བྲག་ལྷ་མོ་ནི་སྤྱི་ལོ640ལོར་ཐང་རྒྱལ་རབས་ཀྱི་རྒྱ་བཟའ་ཀོང་ཇོ་བོད་རྒྱལ་སྲོང་བཙན་སྒམ་པོའི་བཙུན་མོར་ཕེབས་ཏེ་མཚོ་སྔོན་ཡུལ་ཤུལ་ལ་འབྱོར་སྐབས།ས་དེ་གའི་སྣོད་བཅུད་ཀྱི་མཛེས་སྡུག་གིས་ཀོང་ཇོའི་ཡིད་སེམས་རབ་ཏུ་དྲངས་པས་དེ་གར་ཟླ་བ་གཉིས་ཙམ་ངལ་གསོས་པ་རེད།དེའི་རིང་ལ་གོང་ཇོ་ཡུལ་ཤུལ་གྱི་མཐའ་སྐོར་དུ་ཕེབས་པ་མ་ཚད།ཁམས་ཁུལ་འདན་ཁོག་གི་ཕྱོགས་བཞིའི་བྲག་ལ་ལྷ་སྐུ་བཞི་བཞེངས་པ་སྟེ།ཤར་ཕྱོགས་ལ་དེ་བཞིན་གཤེགས་པ་དང་།ལྷོ་ཕྱོགས་སྒྲོལ་མ་ལྷ་ཁང་གི་ཁ་གཏད་ཀྱི་བྲག་ངོས་སུ་སྒྲོལ་མ་ཉེར་གཅིག་གི་སྐུ་དང་།ནུབ་པདྨ་རི་འདབས་སུ་བྱང་ཆུབ་སེམས་དཔའ་ཀུན་ཏུ་བཟང་པོ། བྱང་ཕྱོགས་ལུང་རོང་གི་ལམ་འགྲམ་གྱི་བྲང་ངོས་ཀྱི་དཀྱིལ་དུ་ཚེ་དཔག་མེད་དང་། གཡས་སུ་སྤྱན་རིས་གཟིགས། གཡོན་དུ་ཕྱག་ན་རྡོ་རྗེ། དཀྱིལ་དུ་ཚེ་དཔག་མེད་བཅས་བརྐོས་ཡོད་པས་མི་ཚང་མས་དེ་ལ་བྲག་ལྷ་མོ་ཞེས་འབོད། ལྷ་སྐུའི་ཕྱོགས་བཞིར་བོད་ཀྱི་བརྡ་རྙིང་ཡི་གེ་བརྐོས་འདུག་ལ། བཤད་སྲོལ་དུ་དེ་ནི་རྒྱ་བཟའ་ཀོང་ཇོས་མོ་དང་མཉམ་དུ་ཕེབས་པའི་རྒྱ་ནག་གི་རྡོ་བཟོ་ལ་བརྐོས་བཅུག་པ་གྲགས།སྐབས་དེ་དུས་མི་རྣམས་ཀྱི་སྣང་ངོར་ཀོང་ཇོ་ནི་ལྷ་ལས་མཛེས་པས་བཀའ་དྲིན་རྗེས་དྲན་གྱི་ཆེད་དུ་བྲག་ལྷ་མོ་ཞེས་འབོད།བྲག་བརྐོས་འདི་ལོ་ངོ་ཆིག་སྟོང་སུམ་བརྒྱ་ལྷག་ཙམ་གྱི་རིང་ལ་ཉི་ཤར་ཆར་འབབ་ཀྱིས་གཏོར་བཤིག་ཅུང་ཟད་ཐེབས་མོད།ལྷ་སྐུའི་རི་མོ་ད་དུང་མངོན་གསལ་དོད་པ་དང་།རི་མོ་འབྲི་སྟངས་དང་ལྷ་སྐུའི་གོས་རྒྱན་ལས་དེ་ནི་ཐང་རྒྱལ་རབས་དུས་ཀྱི་བརྐོས་རིས་ཡིན་པ་ར་སྤྲོད་བྱེད་ཐུབ། །