ལག་ལེན་ཤིན་ཏུ་ཞིབ་མོ་ལ་ནི་ཤིང་ལེབ་སྐམ་པོ་དེ་ཡང་བསྐྱར་ཆུར་བཙོ།ཡང་ན་ཆུར་ཡུན་དུ་སྦངས།ཤིང་རྐོས་ལ་ཚོན་བཀྱེ་ཡུལ་མ་ཡིན་པ་ལ་སྣུམ་བྱུག་བྱེད་པ་སྟེ།སྣུམ་གྱི་རྒྱུ་རབ་སྟར་གའི་སྣུམ་སོགས་རྒྱུ་ཤིང་ལས་བྱུང་བའི་སྣུམ་གྱི་རིགས་བྱུགས་ནས་ཡུན་ཙམ་བཞག་པའི་སྟེང་བརྐོས་ན་ཤིང་གི་བཀྲ་ཐོན་ཞིང་རང་མདངས་ལེགས་ཚུལ་དང་།ཡང་ན་ཤིང་རྐོས་ལེགས་པར་འགྲུབ་པའི་སྟེང་སྣུམ་བྱུགས་བྱེད་པའང་བཤད། རྐོ་དུས།ཐོག་མར་བརྐོ་གཞི་གང་ཡིན་པའི་ཤིང་ལེབ་དེ་འབུར་ལེན་གྱིས་འཇམ་པོ་བརྡར་བའི་ཐོག གང་འདོད་པའི་རི་མོ་ཤོག་བུ་སྲབ་མོར་བྲིས་པ་དེ་སྦྱར་ནས་རྐོ་ལ།བརྐོ་སྟངས་འབུར་མ་དང་།གཤོང་མ།འབུར་གཤོང་འདྲེས་མ།འབུར་གཤོང་ཚགས་དཀྲོལ་སོགས་ཡོད་ལ།མཆོད་སྒྲོམ་སོགས་ཕལ་ཆེ་བ་ནི་གཤོང་འབུར་ཚགས་མ་ཡིན་པས།ཐོག་མར་རི་མོའི་ཁུག་ཐམས་ཅད་གསོར་གྱིས་འབུག་ཅིང་།ལྕགས་སྐུད་ཁུག་ལེན་གྱིས་འདྲ།དེ་ནས་གཟོང་ཆེ་བའི་རིགས་ཀྱིས་རི་མོ་ཆེ་བརྐོ་བྱ།དེ་ནས་གཞོག་གྲིས་རི་མོ་ཕྲ་བ་རིགས་ཀྱིས་བརྐོ་ཞིང་འཇམ་རྡར་ཡང་ཡང་བྱས་པས་གྲུབ་ལ།ངག་རྒྱུན་དུ།རྐོས་རབ་རྐོས་ལ་ཕྱི་ནང་གསུམ།རི་དྭགས་བྲག་ལ་རྒྱུ་བ་འདྲ།ཟེར་བ་ཡིན་པས།གཤོང་འབུར་གྱི་ཁྱད་ཆོས་འབུར་དུ་ཐོན་པ་དང་།ཡང་།རྐོས་ངན་རྐོས་ལ་གཤོང་འབུར་མེད།
འདག་ངན་ཞལ་བ་བྱས་པ་འདྲ།ཞེས་གཤོང་ས་ཕབ་མ་ཐུབ་ན་འབུར་ས་འབུར་ཐབས་མེད་ལ།དེའི་ཐབས་རྐོས་བཟོ་ཡི་ལག་ལེན་དངོས་ལས་ཤེས་དགོས་ཤིང་།བྱང་ཚད་ཡུན་དུ་སྦྱངས་ཤིང་ལག་ལེན་གྱི་རྒྱུ་ལས་འབྱུང་མོད།སྤྱིར་ཤིང་ལོ་པ་ཏྲ་གཡུ་འབྲུག་འཁྱིལ་བ་སྟེང་ནོར་བུ་འབར་བ་དང་བཅས་པའི་སྐུ་སྒྲོམ་ཞིག་འབུར་གཤོང་ཚགས་དཀྲོལ་དུ་བརྐོ་བ་རུ་མཚོན་ན།ཐོག་མར་རི་མོ་མཉེན་ལ་མཛེས་ཤིང་།པ་ཏྲ་གན་འཁྱིལ་ཕྲ་ལ་མཉེན་ལྕུག་བར་མཚམས་སུ་མེ་ཏོག་དང་མ་སྨིན་པའི་པདྨ་སོགས་ཀྱིས་མཛེས་པ།འབྲུག་ལས་མཉེན་ཞིང་འཁྱུག་ཅིང་གཡོ་བ།བོད་ལུགས་སུ་རྐང་ལག་བཞིར་ནོར་བུ་འཛིན་པ།འབྲུག་མགོ་ཡི་རྭ་དང་།རལ་བ།སྨིན་མ།མཆེ་བ་བཅས་བརྗིད་ལ་ངར་སྐད་ལྡིར་བའི་ཉམས་ཅན་གཉིས་འོག་ནས་གོང་དུ་འཁྱུག་བཞིན་པའི་རྣམ་པ་ཅན།སྟེང་གི་དབུས་སུ་ཡིད་བཞིན་གྱི་ནོར་བུ་མེ་འབར་བ་རི་མོ་ཉམས་དང་ལྡན་པའི་བར་རྩའམ།བརྐོ་གཞིའི་རི་མོ་བྲིས་པའི་སྟེང་ནས་ཐོག་མར་ཁུག་ཐམས་ཅད་ལེན།དེ་ནས་ཤིང་ལོ་པ་ཏྲ་ཟབ་ཏུ་ཕབ་ནས་ཕལ་ཆེར་འབྲུག་གི་རྒྱབ་ལྗོངས་ལྟ་བུ་ལ།མེ་ཏོག་དང་ཤིང་ལོའི་འགོ་འབུར་ཙམ་དང་མཚམས་མཚམས་སུ་ཤིང་ལོ་པ་ཏྲའི་ཡུ་བས་འབྲུག་གི་སྟེང་ནས་བཀྲིས་པ་ནི་རྐོས།ཀྱི་དཀའ་གནད་ཡིན་ལ།རྐོས་རབ་ཀྱི་ནི་ཤིང་ལོ་པ་ཏྲས་འབྲུག་གི་སྟེང་ནས་བཀྲི་བ་མ་ཟད།འབྲུག་དང་ཤིང་ལོ་པ་ཏྲ་བར་ཁོག་གསེང་ཚགས་དཀྲོལ་བྱེད་པའང་མཐོང་།ཤིང་ལོའི་རྒྱབ་ལྗོངས་ལྟ་བུར་འབྲུག་གི་ལུས་པོ་འབུར་དུ་ཐོན་པ་བརྐོ།སྟེང་གི་ནོར་བུ་མེ་འབར་དང་འབྲུག་གི་འགོ་བརྐོ་གཞི་ཤིང་ལེབ་སྟེང་རི་མོ་ཕྱི་དབྱིབས་ཙམ་བྲིས་ནས་ལེགས་མོ་བཞག་པའི་ཐོག  ཤིང་གཞན་པ་ཞིག་ལ་འབྲུག་འགོ་དང་ནོར་བུ་མེ་འབར་ལོགས་སུ་བརྐོས་ནས་སྔར་མུས་སུ་སྦྱར་བ་ནི་ཤིན་ཏུ་མཛེས་ལ།འབུར་ཁྱད་ཅན་འབྱུང་སྟེ།གོང་སྨོས་ལྟར་རྐོས་རབ་ལ་ཕྱི་ནང་གསུམ་ཞེས་པ་དེ་དངོས་སུ་གྲུབ་པ་ཡིན་ལ།ཤིང་ལོ་པ་ཏྲ་ཟབས་སུ་འཕངས་པས་རི་མའི་རྒྱབ་ལྗོངས་ལྟ་བུ་ནང་མ་དང་།དེའི་སྟེང་འབྲུག་གི་ལུས་ཅུང་ཟད་འབུར་བས་བར་མ་དང་།འབྲུག་འགོ་དང་ནོར་བུ་མེ་འབར་རྐོས་པ་ཕྱི་ནས་སྟེང་དུ་ལྷན་པས་ཕྱི་ནང་རིམ་པ་གསུམ་འབྱུང་ལ།བོད་ཤིང་རྐོས་ཀྱི་ཁྱད་ཆོས་ཀྱང་ཐོན་པ་ཡིན། གླེགས་ཤིང་སོགས་ལ་ནི་འབུར་གཤོང་ཕྱེད་འབུར་ཙམ་ལས་ཚགས་དཀྲོལ་གྱི་རི་མོ་མི་འོང་ལ།འོང་ཡང་ཆག་སྐྱོན་འབྱུང་བས་མི་ལེགས་པས།ཕྱེད་འབུར་གྱི་རྐོས་ཉམས་དང་ལྡན་པ་འབུར་བཟོའི་རིག་པ་ལ་མཁས་པས་རི་མོ་སྟེང་འོག་གི་གོ་རིམ་མི་འཁྲུག་པ་རྡོ་རྐོས་ལས་བཤད་པ་ལྟར་གལ་ཆེ།གླེགས་ཤིང་རྐོས་ཀྱི་ཁྱད་ཆོས་ནི།བརྐོ་གཞི་ཙན་དན་སོགས་སྲ་ཤིང་རྩ་ཆེན་གྱི་རིགས་ཏེ་རི་མོ་ཞིབ་ལ་མཉེན་ཞིང་འཇམ་བརྡར་དང་།གཞི་རྐོས་ཡུན་དུ་བྱས་པས་སྐུ་གཟུགས་རིགས་ལ་སྐུ་ཤ་ལ་གྲིམ་དང་།ན་བཟའ་ལ་ལྷུབ་དང་།རི་བྲག་ལ་སྲ་མཁྲེགས་ཀྱི་ཉམས་དང་།རྐོས་རིས་ལ་འཇམ་ཤ་དོད་པ།རི་མོ་སྤྱི་ལ་མཛེས་ཆ་ཉམས་འགྱུར་ཅན་ཞིག་དགོས་པར་བཤད་དོ།།  འདི་ཕལ་ཆེར་ཁང་ཁྱིམ་གྱི་ཆ་ལག་དང་ཤིང་བཟོ་ལག་ཤེས་ཀྱི་ཁོངས་སུ་གཏོགས་པས་ལེ་ཚན་འདིར་བཀོད་ཅིང་།པར་ཤིང་རིགས་ཀྱི་ཤེས་བྱ་གཞན་དུ་སོང་ངོ་།། སོ་ཕག་གི་རྐོས་ནི།རྒྱུ་སོ་ཕག་ལ་བརྐོས་པའི་ལྡེབ་དང་སྒོ་སོགས་ཀྱི་རྒྱན་ཞིག་སྟེ།དེ་ལ་ཚོན་བཀྱེ་བ་དང་།ཚོན་མེད་པའི་རང་མདོག་བྱས་པ་གཉིས་ཡོད་ལ།རྐོས་དཀྲུག་གི་རྒྱན་གཞན་ལགས་ཁྱད་པར་ཅན་ཞིག་ཡིན། ཤིང་དཀྲུག་ནི།རྒྱུ་རྫབ་དང་།ལ་ཁྲ།སྟག་པ་ཤིང་།སྟག་མ།ཤིང་ལྦ་སོགས་ཏེ།བཟོ་སྟངས་དཀྲུག་རྒྱག་མཁན་གྱིས་ལག་པ་གཉིས་ཀྱིས་གཞར་གཟོང་བཟུང་།ལས་སྟེགས་རྐང་བཞི་ལ་རྡོག་གནོན་གྱིས་དཀྲུག་བྱའི་ཤིང་སྤྲད་པའི་འཁོར་ལོ་བསྐོར་ནས་དབྱིབས་དང་རི་མོ་གང་འདོད་བཟོ་བའི་ལག་རྩལ་ཞིག་སྟེ།བཟོས་པའི་དངོས་པོ་ལ་པ་རུ་དང་།སྡེར་མ།ཕོ་རུ།སྒོག་ཕོར།རྩམ་སྒམ།མདོང་མོ།སྒྲིལ་ཏོག་སོགས་རིགས་མང་པོ་ཡོད། དེང་རབས་ཀྱི་རྒྱུ་ཆ་རྣོ་ཤེལ་དང་།ཤིང་ཕྱེ་སོགས་ལས་ལུགས་སུ་བླུགས་ནས་ཤིང་རྐོས་ཀྱི་ཚབ་བྱེད་པ་ནི།ལས་ཀ་མགྱོགས་ཤིང་འགྲོ་སོང་ཆུང་བ་ཞིག་ཡིན་པས་སྤྱོད་སྒོ་རྒྱ་ཆེ་རུ་ཕྱིན་བཞིན་ཡོད།