ང་གི་དྲུང་དུ་རྡོ་སྐས་བརྟན་པོ་ཞིག་འཛུགས་པ་རེད།
     དེ་སྔོན་བོད་མི་རྣམས་གནས་བཅས་པའི་ཡུལ་ནི་འགྲིམ་འགྲུལ་མི་བདེ་ལ་གནམ་གཤིས་རྩུབ་ཅིང་།འཕྲིན་བརྡ་དོགས་པ་དང་རྙིང་ཞེན་གྱི་འདུ་ཤེས་འཚུབ་པ་བཅས་ཀྱི་དབང་གིས་བོད་ཀྱི་གླུ་པ་དང་གླུ་མ་མང་ཤོས་ལ་ཆུང་དུས་ནས་རིག་གནས་ཀྱི་བདུད་རྩི་མྱོང་པའི་གོ་སྐབས་མེད་ལ་ཆེད་སྦྱོང་གི་གནས་ལ་གོམས་ཤིང་ལོབ་པའི་དུས་ཚོད་ནི་དེ་བས་ཀྱང་ཉུང་།དབྱངས་ཅན་ལྷ་མོའང་དེ་ལས་མ་འདས།གནས་མཆོག་ཤམ་བྷ་ལའི་ཞིང་ཁམས་ལྟ་བུའི་ཡུན་ནན་བདེ་ཆེན་དུ་ཕ་མ་གཉིས་ཀྱི་ལས་འབྲས་སུ་སྨིན་པ་ནས་བཟུང་།ཕ་མེས་ནས་བརྒྱུད་པའི་སྲོལ་རྒྱུན་བཟང་པོ་རྣམས་ཁོང་གི་ལུས་སེམས་གཉིས་ལ་ཁྱབ་ཡོད་དེ།ལྷད་མེད་དྭངས་གཙང་གངས་ཆུ་ལྟ་བུའི་སེམས་པ་དང་ངང་རྒྱུད་འཇམ་ལ་ལྷོད་ཆགས་ལྡན་པའི་གཤིས་ཀ།སྙན་ཞིང་འཇེབས་ལ་ཕོ་མོ་རྒན་གཞོན་སུས་ཐོས་ཀྱང་ཡིད་དབང་འཕྲོག་པའི་ངག་བདེ་མོ་བཅས་རང་བཞིན་གྱིས ་གྲུབ་ཡོད།དེ་ནི་བཀའ་དྲིན་ཅན་གྱི་མེས་པོས་གནང་བའི་ཟད་རྒྱུ་མེད་པའི་རྒྱུ་ནོར་ཞིག་ལགས།ལྷན་སྐྱེས་སུ་གནས་པའི་གཤིས་རྒྱུད་བཟང་པོ་དང་གླུ་བྲོ་ལ་དགའ་བའི་གཤིས་ཀ་བཅས་ཕ་མ་དང་བཅས་པས་གཟིགས་སྐྱོང་གནང་བའི་དྲིན་གྱིས་རིམ་བཞིན་དུ་མགྲིན་ངག་ཁུ་བྱུག་ལྟར་སྙན་ཞིང་སྐྱེད་གཟུགས་རྩ་རིའི་སྨྱུག་མ་ལྟར་དྲང་ལ་ཞལ་རས་དཀར་དམར་མདངས་དང་ལྡན་པའི་བོད་པའི་བུ་མོ་མཛེས་མ་ཞིག་ཏུ་ཆགས།
     རྒྱུ་མེད་པ་ལ་འབྲས་ཡོད་པ།།ཤེས་ལྡན་གང་གིས་བསྒྲུབ་པར་ནུས་ཞེས་པ་ནི་འབྲས་བུ་གང་ཞིག་སྨིན་དགོས་ན་དེ་དང་འཚམ་པའི་རྒྱུ་ལེགས་པོ་ཞིག་ལྡན་དགོས་པའི་དོན་རེད།གླུ་བྲོ་ལ་ལྷན་སྐྱེས་ཀྱི་སྤོབས་པ་དང་སྦྱར་བྱུང་གི་འབད་རྩོལ་མཆིས་པས་སྤྱི་