ཚངས་སྲས་པི་ཝང་འདབ་མར་རབ་བརྐམས་ནས། །

བདག་གིས་ཚེ་རབས་སྔོན་ནས་བསྒྲུབས་པའི་ལྷ། །

རྒྱལ་ཀུན་འཕྲིན་ལས་ཀུན་སྩོལ་མཆོག་གྱུར་མ། །

བདག་སྙིང་པདྨའི་གདན་ལ་བཞུགས་རོགས་མཛོད། །

མཐོན་མཐིང་སྤྲིན་གྱི་ཟུར་ཕུད་གཡོ་བའི་རྩེར། །

ཐུགས་རྗེའི་སྦྲང་ཆར་བྱིན་རླབས་འབུམ་འཇོ་བ། །

ལྷ་མོ་ཁྱེད་རང་རྟག་ཏུ་གསོལ་ནས་ནི། །

རིག་པའི་ཀླུང་ཆེན་ཆུ་བོ་དྲག་ཏུ་འབབ། །

ཞལ་ཁྱིམ་ཟླུམ་རྒྱས་བི་ཤྭ་ཀརྨ་ཡིས། །

བཞེངས་ལེགས་མཆོད་པའི་རི་མོར་བཤམས་འདྲ་བ། །

དྲི་ཟའི་ན་ཆུང་སྒྱུ་མའི་རོལ་རྩེད་མ། །

ཁྱོད་ཞལ་མཛེས་སྡུག་གཞན་གྱིས་བསྒྲུན་དུ་མེད། །

རབ་མཛེས་དུ་ཀཱུ་ལ་ཡི་གོས་བཟང་གིས། །

བཀླུབས་འདྲའི་ཚངས་སྲས་ངག་གི་འདོད་འཇོ་མ། །

དགེ་ལེགས་བྱེ་བའི་འོད་སྣང་ཉི་ཤར་བརྒྱ། །

མཁྱེན་བརྩེའི་རི་ནས་འཛུམ་པ་བསྙོན་དུ་མེད། །

དུས་ཀུན་བྱམས་དང་སྙིང་རྗེའི་སྤྲིན་དཀར་ལྡིང་། །

བརྩོན་པའི་བུ་ལ་ཤེས་རབ་གཤོག་ཟུང་སྤྲད། །

ཤིས་པ་ཀུན་སྩོལ་ངག་གི་དབང་ཕྱུག་མ། །

དད་གསུམ་རྒྱ་མཆོའི་ཀློང་ན་རྣམ་པར་འགྱིང་། །

བདག་བློ་མ་རིག་རྨོངས་པས་ཁྱབ་པ་ན། །

སེམས་ཀྱི་མཁའ་ལ་ཉ་གང་ཟླ་བ་བཞིན། །

གསལ་མཛད་མཆོག་གི་གཏེར་སྦྱིན་དབྱངས་ཅན་མ། །

ལེགས་ཚོགས་སྒོ་བརྒྱ་འབྱེད་པའི་གཉེན་དུ་བྱོན། །

བརྒལ་བརྟག་ལུང་རིགས་རྩོད་པའི་ཕ་མཐའ་ན། །

ཕས་རྒོལ་བྱེ་མར་འཐག་པའི་བར་སྐབས་སུ། །

བརྗིད་ལྡན་གངས་ཀྱི་གདོང་ལྔའི་སྒྲ་དབྱངས་ལ། །

དགྱེས་འཛུམ་དྲེགས་པའི་རལ་བ་ཁྱེད་ཀྱིས་བསྩལ། །

ཉི་ཟླའི་རྣ་ཏོག་རི་བོའི་གདོང་ཟུར་དུ། །

བསྣམས་པའི་གངས་དཀར་རི་ཡི་ཁྱོན་ཡོངས་སུ། །

བདེར་གཤེགས་རྟོགས་བརྗོད་གླུ་རུ་བཞེངས་ལེགས་པ། །

དབེན་གནས་རྣལ་འབྱོར་དག་གིས་ཁྱེད་ཉིད་མཆོད། །

