བློ་བཟང་ཚེ་རིང་（ཨ་ཁུ་སྟོན་པ）ནི་ལོ་རབས་བཞི་བཅུ་དང་ལྔ་བཅུའི་ནང་ལྷ་མོ་སོགས་ཀྱི་སྒྱུ་རྩལ་བྱང་ཆུབ་པའི་གྲགས་ཅན་ཞིག་རེད།ཁོང་འཕན་པོ་རྒྱལ་ལྷ་ཁང་གྲོང་ཚོའི་ཤར་མ་ཞེས་པའི་ཞིང་པའི་ཁྱིམ་ཚང་ཞིག་ལ་སྐྱེས་པ་དང་།ཆུང་དུས་ནས་གཟུགས་བྱད་ལེགས་ལ་སྤྱང་གྲུང་འཛོམས་པ།གྲུང་ཤ་དོད་ལ་དྲན་རྒྱུ་རྒོད་པ།རྩེད་མོར་དགའ་བ།གཞས་དང་ཞབས་བྲོར་དགའ་ཞིང་གཞས་ཚིག་སྣ་ཚོགས་སྐྱེས་སྟོབས་ཀྱིས་འཕྲལ་མར་བཟོ་ཐུབ་པ།མི་གཞན་ལ་སྤྱང་གྲུང་སློབ་མཁས་པ་སོགས་ལ་བརྟེན་ཡུལ་མི་ཚོས་སྔོན་གྱི་ཨ་ཁུ་སྟོན་པ་དང་འདྲ་བས་ཨ་ཁུ་སྟོན་པ་ཞེས་མིང་བཏགས་པ་དེ་རྗེས་སུ་ཡོངས་གྲགས་སུ་གྱུར།རབ་བྱུང་བཅུ་དྲུག་པའི་མེ་ཕག（༡༩༤༧）ལོར་ར་སྟག་དོན་རྐྱེན་ནང་རྭ་སྒྲེང་ལ་ཇུས་ཉེས་བྱུང་རྗེས་བོད་ས་གནས་སྲིད་གཞུང་ནས་ཨ་ཁུ་སྟོན་པ་ལྷ་སའི་སྐྱོར་མོ་ལུང་ལྷ་མོ་ཚོགས་པའི་ནང་བཅུག ཨ་ཁུ་སྟོན་པས་ལྷ་མོ་ཚོགས་པའི་རྒྱ་ལུ་རྒན་པ་དང་འཁྲབ་ཚན་ནང་གི་མི་སྣ་གཙོ་བོ་འགའ་ཞིག་འཁྲབ་སྟོན་བྱེད་ཅིང་།ཁོང་གི་སྐད་གདངས་ཧ་ཅང་སྙན་ལ་རྣམ་ཐར་གྱི་མགྲིན་འགུག་ལེགས་པ།ཕོ་འཁྲབ་མོ་འཁྲབ་གང་ཡིན་ཡང་ལུས་ཀྱི་འཁྱེར་བཟོ་དང་།རྐང་ལག་སྟངས་སྟབས།དགའ་སྐྱོ་ཁྲོ་གསུམ་གྱི་རྣམ་འགྱུར།འཁྲབ་བྱ་གང་ཡིན་དེའི་ཉམས་འགྱུར་དང་རྣམ་ཐར་ཚིག་གདངས་སོགས་ལ་དམིགས་བསལ་གྱི་ཁྱད་ཆོས་ལྡན་པས་ནོར་བུ་གླིང་ཀའི་ཞོ་སྟོན་སོགས་ཀྱི་སྐབས་ཨ་ཁུ་སྟོན་པས་རྣམ་ཐར་གཏོང་སྐབས་ལྟད་མོ་བ་ཚོས་ཀྱང་ཟབ་ནན་གྱིས་ཉན་གྱི་ཡོད།དམངས་གཙོའི་བཅོས་སྒྱུར་རྗེས་ཕ་ཡུལ་དུ་ལྷ་མོ་ཚོགས་པ་བཙུགས་ནས་འཁྲབ་སྟོན་བྱས་པ་དང་།རིག་གནས་གསར་བརྗེའི་ནང་ཁོང་ལ་རྡུང་རྡེག་ཕོག་ནས༡༩༧༠ལོ་ཙམ་ལ་ངལ་རྩོལ་སྒྱུར་བཀོད་ཁོངས་སུ་གྲོངས།།