སོགས་བཤད་བཞིན་ཡོད་ནའང་།ཆེས་ཡ་མཚར་བ་ཞིག་ནི་སློབ་མས་འབྲི་དེབ་ཀྱི་སྟེང་དུ་དགེ་རྒན་གྱིས་བཤད་པའི་སྐད་ཆ་དེ་དག་བྲིས་ཚེ།དགེ་རྒན་གྱིས་ཚ་དམར་པོས་འཕྱུག་རྟགས་བརྒྱབ་ཡོད་པ་རེད།སློབ་གྲོགས་མང་ཆེ་བ་ཞིག་ལ་ཚ་རྟགས་དེ་ཇི་ལྟར་བྱུང་བ་ཡིན་ནམ་ཞེས་དྲིས་ན་སློབ་མ་དེ་དག་གིས་འུན་…འུན…ཞེས་དགེ་རྒན་གྱིས་སློབ་ཁྲིད་སྐབས་སུ་དེ་ལྟར་བཤད་བཞིན་ཡོད་ཅེས་པ་ཙམ་ལས་ལན་འདེབས་རྒྱུ་ཅི་ཡང་མི་འདུག་པས།དོན་དངོས་སུ་ལུང་སྐད་དང་འདྲེས་སྐད་ཀྱིས་སློབ་མའི་སྤུས་ཚད་འཕེལ་རྒྱས་ལ་ཤན་ཤུགས་ཚབས་ཆེན་ཐེབས་བཞིན་ཡོད་པ་རེད།
དགེ་རྒན་སུ་ཞིག་ཡིན་ཡང་སློབ་མ་ལ་ཚད་ལྡན་གྱི་སྐད་ཆས་སློབ་ཁྲིད་བྱེད་རྒྱུ་ནི་སློབ་མའི་བསླབ་འབྲས་འཕེལ་རྒྱས་ཀྱི་ཐབས་ལམ་གལ་ཆེན་ཞིག་ཡིན་པ་མ་ཟད།སློབ་གསོ་འདྲ་མཉམ་གྱི་གཞི་འཛིན་ས་ཞིག་ཀྱང་ཡིན་ཏེ།དཔེར་ན།སློབ་གྲོགས་བཀྲ་ཤིས་ཀྱིས་ཚད་ལྡན་གྱི་སྐད་ཆའི་སློབ་ཁྲིད་མྱོང་བཞིན་ཡོད་པ་དང་།སློབ་གྲོགས་ཕུན་ཚོགས་ལ་ལུང་སྐད་དང་འདྲེས་མའི་སྐད་ཀྱི་སློབ་ཁྲིད་ཐོབ་བཞིན་ཡོད་པ་གཉིས་བསྡུར་ན།སློབ་གྲོགས་དེ་གཉིས་ལ་ཐོབ་པའི་ཤེས་བྱའི་སྤུས་ཚད་འདྲ་མི་སྲིད་ལ།ཁྱད་པར་དུ་སློབ་གྲོགས་དེ་གཉིས་ལ་ཐོབ་པའི་སྐད་ཆའི་སྤུས་ཚད་གཏན་ནས་འདྲ་མི་སྲིད་པ་མངོན་སུམ་གྱིས་ཤེས་ནུས་པ་ལྟ་བུ་རེད།
དེ་བས།སྐད་ཆ་ནི་སློབ་གསོའི་ཐོག་མའི་རྨང་རྡོ་རེད་ལ།ཚད་ལྡན་གྱི་སྐད་ཆའི་སློབ་གསོ་ནི་སློབ་གསོའི་རྨང་རྡོ་ཡིན་པས།“རྨང་རྡོ་གཉིས”ལ་ངོས་འཛིན་དང་གཙིགས་ཆེན་བྱས་མིན་གྱི་དབང་གིས་བྱིས་པའི་མི་ཚེའི་རྨང་གཞི་ཐག་གཅོད་བྱེད་བཞིན་ཡོད་ནའང་།ཁྱིམ་བདག་ལྟ་ཞོག་དགེ་རྒན་གང་མང་ཞིག་གིས་ཀྱང་ད་དུང་བྱིས་པས་སྐད་ཆ་བཤད་ཤེས་མིན་ནས་“ཙེ་ནད（再见）དང་།”“པེ་པེ（拜拜）”ནས་བཟུང་སྟེ་སྐད་ཆ་འདྲེས་མའི་མགོ་རྩོམ་བཞིན་ཡོད་པ་ལྟ་བུ་རེད།（རྩོམ་སྒྲིག་པ་བདེ་ཆེན་དབང་མོ།）