མདོ་སྟོད་འཛིན་མའི་པང་ནས་མཚན་དཔེ་དེ་བཞད་ཅིང་།།
ཆོལ་གསུམ་དབུ་ནག་ལས་འགན་ཕྲག་སྟེང་ལ་བཞེས་ཏེ།།
གངས་རིའི་ཚེ་སྲོག་གསོ་བའི་ཟུངས་ཁྲག་དེ་འཇོ་ཕྱིར།།
མཛད་འཕྲིན་ཞབས་རྗེས་དྭངས་མ་གངས་ངོས་སུ་ཕབ་སོང་།།    

  ས་ཡི་དགེ་མཚན་མངོན་པར་འཕགས་ཤིང་སྣོད་བཅུད་དཔལ་གྱི་མཛེས་སྡུག་གིས་འཛམ་གླིང་སྐྱེ་འགྲོ་ཕོ་མོ་མགྲོན་དུ་བཀུག་ཅིང་མི་ཡུལ་གྱི་དག་ཞིང་ཞེས་པའི་གནས་མཆོག་མགར་ཐར་སྒེག་མོ་ཞེས་པ་ནི་སྔོན་ཆོས་རྒྱལ་སྲོང་བཙན་གྱི་སྐུ་རིང་ལ་བོད་བློན་མཛངས་མི་མགར་སྟོང་བཙན་རྒྱ་ནག་ནས་བོད་དུ་ཐར་བའི་ས་མཚམས་ཡིན་པས་མགར་ཐར་ཞེས་པའི་མིང་གི་འབྱུང་ཁུངས་ཀྱང་དེ་བཞིན་དུ་གྲགས་པའི་གནས་མཆོག་འདི་ནས་སྐུ་ཡི་མཚན་དཔེ་མངོན་པར་བཞད་པའི་མཁས་དབང་དམ་པ་ཉན་ཤུལ་འཇམ་དབྱངས་གྲགས་པ་མཆོག་གི་མཛད་རྣམ་ཡི་གེར་དགོད་འདོད་ཀྱི་འདུན་པ་ཟབ་མོ་སྔོན་ནས་བྱུང་མྱོངས་ཡོད་ལ། ད་ཐེངས་གང་སྐུ་ཉིད་དབུས་ལྷ་ལྡན་ཞིང་ནས་རང་ཡུལ་དུ་ཞབས་སོར་འཁོད་ཡོད་པའི་འཕྲིན་བཟང་སྙན་མོ་ལག་འཕྲིན་གློག་གི་སྐད་ལས་ཐོས་འཛིན་སྙན་པའི་དཔལ་དུ་སིམ་པ་ན་དགའ་སྤྲོའི་དད་པའི་འདུན་པ་རབ་ཏུ་རྒྱས་ནས་གོ་སྐབས་འདི་ཆུད་ཟོས་སུ་གཏོང་མི་རིགས་པར་དྲན་ནས་གང་ཉིད་ལ་ཞུས་ནས་དགོངས་འཁྲོལ་ཐོབ་པ་བཞིན། ཉིན་གཞོན་གྱི་ཟེར་མདངས་དྲོན་མོ་ས་གཞི་ཡངས་བའི་ཕང་བར་འཕྲོས་པའི་ཞོགས་ཀའི་དུས་བཟང་ཞིག་དང་བསྟུན་ནས་གང་སྐུ་ཉིད་ཀྱི་མདུན་སར་བཅར་བ་ཡིན། ཕྲན་ཆུང་གིས་འོངས་དོན་དང་དམིགས་ཡུལ་སོགས་གསལ་བོ་ཞུས་དུས་ཁོང་གིས“བྱས་རྗེས་ཟེར་ཡ་ཞིག་འདི་ཡིན་དེ་ཡོད་ཅིག་མེད་རུང་བོད་ཀྱི་རིག་གནས་འཆི་ལ་ཡོད་དུས་ཚེ་སྲོག་འདི་སྐྱོབ་པའི་ལས་ལ་ཧུར་ཐག་གིས་འབད་འབུངས་བྱས་ནས་འཆི་ཉེན་ལས་ཐར་བའི་ལས་ཀ་ཅུང་ཙམ་རེ་བསྒྲུབས་ཡོད་པ་རེད།”ཅེས་པའི་གསུངས་བཤད་དང་མཐུད་ནས་གང་ཉིད་ཀྱི་ལོ་རྒྱུས་ཞིབ་པར་གསུངས་བྱུང་།།

