ཇ་རྟ་གནའ་ལམ་ཐོག་གི་ཚྭ་ལྷོའི་གནའ་བོའི་ཚྭ་བཟོ་ལག་རྩལ་།

དཔལ་ཐར་རྒྱལ་གྱིས་བསྡུས།        2017-09-20

ཇ་རྟ་གནའ་ལམ་ཐོག་གི་ཚྭ་ལྷོའི་གནའ་བོའི་ཚྭ་བཟོ་ལག་རྩལ་།

ཚྭ་ཁ་ལྷོའི་གནའ་བོའི་ཚྭ་བཟོ་ལག་རྩལ་ནི་ལོ་ངོ་སྟོང་ཕྲག་ལྡན་པའི་ཇ་རྟ་ཚོང་ལམ་སྟེང་ཤུལ་དུ་བཞག་པའི་གདོད་མའི་ལག་རྩལ་ཞིག་ཡིན་ཞིང་།    འཛམ་གླིང་ཐོག་ཉར་ཚགས་བྱས་ཡོད་པའི་གདོད་མའི་ལག་རྩལ་ལ་བརྟེན་པའི་ཚྭ་སྐམ་རྒྱག་ཐབས་ཤིག་ཡིན།    ཚྭ་ཞིང་ནི་ཤིང་གི་གདང་ལ་བཏེགས་པའི་སྟེགས་བུ་སྐས་ཞིང་དང་འདྲ་བ་དག་ཡིན་ཞིང་།   སྟེགས་བུའི་སྟེང་ས་དམར་དང་ས་དཀར་བྱུགས་ཤིང་མཐའ་བཞི་ཅུང་མངོན་པར་འབུར་བའི་ར་བས་བསྐོར་ཡོད།

ཚྭ་ཞིང་ཆེ་ཤོས་རེའི་རྒྱ་ཁྱོན་རྨིད་གྲུ་བཞི་མ་བཅུ་ལས་བརྒལ་བ་དང་ཆུང་ཤོས་ལ་རྨིད་གྲུ་བཞི་མ་གཉིས་ཙམ་ལས་མེད། ཚྭ་ཞིང་གི་གཤམ་ངོས་སུ་བ་ཚྭའི་ཆུ་ལོ་དང་ཟླ་བར་བསགས་པའི་ཚྭ་ཡི་ཀ་བ་དགུན་ཁའི་འཁྱགས་རོམ་གྱི་ཀ་བ་དང་འདྲ་ཞིང་།  ཡུལ་དེའི་ཚྭ་བཟོ་བ་ཚོས་ཚྭ་ཡི་ཀ་བ་ནི་བཟའ་ཚྭ་སྤུས་ཀ་ལེགས་ཤོས་ཡིན་པས་ཁྲོམ་ར་བཙོང་མཁན་མེད་པར་རང་གིས་ཉར་ནས་བཟའ་བཞིན་ཡོད།

 རྫ་ཆུའི་ངོགས་གཉིས་སུ་ཆུ་མིག་བརྒྱད་ཅུ་གྱ་གསུམ་ཡོད་ཅིང་།    ཆུ་མིག་ལས་བརྡོལ་བའི་ཆུ་དྭངས་མོ་ནི་ཚྭ་བཟོའི་རྒྱུ་གཙོ་བོ་རེད། ཆུ་མིག་གི་མཐའ་རུ་རྡོ་ཡི་ར་བས་བསྐོར་ནས་ཆུ་བསྐྱིལ་ཡོད། ཆུ་བསྐྱིལ་ཐབས་ལ་རིགས་སྣ་ཚོགས་ཡོད་དེ། གཏིང་ཐུང་བ་ནི་མཐའ་རུ་འགྲེང་ན་ཐོམ་བུས་ཆུ་བཅུ་ཐུབ་པ་དང་། གཏིང་རིང་བ་ལ་རྨིད་ལྔ་དྲུག་ཙམ་རེ་ཡོད་པས་ཤིང་སྐས་བཙུགས་ནས་མཐིལ་དུ་ཕྱིན་ན་གཞི་ནས་བ་ཚྭའི་ཆུ་ལེན་ཐུབ།  གནའ་སྔ་མོར་ཚྭ་པ་རྣམས་ཀྱིས་ཆུ་དོང་ནང་གི་ཚྭ་ཆུ་ཆུ་རྫིང་དུ་བླུགས་རྗེས་ཉི་མར་སྐམ་བརྒྱབ་སྟེ་ཚྭ་ཆགས་པའི་སྲོལ་ཡོད།  ད་ཆ་དེང་རབས་ཀྱི་ཆུ་འཐེན་འཕྲུལ་ཆས་སྤྱད་དེ་རྫ་ཆུ་རྫིང་བུར་འཐེན་ཏེ་ཉི་མར་སྐམ་རྒྱག་བཞིན་ཡོད་པ་ཉིན་གསུམ་བཞི་བརྒལ་རྗེས་ཚྭ་ཆགས་ཐུབ། ཆུ་རྫིང་རེར་ཐེངས་རེར་ཚྭ་རྒྱ་མ་བཅུ་ཡན་ཆད་ལེན་ཐུབ།   

