༡  བོད་སྤོས་བཟོ་བའི་རྒྱུ་དང་ལག་ཆས།
བོད་སྤོས་བཟོ་བར། བཟོ་བྱེད་ཀྱི་ལག་ཆས་དང་། སྤོས་ཀྱི་རྫས། བཟོ་ཐབས་བཅས་གསུམ་ལས། ལག་ཆས་སྤོས་རྫས་རྡུང་བྱེད་ཀྱི་གཏུན་དང་རྡུང་ཐོ། འཚག་བྱེད་ཚགས། སྤོས་སྐུད་འཐེན་བྱེད་ཀྱི་བཙིར་མདོང་། གནོན་བྱེད་ཀྱི་འཇའ་ཤིང་བཙིར་དབྱུག་ཆ་འགྲིག   སྤོས་ཐུར་སྐམ་སྣོད་ཀྱི་ཤིང་ཁྲི་རྩེག་རིམ་ཅན་དང་ཤིང་ལེབ། སྤོས་ཐུར་འདྲ་བྱེད་ཀྱི་ལེབ་གྲི་དང་རིང་ཐུང་མི་ཤོར་བའི་ཚད་ཤིང་བཅས་སོ། །
     སྤོས་བཟོ་ལ་མེད་དུ་མི་རུང་བའི་རྫས་ནི། ཤུག་པའི་སྡོང་རྒན་གྱི་ཤིང་རུལ་ཕུ་མ་ལྟ་བུ་དང་། ཙན་དན་དཀར་དམར། ཨ་ག་རུ། སྤང་སྤོས། བྲག་སྤོས། ཤུག་པ། ལྷ་ལོ་སྨན་ཤིང་། སྤོས་དཀར། བ་ལུ་དཀར་པོ། མཁན་པ་གསེར་མགོ   ག་བུར། ན་གི། གླ་རྩི། ཆང་། ཛ་ཏི། ལི་ཤུ་ཟངས་འཛེར་མ། ཏང་ཀུན། ཤིང་ཚ། སྟག་པ། ཉ་བྲུག་ཤིང་སོགས་སོ། །
     ༢   བཟོ་ཐབས།
བཟོ་ཐབས་ལ། ན་གི་དེ་སླ་ངའི་ནང་མདོག་སེར་པོར་མ་གྱུར་གྱི་བར་དུ་བརྔོས་ན་དེ་ཧྲོབ་ཙམ་བརྡུང་ལ་ཆང་གར་མའི་ནང་དུ་གླ་རྩི་བླུག་པ་དང་ལྷན་དུ་འདུལ་བ་ནི། སྤོས་ཀྱི་ཕབ་རྟའམ་བྲོ་རྫས་ཡིན་ལ་སྤོས་ཀྱི་བྲོ་བ་བཟང་ངན་གནི་འགག་རྩའང་ཡིན། ན་གི་འདུལ་ཅི་ཐུབ་ན་དེ་ཙམ་གྱིས་བཟང་སྟེ། ངག་རྒྱུན་དུ་ན་གི་ཉི་མ་གཅིག་བཏུལ་ནས་བཟོས་པའི་སྤོས་དེའི་དྲི་བཟང་ཉིན་གཅིག་གི་ལམ་ལ་ཁྱབ། ཉིན་གཉིས་བཏུལ་ན་ཉིན་གཉིས་ཀྱི་ལམ་ལ་ཁྱབ། ཉིན་གསུམ་བཏུལ་ན་ཉིན་གསུམ་གྱི་ལམ་ལ་ཁྱབ་ཅེས་ཟེར།  