མཁས་མང་གསེར་རིའི་ཕྲེང་བ་རབ་བསྟར་བའི།།
འབྲོག་དུད་ཉན་ཤུལ་ཞེས་པའི་གདུང་རྒྱུད་དུ།།
ངོ་མཚར་ལྟས་ཀྱིས་བལྟམས་པའི་རྒྱལ་སྲས་ཤིག།
ས་ཆེན་མི་ཡི་ཞིང་གི་སྐལ་དུ་ཐོབ།།

  དེ་ཡང་མཁས་དབང་དམ་པ་ཉན་ཤུལ་འཇམ་དབྱངས་གྲགས་པ་མཆོག་ནི་མདོ་ཁམས་མི་ཉག་རབ་སྒང་གི་སྟོད་ཀྱི་ཆར་གནས་མགར་ཐར་ས་ཆར་མི་རབས་དུ་མར་མཁས་གྲུབ་གཉིས་ལྡན་གྱི་སྐྱེས་ཆེན་རྒྱུན་མ་ཆད་པར་བྱོན་པའི་འབྲོག་དུད་ཉན་ཤུལ་ཞེས་པའི་ཁྱིམ་རྒྱུད་དུ་རབ་བྱུང་བཅུ་དྲུག་པའི་ལྕགས་སྦྲུལ་སྤྱི་ལོ༡༩༤༢ལོའི་ཟླ་བ་བརྒྱད་པའི་ཚེས་བཅུ་ཉིན་ལ་ཡབ་སྐལ་ལྡན་རྒྱ་མཚོ་དང་། ཡུམ་བསོད་ནམས་དཔལ་སྒྲོན་གཉིས་ཀྱི་སྲས་སུ་མི་ཉག་མཁས་པ་ཀུན་བཟང་བསོད་ནམས་གྱི་གདན་ས་བེ་ལོ་རི་ཁྲོད་ཀྱི་མདུན་ཕྱོགས་སུ་གནས་བདག་ཀོའུ་ལྷ་རྩེ་ཞེས་པས་བདག་ཏུ་བཟུང་བའི་ས་ཆ་བ་དན་སྟེང་ཞེས་པར་ངོ་མཚར་བའི་རྟགས་བཟང་དང་བཅས་པའི་སྒོ་ནས་སྐུ་ཡི་ལང་ཚོ་མངོན་པར་བཞད་པ་དང་། ཟླ་ངོ་གཅིག་གི་སྐབས་ལ་རྣམ་འཇོམ་སྟོང་ཁྲུས་ཐོབ་ཅིང་། མི་ཉག་དཔལ་ལྷ་སྒང་དགོན་གྱི་ཁྲི་པ་འཇམ་དབྱངས་ཐུབ་བསྟན་ཀུན་འཕེལ（ཁྲི་པ་དབུ་དཀར་མ）མཆོག་ནས་འཇམ་དབྱངས་གྲགས་པ་ཞེས་པའི་མཚན་གསོལ།། དེ་ནས་དུས་ཡུན་རིང་མ་ལོང་བར་ཉན་ཤུལ་ཚང་ལ་བུ་སྐྱེ་བ་མཐོན་པོ་ཞིག་འཁྲུངས་ཡོད་ཚུལ་གྱི་འཕྲིན་བཟང་དེ་ཡུལ་དེ་ནས་ས་སྟོད་སྨད་བར་གསུམ་དུ་རིམ་བཞིན་ཁྱབ་འགོ་བརྩམས།།

