བོད་ཀྱི་ཐོས་བསམ་སྒོམ་གསུམ་གྱི་སློབ་གསོ་བྱེད་ཐབས་སྐོར་ཕྲན་ཙམ་གླེང་བ།2(4)

གཅན་རོང་བསྟན་འཛིན།        2011-08-02


ཞེས་ཐོས་བས་པ་ལ་བཤད་ཡོད་མོད།ངས་བལྟས་ན།སྤྱིར་ཐོས་བསམ་སྒོམ་གསུམ་གྱི་བྱེ་བྲག་གི་སློབ་གསོ་བྱེད་ཐབས་གང་ཞིག་ཡིན་ཀྱང་།གང་ཞིག་གཙོ་གཞི་དང་གང་ཞིག་ཟུར་རྒྱན་ཡིན་མིན་གྱི་ཆ་ནས་མི་འདྲ་བ་ཙམ་ལས་ཐོས་པའི་སློབ་གསོ་ཡིན་ལ་བསམ་པའི་སློབ་གསོ་གཏན་ནས་མ་འདྲེས་པ་ཞིག་མེད་པས།བྱེ་བྲག་གི་ཤེས་བྱའི་གནས་མི་འདྲ་བ་དང་།སློབ་གསོ་བྱེད་ཡུལ་མི་འདྲ་བའི་དབང་གིས་སློབ་གསོ་བྱེད་ཐབས་མི་འདྲ་བ་བེད་སྤྱོད་དགོས་ལ།སློབ་གསོ་བྱེད་ཐབས་མི་འདྲ་བ་དེ་དག་ཇི་ལྟར་བེད་སྤྱོད་བྱེད་རྒྱུ་ནི་སློབ་གསོ་བྱ་ཡུལ་གྱི་སློབ་མའི་ཁྱད་ཆོས་དང་སྤྱི་ཚོགས་ལ་ཇི་ལྟ་བུའི་འཇོན་མི་ཞིག་སྐྱེད་སྲིང་བྱེད་རྒྱུ་དེ་དག་གིས་ཐག་གཅོད་དགོས་པ་རེད།འོན་ཀྱང་གནའ་རབས་ཀྱི་སློབ་གསོ་དེ་དག་མྱང་བར་ལ་བརྟེན་ནས“མཁས་པ”ཆེ་འབྲིང་ཆུང་སགུམ་དང་།“གྲུབ་པ་བ”ཆེ་འབྲིང་ཆུང་གསུམ།སྤྱོད་པ་རྣམ་པ་སྣ་ཚོགས་ཀྱི་འཇོན་མི་བྱུང་ཡོད་ན་ཡང་།འདས་པའི་སྤྱི་ཚོགས་ལ་ཤན་ཤུགས་ཆེས་ཆེ་བ་ནི“མཁས་བཙུན་བཟང་གསུམ”དང་“མཁས་གྲུབ་ཉིས་འཛོམས་”ཀྱི་འཇོན་མི་དེ་དག་རེད།དོན་ངོ་མས་བཤད་ན་འཇོན་མི་དེ་དག་ལ་རིག་གནས་ཀྱི་སྤུས་ཚད་འཛོམས་པ་ཡོད་པ་མ་ཟད།ད་དུང་རིག་གནས་དེ་དག་རང་གི་བསམ་བློ་ཞིག་དང་རང་གི་ནུས་པ་ཞིག་རང་གི་ཀུན་སྤྱོད་ཅིག་ཏུ་གྲུབ་པས།ཤེས་ནུས་རྩལ་གསུམ་དང་ཤེས་ནུས་སྤྱོད་གསུམ་འཛོམས་པའི་འཇོན་མི་ཕུན་སུམ་ཚོགས་པ་ཞིག་ཆགས་ལ།འཇོན་མི་དེ་དག་གིས་སྤྱི་ཚོགས་ལ་དངོས་དང་བརྒྱུད་དེ་ཤན་ཤུགས་ཐེབས་ཚད་མཐོ་བས།འཇོན་མི་དེ་དག་ལ་ཚང་མས་གདེང་འཇོག་ཚད་མཐོན་པོ་བྱས་མྱོང་ཡོད་ན་ཡང་།ཆེས་ཡིད་ཕངས་པ་ཞིག་ནི“མཁས་བཙུན་བཟང་གསུམ”སྐྱེད་སྲིང་བྱེད་པའི་ཐོས་བསམ་སྒོམ་གསུམ་གྱི་སློབ་གསོ་བྱེད་ཐབས་ལ་གཙིགས་ཆེན་མ་བྱས་པའི་དབང་གིས“མཁས་བཙུན་བཟང་གསུམ”གྱི་འཇོན་མི་ཇེ་ཉུང་ནས་ཇེ་ཉུང་དུ་གྱུར་པ་རེད་སྙམ།འཇོན་མི་དེ་དག་ནི་ཐོས་བསམ་སྒོམ་གསུམ་ཡ་མ་བྲལ་བའི་སློབ་གསོ་ལས་ཐོན་པ་ཤ་སྟག་ཡིན་པས།སློབ་གསོ་བྱེད་ཐབས་འདི་དག་ལ་བསམ་གཞིགས་དང་ཞིབ་འཇུག་བྱེད་རྒྱུ་ནི་བོད་ཀྱི་སློབ་གསོ་འཕེལ་རྒྱས་ཀྱི་ལམ་གསར་བ་ཞིག་རེད་སྙམ་མོ།།(རྩོམ་སྒྲིག་པ་བདེ་ཆེན་དབང་མོ།)
  • ལེ་ཚན་སྔོན་མ།:བོད་ཀྱི་ཐོས་བསམ་སྒོམ་གསུམ་གྱི་སློབ་གསོ་བྱེད་ཐབས་སྐོར་ཕྲན་ཙམ་གླེང་བ།1
  • ལེ་ཚན་རྗེས་མ།:རྗེས་ལུས་སློབ་མ་སྐྱོང་ཐབས་རོབ་ཙམ་གླེང་བ།
  • དོ་སྣང་ཆེ་བའི་རྩོམ།