ལྟ་ཚུལ་གྱིས་མི་ཚེ་དང་ཐབས་ལམ་གྱིས་ལས་དབང་ཐག་གཅོད་ངེས་རེད།
     ཡར་སྐུལ་གྱིས་བླུན་པོ་འཇོན་མིར་གཏོང་ཐུབ་ལ།སྐྱོན་བརྗོད་ཀྱིས་འཇོན་མི་བླུན་པོར་སྒྱུར་ཐུབ།
     གལ་ཏེ་དགེ་རྒན་གྱིས་སློབ་མའི་སེམས་ཁམས་ཀྱི་གཏེར་ཁ་འདོན་པའི་འཕྲུལ་འདེགས་ལ་ཁ་ལོ་སྒྱུར་ཤེས་ཚེ།སློབ་མའི་ཤེས་ནུས་རྩལ་གསུམ་ལ་འཕོ་འགྱུར་མི་འབྱུང་བ་ག་ལ་སྲིད།
     བྱིས་པའི་འཕེལ་རྒྱས་ལ་སེམས་ཁུར་མི་བྱེད་པའི་སློབ་གསོ་ནི་ཁྲེལ་མེད་ཀྱི་སློབ་གསོ་ཞིག་དང་།བྱིས་པ་ཡོངས་ཀྱི་འཕེལ་རྒྱས་ལ་སེམས་ཁུར་མི་བྱེད་པའི་སློབ་གསོ་ནི་ཕྱོགས་རིས་ཅན་གྱི་སློབ་གསོ་ཞིགབྱིས་པ་ཡོངས་ཀྱི་སྤུས་ཚད་ཀྱི་ཕྱོགས་སོ་སོར་སེམས་ཁུར་མི་བྱེད་པའི་སློབ་གསོ་ནི་ཤི་མ་གསོན་གྱི་སློབ་གསོ་ཞིག་རེད།
     སྤྱི་ཚོགས་དང་མི་འཚམ་པའི་སློབ་གསོ་ནི་ཕམ་ཁའི་སློབ་གསོ་ཉག་གཅིག་རེད།
     ལྟ་ཚུལ་མི་འདྲ་བའི་གླེང་མོལ་མེད་ཚེ་སློབ་གསོ་འཕེལ་རྒྱས་ཀྱི་གཞུང་ལམ་ཆད་སོང་བ་རེད།
     སློབ་གསོ་ནི་མི་ནས་མགོ་རྩོམ་པ་དང་མཐར་མིའི་སྟེང་དུ་འབབ་དགོས་པ་མ་ཟད།མིའི་འཚོ་གནས་ཀྱི་ལྡེ་མིག་ཅིག་ཏུ་འགྱུར་རྒྱུ་དེ་རེད།
     གཞི་རིམ་སློབ་གསོས་མི་ཞིག་སྐྱེད་སྲིང་བྱེད་དགོས་ལ།མཐོ་རིམ་སློབ་གསོས་སྤྱི་ཚོགས་ལ་མཁོ་བའི་མི་འཇོན་ཐང་ཅན་ཞིག་སྐྱེད་སྲིང་བྱེད་དགོས་པས།འཇོན་ཐང་ཡོད་མེད་ནི་སྤྱི་ཚོགས་ལ་འཚམ་མིན་གྱི་ལག་ལེན་ལས་ར་འཕྲོད་འབྱུང་བཞིན་ཡོད།
     མི་མིན་ལ་ཡོན་ཏན་ཡོད་པ་ནི་“དེང་རབས་ཀྱི་འདྲེ”དང་།མི་མིན་ལ་ནུས་རྩལ་ཡོད་པ་ནི་“དེང་རབས་ཀྱི་བདུད”།མི་ཡིན་ལ་འཇོན་ནུས་མེད་པ་ནི་དེང་རབས་ཀྱི་“སྡར་མ”རེད།
     མི་ནི་ལྷ་བདུད་གཉིས་ཀྱི་སོ་མཚམས་སུ་གནས་ཤིང་།སློབ་གསོ་ལེགས་ན་མི་“ལྷ་”རུ་འགྱུར་སྲིད་ལ།སློབ་གསོ་ཉེས་ན་མི་“བདུད་”དུ་གཏོང་སྲིད།
     སློབ་མར་ཤ་ཚ་རྒྱུ་ནི་ཆེས་གལ་ཆེ་ལ།སློབ་མར་ཤ་ཚ་ཤེས་རྒྱུ་དེ་བས་ཀྱང་གལ་ཆེ་བ་རེད།
     སློབ་ཁྲིད་ནི་ཕྱིའི་ཚོད་འཛིན་གྱི་ནུས་པ་ཙམ་མ་ཡིན་པར་ནང་གི་བསམ་བློ་དང་སྤོབས་པ་བཅིངས་འགྲོལ་བྱེད་པའི་བྱ་འགུལ་ཞིག་ཡིན།
     མི་གཤིས་བཟང་ངན་གྱིས་མི་ཚེའི་རིན་ཐང་ཧྲིལ་བོ་ཐག་གཅོད་བྱེད་བཞིན་ཡོད།
     མི་སུ་ཞིག་ཡིན་ཡང་མི་གཤིས་དང་ཀུན་སྤྱོད་ཀྱི་བླ་སྲོག་དང་བྲལ་ཚེ་དེ་ནི་འཛམ་གླིང་མཁས་པའི་རྒྱལ་བོ་ཡིན་ཀྱང་ཟོག་གསོབ་ཙམ་ལས་མ་འདས།