   དགོང་ལོ་དྲུག་ལ་སླེབས་སྐབས། ཞང་བོ་མཁྱེན་རབ་འོད་གསལ་གྱིས་མདུན་ནས་གསལ་བྱེད་སུམ་ཅུ་ལན་གསུམ་ཁྲིད་ཚེ་ཐོགས་མེད་དུ་མཁྱེན་པ་དང་། དེ་ནས་ཉན་ཤུལ་ཚང་གི་སྲོལ་རྒྱུན་བཞིན་འཇམ་དཔལ་བསྟོད་སྒྲུབ་དང་། འཇམ་དཔལ་མཚན་བརྗོད། ཞི་ཁྲོའི་ཐོས་གྲོལ། ཪྙིང་མའི་བཀའ་འབུམ་སྐོར། གདུགས་དཀར་སོགས་བསླབས་པར་ཐོགས་མེད་དུ་མཁྱེན་པས་ཀུན་གྱིས་བསྔགས་བརྗོད་ཀྱི་སྒྲ་དབྱངས་སྒྲོགས་པའི་ཡུལ་ཞིག་ཏུ་གྱུར།། སྤྱི་ལོ1947ལོར་ཟླ་བ་དགུ་པར་མི་ཉག་ཀ་བཞི་དགོན་མི་ཕམ་གླིང་གི་ཆོས་སྒོར་ཞུགས་ཏེ་ཀུན་བཟང་བསྟན་འཛིན་ཞེས་པ་སློབ་དཔོན་དུ་བསྟེན་ཏེ་སློབ་སྦྱོང་གི་མགོ་བཙུགས་ཏེ་བགྲང་བྱ་གསུམ་གྱི་རིང་ལ་རི་བོ་དགེ་ལྡན་པའི་ཆོས་སྤྱོད་མགོའི་དགའ་ལྡན་ལྷ་བརྒྱ་ནས་བཟུང་། མཐར་དཔལ་གསང་བ་འདུས་པ་དང་། གསང་འདུས་རྩ་རྒྱུད། རབ་གནས་དགེ་ལེགས་ཆར་འབེབས་བར་དུ་ཆད་ལུས་མེད་པར་ཚོགས་གྲལ་དུ་བློ་རྒྱུགས་ཕུལ་བར་ཀ་བཞི་ཆགས་དགོན་པའི་བགྲང་བྱ་བདུན་བརྒྱའི་ལོ་རྒྱུས་རིང་ལ་དེ་འདྲའི་དུས་ཐུང་ནས་བློ་རྒྱུགས་སྤྲོད་ཐུབ་པ་བྱུང་མེད་ཅེས་མཚན་སྙན་བླ་རུ་འཕགས།། རང་ལོ་བཅུ་གཉིས་པར་ཉན་ཤུལ་མཁན་པོ་ཐུབ་བསྟན་བསྟན་སྲུང་ཉི་མ་སོགས་ཀྱི་མདུན་ནས་དགེ་ཚུལ་གྱི་སྡོམ་པ་ཞུས། རབ་བྱུང་བཅུ་དྲུག་པའི་ཤིང་ལུག་སྤྱི་ལོ་1955ལོར་དགོངས་ལོ་བཅུ་བཞི་ལ་ཕེབས་སྐབས་དབུས་ལྷ་ལྡན་གྱི་ཞིང་དུ་ཞབས་ཀྱིས་བཅགས་ཤིང་དགའ་ལྡན་ཁྲི་པ་སོགས་གངས་རིའི་སྐྱེས་ཆེན་དུ་མའི་དྲུང་དུ་དབང་ལུང་དང་ཆོས་འབྲེལ་དུ་མ་གསན་བཞེས་གང་ལེགས་མནོས་པ་དང་དཔལ་ལྡན་འབྲས་སྤུངས་དགོན་པའི་ཆོས་གྲལ་དུ་ཞུགས་ནས་གཞུང་ཆེན་བཀའ་པོད་ལྔ་ལ་འབད་པ་ལྷུར་ལེན་གྱིས་སྤྱི་ལོ་1959ལོའི་བར་དུ་ཞུགས། ལོ་དེར་ཕྱིར་ལྷ་སར་ཕེབས་ནས་ཞང་པོ་མཁྱེན་རབ་འོད་གསལ་གྱི་དྲུང་དུ་སུམ་རྟགས་དག་གསུམ་དང་། དབུ་མ་སོགས་ལ་སྦྱང་པ་མཐར་ཕྱིན་མཛད། ལྕགས་ཁྱི་སྟེ་སྤྱི་ལོ་1960ལོར་ནས་ལྷ་ལྡན་སྨན་རྩིས་ཁང་དུ་སྨན་སྤྱི་མཁྱེན་རབ་ནོར་བུ་དང་མཁའ་འགྲོ་དབྱངས་དགའ་སོགས་ཀྱི་དྲུང་དུ་གསོ་རིག་རྒྱུད་བཞི་དང་ལག་ལེན་གྱི་སྐོར། སྨན་གྱི་ངོས་འཛིན་གྱི་སྐོར་སོགས་ལ་སྦྱང་བ་དཔྱིས་ཕྱིན་པ་མཛད། 