      དེ་ནས་ཤུག་སྡོང་རུལ་ཕྱེ་གཞིར་བྱས་པའི་སྟེང་གོང་གི་སྤོས་རྫས་རྣམས་རང་གི་གང་འདོད་དང་སྤོས་གང་ཞིག་གི་བྲོ་བ་ཆེར་བསྐྱེར་རང་གིས་ཚོད་པ་ཟིན་བྱས་ཏེ་བསྲེ་བར། གླ་རྩི་དང་། ན་གི། ཙན་དན་དཀར་དམར། ཛ་ཏི། ལི་ཤི་ཟངས་འཛེར་མ་ལྔ་ནི་མེད་དུ་མི་རུང་བའི་རྫས་ལྔ་ཞེས་བརྗོད་ལ། རྫས་དེ་དག་ཆུ་དྲོན་གྱིས་འདག་ལྟར་བཟོས་པ་ལ་གོང་གོ་ན་གི་བཏུལ་མ་དང་ཆང་བླུགས་ནས་བསྙལ། སྤོས་རྫས་མང་བ་སོགས་ཀྱིས་གླུམ་དཀའ་ན་དེའི་སྟེང་དུ་ཆང་ཕབ་བཏབ་ནས་ཞག་གཉིས་ཙམ་བསྙལ་ནས་ཁ་ཕྱེས་ན། ཆང་ལངས་པ་ལྟར་སྤོས་འདམ་ལ་བྲོ་བ་ཁྱད་པར་ཅན་འབྱུང་བ་ཡིན་ནོ། །
དེ་ནས་བཙིར་མདོང་དུ་བླུག་པའི་སྤོས་ཀྱི་སྐྱོ་མ་དེ། སྤོས་འབོར་ཆེན་བཟོ་ན་ཁང་བའི་འཇའ་འགྱོག་ཐབས་ཀྱི་གནོན་ཤུགས་ལ་བརྟེན་པ་དང་། ཉུང་ཙམ་ལས་མི་བཟོ་ན་མི་ཤེད་ཆེན་གྱིས་གནོན་བཙིར་བྱེད་ཀྱང་རུང་ལ། གང་ལྟར་སྤོས་སྐམ་སྣོད་ཀྱི་ཤིང་ལེབ་རེ་གང་བ་དང་བཟོ་མཁན་གྱིས་སྤོས་དྲང་པོར་འཐེན་མ་ཐུབ་ཡོ་བཅོས་དང་། རིང་ཐུང་མི་མཉམ་པ་རྣམས་སྤོས་ཐུར་རློན་པར་གནོན་སྐྱོན་མི་འབྱུང་བའི་ཆེད་སྤོས་ལྡེ་སྣོད་ཤིང་ལེབ་ཀྱི་མཐུག་ཚད་ལས་སོར་ཕྱེད་ཙམ་འཕགས་པའི་ཕྱོགས་གཉིས་སུ་རྐང་པ་སྤྲས་པའི་ཚད་ཤིང་དྲངས་པའི་ཐོག  ལྕགས་དཀར་གྲུ་བཞི་དང་ནར་མོར་ཤིང་གི་འཇུ་ལུང་ཅན། གཅོད་གྲི་དང་བཞར་གྲི་གཉིས་ཀ་ཡིན་པ་དེས་ལྡེ་གུས་དྲས་ནས་སྤོས་ཐུར་དག་སྤོས་ཁྲིའི་སྟེང་གྲིབ་སྐམ་བྱེད་དུ་འཇུག   བཅད་འཕྲོ་རྣམས་སྤོས་འདམ་དུ་བླུགས་ཏེ་བསྲེ་བརྫི་བྱས་རྗེས་ཡང་བསྐྱར་སྤོས་ཐུར་བཟོ་བའོ། །
                    ༣   རྫས་སྦྱོར་སྣ་ཚོགས།
སྤོས་ཀྱི་རྫས་སྦྱོར་ཚུལ་ལ་ལུགས་མི་འདྲ་བ་དང་། སྤོས་ཀྱི་བདུག་ཡུལ་མི་འདྲ་བའི་ཁྱད་པར་དུ་མ་ཡོད་པ་ལས།  