གནས་ཆེན་ཁ་བ་ལུང་རི་ནི་དཀར་མཛེས་ཁུལ་ཉག་རོང་རྫོང་གི་མངའ་ཁོངས་སུ་ཆགས་ཡོད་པ་རེད། ཞིབ་མོར་བཤད་ན། ཆུ་མོ་རྫ་ཆུ་འབབ་པའི་གཡོན་ཟུར་། བྱང་ཨ་སྟག་རོང་གི་ཉེ་ཚར། ཏྲེ་ཧོར་ཉག་ཨ་ཛི་རང་གི་སྟོད་ཆར། ཉག་སྟོད་ཁ་བ་ལུང་རི་ཞེས་ས་ཕྱོགས་གང་ནས་བལྟས་ཀྱང་རྒྱལ་མཚན་གྱི་ཏོག་ལྟར་དཀར་ལྷང་ངེར་མངོན་པར་མཐོ་བ་ཞིག་ཡོད་པ་རེད།
   བཤད་སྲོལ་ལྟར་ན་ཨོ་རྒྱན་པད་མ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། དགེ་སློང་ནམ་མཁའི་སྙིང་པོ། ལོ་ཆེན་བེེ་རོ་ཙ་ན། སོག་པོ་དཔལ་གྱི་རྡོ་རྗེ་སོགས་རྒྱ་བོད་ཀྱི་རིག་འཛིན་གྲུབ་བརྙེས་མང་པོ་ཞིག་གནས་མཆོག་དེ་ལ་བྱོན་ནས་བཞུགས་ཤིང་བྱིན་གྱིས་བརླབས་པའི་གནས་ཡིད་དམ་བདེ་མཆོག་འཁོར་ལོའི་ཕོ་བྲང་མ་གཤིན་ཊཱཀའི་ཚོགས་ཀྱི་གནས་མཆོག  དཔལ་ལྡན་ཡེ་ཤེས་མགོན་པོའི་རྣམ་རོལ། དགེ་བསྙེན་མཆོད་གསུམ་བཞུགས་པའི་རྟེན་རྫོང་། སྒྲུབ་གནས་རྣམས་སུ་བཀའ་རྟགས་ཕྱག་རྗེས་དང་། གྲུབ་རྟགས་རང་བྱོན་སོགས་ངོ་མཚར་ཅན་གྱི་མཐོང་ཆོས་སུ་ཡོད་པ་ཞིག་རེད།
    གནས་སྐོར་གྱི་ཕན་ཡོན་ནི་རྩེ་སྐོར་གཅིག་ལ་བྱེ་ཆེན་གཅིག  བར་སྐོར་ཅིག་ལ་བྱེ་ཆེན་བཞི   མཐའ་སྐོར་གཅིག་ལ་བྱེ་ཆེན་བདུན། ཕྱི་སྐོར་གཅིག་ལ་དུང་ཕྱུར་གཅིག  ཕྱིར་སྐོར་ཆེན་མོ་ལ་དུང་ཕྱུར་ལྔ་འགྱུར་ཡོད། ཁྱད་པར་དུ་སྤྲེའུ་ལོར་གནས་འདུ་ཡིན་པས། དེ་ལས་ཀྱང་ཕན་འགྱུར་ཆེ་བ་ཡོད་ཅེས་ས་གནས་དེ་གའི་དམངས་ཁྲོད་དུ་བཤད་རྒྱུན་ཆགས་པ་ཞིག་རེད། མདོར་ན། ཞི་རྒྱས་དབང་དྲག་ལས་རྣམས་མཐར་ཕྱིན་ཞིང་། མི་མཐུན་རྐྱེན་རྣམས་སེལ་ཞིང་བསམ་དོན་འགྲུབ། འཆད་རྩོད་རྩོམ་གསུམ་ལ་བྱང་ཆུབ་ས་བོན་ཐེབས། མཐར་ཐུག་བསམ་དོན་གོ་འཕང་ཐོབ་པར་ངེས།