ཚོན་སྦྱོར་གྱི་ས་བཅད་ལས་བཤད་ཟིན་པ་ལྟར་ལྷང་ཚེར་གྱི་ལག་ལེན་མཁས་གྱུར་ན།ཚོན་སྣ་ཚོགས་ཀྱིས་མདོག་བསྒྱུར་བའི་གཞི་མཆོག་ཏུ་གྱུར་པ་ཞིག་སྟེ།དེ་ལ་ཐོག་མར་རྒྱུ་ལ་བརྟག་དགོས་པ་ལས་རབ་སེར་པོ་དང་།འབྲིང་དཀར་པོ།ཐ་མ་སྔོ་ནག་ཡིན་པ་ལས།ལྷང་ཚེར་སྤུས་ལེགས་གྲིས་གཤགས་པའི་སྲབ་མོའམ།ཡང་ན་ཆེ་བརྡུང་བྱས་པ་རྫ་གསར་གྱི་ནང་དུ་ཆང་གསར་བྲེ་གང་བཙོ་ཐེབ་ལན་གསུམ་བྱས་ཏེ་ཁུ་ལ་ཡང་ཡང་འཕོ་ཞིང་ཆུ་ཚན་གྱིས་བཤལ་ནས་ར་རྐྱལ་ཆུ་ཐུབ་ཏུ་བླུག དེ་ལ་ཚོན་སྣ་ཚོགས་ཀྱིས་མདོག་བསྒྱུར་བྱེད་འདོད་ན།ཆང་རག་གམ།དར་བ་སྐྱུར་པོའམ།སྤྱིན་ཆུའམ།ཆུ་གཙང་གང་འདོད་བླུག་པའི་སྟེང་།རྐྱལ་ཁ་རྔ་རྩིད་ཀྱིས་བསྡམས་ནས་མི་ཤེད་ཆེན་གྱིས་རྐྱལ་བ་ལག་མཉེད་བྱས་ནས་སྐྱོ་མ་ཞོ་ལྟར་དུལ་བ་དང་།ཚག་ལ་དྲོངས་པ་འདི་ཁ་དོག་གང་འདོད་བསྒྱུར་བའི་གཞི་མ་ཁྱད་འཕགས་ཡིན་ནོ།།རྐྱང་པ་བྱུག་ན་དངུལ་མདོག་འོང་ཞིང་སྤྱིན་ཆུའམ་ཟར་ཁུས་དམ་བྱའོ།།གསེར་མདོག་བྱེད་འདོད་ན་ཡུང་བ་སེར་པོ་ཞོ་གསུམ།ཁ་ཆེའི་ཤ་སྐམ་ཞོ་གཅིག་སྐར་གཉིས།ཆུ་བུན་པ་སྲང་གང་ཞོ་གསུམ།སྒོ་རུལ་ཞོ་བདུན་སྐར་བརྒྱད།ལྷང་ཚེར་སྲང་དྲུག་ཞོ་དྲུག་བཅས་སྲང་བཅུའི་ཚད་དུ་བྱའོ།།དེ་ནས་གོང་གི་བཙོ་བཤལ་ཟིན་པའི་ལྷང་ཚེར་དེ་དྲོད་མ་ཡལ་བ་ལ་ཡུང་བ་སེར་པོ་ཞིབ་བཏགས་བཏབ་ནས།རླངས་པ་མ་ཤོར་བར་ཡུད་ཙམ་བཙོས་པའི་ནང་དུ་ཆང་ངམ་དར་སྐྱུར་བྲེ་གང་བླུགས་ཏེ་སྐྱོ་མ་བྱས་པར་རྫས་གཞན་རྣམས་བཏབ་སྟེ་ར་རྐྱལ་དུ་བླུག །ཁ་བཅིངས་ནས་རྫ་སྣོད་ནས་བྲེ་བརྒྱད་ཤོང་བ་ཙམ་གྱི་ནང་དུ་བཞག །དེའི་སྟེང་དར་བ་རང་ནུབ་ཙམ་བླུག །ཁ་རས་ཀྱིས་བཀབ་ལ་ཞག་གསུམ་མམ་བདུན་དུ་བྱེ་མའི་ནང་དུ་བསྙལ།དེ་ནས་བཏོན་པ་མི་ཤེད་ཆེ་བས་ཁུག་མ་ལག་མཉེ་བྱས།ཞོ་ལྟར་དུལ་ནས་ཁ་ཕྱེ་ལ་དར་ཚགས་ལ་བཙག །སླར་ཁ་རྩི་སྤར་དགོས་བྱུང་ན་རྫས་སྔ་མའི་ཁུ་བས་རུང་ངོ་ཞེས་དང་།ཡང་ལྷང་ཚེར་ཞིབ་ཏུ་བརྡུངས་པའི་ཕྱེ་མ་བླུག་ཀོང་ནང་བཅུག་སྟེ་ཁ་སོག་སྦུབ་ཙམ་མ་ཡིན་པ་རྫ་འདམ་གྱིས་བཅད།དེ་ནས་མར་ཟེ་ཚྭ་ཙམ་མམ་ཟི་ཙི་བླུག་ནས་སོལ་མེར་བཞུ།གྲང་བཅུག་པས་ཤོག་བུ་བསྲེགས་ཐལ་འདྲ་བ་འོང་།དེ་ཟར་མའི་ཁུ་བ་དང་སྦྱར་ནས་ཅི་ལ་བྱུག་ཀྱང་གསེར་གྱི་མདོག་ཏུ་འོང་ཞེས་དང་།ཡང་ལྷང་ཚེར་ཆང་གི་ནང་མདོག་ཉམས་ཙམ་བཅོས་ལ་བཏོན།ཆ་མེད་པར་ཞིབ་བཏགས་བྱས་པར་རྐྱལ་སྣོད་གཙང་མར་ཞག་གསུམ་མཉེ།དྲི་མ་རིམ་བཞིན་བཅད་པས་ཞར་ལ་དག་པར་འགྱུར་ཞིང་།དེ་ལྟར་ལན་འགའ་བྱས་པ་ཟར་ཆུར་ཤིང་ཀུན་ཞིབ་བཏགས་ཁུ་བ་ཕམ་སྟེ་བྱུག་པས་དངུལ་མདངས་འབྱིན།དེ་ལྟར་ཞིབ་ཆ་མ་གྲུབ་ན་ཡང་ཆང་གི་ནང་དུ་ཟན་དྲོན་བཙོས་པ་ལྟར་བྱས་ཏེ་འདམ་འཐག་བྱས་ན་དྲི་མ་སྔར་ལྟར་འདོན་ཅིང་ཟར་ཁུས་བྱུག་པར་གཟིས་དབུར་བས་འགྲུབ་ཅིང་།དེ་ལ་ཁ་ཆེ་གུར་གུམ་ནས་རྦྲྀ་རྟ་སྦྲང་ཆར་བཀྲུས་སྐམ་པོ་དང་རུ་རྟ་བསྲེས་ཏེ་བྱུག་པས་གསེར་བཙོ་མ་ལྟར་འབྱུང་བར་བཤད་པ་སོགས་ལྷང་ཚེར་ཁ་བསྒྱུར་བྱེད་ཐབས་ཤིན་ཏུ་མང་ངོ་།།