དུས་ཀྱི་སྨག་རྒྱ་འཛིང་བའི་བསྒྲིབས་འོག་ཏུ།།
རིགས་ཀྱི་དྭངས་མ་འདྲེན་པའི་སྒྲོན་མེ་མཆོག།
གངས་ཅན་རིག་པའི་མཛོད་འཆིང་སྡེ་སྣོད་འཛིན།།
བསྟན་པའི་མེ་རོ་གསོ་ཕྱིར་མགོན་དུ་བྱོན།།

   དུས་འགྱུར་སྐབས་ཕྱིར་ཕ་ཡུལ་དུ་བྱོན་ནས་ཡུལ་མི་ཚོར་སྒྲོ་བ་དང་ལྷམ་སོགས་འཚེམ་བཟོ་བྱས་པ་སོགས་འཇིག་རྟེན་ཐུན་མོང་གིས་མཛད་པ་བཞེས་པ་དང་། ཞིང་སྲུང་སོགས་མཛད་ནས་ཞོར་དུ་མེ་ཏོག་རེ་ལྕག་པའི་རྩ་བས་ཤོག་བུ་བླུགས་ཏེ་གཅོད་འཛིན་དང་རང་གྲོལ་སོགས་ཀྱི་ཆོས་དཔེ་པོ་ཏི་འགའ་བྲིས་གཟུགས་སུ་ཕབ། ས་བྱ་སྟེ་སྤྱི་ལོ་1968ལོར་ལུང་ཕུག་ཅེས་པར་སྨན་བཅོས་བྱེད་པའི་འགོ་བཙུགས། དེའི་ཕྱི་ལོ་རྡོ་རྔ་རུ་དབུ་མཛད་ཀ་ཐོའི་དྲུང་དུ་སྐར་རྩིས་ལྔ་བསྡུས་དང་། སྒྲ་གཅན། ས་གླང་བརྟགས་ཐབས། དུས་གཟེར་སོགས་ཀྱི་ལག་ལེན་ལ་སྦྱངས་པ་བྱས་ཏེ་ལྷ་ས་སྨན་རྩིས་ཁང་གི་ལོ་ཐོ་མ་བྱུང་བར་བགྲང་བྱ་བདུན་ཙམ་གྱི་རིང་ལ་ཉི་འཛིན་དང་ཟླ་འཛིན་སོགས་ཕབ་པ་དང་བསྟན་རྩིས་རྒྱས་པ་བརྩམས་ནས་འགྲེམས་སྤེལ་གནང་། མེ་འབྲུག་ལོ་སྤྱི་ལོ1976ལོ་ནས་གསེར་ཁ་ཤང་གིས་བོད་སྨན་ཁང་བཙུགས་པར་དེ་གར་གསོ་བྱད་སྨན་གྱི་ཕག་ལས་གནང་ནས་བགྲང་བྱ་ཧྲིལ་པོ་དྲུག་ལ་བཞུགས། 1978ལོར་རང་སྐྱོང་ཁུལ་གྱི་སྨན་རྫས་ཞིབ་བྱ་བར་སྨན་སྣ་བདུན་ཅུ་ལྷག་བསྡུས་པས་སི་ཁྲོན་ཞིང་ཆེན་གྱི་བྱ་དགའ་ཐོབ། 1980ལོར་ཁྲིན་ཏུའུ་རུ་བོད་རྒྱ་ཚིག་མཛོད་ཆེན་མོ་རྩོམ་སྒྲིག་གི་བྱ་བར་ཞུགས་པ་དང་། ལོ་དེར་རྟའུ་རྫོང་སྲིད་གྲོས་སྐབས་བཞི་པའི་ཨུ་ཡོན་གྱི་འཐུས་མིར་འདེམས། 1982ལོར་དཔལ་སྨད་དུ་ཁུལ་འཕྲོད་བསྟེན་སློབ་གྲྭའི་བོད་སྨན་ཚན་ཁག་བཙུགས་པར་གདན་དྲངས་ནས་གསོ་བ་རིག་པའི་སྐོར་གྱི་སློབ་ཁྲིད་ལོ་གཉིས་མཛད་ཅིང་། རྟའུ་ཉི་མཚོ་དགོན་པའི་གྲྭ་པ་བདུན་ཅུ་སོགས་ལ་སུམ་རྟགས་སྐོར་རྒྱས་ཁྲིད་གནང་། 1984ལོར་རང་སྐྱོང་ཁུལ་གྱིས་དར་མདོའི་དགེ་རྒན་ཟབ་སྦྱོང་འཛིན་གྲྭ་དག་གི་མཛུབ་ཁྲིད་དགེ་རྒན་ལ་གདན་འདྲེན་ཞུས། དར་མདོ་མི་རིགས་དགེ་འོས་སློབ་གྲྭའི་བོད་ཡིག་ཚན་ཁག་གི་འགན་ཁུར་བའི་ཐུགས་འགན་བཞེས་པ་དང་རྒྱལ་ཡོངས་བོད་ཡིག་མཐོ་རིམ་སློབ་འབྲིང་གི་སློབ་གཞི་ཞིབ་བཤེར་དང་ལྗོངས་ཞིང་ལྔའི་མཉམ་འབྲེལ་སློབ་དེབ་ཞིབ་བཤེར་སོགས་ཀྱི་མཛད་པ་བསྐྱངས། 1989ལོར<<མངོན་བརྗོད་ཀྱི་བསྟན་བཅོས་རྒྱ་མཚོའི་ཆུ་ཐིགས་ཀྱི་འགྲེལ་བ་ཀུ་ཤུའི་ཆུན་པོ>>བརྩམས་ཤིང་སི་ཁྲོན་མི་རིགས་དཔེ་སྐྲུན་ཁང་ནས་པར་དུ་བསྐྲུན་ཏེ་དགེ་འོས་སློབ་གྲྭ་བཞིས་སློབ་དེབ་ཏུ་བཀོལ། དར་མདོ་མི་རིགས་དགེ་འོས་སློབ་གྲྭའི་བོད་སྐད་ཀྱི་རྒྱང་སྒྲོག་གསར་དུ་བཙུགས་པར་སྒྲ་གདངས་སོགས་ཁྲིད་པ་དང་། སྒྲ་ཐག་གཉིས་ལ་སྒྲ་བླུགས་ཏེ་སློབ་གཞི་རུ་བཀོལ། 1993ལོར་མཐོ་རིམ་དགེ་རྒན་ཆེན་མོའི་མཚན་སྙན་ཐོབ། 1995ལོར་བརྡ་སྤྲོད་པའི་བསྟན་བཅོས<<སུམ་རྟགས་རྣམ་བཤད་ཆུ་བོ་གཅིག་འདྲེས>>བརྩམས་ཤིང་སི་ཁྲོན་མི་རིགས་དཔེ་སྐྲུན་ཁང་གི་པར་དུ་བསྐྲུན་ནས་དགེ་འོས་སློབ་གྲྭའི་སློབ་དེབ་ཏུ་བཀོལ། 1997ལོར<<བོད་ཀྱི་ལོ་རྒྱུས་དང་ས་ཁམས་ལས་འཕྲོས་པའི་གཏམ་བྱིས་པའི་མཛུབ་ཁྲིད>>ཅེས་པ་བརྩམས་ཏེ་དགེ་འོས་སློབ་གྲྭའི་སློབ་དེབ་ཏུ་བཀོལ་པ་དང་སི་ཁྲོན་བོད་རིག་པ་ཞིབ་འཇུག་ཁང་གི་ཁོང་མིར་འདེམས་ཏེ་ཚོགས་འདུར་ཐེངས་དུ་མར་ཞུགས། སྔ་ཕྱིར་མཚོ་སྔོན་སློབ་གསོ་སློབ་གླིང་དང་སི་ཁྲོན་མི་རིགས་སློབ་གླིང་གཙོས་པའི་བོད་རིག་པའི་སློབ་གླིང་དུ་མར་འཆད་ཁྲིད་དང་གཟབ་ཁྲིད་གནང་ཞིང་།རྟའུ་ཉི་མཚོ་དགོན་པ་གཙོས་པའི་དགོན་སྡེ་དུ་མར་ཆོས་འབྱུང་དང་ལོ་རྒྱུས་སོགས་གཟབ་ཁྲིད་གནང་བ་དང་།ལས་ཀའི་ཟླ་ཕོགས་ཆུད་ཟོས་སུ་མ་བཏང་བར་མ་འོངས་པའི་གང་ཟག་ལ་ཕན་པར་རེ་བའི་ཐུགས་འདུན་དྭངས་མས་ཀ་བཞི་ཆགས་དགོན་དུ<<གངས་ཅན་རིག་པའི་གཏེརམཛོད་ཁང་>>གསར་དུ་བསྐྲུན་ཏེ་དེར་རྒྱལ་བའི་བཀའ་བསྟན་གྱིས་གཙོས་རིས་མེད་སྐྱེས་ཆེན་དུ་མའི་གསུང་པོད་སྟོང་ལྷག་བླུས་ཏེ་ཉར་ཚགས་བྱས། རྗེ་ཉིད་ཀྱིས་སྲོལ་རྒྱུན་གྱི་དཔེ་རིང་ལྟར་དུ་བྲིས་པའི་གསུང་རྩོམ་པོ་ཏི་གསུམ་དང་དེང་རབས་དཔེ་ཆའི་ལུགས་ལུགས་ལྟར་བྲིས་པའི་གསུང་རྩོམ་པོ་ཏི་བཞི་ལྷག་བརྩམས་ཤིང་ཞོར་དུ་ཐོར་རྩོམ་བརྒྱ་ཕྲག་དུ་མཛད་དེ་གཞུང་སྒེར་གཉིས་ཀྱི་དུས་དེབ་དུ་བཀོད་པས<<རྨི་ལམ་སྒྱུ་མའི་རོལ་རྩེད་སྙིང་པོ་མེད་པའི་ཆུ་ཤིང>>ལ<<སྦྲང་ཆར>>རྩོམ་སྒྲིག་ཁང་ལོ་འཁོར་ཉི་ཤུ་འཁོར་བའི་བྱ་དགའ་ཐོབ་པ་དང་། <<ཚེ་རིང་རྣམ་དྲུག་གི་རྟོགས་བརྗོད་དྲང་སྲོང་དགྱེས་པའི་གླུ་དབྱངས>> ལ<<གངས་དཀར་རི་བོ>>རྩོམ་སྒྲིག་ཁང་ནས་བྱ་དགའ་རིམ་པ་དང་པོ་ཐོབ་པ་སོགས་རྒྱལ་ཁབ་དང་ཞིང་ཆེན་རིམ་པའི་བྱ་དགའ་དུ་མ་ཐོབ།
      མདོར་ན་རྗེ་དམ་པ་ཁོང་གིས་བགྲང་བྱ་ཉི་ཤུ་ལྷག་གི་རིང་ལ་བོད་སྐད་ཡིག་གི་སྲོག་ཤིང་བརྟན་པོར་འཛུགས་ཆེད་ཉིན་མཚན་ལྟོས་མེད་དུ་ནུས་ཤུགས་རྩལ་སྤྲུགས་ཀྱིས་གངས་འདབས་ཀྱི་ཤེས་ལྡན་པ་སྟོང་ལྷག་སྐྱེད་སྲིང་བྱས་ཏེ་དེ་དག་སྲིད་འཛིན་ལས་ཁུངས་དང་དགེ་རྒན་སོགས་ཀྱི་དཔུང་སྡེ་ནས་རྒྱལ་ཁབ་དང་མི་རིགས་ལ་ཞབས་འདེགས་ཞུ་མུས་སུ་མཆིས། རབ་བྱུང་བཅུ་བདུན་པའི་ལྕགས་འབྲུག་སྟེ་སྤྱི་ལོ་ཉིས་སྟོང་ལོར་ལས་འཁྱུར་ངལ་གསོ་བྱས་པའོ།།

