བསམ་བྱུང་གི་སློབ་གསོ་བྱེད་ཐབས་ཀྱིས་བསམ་བྱའི་ཕྱོགས་ཀྱི་ཐེ་ཚོམ་མང་པོ་ཞིག་བྱ་དངོས་ཕན་ཚུན་བསྡུར་བ་དང་། ཕན་ཚུན་དབྱེ་ཞིབ།ཚོད་ལྟ། བརྟག་དཔྱད་ཞིབ་འཇུག་གི་བྱེད་ཐབས་གང་མང་བརྒྱུད་དེ་བྱ་དངོས་དེ་དག་གི་ཐུན་མོང་གི་ཁྱད་ཆོས་དང་། ཐུན་མོང་མ་ཡིན་པའི་ཁྱད་པར་སོགས་ཀྱི་དབྱེ་ཐག་ཆོད་པར་བྱེད་ན་ཡིན་ལ། ཁྱད་པར་དུ་བསམ་བྱུང་གི་སློབ་གསོ་བྱེད་ཐབས་ལ་སློབ་མའི་གཙོ་གཞིའི་ནུས་པ་འབུར་དུ་ཐོན་པའི་ཁྱད་ཆོས་ཡོད་པས། དགེ་རྒན་གྱིས་སྣེ་ཁྲིད་དང་ཕྱོགས་སྟོན་གྱི་ནུས་པ་འདོན་པ་ལས་གཞན་བསམ་བྱུང་ཞིབ་འཇུག་གི་འགན་ཁུར་ཡོད་ཚད་སློབ་མས་ཁུར་དགོས་ལ། སློབ་མ་ཁེར་རྐྱང་གི་ཞིབ་འཇུག་དང་། རེ་གཉིས་ཀྱི་ཞིབ་འཇུག ཐུན་མོང་གི་ཞིབ་འཇུག་སོགས་སྣ་ཚོགས་ཡོད་ལ། བོད་སྲོལ་རྒྱུན་རིག་གནས་ཀྱི་རྩོད་གྲྭའི་སྔ་རྒོལ་ཕྱི་རྒོལ་རྩོད་པ་བྱེད་པའི་སློབ་གསོ་བྱེད་ཐབས་འདི་ནི་གཙོ་བོ་ཐེ་ཚོམ་གྱི་སྒྲོ་འདོགས་གཅོད་པའི་བསམ་བྱུང་གི་སློབ་གསོ་བྱེད་ཐབས་ཀྱི་རྣམ་པ་ཕུན་སུམ་ཚོགས་པ་ཞིག་ཡིན་པས། སློབ་གསོ་བྱེད་ཐབས་འདིས་སློབ་མའི་བསམ་བྱུང་གི་ཤེས་རབ་མཐོར་འདེགས་གཏོང་བཞིན་ཡོད་པ་མ་ཟད། ཆུང་དུས་ནས་མིའི་བསམ་གཞིགས་ཀྱི་ནུས་པ་སྐྱེད་སྲིང་བྱེད་པར་ཕན་ནུས་ཁྱད་པར་ཅན་ཞིག་འདོན་བཞིན་ཡོད་པས། སློབ་ཁྲིད་བྱེད་ཐབས་འདི་ལ་སྔོན་གྱི་མཁས་པས“དམ་ཆོས་འོད་ཟེར་མ”ཞེས་བརྗོད་པ་ནི་ངོ་མ་དོན་ལ་གནས་པ་ཞིག་ཡིན་མོད། ཡིན་ནའང་ད་ལྟ་གནའ་རབས་སུ་ཡོད་པའི་བསམ་བྱུང་ཞིབ་འཇུག་རང་བཞིན་གྱི་སློབ་གསོ་བྱེད་ཐབས་སྣང་མེད་དུ་འཇོག་པ་དང་འཛམ་གླིང་རང་བཞིན་དུ་སོ་མ་དར་བཞིན་པའི་ཞིབ་འཇུག་རང་བཞིན་གྱི་སློབ་ཁྲིད་བྱེད་ཐབས（研究性教学）ལ་ཡང་གཙིགས་ཆེན་མི་བྱེད་པ་ནི“གནའ་བཟང་དེང་སྤྱོད་དང་ཕྱི་བཟང་ཀྲུང་སྤྱོད”ཅེས་པའི་དགོངས་དོན་ལག་བསྟར་མཐིལ་ཕྱིན་བྱས་པ་མི་འདང་བའི་མཚོན་རྟགས་ཡིན་ལ། ཁྱད་པར་དུ་མི་སྐོར་ཞིག་གིས་གང་ཞིག“གནའ་བཟང”ཡིན་པ་ངོས་ཟིན་མེད་ལ། མི་སྐོར་ཞིག་གིས་གང་ཞིག“དེང་སྤྱོད”བྱེད་རྒྱུའི་ཐད་ལ་ངོས་ཟིན་ཆེས་ཞན་པ་འདིས་ཀྱང་མི་རིགས་ཀྱི་འཕེལ་རྒྱས་དང་བྱིས་པའི་སྤུས་ཚད་ལ་ཤན་ཤུགས་ཆེན་པོ་ཐེབས་དང་ཐེབས་བཞིན་ཡོད་པ་རེད་སྙམ།
　　 གསུམ། སྒོམ་བྱུང་གི་སློབ་གསོ་བྱེད་ཐབས།
 　　སྒོམ་བྱུང་གི་སློབ་གསོ་བྱེད་ཐབས་ནི་ཐོས་བྱུང་དང་བསམ་བྱུང་གི་སློབ་གསོ་བྱེད་ཐབས་ལ་བརྟེན་ནས་ཐེ་ཚོམ་གྱི་སྒྲོ་འདོགས་ཆོད་ཅིང་ངེས་པ་རྙེད་པའི་དོན་དེ་ཉིད་རིགས་པས་དཔྱད་པ་དང་འཇོག་པ་ཅི་རིགས་ཀྱི་སྒོ་ནས་ཡང་ཡང་འདྲིས་པའམ་གོམས་པར་བྱེད་པའི་སློབ་གསོ་བྱེད་ཐབས་ཐུན་མོང་མ་ཡིན་པ་ཞིག་རེད། སློབ་གསོ་བྱེད་ཐབས་འདིའི་ཁྱད་ཆོས་གཙོ་བོ་ནི་དཔེར་ན་སློབ་མའི་བསམ་བློ་དཔྱད་གཞི་གཅིག་གི་སྟེང་དུ་བསྡུ་བའམ་བློ་སེམས་རྩེ་གཅིག་གི་བསམ་བློ་སྦྱོང་བརྡར་བྱེད་པར་ཐུན་མོང་མ་ཡིན་པའི་ཁྱད་ཆོས་ཡོད་པར་མ་ཟད། བློ་ཁ་ནང་དུ་ཕྱོགས་ནས་རང་གི་བསམ་བློ་དང་ཀུན་སྤྱོད་དག་ཐེར་གྱི་ནུས་པ་སྐྱེད་སྲིང་བྱེད་པའི་སློབ་གསོ་བྱེད་ཐབས་ཁྱད་པར་ཅན་ཞིག་ཀྱང་ཡིན་པས། བསམ་བློ་བདེ་ཐང་སློབ་གསོའི་མ་ལག་གལ་ཆེན་ཞིག་ཀྱང་རེད། ཤེས་ཡོན་དཔལ་འབྱོར་གྱི་དུས་རབས་ནང་དུ་སེམས་ཁམས་བདེ་ཐང་སློབ་གསོ་ནི་སློབ་གསོའི་རྩ་བ་ཡིན་པར་མ་ཟད། བདེ་ཐང་གི་འབྱུང་རྩ་ཉག་གཅིག་རེད། ཚད་ངེས་ཅན་ཞིག་གི་ཐད་ནས་བཤད་ན། སེམས་ཁམས་ཀྱི་ནད་རིགས་ནི་དུས་རབས་ཉེར་གཅིག་པའི་ན་ཚ་རེད་ཅེས་བཤད་ཆོག་ཆོག་རེད་ལ། དུས་རབས་ཉེར་གཅིག་པའི་སེམས་ཀྱི་ན་ཚ་དེ་གློ་བུར་དུ་ཕྱིར་མངོན་པ་ལྟ་བུ་ཞིག་ཡིན་ན་ཡང་།དོན་ངོ་མས་བཤད་ན་སེམས་ཀྱི་ན་ཚ་དེ་ཡང་མི་ཞིག་གི་ཚེ་སྲོག་དང་གཅིག་ཏུ་འབྲེལ་ཡོད་པ་ཞིག་ཡིན་ཏེ། མི་ཞིག་སྐྱེས་མ་ཐག་པ་ནས་ན་ཚ་དེ་ཡང་མགོ་བརྩམས་པ་ཡིན་ལ། མི་ཞིག་ནར་སོན་པའི་གོ་རིམ་ནི་ན་ཚ་དེ་རྒྱས་པའི་གོ་རིམ་ཡིན་པས། གལ་ཏེ་བདེ་ཐང་གི་མི་ཞིག་ཆགས་དགོས་ན་བྱིས་པ་ཆུང་དུས་ནས་བདེ་ཐང་སློབ་གསོ་ལ་གཙིགས་ཆེན་དང་སེམས་ཀྱི་ན་ཚ་དེ་སྔོན་འགོག་བྱེད་དགོས། ཐུན་མོང་མ་ཡིན་པའི་སློབ་གསོ་བྱེད་ཐབས་འདིས་རང་གི་བསམ་བློར་རང་གིས་གཙང་སྦྲ་དང་རང་གི་བསམ་བློ་རང་གིས་དག་ཐེར། རང་གི་བསམ་བློ་རང་གིས་བཅིངས་འགྲོལ་བཅས་བྱེད་པའི་ཁྱད་ཆོས་ཡོད་པ་མ་ཟད། རང་གི་བསམ་བློ་རང་གིས་བདེ་ཐང་གི་ཕྱོགས་དང་། ཆེད་ལས་ཀྱི་ཕྱོགས་ལ་གང་འདོད་འདོད་དུ་བསྒྱུར་བའམ་གནས་ཐུབ་པའི་བསམ་བློའི་སྤུས་ཚད་འཕེལ་རྒྱས་ལ་ཐུན་མིན་གྱི་ནུས་པ་འདོན་ཐུབ། དེ་བས། ཐོས་བསམ་གྱིས་སྒྲོ་འདོགས་ཆོད་པའི་ཤེས་རབ་དེ་རང་གི་བསམ་བློ་ཞིག་དང་རང་གི་རྩལ་ནུས་ཞིག་ཏུ་སྒྱུར་བྱེད་ཀྱི་སློབ་གསོ་བྱེད་ཐབས་ཐུན་མོང་མ་ཡིན་པ་ཞིག་རེད་ཅེས་བཤད་ཆོག
 　　བཞི། ཐོས་བསམ་སྒོ་གསུམ་ཡ་མ་བྲལ་བའི་སློབ་གསོ་བྱེད་ཐབས།
 　　སྤྱིར་ཐོས་བསམ་སྒོ་གསུམ་གྱི་སློབ་གསོ་བྱེད་ཐབས་ལ་བརྟེན་ནས་རིམ་བཞིན་ཐོས་བྱུང་གི་ཤེས་རབ་དང་བསམ་བྱུང་གི་ཤེས་རབ། སྒོམ་བྱུང་གི་ཤེས་རབ་གསུམ་སྐྱེད་སྲིང་བྱེད་ཐུབ་པར་མ་ཟད།ཤེས་རབ་དེ་དག་ཐོབ་པའི་གོ་རིམ་གྱི་ཁྲོད་ནས་མིའི་ཤེས་བྱའི་སྤུས་ཚད་དང་།རྩལ་ནུས་ཀྱི་སྤུས་ཚད། བསམ་བློ་ཀུན་སྤྱོད་ཀྱི་སྤུས་ཚད་སོགས་སྐྱེད་སྲིང་བྱེད་ཐུབ་ལ། སློབ་གསོ་བྱེད་ཐབས་དེ་དག་ཀྱང་ཐོག་མར་ཐོས་པ་དང་། དེ་ལ་བརྟེན་ནས་བསམ་པ། བསམ་པ་ལ་བརྟེན་ནས་སྒོམ་པའི་སློབ་གསོ་བྱེད་ཐབས་བེད་སྤྱོད་བྱེད་པའི་གོམས་སྲོལ་ཡོད་ནའང་བྱེ་བྲག་གི་ཤེས་བྱའི་གནས་གཞན་དང་གཞན་གྱི་ཕྱོགས་སུ་བེད་སྤྱད་ཚེ། ཐོས་བསམ་སྒོམ་གསུམ་གྱི་སློབ་གསོ་བྱེད་ཐབས་ཡ་མ་བྲལ་བར་བེད་སྤྱོད་བྱེད་དགོས་ཏེ། དཔེར་