འོག་མིན་སྟུག་པོའི་ཞིང་ཁམས་གཉིས་པ་ཞེས། །

རབ་མཛེས་ནོར་བུའི་ཕོ་བྲང་གསེར་འོད་ཅན། །

ཆོས་བརྩིགས་གླེགས་བམ་རི་ལྟར་སྤུངས་པའི་དབུས། །

ཁྲིམས་ལྡན་ངུར་སྨྲིག་བྱེ་བས་ཁྱེད་ཉིད་བསྟོད། །

སྐབས་གསུམ་དྲི་ཟའི་དགའ་ཚལ་འདི་འོ་ཞེས། །

རིག་གཞུང་པདྨའི་སྦྲང་རྩི་འཐུང་བར་གོམས། །

ལྔ་རིག་སློབ་གླིང་ཤེས་བྱའི་ནགས་ཀླུང་ན། །

མགྲིན་ངག་དབྱངས་ཀྱི་ལྷ་མོ་ཁུ་བྱུག་བཞིན། །

རྡུལ་བརྩེགས་ཤེལ་དཀར་ལྷུན་པོའི་འགྱིང་བག་གིས། །

རྔམ་བརྗིད་མཁས་པའི་དྲེགས་པ་འབར་བྱེད་ཅིང་། །

དཔྱོད་ལྡན་ཡིད་དབང་རྩོམ་ལ་དབང་འབྱོར་བ། །

སྙན་ངག་སྨྲ་བ་དག་གིས་ཁྱེད་ཉིད་གླེང་། །

ཤེས་རིག་མར་གྱི་འོད་ཞག་གཞིབ་པ་དང་། །

སྙན་ཚིག་ཟླ་ཤེལ་ཕུང་པོ་བསྐྲུན་པ་ལ། །

ལྷ་མོ་ཁྱེད་ནི་འདོད་འཇོའི་ཏོག་ཏུ་ལྷམ། །

མཁྱེན་ཡངས་ཤིས་པ་སྒྲུབ་པའི་གྲོགས་སུ་བསྡེབས། །

རྨ་བྱའི་གཙུག་ཏོར་བཞིན་དུ་དཔག་དཀའ་བའི། །

མཚན་ལྡན་བཤེས་གཉེན་ཤེས་རབ་གཙུག་ཕུད་ཅན། །

ཞབས་པད་འཕྲིན་ལས་བསམ་མི་ཁྱབ་པ་ལ། །

དངོས་གྲུབ་ཀུན་སྩོལ་ལྷ་མོ་དཔུང་དུ་བྱོན། །

དེ་བས་ཀ་ཁ་སློབ་པའི་ན་ཆུང་དང་། །

བཤེས་གཉེན་རབ་འབྱམས་གཞུང་ལ་ཐོགས་མེད་བར། །

མཆོག་དམན་བར་མ་ཀུན་གྱིས་ཁྱེད་ཉིད་བཀུར། །

བློ་གྲོས་སྣང་བའི་གཏེར་མཛོད་མཚོ་བྱུང་མ། །

ལྡོངས་མེད་ཤེས་རབ་སྤྱན་ཟུང་འབྱེད་པ་ལ། །

ཐུགས་རྗེའི་འོད་ཞགས་འཕྲུལ་གྱི་དགེ་ལེགས་ཀྱིས། །

ཤེས་བྱ་རྒྱུ་སྐར་བཀྲ་བཞིན་མཐོང་གྱུར་ནས། །

རྒྱ་ཆེན་གཞུང་ལུགས་བཀྲལ་ལ་བསྙེངས་བྲལ་ཤོག །

ཕ་མེས་རིག་གཞུང་འཆི་མེད་བདུད་རྩིའི་བཅུད། །

གངས་ཀྱི་རི་ལ་སེང་གེའི་འོ་མ་བཞིན། །

རིན་བྲལ་ནོར་བུར་བསྒོམས་ནས་གཅེས་པ་ལ། །

བྱིན་རླབས་མཚོ་ལྟར་འཁྱིལ་བའི་དགེ་ལེགས་མཛོད། །