ཉིད་ཀྱི་མཛད་འཕྲིན་ཀློང་ཆེན་ཆུ་ཡི་གཏེར།།
ཡོངས་སུ་བརྗོད་པར་བདག་གི་བློ་མིན་ཕྱིར།།
སྐལ་ལྡན་གདུལ་བྱར་སྐྱོང་བའི་ག་བུར་རྡུལ།།
ཟེགས་མའི་བདུད་རྩི་རྟེན་དུ་དབུལ་བར་བགྱི།།

   ལས་འཁྱུར་ངལ་གསོ་བྱས་རྗེས་རྟའུ་མའུ་ཇོ་དགོན་དང་གསེར་རྒྱལ་སྒོ་སོགས་སུ་ཕེབས་ནས་གཙུག་ལག་ཁང་དང་སྨན་ཁང་གསར་བཞེངས་མཛད་དེ་གྲྭ་སེར་ཇོ་མོ་དུ་མར་གསོ་རིག་རྒྱུན་ཤེས་དང་སྒྲ་རིག་པ་སོགས་ཀྱི་སློབ་ཁྲིད་ལོ་དུ་མར་མཛད་ཅིང་། <<རྗེ་བཙུན་སྒྲོལ་མའི་བསྟོད་པ་ཕྱག་འཚལ་ཉེར་གཅིག་གི་རྣམ་བཤད་དད་ལྡན་དགའ་བ་སྐྱེད་བྱེད་ཨུཏྤལ་དགོད་པའི་འཛུམ་ཟེར>>ཞེས་པ་གསར་དུ་བརྩམས་ནས་པར་དུ་བསྐྲུན་པ་དང་། མཁན་ཆེན་ཚུལ་ཁྲིམས་བློ་གྲོས་ཀྱི་བཀའ་གསུང་བཞིན་ཁྲིན་ཏུའུ་རུ་ཕེབས་ནས་བགྲང་བྱ་གསུམ་གྱི་རིང་ལ་གསར་བྱུང་ཐ་སྙད<<རིས་མཛོད>>དང<<མིང་མཛོད>>གཉིས་ཀྱི་རྩོམ་སྒྲིག་གི་འགན་བཞེས་ཤིང་མདོར་ན་སྐུ་ཚེ་ཧྲིལ་པོ་མི་རིགས་ཀྱི་རིག་གནས་དང་བསྟན་པའི་ཞལ་འདེབས་སུ་ཕུལ་ཞིང་ད་ལྟའང་སྨད་མི་ཉག་དཔལ་སྨད་དུ་མི་འདོད་ནད་ཀྱིས་མནར་བའི་ཉམ་ཐག་སྐྱེ་འགྲོ་ཀུན་ལ་གསོ་བྱད་སྨན་གྱིས་གསོས་ཤིང་སྐུ་འཚོ་ཞིང་བཞུགས་པ་ཉིད་ལགས་སོ།།

བསྟན་འགྲོ་ཕན་བདེའི་ཉི་བྱེད་འབུམ་གྱི་གཟི།།
གངས་རིའི་མགོན་དུ་གཟི་མདངས་རབ་འཕྲོས་ཏེ།།
འགྲོ་ཀུན་དུ་ཁའི་གདུང་བའི་འཇོམས་བྱེད་ཅིང་།།
ཞབས་པད་ཆུ་སྐྱེས་འཛུམ་རྒྱ་གྲོལ་བར་ཤོག།
ཁམས་གསུམ་མ་ལུས་ལུས་ཅན་ཐམས་ཅད་ཀུན།།
ཉམ་ཐག་གདུང་བའི་མུན་པ་རབ་བཅོམ་སྟེ།།
བདེ་ཆེན་འོག་མིན་ཆོས་དབྱིངས་ཕོ་བྲང་དུ།།
འདྲེན་པའི་དེད་དཔོན་ཆེན་པོའི་རྒྱུར་གྱུར་ཤོག།