ན། བསམ་བློ་ཀུན་སྤྱོད་ཀྱི་སློབ་གསོ་ལྟ་བུ་ལ་མཚོན་ན། ཐོག་མར་ཐོས་པ་ལ་བརྟེན་ནས་བསམ་བློ་ཀུན་སྤྱོད་ཕྱོགས་ཀྱི་ཤེས་བྱ་བློ་ལ་ངེས་པ་དང་། བློ་ལ་ངེས་པའི་ཀུན་སྤྱོད་ཀྱི་ཤེས་རབ་དེའི་རྨང་གཞིའི་སྟེང་དུ་ཀུན་སྤྱོད་དེ་དག་གི་ངོ་བོ་དང་། དབྱེ་བ། ཀུན་སྤྱོད་བསམ་བློ་གོམས་པར་བྱས་པ་ལ་བརྟེན་ནས་རང་གི་བསམ་བློ་ཞིག་དང་རང་གི་ཀུན་སྤྱོད་ཅིག་ཏུ་གྱུར་ཚེ་ཀུན་སྤྱོད་སློབ་གསོ་དེའི་དམིགས་ཚད་ལ་ཐོན་པ་ཡིན་པས། མིག་སྔར་ཐོས་པའི་སློབ་ཁྲིད་བྱེད་ཐབས་གཙོ་ལ་བསམ་པའི་སློབ་ཁྲིད་བྱེད་ཐབས་སྣང་མེད་དུ་འཇོག་པ་དང་། བསམ་པའི་སློབ་ཁྲིད་བྱེད་ཐབས་གཙོ་ལ་ཐོས་པའི་སློབ་ཁྲིད་བྱེད་ཐབས་སྣང་མེད་དུ་འཇོག་པ། ཐོས་པའི་སློབ་ཁྲིད་བྱེད་ཐབས་གཙོ་ལ་སྒོམ་པའི་སློབ་ཁྲིད་བྱེད་ཐབས་སྣང་མེད་དུ་འཇོག་པ། སྒོམ་པའི་སློབ་ཁྲིད་བྱེད་ཐབས་གཙོ་བས་ཐོས་པའི་སློབ་ཁྲིད་བྱེད་ཐབས་སྣང་མེད་དུ་འཇོག་པ། བསམ་པའི་སློབ་ཁྲིད་བྱེད་ཐབས་གཙོ་ལ་སློབ་ཁྲིད་བྱེད་ཐབས་སྣང་མེད་དུ་ལུས་པ། སྒོམ་པའི་སློབ་ཁྲིད་བྱེད་ཐབས་གཙོ་ལ་བསམ་པའི་སློབ་ཁྲིད་བྱེད་ཐབས་སྣང་མེད་དུ་འཇོག་པ་སོགས་ཀྱི་དབང་གིས་དཔེ་ངོས་ཤེས་བྱ་ཡོད་ལ་བློ་ཐག་ཆོད་པའི་གོ་རྟོགས་མེད་པ་དང་། ཐག་ཆོད་པའི་གོ་རྟོགས་ཙམ་ཡོད་ཀྱང་དོན་རང་གི་བློ་ངོར་གོམས་འདྲིས་མེད་པའི་དབང་གིས་ཤེས་བྱ་ཡོད་ལ་ནུས་པ་མེད་པ་དང་། ཤེས་བྱ་ཡོད་ལ་ཀུན་སྤྱོད་མི་ལེགས་པ། ཀུན་སྤྱོད་ལེགས་ཀྱང་ཤེས་བྱ་མེད་པ།ཀུན་སྤྱོད་ལེགས་ཀྱང་ནུས་པ་མེད་པ། ནུས་པ་ཡོད་ཀྱང་ཤེས་བྱ་མེད་པ། ནུས་པ་ཡོད་ཀྱང་ཀུན་སྤྱོད་མི་ལེགས་པ་སོགས་ཀྱི་མཇུག་འབྲས་ངན་པ་འདི་དག་བྱུང་དང་འབྱུང་བཞིན་ཡོད་པ་རེད་སྙམ།
