མགོ་བོ་ཡར་ལ་དགྱེས་ཏེ།།

རེ་བའི་འོད་སྣང་འཚོལ་དུས།།

དཀར་གསལ་འོད་མདངས་བཀྲ་བའི། །

ཟླ་བ་ཡིན་ན་བསམ་བྱུང་།།

ག་ས་གང་ལ་འཕུར་བའི།།

གསུང་སྐད་ངག་ལ་འབྱིན་པའི།།

ཚང་མལ་སྙེགས་ལ་བྲེལ་བའི།།

བྱེའུ་ཆུང་ཡིན་ན་བསམ་བྱུང་།།

ནངས་མོ་སྔ་ལས་ལངས་ཏེ།།

ཞོགས་པའི་མཚམས་སྤྲིན་མཐོང་ཚེ།།

ས་གཞིར་འོད་སྣང་སྟེར་བའི།།

ཉི་མ་ཡིན་ན་བསམ་བྱུང་།།

མུན་པའི་སྨག་ལ་བཏེགས་པའི།།

ལྷིང་འཇགས་རི་གྲོང་ཁོར་ཡུག །

ཁྲ་ཆུང་མིག་གིས་འཚོ་དུས། །

སྐར་ཚོགས་ཡིན་ན་བསམ་བྱུང་།།

དཔྱིད་ཀྱི་ནམ་མཁའ་དྭངས་མོ།།

བོད་ཡུལ་ཕྱོགས་སུ་འཕུར་ཏེ།།

གསུང་དབྱངས་འགྱུར་ཁུག་སྙན་པའི།།

ཁུ་བྱུག་ཡིན་ན་བསམ་བྱུང་།།

འཛམ་གླིང་མཛེས་པའི་ལྟད་མོ།།

མིག་གི་རྒྱལ་མོར་བླངས་ནས།།

རིགས་དྲུག་སྐོམ་གདུང་སེལ་བའི།།

ཆུ་ཕྲན་ཡིན་ན་བསམ་བྱུང་།།

རྩི་ལྗང་གཉིད་ལས་སྐྲོག་བྱེད།།

ལྷ་ལམ་སྤྲིན་གྱི་མེ་ཏོག།

ས་གཞི་བྱི་དོར་བྱེད་པའི།།

སྦྲང་ཆར་ཡིན་ན་བསམ་བྱུང་།།

ཡངས་པའི་མཐོན་མཐིང་ངོས་སུ།།

སྤྲིན་ཚོགས་མང་པོ་ལྡིང་དུས།།

མི་རྣམས་ཞེན་ཆགས་སྟེར་བའི།།

འཇའ་མཚོན་ཡིན་ན་བསམ་བྱུང་།།

རིགས་དྲུག་གང་གི་མགྲོན་པོ།།

མ་ངེས་གཅིག་ཏུ་བསྡུས་པའི།།

ལྷན་འཛོམས་གཞིས་ཁྱིམ་མོ། །

བདེ་སྐྱིད་དགོད་སྒྲས་བསུས་ཡོད། །

རྩོམ་པ་པོ། སི་བོད་སློབ་གྲྭ། ཚུལ་ཁྲིམས་བཟང་མོ།（22.6）

རྩོམ་སྒྲིག་པ། མགར་རྒྱལ་སྲས།