འཇམ་མགོན་མི་ཕམ་གྱིས་མཛད་པའི་རྫས་སྣ་ཚོགས་སྦྱར་ཐབས་ལས་གསུངས་པ་ནི།སྤྱིར་ཕི་བ་ལ། ཙན་དན་དང་། ཨ་ག་རུ་དང་ག་པུར་སོགས་དང་། དྲག་པོ་ལ། ཨ་རུ་དང་། ཐར་ནུ། གུ་གུལ། རྒྱ་སྐྱེགས། སྤོས་དཀར་བཅས་ཆུས་སྦྱར་བའོ། །ཞེས་དང་། ཡང་བླ་མ་དགོངས་འདུས་ལུགས་ཀྱི་སྤོས་སྦྱོར་གྱི་ཚུལ་བཞིར་གྲགས་པ་ནི། ཤིང་ཚ་ཆུའི་ཚུལ། སྤོས་དཀར་ཐལ་གྱི་ཚུལ། ལི་ཤི། རྡོར་གྱི་ཚུལ། སྤང་ཚྭའི་ཚུལ་ཞེས་གོང་གི་སྤོས་ཕྱེ་ཆང་དུ་སྦངས་པ་ལ་སྦྲང་རྩིའི་དམ་སྦྱར་བའི་སྟེང་། སུག་སྨེལ་གྱི་ཕབ་བཏབ་པས་དྲི་བཟང་མཆོག་དང་ལྡན་པའི་སྤོས་མྱུར་དུ་འགྲུབ་ཅེས་དང་། ཡང་གླ་རྩི་དང་། རྡོ་དྲེག   ཏང་ཀུན།   བ་ལུ་བཕི་སྦྱར་བས་ཀྱང་རུང་བ་དང་། ཡང་ན་གླ་རྩི། ག་པུར། སིལ། ཙན་དན། ཨར་ནག་བཅས་ལྔ་སྦྱོར་ཡང་རུང་བར་གསུངས་པ་དང་། ཁ་ཆེ་པཎ་ཆེན་གྱིས། སྤྱིར་ནཱ་གི་དང་། ཙན་དན། ཨ་ག་རུ། གླ་རྩི་བཅས་སྦྱོར་ཡང་། ཀླུ་ལ་བདུག་ན་གུ་གུལ་སྤང་། བཟའ་ལ་སྤང་སྤོས་མི་སྦྱར་བ་གསུངས་པ་དང་། རཏ་གླིང་གཏེར་ཁ་ལས་འབྱུར་བ་ལྟར་ན། མགོན་པོ་མཆོད་བསྐང་གི་རྫས་ལ། མར་དང་། བག་ཕྱེ། སྦྲང་རྩི། པི་ལིང་། ན་ལེ་ཤམ། རྒུན་འབྲུམ། བལ་པོའི་སེའུ་འབྲུ་བཅས་ལ་བུར་ཤིང་གི་འབྲས་བུ་སྦྱར་བ་ཚོགས་བདག་ལ་སྤོས་དུད་བསྲེགས་ན་མགོན་པོ་འཁོར་བཅས་ཤིན་ཏུ་མཉེས་ཚུལ་གསུངས་པ་དང་། གནམ་ཆོས་གཏེར་ཁ་ལས། དྲང་སྲོང་ཆེན་པོ་རཱ་ཧུ་ལ་མཉེས་ཐབས་སུ། ར་ཅོ། བྱ་ཤ། བྱ་མོའི་གསེར་ཐིག   ཆུ་སྲིན་སྡེར་མོ། མཛོ་མོ་ཤིང་ཁོག་རུལ་ཤིང་ཕྱེ། ཕ་ཝང་དྲེག་པ་རྣམས་ལ་ཤུག་ཚིལ་དང་ཤུག་ཤུན་སྦྱར་བ་བདུག་ན། གཟའ་ཡི་ཐུགས་དང་འགལ་བ་གང་མཆིས་སོར་ཆུད་ཅེས་གཞན་གྱི་བསྟན་བཅོས་ལས་ལུང་དྲངས་པ་མཛད་པ་ལས། བོད་ལ་སྤོས་གྱི་ལག་ལེན་ཙམ་མ་ཟད་དེའི་བསྟན་བཅོས་ཀྱང་ལུགས་མང་ཕུན་སུམ་ཚོགས་པ་ཞིག་ཡོད་པ་ཤེས་ཐུབ་པ་ཡིན་ནོ། །