དཔལ་དགེ་མ་ཎི་རྡོ་འབུམ་ནི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་སེར་ཤུལ་རྫོང་གི་ནུབ་བྱང་མཚམས་སུ་ཡོད།རྫོང་ཐོག་ནས་ལམ་ཐག་སྤྱི་ལེ་ལྔ་བཅུ་ལྷག་ཙམ་ཡོད།རྡོ་འབུམ་བཞེངས་པའི་ས་ཆ་ནི་རྫ་མ་མོ་ཐང་ཞེས་པ་དེ་རེད།ས་གནས་དེ་གའི་མི་རྒན་ཚོས་བཤད་པ་ལྟར་ན།དཔལ་དགེ་བླ་མ་བསམ་གཏན་ཕུན་ཚོགས་ཀྱིས་རབ་བྱུང་བཅུ་གཅིག་པའི་ལྕགས་འབྲུག་ལོ་སྟེ་སྤྱི་ལོ༡༦༤༠ལོར་རྡོ་རྐོ་མ་ཎི་ཚེ་རིང་ཞེས་པ་ཞིག་དང་འཕྲད་དེ་རྟེན་འབྲེལ་འགྲིག་ནས་རྡོ་འབུམ་དེ་ཐོག་མར་གསར་བཞེངས་བྱས།

རྗེས་སུ་དེའི་ཡང་སྲིད་དཔལ་སྤྲུལ་ཨུ་རྒྱན་འཇིགས་མེད་ཆོས་ཀྱི་དབང་པོས་དགུང་ལོ་སུམ་ཅུའི་ཐོག་ལོ་ལྔ་ཙམ་གྱི་རིང་ལ་རྡོ་རྐོ་བ་དུ་མ་བསྡུས་ནས་མ་ཎི་བཀའ་ཆེན་དང་བཅུ་འགྱུར་སོགས་རྡོ་ལ་བརྐོས་རྗེས་རྩིས་ལེན་ཞིབ་གཟིགས་ནན་ཏན་མཛད་དེ་རྡོ་འབུམ་རྒྱ་ཇེ་ཆེར་དང་དཔངས་ཇེ་མཐོར་བཏང་ལ་ཁ་སྣོན་ཞིག་གསོས་ལེགས་ཞིབ་བྱས།བཞེངས་སྐྲུན་མཛད་པ་དང་དུས་མཚུངས་སུ་བླ་སྤྲུལ་མང་པོ་གདན་དྲངས་ནས་རྡོ་འབུམ་ལ་རབ་གནས་ཀྱང་རྒྱ་ཆེན་པོ་བྱས།རིག་གནས་གསར་བརྗེ་ཆེན་པོའི་སྐབས་སུ་རྡོ་འབུམ་དེ་ཞིག་གསོ་བྱེད་མཁན་མེད་ཕྱིར་རྡོ་རྩིག་དེ་ཞིག་རལ་དུ་གྱུར་ན་ཡང་།
 

 

ཏང་གི་སྐབས་བཅུ་གཅིག་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་འཚོགས་ཚུན།མཆོག་སྤྲུལ་རྒྱལ་མཚན་རབ་ཡངས་ཀྱིས་གཙོ་འགན་བཞེས་ནས་མི་དམངས་ཤོག་སྒོར་ཁྲི་ཚོ༡༧ཙམ་འགྲོ་སོང་བཏང་ནས་ཡུལ་སྡེ་དེའི་བླ་སྤྲུལ་དང་ཆོས་དད་མང་ཚོགས་ཀྱིས་ཉམས་གསོ་ཕུན་སུམ་ཚོགས་པ་བྱས་ཡོད།དཔལ་དགེའི་རྡོ་རྩིག་རིང་ཐུང་གི་ཚད་ནི་སྤྱི་ལེ༡.༧ཡོད་ལ།རྩིག་པའི་རྒྱ་ཞེང་ལ་སྨི༡ནས༣བར་དང་།རྩིག་པའི་མཐོ་ཚད་ནི་སྨི༢.༥དང༣.༥བར་ཡིན།
 

རྡོ་འབུམ་རིང་པོ་འདིའི་ཐོག་གི་སོ་སོའི་བར་དུ་སྨི༣ནས༤ཡི་བར་དུ་རྡོ་རྩིག་གྲུ་བཞི་དང་ནར་མོ་བཅས་བརྩིགས་ཡོད།ས་ཆ་དེའི་གྲྭ་པ་བླ་མ་ཚོའི་ཞལ་རྒྱུན་ལྟར་ན་རྡོ་འབུམ་དེའི་ནང་དོན་ནི་མ་ཎི་ཡིག་དྲུག་གཙོ་བོ་བྱས་པའི་སྟེང་དུ་བཀའ་བསྟན་འགྱུར་དང་ཐར་མདོ་ཚར༥༠༠༠ཙམ་དང་།རྡོ་ལ་བརྐོས་པའི་ལྷ་སྐུ་ཆེ་ཆུང༣༠༠༠ལྷག་ཡོད་པར་བཤད།ས་ཆ་འདིའི་མཐོ་ཚད་ནི་རྒྱ་མཚོའི་ངོས་ལས་ཆ་སྙོམས་སྨི༤༢༤༠ལྷག་ཙམ་ཡོད་པ་རེད།

 

རྡོ་འབུམ་དེར་ལོ༣༦༠ཙམ་གྱི་ལོ་རྒྱུས་ལྡན་པ་རེད།འབྲེལ་ཡོད་ཆེད་རམས་པ་ཚོས་བཤད་པ་ལྟར་ན།རྡོ་འབུམ་འདི་ནི་དེང་སང་འཛམ་གླིང་སྟེང་ཆེས་རིང་བའི་མ་ཎི་རྡོ་རྩིག་ཅིག་རེད།