     མི་སུ་ཞིག་ཡིན་ཡང་“ལྷ”ཡི་ཆ་དང་།“དུད་འགྲོའི་”ཆ་ངེས་ཅན་ཞིག་ཡོད་པར་མ་ཟད།“བདུད་”ཀྱི་ཆ་དང་“འདྲེ་”ཡི་ཆ་ཡང་ཡོད་ངེས་ཡིན་པས།སློབ་གསོས་“དུད་འགྲོའི་”ཆ་དང་“བདུད་”ཀྱི་ཆ།“འདྲེ”ཡི་ཆ་དེ་མི་ཡི་ཆ་དང་“ལྷ”ཡི་ཆ་རུ་བསྒྱུར་རྒྱུ་དེ་རེད།
     མི་རིགས་སུ་ཞིག་ཡིན་ཀྱང་མིའི་གསར་བཏོད་ཀྱི་ནུས་རྩལ་སྔོག་འདོན་བྱེད་རྒྱུར་མཐོང་ཆེན་བྱས་ཚེ།མི་རིགས་དེ་འཛམ་གླིང་མི་རིགས་དགའ་ཚལ་དུ་ཡལ་འདབ་ཡོངས་སུ་རྒྱས་པའི་མེ་ཏོག་ཅིག་ཏུ་འགྱུར་ཐུབ་ངེས་རེད།
     ང་ཚོས་དུས་ཡུན་རིང་བོའི་ནང་དུ་ཕྱི་རོལ་ཡུལ་གྱི་གཏེར་ཁའི་ཐོན་སྒོ་འབྱེད་པ་ལ་གཙིགས་ཆེན་བྱས་ཡོད་ནའང་།མི་རང་སྟེང་གི་འཇོན་ནུས་གཏེར་ཁ་འདོན་པ་སྣང་མེད་དུ་ལུས་ཡོད་པས།ད་ནས་བཟུང་སྟེ་བྱིས་པའི་འཇོན་ཐང་གི་གཏེར་ཁ་འདོན་པར་དེ་བས་ཀྱང་ཤུགས་སྣོན་བྱེད་དགོས།
     གཞན་བརྟེན་གྱི་ཡིད་ཆས་དེ་རང་བརྟེན་གྱི་ཡིད་ཆེས་ཤིག་ཏུ་འགྱུར་རྒྱུ་ནི་མི་ཚེ་རྒྱལ་ཁའི་ལམ་དུ་བགྲོད་པའི་ནང་ཤུགས་ཐུན་མོང་མ་ཡིན་པ་ཞིག་རེད།
     དགེ་རྒན་གྱི་མར་མེས་སློབ་མ་ལ་འོད་སྣང་སྤྲོ་བ་དང་མཉམ་དུ་སློབ་མའི་མར་མེ་རེ་རེས་ཀྱང་དགེ་རྒན་ལ་འོད་སྣང་སྤྲོ་བཞིན་ཡོད།
     ལྡེ་མིག་གི་ཚད་གཞི་ནི་སྒོ་ལྕགས་ཀྱི་ཟ་འབྱེད་ཐུབ་མིན་གྱིས་གཏན་འཁེལ་བྱེད་པ་ལས།ཟ་འབྱེད་མི་ཐུབ་པའི་ལྡེ་མིག་དེ་གསེར་གྱི་ལྡེ་མིག་ཡིན་ནའང་ལྡེ་མིག་ཚད་ལྡན་ཞིག་ཡིན་མི་སྲིད་པ་ལྟར་སློབ་མའི་སློབ་དེབ་ཀྱི་བཟང་ངན་ཡང་སློབ་མའི་བློ་སྒོ་འབྱེད་ཐུབ་མིན་གྱིས་ཐག་གཅོད་བྱེད་ཐུབ་པ་རེད།
     རང་གི་བྱིས་པ་ལ་ཤ་མི་ཚ་བའི་ཕ་མ་ཆེས་ཉུང་ལ།ཤ་ཚ་ཤེས་པའི་ཕ་བ་དེ་བས་ཀྱང་ཉུང་བ་རེད།
     ཁ་སང་གི་སློབ་གསོ་ནི་དེ་རིང་གི་རྩལ་ནུས་དང་དེ་རིང་གི་རྩལ་ནུས་ནི་སང་ཉིན་གྱི་དཔལ་འབྱོར་ཡིན་སྟབས།དེ་རིང་གི་སློབ་གསོ་མེད་ན་སང་ཉིན་གྱི་དཔལ་འབྱོར་ཡོད་མི་སྲིད་དོ།
     མིའི་སྤུས་ཚད་དང་ནུས་པ་ཡོད་མེད་ནི་མེ་རེ་རེས་མྱངས་པའི་སློབ་གསོ་དེ་མི་རང་ཉིད་ཀྱི་ཁྱད་ཆོས་དང་འཚམ་མིན་གྱི་མཇུག་འབྲས་ཙམ་ཞིག་ཡིན་ཏེ།མིའི་ཁྱད་ཆོས་དང་འཚམ་པའི་སློབ་གསོས་མི་ནུས་མེད་ཅིག་འཇོན་ཐང་ལྡན་པ་ཞིག་ཏུ་གཏོང་ཐུབ་ལ།མིའི་ཁྱད་ཆོས་དང་མི་འཚམ་པའི་སློབ་གསོས་མི་འཇོན་ཐང་ཅན་ཞིག་ནུས་མེད་སྡར་མ་ཞིག་ཏུ་གཏོང་སྲིད།
      རྩོམ་སྒྲིག་འགན་ཁུར་བ་བདེ་ཆེན།