒྲིག་བྱས་ཏེ་བཟོ་བཀོད་རྒྱན་སྤྲས་དང་ཁོར་ཡུག་དོ་མཉམ་པར་གྲུབ་པའི་དགེ་མཚན་གཟེངས་སུ་ཐོན་པ་ཡིན།
　　བོད་ལུགས་བཟོ་བཀོད་རྒྱན་སྤྲས་སྒྱུ་རྩལ་གྱི་མཚོན་བྱེད་ལ་རྣམ་པ་མང་དུ་མཆིས་ཤིང་། བཟོ་སྐྲུན་གྱི་བཀོད་པ་དང་སྤྱོད་ཐབས་སོགས་ལ་བརྟེན་ནས་ཇུས་འགོད་བྱས་ཆོག རྒྱན་སྤྲས་རྒྱུ་ཆ་དང་། རྒྱུ་སྤུས། མཚོན་ཐབས་སོགས་ཀྱིས་བཟོ་བཀོད་རྒྱན་སྤྲས་དེ་ལས་འདས་པའི་ཆོས་གཞན་དང་ཁོར་ཡུག་ལ་ཤུགས་རྐྱེན་ཐེབས་ཐུབ། བོད་ལུགས་བཟོ་བཀོད་རྒྱན་སྤྲས་སྒྱུ་རྩལ་ལ་རང་རྐྱ་འཕེར་བའི་ཁྱད་ཆོས་ཤིག་འཛོམས་པ་ནི་མཐར་གཏུགས་ན་མཐའ་འཁོབ་ཀྱི་སྤྱི་ཚོགས་ཁོར་ཡུག་དང་། ཐུན་མིན་གྱི་རིག་གནས་མཁའ་དབུགས། མི་རིགས་ཀྱི་སེམས་ཁམས་སོགས་དང་འཆམ་མཐུན་དུ་གྲུབ་པར་རག་ལས་པའོ། །

བོད་ཀྱི་ཁྱད་ཆོས་ཀྱིས་ཕྱུག་པའི་རྒྱན་སྤྲས་སྒྱུ་རྩལ།

བོད་ཀྱི་ཁྱད་ཆོས་ཀྱིས་ཕྱུག་པའི་རྒྱན་སྤྲས་སྒྱུ་རྩལ།