བོད་རིགས་ནི་གནའ་སྔ་མོའི་དུས་ན་རི་དྭགས་རྒྱག་པ་དང་ཕྱུགས་འཚོས་ཏེ་འཚོ་བ་སྐྱེལ་མཁན་ཞིག་ཡིན་པས།མི་དང་སྲོག་ཆགས་དབར་འབྲེལ་བ་ཧ་ཅང་ཟབ་མོ་ཡོད།དེ་ཡང་སྤྱི་ལོ2002ལོའི་ཟླ5པར་ང་ཚོ་མངའ་རིས་སུ་སྒྱུ་རྩལ་རྟོག་ཞིབ་བྱེད་པར་སྐྱོད་སྐབས་རུ་ཐོག་རྫོང་དུ་བོད་ཀྱི་བྲག་བརྐོས་རི་མོ་མི་ཉུང་བ་ཞིག་མཐོང་བྱུང་བས་མེས་པོ་ཚོས་བྲག་རྡོའི་ཐོག་བརྐོས་པའི་སྲོག་ཆགས་ཀྱི་དབྱིབས་གཟུག་འདྲ་མིན་གྱི་གསོན་ཉམས་བྱོན་ལེགས་ལ་སློབ་གྲོགས་ཚང་མ་ཧང་སངས་པར་གྱུར།བྲག་བརྐོས་རི་མོའི་ཐོག་ཕྱུགས་འཚོ་བ་དང་རི་དྭགས་རྒྱག་པའི་རི་མོ་ཕུད་དེའི་ནང་གི་ཆ་ཤས་ཤིག་ལ་བལྟས་ན་ཕན་ཚུན་གཡུལ་འགྱེད་པའི་བཟོ་ལྟ་འདྲ་ལ་ཡང་མཐུ་རྩལ་འགྲན་པ་དང་ཡང་འདྲ་སྟེ་བྲིས་ཆའི་མི་རྣམས་ཀྱི་མགོ་སྟེང་དུ་བྱ་སྒྲོ་བཙུགས་ཡོད་པ་དང་ལུས་གྱི་སྨད་དུ་དཔྱང་ཐག་གིས་བརྒྱན་པར་བྱས་ཚུལ་དེ་དག་དེང་གི་ཆར་ཡང་ཡིད་ངོར་ལྷམ་མེར་འཆར་བར་གྱུར།ང་ཆོའི་སྣེ་ཁྲིད་དགེ་རྒན་བློ་བཟང་བཀྲ་ཤིས་ལགས་ཀྱིས་“ད་དུང་བྲག་བརྐོས་རི་མོ་འགའ་ཞིག་གིཐོག་ཏུ་བོད་རིགས་ཀྱི་མེས་པོ་ཚོས་སྲོག་ཆགས་ཀྱི་པགས་པ་རང་ལུས་འགེབས་བྱེད་དུ་གྱོན་པ་དང་མཛེས་པར་བྱེད་པའི་རྒྱན་ཆ་ལྟ་བུར་བརྩི་ཡི་ཡོད་”པ་སོགསཀྱི་ཐད་འགྲེལ་བཤད་ཀྱང་གནང་བྱུབ༌།ལྷ་མོའི་འཁྲབ་སྟོན་ནང་རྔོན་པའི་སྐེད་པར་ཐིག་རལ་གྱིས་བརྒྱན་པར་བྱས་ཡོད་པ་མ་ཟད་“འབྲོང་རྩེད་”དང་“བྲོ”སོགས་དམངས་ཁྲོད་ཀྱི་འཁྲབ་སྟོན་ནང་དུའང་སྤྱོད་སྲོལ་ཡོད།དེར་བརྟེན་བོད་ཀྱི་གནའ་སྔ་མོའི་དུས་ཀྱི་ཞལ་འབག་རྣམས་ནི་གཙོ་བོ་སྲོག་ཆགས་ཀྱི་པགས་པ་དང་སྤུ་ཡིས་བཟོས་པ་ཞིག་ཡིན་པ་ཚོད་དཔག་ཐུབ་ཀྱི་འདུག་ལ་“འབྲས་དཀར་དང་སྒྱི་བདག་གི་འབག་གཉིས་པོར་གཞི”རྩའི་ཐད་གདོད་མའི་རྗེས་ཤུལ་རང་སོར་བཞག་ཡོད་མོད།དུས་གྱི་འཕེལ་འགྱུར་དང་ཆབས་ཅིག་མི་རྣམས་ཀྱིས་འབག་གི་ནང་དོན་དང་མཛེས་རྒྱན་ཁ་སྣོན་ཟམ་མི་ཆད་པར་བྱས་ཡོད་པ་ང༌།ལྷག་པར་དུ་རྒྱུ་ཆ་གསར་པ་དང་ལག་རྩལ་གསར་པའང་སྤྱད་དེ་དེ་བས་མཛེས་སྡུག་ཅན་དུ་བཟོ་བར་བྱེད་ཀྱི་ཡོད།འོན་ཀྱང་སྲོག་ཆགས་ཀྱི་པགས་པས་མ་རྒྱུ་བྱས་ཏེ་གྲུབ་པའི་བོད་ཀྱི་དམངས་ཁྲོད་ཞལ་འབག་སྒྱུ་རྩལ་ལ་མངའ་བའི་རང་བྱུང་དང་དམིགས་བསལ་གྱི་ཁྱད་ཆོས་ལ་སུས་ཀྱང་རྩ་འགྱུར་བྱེད་ཐབས་མེད་པ་ཞིག་ཡིན་པ་ནི་བོད་གྱི་ཞལ་འབག་སྒྱུ་རྩལ་གྱི་རང་གཤིས་ཡིན།དེ་ནི་གཞན་དང་མི་འདྲ་བའི་ཁྱད་ཆོས་ཤིག་ཡིན་པས་དེར་མི་རྣམས་ཀྱིས་རྩ་འགྱུར་བྱེད་ཐབས་མེད་ལ་ཐུན་མོང་མ་ཡིན་པའི་ཁྱད་ཆོས་དེ་དང་བྲལ་ན་རང་གཤིས་མེད་པའི་སྒྱུ་རྩལ་དཀྱུས་མ་ཞིག་ཏུ་འགྱུར་ངེས་རེད།  །