 　　དེ་བས། མི་ཞིག་གི་ཤེས་བྱའི་སྤུས་ཚད་དང་། ངལ་རྩོལ་རྩལ་ནུས་ཀྱི་སྤུས་ཚད། བསམ་བློ་ཀུན་སྤྱོད་ཀྱི་སྤུས་ཚད་སོགས་ཕྱོགས་ཡོངས་ནས་འཕེལ་རྒྱས་སུ་གཏོང་དགོས་ཚེ་ཐོས་བསམ་སྒོམ་གསུམ་ཡ་མ་བྲལ་བའི་སློབ་གསོ་ལ་གཙིགས་ཆེན་བྱེད་དགོས།
 　　གནའ་རབས་དགོན་པའི་སློབ་གསོ་ལ་མཚོན་ན་ཡང་ཐོས་བསམ་སྒོམ་གསུམ་ཡ་མ་བྲལ་བའི་སློབ་གསོ་ལ་གཙིགས་ཆེན་བྱས་མིན་གྱི་དབང་གིས་དགོན་པ་དེ་དག་ནས་ཐོན་པའི་འཇོན་ཐང་མི་སྣའི་ཁྱད་པར་མི་འདྲ་སྟེ། དཔེར་ན། ཐོས་བསམ་གྱི་སློབ་གསོ་གཙོ་བོ་བྱེད་པའི་རྩོད་གྲྭ་དང་། སྒོམ་བྱུང་ཤེས་རབ་ཀྱི་སློབ་གསོ་གཙོ་བོར་བྱེད་པའི་སྒོམ་གྲྭ། ཐོས་བསམ་སྒོམ་གསུམ་གྱི་སློབ་གསོ་བྱེད་ཐབས་གསུམ་ག་གཙོ་བོར་བྱེད་པའི་གྲྭ་ཚང་སོགས་ནས་ཐོན་པའི་འཇོན་ཐང་མི་སྣའི་ཁྱད་པར་མི་འདྲ་ལ། ཚད་མི་འདྲ་བའི་འཇོན་ཐང་མི་སྣ་དེ་དག་གིས་སྤྱི་ཚོགས་ལ་ཤན་ཤུགས་ཐེབས་ཚད་གཏན་ནས་མི་འདྲ་བ་དང་། སློབ་གསོ་དེ་དག་མྱངས་པའི་ཐུན་མོང་མ་ཡིན་པའི་འཇོན་ཐང་མི་སྣ་དེ་དག་གི་བསམ་བློ་དང་ལྟ་ཚུལ་ཡང་གཏན་ནས་མི་འདྲ་སྟེ། ཐོས་བསམ་སློབ་གསོ་གཙོ་བོར་བྱེད་པའི་འཇོན་མིས་བལྟས་ན་སྒོམ་བྱུང་སློབ་གསོ་གཙོ་བོར་བྱེད་མཁན་ནི་རྨང་གཞི་མེད་པ་ལྟ་བུ་ཞིག་དང་། སྒོམ་བྱུང་སློབ་གསོ་གཙོ་བར་བྱེད་མཁན་གྱིས་བལྟས་ན་ཐོས་བསམ་སློབ་གསོ་ནི་ཁ་བཤད་རྐྱང་རྐྱང་གི་སློབ་གསོ་ལྟ་བུ་ཞིག་ཡིན་པར་བསྟན་ཡོད་དེ།སྔོན་གྱི་ཐོས་བསམ་པས“ཐོས་པ་མེད་པའི་སྒོམ་པ་ནི།།ལག་ལྡུམ་བྲག་ལ་འཛེག་པ་འདྲ།།”ཞེས་སྒོམ་པ་བ་ལ་འཛེར་བ་དང་།སྒོམ་ཆེན་པས“ཁ་བཤད་སྟོང་བའི་འཕྱོར་འགྲོ་དེས།རྐྱེན་ཉོན་མོངས་ཐུབ་པ་དཀའ་མོར་གདའ།།” ཞེས་ཐོས་བསམ་པ་ལ་བཤད་ཡོད་མོད། ངས་བལྟས་ན། སྤྱིར་ཐོས་བསམ་སྒོམ་གསུམ་གྱི་བྱེ་བྲག་གི་སློབ་གསོ་བྱེད་ཐབས་གང་ཞིག་ཡིན་ཀྱང་། གང་ཞིག་གཙོ་གཞི་དང་གང་ཞིག་ཟུར་རྒྱན་ཡིན་མིན་གྱི་ཆ་ནས་མི་འདྲ་བ་ཙམ་ལས་ཐོས་པའི་སློབ་གསོ་ཡིན་ལ་བསམ་པའི་སློབ་གསོ་གཏན་ནས་མ་འདྲེས་པ་ཞིག་མེད་པས། བྱེ་བྲག་གི་ཤེས་བྱའི་གནས་མི་འདྲ་བ་དང་། སློབ་གསོ་བྱེད་ཡུལ་མི་འདྲ་བའི་དབང་གིས་སློབ་གསོ་བྱེད་ཐབས་མི་འདྲ་བ་བེད་སྤྱོད་དགོས་ལ། སློབ་གསོ་བྱེད་ཐབས་མི་འདྲ་བ་དེ་དག་ཇི་ལྟར་བེད་སྤྱོད་བྱེད་རྒྱུ་ནི་སློབ་གསོ་བྱ་ཡུལ་གྱི་སློབ་མའི་ཁྱད་ཆོས་དང་སྤྱི་ཚོགས་ལ་ཇི་ལྟ་བུའི་འཇོན་མི་ཞིག་སྐྱེད་སྲིང་བྱེད་རྒྱུ་དེ་དག་གིས་ཐག་གཅོད་དགོས་པ་རེད།འོན་ཀྱང་གནའ་རབས་ཀྱི་སློབ་གསོ་དེ་དག་མྱངས་བ་ལ་བརྟེན་ནས“མཁས་པ”ཆེ་འབྲིང་ཆུང་གསུམ་དང་། “གྲུབ་པ་བ”ཆེ་འབྲིང་ཆུང་གསུམ། སྤྱོད་པ་རྣམ་པ་སྣ་ཚོགས་ཀྱི་འཇོན་མི་བྱུང་ཡོད་ན་ཡང་། འདས་པའི་སྤྱི་ཚོགས་ལ་ཤན་ཤུགས་ཆེས་ཆེ་བ་ནི“མཁས་བཙུན་བཟང་གསུམ”དང་“མཁས་གྲུབ་ཉིས་འཛོམས”ཀྱི་འཇོན་མི་དེ་དག་རེད། དོན་ངོ་མས་བཤད་ན་འཇོན་མི་དེ་དག་ལ་རིག་གནས་ཀྱི་སྤུས་ཚད་འཛོམས་ཡོད་པ་མ་ཟད། ད་དུང་རིག་གནས་དེ་དག་རང་གི་བསམ་བློ་ཞིག་དང་རང་གི་ནུས་པ་ཞིག་རང་གི་ཀུན་སྤྱོད་ཅིག་ཏུ་གྲུབ་པས། ཤེས་ནུས་རྩལ་གསུམ་དང་ཤེས་ནུས་སྤྱོད་གསུམ་འཛོམས་པའི་འཇོན་མི་ཕུན་སུམ་ཚོགས་པ་ཞིག་ཆགས་ལ།འཇོན་མི་དེ་དག་གིས་སྤྱི་ཚོགས་དངོས་དང་བརྒྱུད་དེ་ཤན་ཤུགས་ཐེབས་ཚད་མཐོ་བས།འཇོན་མི་དེ་དག་ལ་ཚང་མས་གདེང་འཇོག་ཚད་མཐོན་པོ་བྱས་མྱོང་ཡོད་ན་ཡང་། ཆེས་ཡིད་ཕངས་པ་ཞིག་ནི“མཁས་བཙུན་བཟང་གསུམ”སྐྱེད་སྲིང་བྱེད་པའི་ཐོས་བསམ་སྒོམ་གསུམ་གྱི་སློབ་གསོ་བྱེད་ཐབས་ལ་གཙིགས་ཆེན་མ་བྱས་པའི་དབང་གིས“མཁས་བཙུན་བཟང་གསུམ”གྱི་འཇོན་མི་ཇེ་ཉུང་ནས་ཇེ་ཉུང་དུ་གྱུར་པ་རེད་སྙམ། འཇོན་མི་དེ་དག་ནི་ཐོས་བསམ་སྒོམ་གསུམ་ཡ་མ་བྲལ་བའི་སློབ་གསོ་ལས་ཐོན་པ་ཤ་སྟག་ཡིན་པས། སློབ་གསོ་བྱེད་ཐབས་འདི་དག་ལ་བསམ་གཞིགས་དང་ཞིབ་འཇུག་བྱེད་རྒྱུ་ནི་བོད་ཀྱི་སློབ་གསོ་འཕེལ་རྒྱས་ཀྱི་ལམ་གསར་བ་ཞིག་རེད་སྙམ་མོ།