རྫ་ཆུའི་ཤར་ངོགས་སུ་གནས་པའི་ཇ་རྟ་གྲོང་སྡེ་ལས་གཙོ་བོ་ཚྭ་དམར་དང་ཤར་ངོགས་ཀྱི་སྟོད་སྨད་ཚྭ་ཁ་ལྷོར་གཙོ་བོ་ཚྭ་དཀར་ཐོན་བཞིན་ཡོད།  དེའི་ནང་ནས་ཚྭ་དམར་ནི་ཐོན་ཚད་མཐོ་ཞིང་གོང་ཚད་སླ་བ་ཡིན་ལ།    ཚྭ་དཀར་ནི་ཐོན་ཚད་ཉུང་ཞིང་གོང་ཚད་མཐོ་བ་ཡིན།  ལོ་ལྟར་ཟླ་གསུམ་པ་ནས་ཟླ་ལྔ་པའི་བར་ཁམ་བུ་མེ་ཏོག་བཞད་དུས་ཐོན་པའི་ཚྭ་དེ་ལ་ཁམ་ཚྭ་ཞེས་འབོད་སྲོལ་ཡོད་དེ།  དུས་ཚིགས་འདིར་ཐོན་པའི་ཚྭ་ནི་ལེགས་ཤོས་དང་མིང་གྲགས་ཆེ།

ཚྭ་ཁ་ལྷོའི་ཚྭ་ཁ་དེ་བོད་ཁུལ་དུ་རྩ་ཆེ་བའི་ཚྭ་ཁ་ཞིག་ཡིན་ཞིང་།    གནའ་གཏམ་དུ་ཚྭ་རྩོད་རྒྱག་རྐྱེན་དེར་དམག་འཁྲུག་བསླངས་མྱོང་བའི་བཤད་སྲོལ་ཡོད་དེ།  གེ་སར་རྒྱལ་པོའི་སྒྲུང་ལས་འཇང་གླིང་གཡུལ་འགྱེད་ནང་གི་ཚྭ་རྩོད་རྒྱག་སའི་ཡུལ་དེ་ནི་ཚྭ་ཁ་ལྷོ་རེད་ཅེས་ངོས་འཛིན་བྱས།   ཚྭ་ཁ་ལྷོར་བོད་ལྗོངས་དང་སི་ཁྲོན། ཡུན་ནན་སོགས་ཀྱི་ས་ཆ་ནས་ཡོང་བའི་ཚྭ་སྒྲུབ་མཁན་ཚོས་ལོ་ལྟར་ཚྭ་རྒྱ་མ་ས་ཡ་ཁ་ཤས་ཉོ་སྒྲུབ་བྱེད་བཞིན་ཡོད་ལ།  ཚྭ་རྒྱ་མ་གང་ལ་དངུལ་སྒོར1ཡན་དགོས།  2009 ལོར་ལོ་ངོ་སྟོང་གི་ལོ་རྒྱུས་ལྡན་པའི་ཚྭ་ཞིང་འདི་ནི་བོད་རང་སྐྱོང་ལྗོངས་ཀྱི་རིག་དངོས་ཤུལ་བཞག་སྲུང་སྐྱོང་སྡེ་ཚན་དུ་ཚུད་ཅིང་།  ཚྭ་སྐམ་པའི་ལག་རྩལ་དེ་རྒྱལ་ཁབ་ཀྱི་ཐེངས་གཉིས་པའི་དངོས་མིན་རིག་གནས་ཤུལ་བཞག་གི་གྲས་སུ་ཚུད་ཡོད།།


  • ལེ་ཚན་སྔོན་མ།:མཚར་སྡུག་རྣམ་པར་བཀྲ་བའི་བོད་ཤོག་བཟོ་རྩལ།
  • ལེ་ཚན་རྗེས་མ།:རྫ་ཆུའི་འགྲམ་རྒྱུད་ཀྱི་ཚྭ་ལྷོའི་ཚྭའི་དབྱེ་བ།
  • དོ་སྣང་ཆེ་བའི་རྩོམ།