ལོ་ཆིག་སྟོང་དགུ་བརྒྱ་གོ་ལྔ་ལོར་དབྱངས་ཅན་ལྷ་མོ་ཡུན་ནན་ཞིང་ཆེན་ཁུན་མིང་གྲོང་ཁྱེར་དུ་འབྱོར་བའི་གོ་སྐབས་ཐོབ་པས་མི་ཚེའི་ལྟ་བ་དང་འཇིག་རྟེན་ལྟ་ཚུལ་བཅས་ལ་འཕོ་འགྱུར་ཆེན་པོ་བྱུང་སྟེ་རང་ཉིད་ཀྱི་མི་ཚེའི་འགྲོ་ལམ་ལ་སླར་ཡང་བསམ་གཞིག་མཛད།མི་ཚེ་འདིའི་འགྲོ་ལམ་ཀྱི་ཁ་ཕྱོགས་བསྒྱུར་བའི་དུས་ནི་ཁོ་རང་ཁྲི་འདུ་རུ་རྒྱལ་སྤྱིའི་བརྙན་འཕྲིན་དུས་ཆེན་ཞིག་ལ་ཞུགས་པའི་སྐབས་སི་ཁྲོན་རོལ་མོའི་སློབ་གླིང་རྒྱུགས་སྤྲོད་ཆོག་པའི་གཏམ་བཟང་གོ་ཐོས་བྱུང་བས་ཐེ་ཚོམ་ཅི་ཡང་མེད་པར་རྒྱུགས་འཕྲོད་མིན་བལྟ་རུ་སོང་།སྐབས་དེ་དུས་ཁོང་གིས་རོལ་མོའི་སློབ་གླིང་དུ་ཡང་སྙིང་ཅི་ཞིག་སྦྱོང་དགོས་པའང་གསལ་ཆ་མེད་མོད།རྫ་རིའི་ཁོང་གསེང་དུ་ལྷུང་ལྷུང་དལ་གྱིས་འབབ་པའི་ཆུ་ཕྲན་ལྟ་བུའི་ངག་སྙན་པོ་དང་བཅོས་མིན་གཉུག་གཤིས་ལྡན་ལ་རིག་པ་གྲུང་པོར་དོད་པའི་བོད་པའི་བུ་མོ་ཞིག་གིས་དགེ་རྒན་རྣམས་ཀྱི་ཡིད་སེམས་འཕྲོག་སྟེ་འདོད་དོན་ཡིད་བཞིན་དུ་གྲུབ།དུས་དེ་ནས་བཟུང་གླུ་དབྱངས་ནི་རང་ཉིད་ཀྱི་ཚེ་སྲོག་གི་ཆ་ཤས་སུ་བསྒོམས་པའི་བོད་པའི་བུ་མོ་རེ་བ་ཅན་ཞིག་གིས་རོལ་དབྱངས་སྒྱུ་རྩལ་གྱི་རྒྱ་མཚོ་ཆེན་པོ་རུ་བརྩོན་འགྲུས་ཀྱི་གྲུ་གཟིངས་ལ་བརྟེན་ནས་སེམས་ནས་འདོད་པའི་ཡིད་བཞིན་ནོར་བུ་ལག་ཏུ་ལོན་ཐབས་བྱས།སྒྱུ་རྩལ་ནི་འཚོ་བ་ལས་བྱུང་ཡང་འཚོ་བ་ལས་ཐོད་རྒལ་ཅན་དང་ཁྱད་དུ་འཕགས་པ་ཞིག་ཡིན་ལ་ཕ་ཡུལ་དུ་དར་ཞིང་ཁྱབ་པའི་དམངས་ཁྲོད་ཀྱི་གླུ་དང་གཞས་ནི་ཁོ་རང་གི་སྒྱུ་རྩལ་གྱི་ཆུ་འགོ་ལྟ་བུ་ཡིན་པའི་གནས་ལུགས་དེ་གསལ་ལེར་ཤེས་པས་ཡང་དང་བསྐྱར་དུ་ཕ་ཡུལ་དུ་ལོག་ནས་དམངས་གླུ་དང་དམངས་གཞས་མང་པོ་འཚོལ་སྡུད་བྱས་པ་མ་ཚད་དེ་ལ་གསོན་