དཀོན་མཆོག་བསྟན་འཛིན།འཕྲིན་ལས་རྒྱལ་མཚན། བོད་ཀྱི་ལག་ཤེས་ཀུན་འདུས་ཆེན་མོ། 2011-02-25
ཚོན་གྱི་གར་སླའི་ཚད་ནི།ཚོན་བྱུག་པར་ཧ་ཅང་གར་ན་བྱུག་རིས་དང་སྲབ་མཐུག་འབྱུང་ཉེན་ཆེ་ཞིང་།སྲབ་མཐུག་ཁོད་མི་སྙོམས་པའི་བྱུག་ཚོན་གྱི་སྟེང་དུ་མདངས་དང་བཅད་གཉིས་ཅི་ཙམ་གཟབ་ཀྱང་ལེགས་པོ་མི་འོང་ལ།ཧ་ཅང་སླ་དྲག་ནས་བྱུག་གྲངས་མང་ན་ཚོན་ལ་ལའི་མདོག་འགྱུར་ཉེན་གྱིས་ཚོན་གྱི་ཁ་དོག་ལ་གནོད་སྲིད་པས་ཚོན་གྱི་གར་སླའི་མཚམས་ནས་སྐུས་ཟེར་བ་ལྟར་གར་སླའི་མཚམས་ནས་བླངས་ཏེ་བསྐུའོ།།བྱུག་གྲངས་ལ།སྤང་དང་མཐིང་གཉིས་ལན་གཉིས་དང་།།མཚལ་དང་བ་བླ་ལི་ཁྲི་གསུམ།།ལན་གསུམ་དག་ཏུ་བྱུག་པར་བྱ།།སྔོ་སྐྱ་ན་རོ་མི་ཤ་ཁ།།ལན་བཞི་དག་གིས་སྙོམས་པར་བྱུག །ཅེས་སོགས་བཤད་ཀྱང་བརྟག་དགོས་ཏེ་ཚོན་ཕལ་ཆེར་ལན་གཉིས་དང་།རེ་འགའ་ལན་གསུམ་ཙམ་ཞིག་བྱུག་ན་འཚམས་པར་སེམས་སོ།།བྱུག་ཚོན་ལེགས་པའི་ཚད་ལ།བྱུག་ཚོན་མཐའ་རྒྱ་ཆོད་པ་ལ།།བར་མཚམས་དྲངས་ལ་སོག་ཁ་མེད།།བྱུག་རིས་མེད་ཅིང་སྲབ་མཐུག་མེད།།ཟུར་ནས་བལྟས་ན་འཇམ་པ་ལ།།མེ་ལོང་དཀྱིལ་དང་མེ་ཏོག་དཔལ།།རང་བཞིན་ཁ་དོག་ཐོན་པ་ཡིན་ཞེས་པ་བཞིན་ཐོག་མ་ཉིད་ནས་འབད་དེ་བྱའོ།།
རྩོམ་གསར། 10